من الحياة: حماتي بتغير مني لدرجة انها ادام جوزي بتعملني احسن معاملة ومن وراه بتهني جامد

حماتي بتغير مني لدرجة انها ادام جوزي بتعملني احسن معاملة ومن وراه بتهني جامد
انا مشكلتى بجد مش لاقيالها حل ونفسي تساعدوني
كل مشكلتى حماتى بتغير مني على ابنها بطريقة بشعة الحكاية ابتدت من اول جوازنا سافرنا شهر العسل وكنا متفقين هيبقا اسبوعين وعاملين حسابنا على كدة لقيتها من اول يوم وصلنا كانت كل شوية تكلم جوزى ولازم تعرف خط سيرنا وعملنا ايه بالظبط قلت مش مشكلة واكبر دماغى لقيتها بعد تلات ايام بالظبط اتصلت بيه وقعدت تعيطله فى التليفون وقلقته عليها مرضيتش تقوله فى ايه طبعا قل
قنا ولمينا شنطنا ونزلنا على مصر جرى عشان نعرف ايه المصيبة الشنيعة دى لقتها بتقابلنا بابتسامة وبتقوله اصلك كنت واحشنى وكنت قلقانة عليك !!!!!! قلت مش مشكلة بردو واكبر دماغى يمكن هى خايفة لحسن اخد ابنها منها ودى ام بردو ولازم اقدر وانا اكيد فى يوم من الايام هبقا فى مكانها فلازم اراعيها ومعملش مشكلة وكتمت فى نفسي ومحسستش جوزى انى متضايقة وحاول يراضيني ويخرجنى لما جينا بيتنا وطبعا تليفونها يوميا بردو لازم تعرف عملنا ايه وخط سيرنا ايه ولما تعرف انه خرجنى تبقا القيامة قامت تتصل بيا على موبايلي وتهزأنى بابشع كلام ممكن واحدة تستحمله وتقولى مش تخافى على جوزك ولا قرش جوزك انتى معندكيش دم كل يوم عاوزة تدورى على حل شعرك معاه !!! وانا والله كنت بسمع كلامها ده واكتم فى نفسي واحاول اهديها عشان حتى ابنها ميحسش ان فى مشكلة بيني وبين مامته وارضيها لقيتها بعدها على طول راحت مكلماه وقالتله تعالى اقعد معايا كام يوم عشان تعبانة ومحتاجة لك راح قالى هنروح نقعد مع اهلى كام يوم تغييير جو ونرجع تانى لحسن ماما شكلها تعبانة طول ما احنا هناك بقا قدام جوزى وباباه واخواته بتعاملنى احسن معاملة هما يخرجو من هنا اشوف كمية اهانة عمرى ما شفتها وكلام بجد جارح انتى ليه تنامى جنب جوزك وانتو هنا !! نامى جنب اخت من اخواته ولا هو حبك تتلزقى فيه !! مش تراعى ان له اخوات بنات !! وسكتت وكتمت فى نفسي لان انا طبعى للاسف هادية وكتومة ومبعرفش ارد على حد وبردو قلت اراعى انها فى مقام والدتى .. طول ما احنا هناك كنت بحاول ارضيها بكل الطرق مبقتش اقعد جنب جوزى وهى قعدة عشان متغيرش ولا بقيت انام جنبه عشان مضايقهاش وواحنا هناك هى تعبت اوى بقيت انا اللى بخدمها ووالله من نفسي من غير ما حد يطلب منى عشان كمان بناتها قلبهم جامد اوى عليها وهى فعلا صعبت عليا لدرجة مكنتش بخليها تقوم تجيب لنفسها كوباية ماية واكلها كنت بجبهولها لحد السرير وبعد ما خفت مقدرتليش حتى الكلام ده كله ورجعت تانى لنفس معاملتها معايا وقلت اجى على نفسي هما يومين اللى قعدينهم وهنروح بيتنا مع العلم ان الكلام ده كله فى تانى اسبوع فى جوازنا .. المهم جوزى اجازة شهر من شغله وراجع تانى ومش هييجي الا بعد6 شهور طبعا عدى اسبوعين من الشهر اللى قعده عند مامته وقلت مش مشكلة وروحنا بيتنا كل يوم مكالمة كالعادة عملتلك اكل ايه فطرتك ايه غدتك ايه غسلتلك هدومك ولا لا وهو كان بيقولها وبعدين تكلمنى وتقولى هو ده الاكل الى عملتيهوله ده اللى قدرتى عليه !! كنت اقولها معلش بقا ياماما وانا هاجى ايه جنب اكلك واحاول اهزر معاها وردودها واقفة معايا .. انا طول عمرى اكتر حاجة اكرهها فى حياتى كلها ان حد يتدخل ف حياتى وحاولت افهم جوزى الكلام ده كان بيهاودني ويراضيني ويقولى انا عارف انى مقصر فى حقك بس سامحيني انا دى امى بردو واستحملى شوية والاقيه بردو يقولها على كل حاجة ويقولى معلش عشان متزعلش واقول مش مشكلة
المهم بقا قبل ما يسافر قعدت تقوله مراتك شكلها فيها عيب ولسة مبنش عليها اى بشاير للحمل وانا كانت تقولى ادام عيلتهم تبقا عازمانا كلنا وتحرجنى ادامهم وتقولى ما تروحى تكشفى وتشوفى فيكي ايه ده فلانة قبل ما يعدي شهر على جوازها عرفنا انها حامل .. بجد كنت ببقا كاتمة الدمعة فى عنيا وبردو مبشتكيش .. بعد ما جوزى سافر عرفت انى حامل وكنت بجد طايرة من الفرحة وكلمته وقلتله وفرح اوي هى اول ما كلمتها وقلتلها كلمته ومحكمة رأيها انى لازم لما اولد ارجع من المستشفى عليها عشان هى اللى تربي العيل !! طبعا ماما اتضايقت وكلمتها وقالتلها ان مينفعش كدة ولازم الواحدة امها تبقا جنبها لكن لاحياة لمن تنادى .. انا دلوقتى فى الخامس ولغاية دلوقتى ضغطى عالى من كتر الزعل اللى انا فيه لانى مش قادرة احكى لحد على كل اللى حصل معايا ولا اللى بيحصل كل يوم منها .. وفوجئت بالصدفة من اخته ان جوزى بعتلها فلوس الولادة وانا بيبعتلى مصروفى وخلاص وهو مقاليش مع العلم انى لما اشتكيتله انى متضايقة من مكالمتها لماما وانى مش حابة اما اولد اروح عندها قالى ميهمكيش وانا هعملك اللى يريحك وهو دلوقتى مخبي عليا حكاية مصاريف الولادة دى اللى بعتهالها ومش عارفة اقوله ازاى ولا عارفة ازاى ابعده عن تحكمات مامته
انا بجد تعبت ومش عارفة اعمل ايه انا كل اللى حصلى ده استحملته عشان بحبه وواخدين بعض عن قصة حب وعشان هو معاملته كويسة اوى معايا وعمره ما غلط فيا بس بجد تعبت من تحكمات مامته بجد وصلتنى لدرجة انى بدعى على نفسي فى كل صلاة ان ربنا ياخدنى ويريحها ويرحينى