أهان كرامتي وجرحني كتير وهاموت ويرجع لي

[أنا بحبه أوي وعايزاه يرجع لي ومايبعدش عني]
أنا بحبه أوي وعايزاه يرجع لي ومايبعدش عني
السلام عليكم ورحمة الله وبركاته.. أنا عندي مشكلة مش عارفة أحلها إزاي وأرد كرامتي، أنا بنت بحب واحد من 6 سنين، بس أول ما اتعرفت عليه كانت معرفة تليفون.

وبعدها هو حب واحدة كانت معاه في الشغل، واتصل بيّ بعد 3 سنين وجرحني وعايرني بشكلي، وكان دايما برضه على اتصال بيّ على طول، وبعد ما سيبنا بعض بسنة ونص سابها وحب بنت عمه وهي ساكنة أمامه، وكانت شاغلاه أوي وحبها أوي واتعلق بيها وقعد معاها 4 شهور، وهي مش محترمة واعترف لي بكده.

هو وأهله شافوها راكبة عربية ورايحة مع صاحبه وحاجات كتير، وبعد ده أنا من كتر حبي ليه كنت دايما على اتصال بيه؛ مع إن في كل مكالمة كان بيجرحني فيها، وقلت له إن أنا بحبه وعايزاه يرجع لي، قام شافني تاني، بس هو لسه محتفظ بصورتها، وهو لما شافني كان سايبها، ووعدني إن هو عمره ما هايجرحني، وإن هو بيحبني، وقطّع صورتها قدامي، وبرضه كان بيتصل بيها، وكان عايزاها ترجع له علشان بيحبها بجنون، مع أنه كان بيقنعني إن هو نسيها، وإن عمره ما هيرجع لها.

وقعدنا مع بعض سنة ونص وكان بيقول لي إن هو بيحبني؛ علشان خاطر مامته هي بتحبني، وكنت كل ما أزعله ويكون هو اللي غلطان أو أنا اللي غلطانة كان بيصالحني، بس وهو بيناديني بيتلخبط في اسمي ويقول اسمها يقول لي لما بيقف معاها بيحن لأيامها وكنت في فرح أخته عينه ماكنتش بتنزل من عليها وهي كمان بتحبه وهو مش بيقدرني ولا بيعمل لي اعتبار.

وكنت باخرج معاه وكنا زي أي اتنين بيحبوا بعض وأنا تعبت من سيرتها وجرحه ليّ وكنت كل شوية أنا باجيب في سيرتها وكنت باقول له انت كنت بتعمل معاها إيه كنت بتحبه يعني، أنا عارفة إني غلطانة لأن مايصحش إن أجيب سيرة الماضي وآخر مرة قولت له مايكلمهاش هي اتصلت بيه وعيطت وقالت له أنا بحبك وعايزاك وكلمها وقال لها أنا كمان كنت بحبك أوي بس انتي اللي خليتيني آخد واحدة تانية وكفاية إن هي بتسمع كلامي ومحترمة.

وكنت بحب إن هو واخدني عشان يحسسها إن هي تندم عليه وأنا سيبته 3 شهور وبردو كان بيكلمها وكان بيتصل بيّ يتحايل عليّ عشان أرجع له وأنا كنت بارفض جيت يوم عيد الأم كنت بتصل بيه عشان ينزل من الجيش ويجي معايا عند والدته وبهزر معاه وبقول له أنا اتخطبت ومبروك لرجعوك لبنت عمك عشان كان قابلها بيومين في فرح أختها وأهزر معاها وآخد منها الدبلة بتعاتها وهي تاخد منه الساعة بتاعته وبقول له ماتنساش تكتب عليها اسمها زي ما كنت كاتب على الدبلة بتاعتي اللي انت راميتها..

رد عليّ في رسالة اكتب عليه طول العمر وانتي الصديقة رديت وقلت له ما هي دي اللي تليق بيك قال لي طبعا هي دي اللي تليق بيّ على الأقل مابستهاش ماحضنتهاش وماحطتش إيدي على جسمها وشتمني شاتيم زبالة أوي قولت له ما هي دي اللي تليق بيك عشان ليك ولاغيرك ورديت الشتيمة عليه ومن ساعة الموضوع ده ماكلمنيش خالص بقاله 18 يوم.

أنا بحبه أوي أعمل إيه؟؟ أنا عايزاه مايبعدش عني ويرجع لي، ومش عارفة هو رجع لها تاني ولا إيه؟! سكوته هايموتني مع أنه كمان بيعايرني بأهلي وعلشان باشتغل.. أعمل إيه يا ريت تردوا عليّ؟ وأنا من قبل مايشتمني أنا فعلا كنت باشتم على بنت عمه، وكنت باجرحه بيها على طول، وكمان كنت باغيظه، وكانت نهاية كرامته معايا، وهو استحملني كتير.. أنا مش عارفة أنا بحبه ولا إيه؟!! تنصحوني أعمل إيه.. يا ريت الرد بسرعة.

loly_000000

مش عارفة إذا كنتي فعلا مقتنعة وإنتي بتقولي إنك بتحبيه وإنه بيحبك، أو كان بيحبك وبعد كده راح يحب بنت عمه، ومش عارفة لو كنتي صديقتي العزيزة تعرفي المعنى الحقيقي للحب.

صدقيني مش قصدي إني أوجّه لك أي إهانة وأنا باقول لك إنك ما تعرفيش المعنى الحقيقي للحب؛ ولكن هي دي الحقيقة، لأن الحب الحقيقي أصحابه مايعرفوش يجرحوا كرامة الشخص اللي بيحبوه بالبساطة اللي بتتكلمي بها.

إنتي بتقولي إنك كنتي بتجرحيه دايما ببنت عمه، وعلاقته بها وكلامك عليها، وهو كان بيجرحك دايما ومن بداية العلاقة سواء بشكلك أو بأهلك أو بالأخطاء اللي وقعتوا فيها سوا، وكل ده معناه إن اللي بينكم ماكانش حب من الأساس لكن كان مجرد احتياج، يعني احتياج منك إنك ترتبطي زي كل البنات اللي بتعرفيهم، حتى لو بتتعذبي، ولكن لمجرد إنك تلاقي حكاية تتكلمي فيها مع أصحابك، وإنك بتحبي ومرتبطة، وهو كان محتاج لك كشخص يرجع له لما بنت عمه تبعد عنه؛ لإنه عارف طبعا إنك مش هترفضيه أو تاخدي منه موقف مهما عمل.

صديقتي العزيزة.. لازم تعرفي إن كل اللي كان بينك وبين الشاب ده كان غلط في غلط؛ لأنه ماكانش مبني على أساس صحيح من البداية، علشان كده نصيحتي ليكي اللي بأتمنى إنك تاخدي بها، إنك تنسي الموضوع ده من الأساس، وتبعدي عن الشخص ده وتتجنبيه كإنه ماكانش موجود في حياتك قبل كده.. وصدّقيني مع مرور الوقت هتضحكي على نفسك كل ما تفتكري الوقت ده، ويمكن تزعلي إنك ضيعتي وقتك في حاجات مش مفيدة.

وكل اللي لازم تعمليه دلوقتي إنك تقربي من ربك، وتتوبي وتستغفري عن كل خطأ ارتكبتيه، وتصلي وتدعي إن ربنا يرزقك بالزوج الصالح اللي يصونك ويصون كرامتك، تكوني عارفة إنه حتى لو مش بيحبك عمره ما هيهينك؛ لإنه بيراعي ربنا في بنات الناس، وعلشان ربنا يرزقك باللي يراعي ربنا فيكي، لازم في الأول تراعي ربنا إنتي في عمرك وفي تصرفاتك وفي تفكيرك، وبلاش تضيّعي وقتك تاني في كلام فاضي، ولكن استغليه في تثقيف وتطوير نفسك علشان تكوني دايما أحسن، وتبقي واثقة في نفسك إنك تستاهلي أحسن حاجة في الدنيا، مش مجرد شخص ترمي نفسك عليه وتستحملي إهاناته المستمرة ليكي.

وفي النهاية هاوصيكي مرة تانية، راعي ربنا في نفسك وفي وقتك وفي عمرك، وبلاش تضيعي كرامتك علشان أي حد مهما كان؛ لأن اللي هيحبك بجد هيصون كرامتك.

لو عايز تفضفض لنا دوس هنا