يا حضرة القاضي

لأني باكره المخلوع بأقول ياحضرة القاضى ياريت تسمعنى
ولا تقولش دا واد تافه ومخه فيه كلامى فاضى ...
مانيش عايز فلوس ترجع ..
ما أنا طول عمرى وانا عايش فى ذل وجوع
ما متش يعنى ولا حاجة ..
أمانة ياحضرة القاضي ...
إذا تلمح ولو ورقة تدينه دغرى قطعها ما تعلنهاش ..
ولو شاهد نطق بالحق قول عنه دا غاب وما جاش ..
ولا تسمع لصوت يهتف بتار وقصاص
وقول لأم الشهيد تسكت ما تدونشناش ..
وتحمد ربنا ع الصبر ويعنى ابنها كان إيه ..؟؟
ها يفرق إيه .. إذا كان عاش ..؟؟
ويعنى ابنها كان إيه ..؟؟
دا كان صايع وكان تافه ولا يسواش ..
رباط فى جزمة الباشا ولا شعرة فى سعادة البيه .
أمانة ياحضرة القاضى ..
تقول لجمال ينام والقلب مطمن على الأحوال
وإن الدنيا عال العال ...
. وإن اللى حصل كله دا لعب عيال ..
وقبل ما أنسى ياقاضى أمانة تقوله يتحضر ..
ويبدأ دغرى ويحضر مراسم خارجة الباشا ..
ويعمله الكفن ميت توب ويعمله شنط وجيوب ..
لأن الباشا مش ناوى لربه يتوب ..
وناوى يروح ع الآخرة ......
وشايل أد وزن الأرض ذنوب وذنوب .