ماذا قال مدير أعمال شيرين عبدالوهاب السابق عن أزمتها الأخيرة؟!

علق مدير أعمال شيرين عبدالوهاب السابق علي أزمتها الأخيرة والتي أدت إلي قرار نقابة الموسيقيين بوقفها عن الغناء للإساءة لمصر في إحدى حفلاتها عندما طلبت منها إحدي الحاضرين أن تغني"مشربتش من نيلها"، فردت شيرين: "نيلها فيه بلهارسيا اشربي إيفان".

وكتب أيمن، عبر حسابه الشخصي بموقع التواصل الاجتماعي"الفيسبوك"،" كفاياك تطبيل ياحبيبي أنت وهو وهي، أنا اشتغلت معاها بدير أعمالها وشغلها 10 سنين وسيبت الشغل معاها وعلاقتنا كويسه وهي عارفه مين أيمن نابليون، كويس أيمن نابليون، اللي لما كان بيشوف غلط بيقول ده غلط ومش فارقه معاه حاجه علشان هو راجل فاهم يعني ايه راجل الصح صح والغلط غلط طالما الحياة هزار والهزار ده بيوقعنا في غلط يبقي نبطل هزار وبلاش نقول بتتصرف بطبيعتها، طالما طبيعتها بتعملها مشاكل نقولها انتي كده غلط، لكن شغل التطبيل ده مالوش لازمه".

وأستكمل:"أنا سيبت شغلي معاها ودي حاجه حلوه علي قلب ناس كنت بالنسبة لهم شوكه واقفة في زورهم .وارتاحوا مني، وللعلم انا اللي اخترت امشي واسيب الشغل اللي تعبت 10 سنين فيه واسيب غيري اللي مالوش لازمه ياخد تعبي وجهدي ونجاحي وينسبه ليه ويعمل شو، وانا ماليش في الشو لأن نسبه النفاق والتضليل بقت كتير".

وأضاف: "انا بشتغل في سكات وبس اما بالنسبه للناس اللي في الوسط وعارفين حقيقه الناس اللي حواليها عيب توصل بيكم المرحله أنكم تشتموا فيها وانتم عارفين ان اللي حواليها حاليا هما السبب عيب كده ومنكم كتير لو شافوها في أي مكان هيقبلوها بابتسامه وازيك يافنانه وازيك يا ست الكل كلنا عارفين المشكله عندها فين وهي نفسها عارفه وعارفه مين الكويس ومين المنافق، انا اتكلمت لما لقيت اللي حواليها جايبنلها الشتيمه من النا واللي حواليها دول مش مهم عندهم طالما المصلحة ماشيه والتطيبل جايب نتيجه، وانا علي فكره ماليش اي مصلحه واللي يعرفني كويس يفهم كلامي ومعناه، وللعلم انا كنت عندها من اسبوع في بيتها وقابلتني احسن مقابله لأنها عارفه ايمن نابليون كويس وعارفه معزتها عند بدون اي مصلحة".