تحديات السينجل مازر Single Mother (تدخلات الأهل)

مصطلح السينجل مازر Single Mother أو الأم الوحيدة يعني اللي بتربي أطفالها لوحدها نظرا لغياب الأب. وغياب الأب هنا بالطلاق واللي اصبح ظاهرة غريبة ظهرت في مجتمعاتنا بشكل ملفت جدا. الظاهرة مش متمثلة فقط في الطلاق واللي زادت معدلاته بشكل ملفت جدا في الآونة الأخيرة، لكن في تخلي الأب عن مسؤلياته تجاه أطفاله (مادية – معنوية – تربوية)، وهو بالشكل ده بيمثل إما ضغط على الأم بغرض إبقائها في سلسلة مسؤليات أكبر من قبل (وقت زواجها بيه) أو تخلي عن أعباء وفرصة للإستمتاع بحياته الجديدة من أول وجديد من غير مسئوليات.
النهارده إحنا مش بصدد مناقشة موضوع تخلي الأب اللي أكيد لا يقل أهمية، لكن النهارده هتكلمنا الأستاذة ماجي حرفوش – مستشارة حياتية وخبيرة تعزيز إمكانيات المرأة – عن احد التحديات التي تواجهها المرأة المطلقة وهو احساسها إن ملهاش ضهر.
قالت الأستاذة ماجي : "احد الضغوطات الكتيرة اللى بتقابلها السينجل مازر هي الأهل وتدخلهم وطريقتهم فى التعامل معاها، لإن خلاص إتعرف انها معاهاش راجل.. وطالما معاهاش راجل يبقى هي في نظر المجتمع عامة وأهلها خاصة بقت ضعيفة.. مهيضة الجناح على رأى عادل امام فى مدرسة المشاغبين.. وسبحان الله بتتحول بقدرة قادر فى نظرهم من واحدة كانت عارفة تربى ولادها ومعتمدة على نفسها وقوية وهى متجوزة، لواحدة يا عينى مبتعرفش تتصرف ومحتاجة نصيحة فى كل كبيرة وصغيرة"

وتضيف الأستاذة ماجي حرفوش: "من أول يوم الطلاق يبتدى التدخل الرهيب والنقد عمال على بطال. وشوية ويبتدى الكلام يترمى من عينة (مترجعيله احسن) او (ما إنتي اللي عملتي في نفسك كده) او (قلنالك بلاش ماهو كان باين من الأول)
كلام ملوش أي لازمة غير انه يزود من احباط الست ويخليها يصعب عليها حالها، فتحس إن الدنيا ضاقت بيها لأن أهلها مش حاسيين بيها ولا بالمعاناة النفسية اللي هي بتمر بيها"

بعد أن شرحت الأستاذة ماجي حرفوش بعض التفاصيل الإنسانية لبعض المواقف المتكررة والتي تجد تشابها مع العديد من الحالات، تضع لكِ سيدتي خطوات الحل لتجنب الأثر السلبي الناتج عن هذا السلوك من قِبَل الأهل فتقول: "فى الحالة دي انا بطلب من الsingle Mother حاجة وهي متسمعيش الكلام ده، اسمعيه بودانك عشان دول اهلك، بس متخليهوش يدخل عقلك وقلبك.. انتي قوية وتعرفي تعتمدي على نفسك، سواء معاكي راجل او لأ. إنتي كده كده اللي بتربي الأولاد، ربيهم على قد معرفتك وزي ما إنتي شايفة.. متخليش حاجة تحبطك او تحسسك انك ناقصة.. انتى كاملة طول الوقت".
همست أيضا الأستاذة ماجيحرفوش للأهل بالنصيحة فقالت: "وللأهل احب اقولكوا إن لو بنتكم اتطلقت...
كفاية عليها ده اوي، ماتزودوش عذابها واحباطها، خلوا بالكم ان كلامكم هيوجع اوي لإنها بتبقى حساسة جدا لأي كلام او تعليق..
حسوا بيها.. هي محتاجه دعم معنوي اكتر من اي حاجة تانية.. محتاجة انها تحس انكم فخورين بيها وبتدعموها ومعاها فى اى ظرف.. وإنها لسة قوية فى عينيكم..
من فضلكم بلاش نظرة الشفقة.. خليها نظرة تقولها (انتي تقدري تكملي) واحنا معاكي.."