رسايل شباب ابنى بيتك على الفيس بوك

:رسايل شباب ابنى بيتك على الفيس بوك
الاعفاء من الاقساط و المرافق و الدعم و الانفلات الامنى فى مشروع ابنى بيتك
ونبدأ بموضوع الاعفاء من
الاقساط
فلاحظت من خلال رسايل الاعضاء انقسامهم لفريقين

الفريق الاول : يطالب باسقاط الاقساط بسبب
الظروف الماليه الصعبه واستدانتهم واسوه بمن اعفو من بنى الثلاث ادور وانو مشروع فاشل وخدعه ومكنش يستاهل جنيه يتدفع فى صحرا جردا وحاليا بيوت متكلفه الاف الجنيهات مهجوره وعربان ولصوص وافلام هنديه ملهاش
اخر ... الخ
والفريق الاخر : يرى انه لابد من دفعها من باب احقاق الحق .وحق الدوله على ابناءها وان العقد شريعة المتعاقدين ... الخ
اما بالنسبه لرئيى

فانا كنت اوائل المطالبين باسقاط الاقساط عن كافة مستفيدى مشروع ابنى بيتك ومن قبل الثوره مش بعدها

واذا كنت مصمم على اسقاط الاقساط فده
لاسباب حقيقيه واقعيه مش بنركب الموجه ونهيص مع الهايصين
اولا : الارض اللى استلمناها دى
من سنتين تلاته فى صحراء قاحله لا زرع فيها ولا ماء ولا اى حاجه , ارض منها للسما .ارض تحتيك وسما فوقيك وشمس حارقه بتشويك .وتلف تلف تلف حولين نفسك .عينك مش شايفه غير صحرا فى صحرا.
ارض واللهى ملهاش اى قيمه غير انهم شجعو واغرو الشباب بالدعم وتوصيل المرافق وانها هتكون مساكن منظمه وعلى مستوى معيشى محترم
دا فى ناس يوم ما راحت تستلم وشافت منظر الرمل والصحرا اتوهمو واتصدمو وباعو للسماسره فورا وهما واقفين على ارضهم
دى ارض ملك ابناء الشعب. والمسؤلين السابقين اساءو اداره المشاريع
السكنيه لابناء الوطن واساءو فى توزيع ثروات البلد
العينيه
وبدل ما يدهالك مجانا ويوصلك المرافق قبل الاستلام ويئمنلك المكان ويسهلك كل الامور
راح ورهالك وطلع يجرى ولا كاءنو يعرفك
بيبعولنا ارض صحرا ومصر 96 % منها صحرا. والنبى مش حاجه تشل وتعلى الضغط
هتقولى الاقساط دى تمن توصيل المرافق اللى هتوصلك .
هقولك ما ده الطبيعى ان الدوله توصلك المرافق والخدمات وده دورها فى تنميه وتوفير مسكن مناسب لابناء الشعب
هتقولى ما ادولك 15 الف دعم
هقولك اصدك شحتونا 15 الف على 3 دفعات متاخره شهور ومدوخنا
عليهم من العام الماضى
وخدناهم بادينا اليمين وادناهم للعربان بادينا الشمال وعليهم حوالى 10000 كمان
من جيوبنا فى صوره مواد بنا ناقصه ومضروبه وبلطجه ونصب واحتيال دا غير ان فى ناس كتير راح عليها الدعم
الخلاصه : سوء اداره من المشرفين فى الاوبرج فى وزارة الاسكان عشان مكنوش فاضينلنا
ثانيا : ان المفروض وده طبعا محصلش لكن هيحصل ان شاء الله فى المستقبل . انى كشاب لو فى دوله محترمه انها تلتزم باعطائى كامل حقوقى المشروعه .
ولو دوله تعبانه ماديا تحاول تساعدنى بشتى الطرق فى الحصول على
حقوقى
مع العلم ان مصر مش تعبانه ماديا .
مصر ماشاء الله دوله غنيااااااااااااا ومن زمن الزمان
واعتقد من خلال حسبه كده
سريعه توقعيه ان لو من 30 سنه او اكتر مكنتش السرقه دى بتتم
كان زمان ((اقل)) شاب فى مصر عندو شقه تمليك وعربيه ورصيد بنكى من 50000 ل100000
وبقول اقل شاب
اللى اتسرق كتيرررر اوووووى اوى اوى واللهى
الله يخرب بيوتهم ويرزقهم العذاب الاليم دنيا واخره بذنب الشعب ده
نرجع لموضوعنا
ومن بعض الحقوق للمواطن على دولته على سبيل المثال لا الحصر .الحق فى السكن
.الحق فى الرعايه الصحيه . فى التعليم . وغيرو كتير من الحقوق اللى البعض بيفتكر انها هبات واحلام كبيره اتفضلت واتكرمت الدوله ومنحتنا اياها
ولازم يا اخواننا نفرق بين الحقوق وبين
المنح و المساعدات وعدم الخلط بينهم
ال مبارك ورجالتو الله لا يرحمهم لا دنيا ولا اخره ربو الشعب من زمان على انهم عبيد .
دوله ملكيه مقنعه فى صوره جمهوريه او تقدرو تقولو عليها وسيه او عزبه
فلوس البلد بتاعتهم والحكم بالوراثه واحنا شغالين عندهم
اللى ندهولكو تحمدو ربنا عليه وتبوسو ادينا . كمان مفيش حاجه اسمها حقك يا مواطن . فى حاجه اسمها الفتافيت . اللى هتفيض مننا هنبقى نرمهالك انتا وكلاب
الشوارع وابقو كلو مع بعض منتو زى بعض .
بدليل ان كان فى ناس بتاكل من سلات الزباله فعلا مع الكلاب ايام العهد الرائع المبارك الله يلعنهم دنيا واخره

وكنت دايما بقول من
خلال تصوراتى والكلام ده من قبل الثوره ان لو ايرادات مصر جنيه 100 قرش فى اليوم
فكان مبارك وشلتو
بياخدو 75 قرش .وال 25 قرش الباقين تتوزع عالشعب كلو
75 قرش على5 مليون شخص بكتيرو
80 مليون بيتقاسمو25 قرش
المهم مش عايزين نتكلم فى الماضى عايزن نشوف هنعمل ايه فى مستقبلنا ومستقبل مصر
لازم نمسح المفهوم ده ( المنحه ) من دماغنا مسح (شفت دليت . مش دليت بس
لان دى اقل حقوقنا
كن شرس فى الدفاع عن حقك وما تخليش موظفى الدوله اللى احنا معيننهم عشان يديرو لنا شؤن
بلادنا وثروتنا يحسسك انو بيتعطف عليك او بيقطعلك حته من لحمه ويدهالك ولابيديك فلوس من وسية ابوه اللى سبهالو

دى بلدنا احنا .
احنا الشعب مصدر كل
السلطات
احنا الشعب اصحاب البلد
احنا الباقين وهما الزائلون
.
وكل مسؤلى الدوله دول من رئيس الدوله اللئيم وحتى عامل النظافه الكريم .ما هم الا موظفين موكلين من اصحاب الحق( الشعب )واصحاب الارض والوطن فى ادارة شؤن البلاد فى كافة المجالات سياسيه واقتصاديه ..... الخ

وتوزيع ثروة البلاد على ابناءها بالعدل والتساوى
والاخد من الغنى واعطاء الفقير وتحقيق العداله
الاجتماعيه واحترام حقوق الانسان على كافة المستويات واعلاء قيمة المواطنه والمساوه وتحقيق القانون
فالمقصود ان قطعة الارض دى مش منه ولا منحه لكنها اقل حقوقنا فى
بلدنا
وشوفو الدول الاجنبيه المحترمه اللى بتحترم شعوبها بتعمل ايه مع مواطنيها .
وحتى دول الخليج المحترمه زى الامارات وقطر وغيرهم
شفتم شباب صغير فى العشرينات ما شاء الله عليهم
انظمتهم وفرتلهم السكن .وسكن فخم كمان مش عادى وسيارات وارصده فى البنوك ومرتبات محترمه واعانات بطاله ومرتبات شهريه للاطفال وحقوق كتير ....
تفتكرو ان دول الخليج دى بتوع امبارح دول اغنى من مصر الفراعنه
حسبى الله ونعم الوكيل فى اللى فى ضيعوكى يا مصر
المهم عشان ما اطولش ومش طالبه ندب هيا. عشان لو ندبنا هنندب كتير
ولانى شايف ان
المستقبل اجمل بكتير ان شاء الله
بس الجماعة اللى قاعدين عالكراسى دول يتحركو اسرع ولوهما حاسين انهم كبرو ومش قادرين عالحركه وسرعة التصرف والانجاز . فبنرفعلهم القبعه احتراما وتقديرا لدورهم السابق فى خدمه البلد وبنقلهم الف الف شكر عملتو اللى عليكو وممكن يقومو يستريحو يتفرجو على توم وجيرى وياكلو فشار او يلعبو صائد الفراخ عالبلاستيشن وياخدو علاج السكر والضغط اللى الشعب جبهولهم ويصلى ركعتين ويستغفر ربنا ويستعد للقاء ربنا يمكن يغفرلهم زنوبهم
المهم ... ان الارض ال150 متر اللى فى صحرا فى اخر الدنيا دى. ومازالت بعد سنين لا
فيها ميه
ولا نور ولا صرف ولا مواصلات ولا اسواق ولا مدراس ومستشفيات ولا خدمات من اى نوع
واللى مليانه بالعربان واللصوص وقطاعين الطرق والمجرمين ومحرزى المخدرات والسلاح وعلى مرئى ومسمع من اجهزه الشرطه اللى عامله نفسها بريئه مش عارفه حاجه وهيا فى حقيقة الامر عاجزه وسيئة سيئه سيئه الاداء بالتلاته للغايه من وجهة نظرى
وبالمناسبه بوجهه كلمه للحكومه ووزير الداخليه بصفته
وبقولو ان سيادتك سمعت مرارا وتكرارا عن مشاكل ابنى بيتك بمدينه اكتوبر
وطالبنا بدل المره الف مره من قبل الثوره
وبعدها بعمل نقاط شرطه لحماية السكان اللى مش
قادرين يسكنو بيوتهم خوفا من العربان واللصوص
وانا اتقدمت قبل كده بخطه امنيه لمشروع ابنى بيتك وعندى بدل الخطه اتنين وتلاته مش واحده بس
ايه باءا كان رد سيادتك بصفتك المسؤل عن حمايه شعب مصر على الشكاوى والمذكرات والاحتاجات اللى عملها شباب المشروع
بكل اسف ولا عملت الوزاره حاجه ولا اتحركلها ساكن . عادى كلاب بتهوهو مش فاضينلهم
سامعين وشايفين وعارفين وعاملين مش فاهمين
وتكلمهم يقولك ها ؟ ايه ؟ بتقول ايه ؟ معلش مخدتش بالى ؟ قول تانى كده
نقولو عايزن امن فى المشروع
يقولك الوووو معلش تليفون ؟نعم ؟ ايوه ؟ جاى حالا
يا افندم ؟
وبعد اذنك عشان فى ماموريه مهمه لازم اروح دلوقتى ونتكلم بعدين وكل سنه وانتا طيب وابقى قابلنى
طيب ده كان ايام المحروق السابق . طيب وبعد الثوره هيبقى هوا دا نظام الوزراه برضو ولا هيبقى فى احترام لأدميه وحقوق الانسان فى العيش فى امان
دا حقنا فى العيش فى امان وانتم كجهاز شرطه دا شغلكم اللى بتتقاضو عليها مرتبات وملزمين بيه ولوما قمتوش بمهام وظيفتكم على اكمل وجه فى تحقيق امن المواطن تبقو فشله ومتستحقوش مناصبكم .لان تحقيق الامن ده مش جدعنه منكو .
يعنى يا تشوفو شغلكم صح يا تقعدو فى بيوتكم ويجى ناس تعرف تئمن
البلد
وما تقوليش ان البلد هايصه بعد الثوره وانفلات وبلطجيه وكلام فارغ ومعلش نفوق بس ونظبط الامن
الموضوع ده كان يتحسم فى اقل من شهر بعد الثوره
الموضوع مش كبير اوى كده واتصور ان الانفلات الامنى مفتعل وفى ناس موجوده على كارسيها ليها مصلحه فى الانفلات الامنى فى البلد

ولا اشك للحظه واحده ان وزاره الداخليه مش عارفه كل حاجه عن مشاكل المشروع الامنيه وعارفه دبه النمله فى البلد ( ولو ما تعرفش يبقى متستحقش انها تقوم بمهمه حراسة البلد وحمايتها) وبلاش منكو اصلا ونشوف حراس غيركم يحمو البلد
انا وبكل اسف واسى اشك فى نجاحك
ونجاح رجالتك يا دكتور شرف
رغم انك راجل طيب ومحترم
وربنا يخيب ظنى واكون غلطان لانى معحب بشخصك لكن مش مبسوط من الاداء الوظيفى
كنت من اشد المعجبين بوصولك لكرس رئيس وزراء مصر ولكن دلوقتى من المستائين من من طريقة شغلكم الهاديااااا الغير متناسبه مع ظروف ومتطلبات الثوره المصريه العظيمه
مش اعتراضا على شخصك لاء . انتا شخص محترم ومهذب. لكنك متبع سياسه عاديه مش ثوريه سياسه الايدى الناعمه والطبطبه وده سبب طول فتره استئصال الامراض الخبيثه من الجسم المصرى السقيم
الفتره طولت
اوى كانت ممكن تخلص فى شهر من الثوره
وكان نفسى تكون حكومتك حازمة صارمه سريعه ناجزه
وقابض فى ايدك اليمين وايد كل واحد من رجالتك
كرباج ينزل يقطع ظهور المتباطئين والمتكاسلين والمتخاذلين
وفى
ايدك الشمال سيف على رقاب الفاسدين والمتلاعبين على الوجهين.
ومعاك جركن ميه نار تدلقو على كل بؤر الفساد فى جهاز الدوله عشان يطلع الوساخه والجلخ المتراكم من سنين ويطهرجسم الدوله المصريه الطاهره من كل خبث ودنس الخائنين

الا انه وللاسف لسه فى مسؤلين مباركين كتير موجودين على كراسيهم وبيلعبو عالوشين .وشعارهم احنا مع الثوره.
لالالاء مش مع !!!. دا احنا اللى قمنا بالثوره . ويعلم الله ما فى قلوبهم
سامحونى لانفعالى لكنى منفطر غيظا من بطئ حركه
التحول والتصحيح رغم ان فى وسائل وطرق اسرع بكتير
.
ورغم كده بتمنى من ربنا يخيب ظنى فى
الحكومه دى وتنجح وبتفوق فكلنا همنا مصلحة البلد على ايد اى حد مش هتفرق . المهم البلد تقوم وبسرعه
ثالثا : ودا باءا السبب الاساسى والرئيسى اللى برتكن عليه فى رئيى .
ان الدوله اعفت من قام ببناء الثلاث ادوار
طيب ليه يا عم الحج الوزير اعفتوهم
قالك عشان نشجع الشباب انهم يبنو وحدات اكتر وبالتالى هينتقل عدد
اكبر من السكان هناك
قلنا واللهى فكره كويسه مش وحشه
طيب الكلام ده معناه ان اللى معاه فلوس اكتر
ويقدر يبنى دورين اخرين بخلاف الاول هنسقط من عليه الاقساط
قالك اه مظبوط
قلنا طيب والشباب المتعثرين ماليا ويا دوب قدر يبنى دور واحد بالعافيه بالسلف والدين. ما ينفعش نعفيهم دول كمان احسن دول حالتهم صعبه وهما اولى بالاعفاء من المقتدرين
قالك لالالاء دى فلوس دوله يا عم وحق الدوله .هيا هيصه ولا ايه
الله !! ؟؟ وهيا الناس اللى اتعفت من الاقساط دى واللى فى الاصل ما يستحقوش الاعفاء لانهم ماشاء الله . ربنا يذيدهم معاهم فلوس وبذياده . مكنتش اقساطهم فلوس الدوله ؟
فكر عقيم ومتخلف للغايه
ومخالف للشرع والقانون وكل الاعراف
والعادات الحقوقيه
ازاى اعفى
اللى معاه واخد من اللى معهوش

والدليل انو معهوش انو مقدرش يبنى التلاته ادوار عشان يتعفى هوا كمان
طيب احنا قولنا سابقا انو الهدف من اعفاء بانى الثلاثه ادوار زياده الوحدات وبالتالى ذياده المنتقلين هناك وتخفيف الحمل السكنى عن العاصمه .. صح ؟
طيب فى المنتقلين باءا اصلا اللى انتقلو للسكن؟
دا لا فى منتقلين ولا ساكنين ولا متئندلين ولا اى حد عارف يروح يعيش
واللى غامر وراح وسكن هروبا من ايجار سكن ب500 شهرى وانتا طالع . عايش عيشة بدائيه لمبة جاز ومياه براميل وحاجه تقرف
دا غير باءا الهديه الكبيره اللى
سيبهالنا الداخليه وهما العربان
واللصوص
الله عليكم يا مسؤلين بلادنا قبل وبعد الثوره
ويا عينى عالصبر
طيب موضوع الاعفاء ده طالبنا بيه قبل الثوره مش جديد
جت الثوره واتحبسو الحرميه وجت حكومه ربع ثوريه مش ثوريه كامله
جت الثوره بناس نص نص لا هما ثوريين خالصين ولا هما مباركين اوى
جه وزير اسكان جديد
ايه العمل الجديد اللى عملو ابهر بيه الشباب واصبح وزير وطنى قومى وحاز على اعجاب شباب مصر مفجرى الثوره
مازالت الحركه سلحافيه بطيئه روتينيه خوافه
واللى هيشلنى وهيموتنى بالسكته القلبيه
ان الوزاره تقولك
هنوزع اراضى فى سبتمبر الجاى
هنعمل مشروع
المليون وحده
على خمس سنين
هنعمل وهنعمل وهنعمل
طيب ما تنهو المشاريع المتعثره اوى دى الاول
قفلو الملفات المفتوحه قبل ما تفتحو ملفات جديده
ودماغهم العبقريه وسياستهم بتقولك لازم نعمل مشاريع جديده عشان الناس تحس بنتايج بالثوره
لما انتم مش قادرين تخلصو المشاريع القديمه هتعملو مشاريع جديده ازاى
انا معاكو فكرو فى مشاريع جديده وحهزوها عالتنفيذ بس ما تبدئش الا لما تنهى القديم المتناثر المتعثر
دنتم شركات الرصف والمرافق مديناكم وليها عندم فلوس وما كانوش عايزين يشتغلو ويكملو الشغل الا
لما يخدو مستحقاتهم المتاخره
سبحانك يا رب
فيما ابدعت

مش واخدين بالهم ان مشروع ابنى بيتك ده مكون من 92000 مستفيد واسرهم
يعنى 92000 مستفيد * 3 افراد اسره كل مستفيد تقريبا
279000 =
مواطن غير اللى بانى تلاث ادوار وهيسكن دورين كمان
يعنى اغلب شباب مصر مستفيدين منو
يعنى لما الاسر دى يرتاحو فى بيوتهم والشعب يعرف ان الدوله ريحتهم بسكن
كويس وينتشر الخبر بين الشعب ويشوفو بعنيهم هيذداد ثقه الشعب فى الوزاره والحكومه وهنحبكم وهنتمسك بيكم
يا وزاره الاسكان قفلى مشاريعك القديمه البايره اللى عنست وانتا بتخططى لمشاريع جديده لكن ما تبدئش الا لما تقفلى القديم
قفل شغلك القديم وانتا بتخطط للجديد
خلص القديم النهارده وابدا بكره فى الجديد
عارفين ان المشروع يعتبر انو محسوب لمبارك ومش هيحقق بروباجندا الثوره للوزاره وشعور الشعب بمكتسبات الثوره
لكن احنا دولة مؤسسات مفيش اعمال ولا مشاريع قوميه بتتوقف
على شخص
يعنى المشاريع ملهاش
دعوه بفلان قاعد ولا علان مشى
المؤسسات مستمره فى العمل مع اختلاف الاشخاص
ونصيحه لوزارة الاسكان .اهتمو بمشروع ابنى بيتك
والمشاريع القوميه المشابهه من اسكان شباب وغيرو القائمه والمتعثره حاليا
وابقو روحو افتتحو المشروع بعد نهايتو وافخرو بنفسكم وانتو بتتصور والشعب كلو شايفكو عبر القنوات التليفزيونيه زى مبارك كده . مع اختلاف ان انتو هتكونو انصار الوطن والشعب وهتكونو متشالين على الاكتاف لتلبيتكم مطالب الشعب .مش خونه داخل القفص زى المبارك مبارك .
وساعتها الناس كلها هتتفرج على افتتاح المشروع وشايفنكم وبيقولو فعلا وزاره ووزير محترم وكسب ثقتنا . احنا عايزين الراجل ده خلوه فى الوزاره بدل
ما يقولك غورو مش
عايزينو
وكلام الشعب هوا اللى هيمشى فى الاخر ومفيش حد كبير عالقانون يا كبار اوى ..... ولا ايه ؟؟

دا مين صاحب الفكره العبقريه بنت الايه دى
الفكره اللى بتقول ادى اللى معاه واخد من اللى معهوش
طيب دى كانت فكره ايام الافكار العبقريه المباركه
طيب وفكر الثوره ايه رائيو فى الموضوع ده
فكر الثوره قايم على عداله اجتماعيه فى توزيع الثروه
بمعنى اخد من اللى معاه وادى اللى معهوش
ايه رائيك يا حكومه الثوره
هتمشى ورا كلام المباركين
ولا هتصححى اخطاء السابقين الاولين

اما بالنسبه للاخوه اللى بيقولك دا حق دوله ولازم ندفع ومبلغ بسيط وعشان البلد تقوم والبلد محتاجه فلوس والعقد شريعه المتعاقيدن.
فانا مؤدب ومش هتنرفز وهقول ان الكلام ده بيعبر عن ناس بتحب بلادها وخايفه عليها وحسنى النيه ومش هقول انه جهل منهم باحوال البلد وهكظم غيظى منهم والله المستعان لانهم معزورين .

عذرهم الاول انهم مش عارفين فلوس البلد بتندار ازاى وايه داخل وايه خارج
وايه اللى اتسرق واللى اتهرب واللى اتمسك واللى متخزن تحت البلاطه عشان يطلع فى وقتو واللى واللى .....!
عذرهم التانى : انهم ما شاء الله . ربنا يباركلهم معاهم قيمه الاقساط وبالتالى مفيش مشكله بالنسبالهم
لا هوا هيستلف فوق اللى مستلفو قبل كده عشان يبنى البيت
ولا هوا هيبيع دهب مراتو وعيالو
ولا هوا ساكن هوا ومراتو وعيالو مع امو او حماتو عشان يوفر ايجار شقه وغيرو وغيرو
وبعدين حال الدوله ماديا يا اخى كويس ما تقلقش
مصر بقولك دوله غنيه ومن زمن الزمان
والبلد فيها فلوس ما
شاء الله
مصر بخير ربنا يحميها وكمان اهلها بخير طول محنا عارفين ربنا وبنراعى بعضنا وقلوبنا وادينا واحده هنعدى الصعاب وهنوصل . ومحدش بعد كده هيتغرب يشتغل عن اخوانا الخليجين المحترمين اللى بيحترمونا جدا عندهم
ولا هنركب مراكب الموت ونغرق عشان نروح ايطاليا نشحت هناك فلوس وحريه وكرامه

وبعدين لو خايف عالبلد انها تفلس فقول للحكومه اقبضى عالحراميه اللى لسه هربانين بره وهاتو الفلوس اللى اتهربت بره وهيا تملى خمسين خزنة دوله
بلاش دى
قول للدوله صادرى كل فلوس الحراميه اللى جوه وضميها لخزنة الدوله ذى ما عمل عبد
الناصر وجرى فى لحظه وأفش الاقطاعين وخد منهم الدهب الذايد ووزع اراضيهم لكل فلاح خمس فدادين
طيب بلاش دى
كمان
الفلوس اللى كانت بتتسرق كل طلعة شمس كل يوم وبتدخل جيوب الحراميه .دلوقتى ما بتتسرقش ما شاء الله وبتدخل خزنه الدوله يوم بيوم على ايد الشرفاء
المقصود انو مش انتا يا شاب يا تعبان ده لو كنت تعبان طبعا بالملاليم دول اللى هتدفعهم اقساط اللى هتعجز البلد
لكن الملاليم دول بالنسبالك يا مطحون ثروه وهيحلو معاك ازمه وممكن يفكو دينك
وبعدين هتقولى احنا احسن من
غيرنا يا عم . دا فى ناس مخدتش خالص .

هرد عليك واقولك انهم هياخدو بعد الثوره
وان شاء الله هياخدو احسن منى ومنك لان العداله جايه وكل واحد هياخد حقو وذياده والايام بيننا
مشكلة الامن
ودى اهم المشاكل على الاطلاق بلا منازع
ومش هتكلم فيها كتير عشان اتخنقت من كتر المذكرات والرسايل ولسانى وصاوبعى وجعونى
بصراحه
ودى فى رقبة وزارة الداخليه وهيجى يوم هنحاسبهم على تقصيرهم واهمالهم فى الموضوع ده ان ما كانش
النهارده هيبقى بكره
وحلها بشكل موجز يتلخص فى الاتى
عمل نقاط شرطه فى كل منطقه
كل نقطه فيها ظابط صغير واربع امناء وعشر مجندين
عمل لجنه صغيره عند مدخل كل منطقه مكونه من سياره بوكس بها ضابط صغير و2 امين شرطه و4عساكر
واللجنه تكون مكونه من السياره البوكس اللى قولنا عليها دى وسياره نجده وسياره اسعاف
وبوجه
كلامى المخنوق من وزراه الداخليه لمسؤليها بصفاتهم مسؤلى حمايه الامن الداخلى للوطن
انتو مهام وظيفتكم ايه ؟
بتاخدو مرتبات وبتركبو عربيات الوزاره ومميزات وشقق ونوادى و و و و ليه؟
ولما كان من المفروض ان من مهام وظيفتكم بتقول انك تحمى المواطنين بشكل وقائى مسبقا وبدون طلب
فمبالك بمحاضر يوميه متكرره لا تحصى فى اكتوبر عن سرقه الابواب وشبابيك ومحولات كهربا المشروع وكسر مواسير المياه واعمال بلطجه وفرض اتاوه واحراز واستخدام اسلحه ناريه متطوره وبيضاء فى ترويع وسرقه المواطنين وابتزازهم
واتخذنا كافة
الطرق المشروعه من محاضر وطلبات
ومذكرات واستغاثات واحتجاجات
ومع ذالك مفيش خطوه اتعملت من جانب وزاره حمايه الشعب
ردى انتى باءا على نفسك يا وزاره الداخليه
تبقى انتو ايه ناجحين ومتفوقين وحذتم باعجاب الشعب ولا فاشلين وعجزه ومتستحقوش كراسيكم ومرتبتكم اللى بتخدوها من ضرايبنا
واللهى بس نفسى اللى مش قد الكرسى اللى قاعد عليه ويحس انو واسع كده وكبير عليه يسيبو لواحد تانى يكون على مقاسو ويملا مركزو ومكانه ويقدر يشوف شغلو بضمير واخلاص
اما بالنسبه لموضوع المرافق

فانا منكرش انهم اشتغلو فيها لكن من غير فايده
مواسير الميه بيكسروها العربان عشان يملو فناطيس ويبعوها
ويستغلو الشباب
الصرف الصحى . الشركه اللى قامت باعمال الصرف وقعت فى اخطاء جسيمه فى بعض المناطق وعلو البلاعات متر تقريبا والادوار الاولى اتحولت لبدرومات
الكهرباء بيركبو المحولات من هنا والعربان واللصوص بيسرقوها رغم انها اسعارها غاليه جدا
يعنى باختصار كلو بيصب فى موضوع الانفلات الامنى فى المنطقه
يعنى المشكله الاساسيه والرئيسيه بتصب فى النهايه فى تحقيق الامن فى المشروع فى اكتوبر
ولازلت بناشد وزاره الداخليه انها تنشى اداره خاصه بمديرية امن اكتوبر لمشروع ابنى بيتك تكون مسؤله عن تحقيق الامن هناك
واللهى يا
وزير الداخليه لو عملت تليفون صغير لمدير
امن اكتوبر وقولتلو محتاج ايه لتاءمين المشروع هتلاقيه بينتفض من عالكرسى وبيقولك تمام يا افندم اعتبر الموضوع منتهى
والموضوع مش مكلف اوى يعنى
يعنى سبع نقط شرطه صغيره وسبع لجان صغيره برضو مش معضله بالنسبه لحجم تعداد افراد الوزاره خصوصا قوات الامن المركزى ومكافحه الشغب

مش طالبين جيش نحارب بيه اسرئيل
ولو حتى هيكلف فده من صميم شغلكم واطلبو مستلزماتكو الماليه من وزاره الماليه بموافقه مجلس الوزراء
وفى نفس الوقت هتسعد ناس كتير وهيحبوك وهنتمسك بيك
وبعدين منتو لو حليتو المشاكل دى ففى ناس كتير مش هتروح ميدان
التحرير
تتظاهر من خنقتها
مشكلتكم انكم بتحلو المشاكل من الديل مش من الراس
حلو مشاكل الناس وريحوهم مش هيروحو يتظاهرو
الناس بيتظاهرو من خنقتهم وشعورهم بالتهميش والظلم
وهقول وصفه سحريه لكل مسؤل نفسو يموت وهوا عالكرسى . وكمان تخلى الكرسى هوا اللى يلزق فيك ومش عايز يسيبك . مش انتا اللى تلزق فيه

اشتغل بضمير وما تخفش من
حد وخلى الناس تحبك
هيتمسكو بيك وهيثبتوك عالكرسى
ولو طلعت معاش هيقولك كان راجل محترم فين
ايامك . ولو مت هيقولك اقرولو الفاتحه
الشعب يكسب يا حضرات المسؤلين واعتبرو من مبارك
لما الشعب قال كلمتو محدش نفعو
ومحدش يقدر يعفو عنو بعد الله سبحانه وتعالى الا الشعب
الشعب هما انتا وانا وانتم واحنا
الوظيفه مش ديمالك وهتطلعو معاش وهترجعو تانى للصفوف الاخيره
اعملو حاجه
تشفعلكم يوم تكون ماشى فيه انتا واهلك فى الشارع والناس تشوفك
يا اما هتجرى عليكم تخدكم بالاحضان
ويا اما هيلعنوكو ويحدفوكو بالطوب .ويشوفو عيالكم واحفادك ويعايروهم بيكو .او يشيلوهم عالاكتاف
اتركو الشرف والكرامه لخلفائكم بدلا من العار والخزى كأل مبارك
والاهم اعملو حاجه تشفعلكم يوم لا ينفع مال ولا بنون الا من اتى الله بقلب سليم.

كن مع الله
تحياتى وتمنياتى الحاره بالتوفيق للجميع
واسف للاطاله لكنى مليان وهفرقع ويعتبر انا كده اختصرت كمان
ووان كنت اصبت فبتوفيق من الله وان اخطأت فمنى
سبحانك لا اله
الا انت انى كنت من الظالمين
التوقيع / محمد الخطيب
مواطن مصرى / مخنوق من الاوضاع
محامى شريف / مقهورمن عدم الاستقرار
ناشط سياسى وحقوقى مستقل / بيعشق تراب ارض بلاده