"الطلاق.. الخيانة.. كلام الأهل.. نصائح الأصدقاء الفاشلة.. السيطرة على المرأة تحت اسم الرجولة"، وأسباب كثيرة أخرى أدت إلي نتيجة واحدة وهى فشل أى علاقة عاطفية بين أى شخصين، وجعلنا نترحم على أيام زمان، ونتذكر أى لحظة رومانسية حتى نغير من حالتنا المزاجية. في البداية عندما نتحدث عن البنات طبعا الولاد هيردوا ويقولوا دول مش محتاجين كلام دول، محتاجين مجلدات عشان الواحد يعرف يفهمهم ويتعامل معاهم، واحد هيرد ويقولك أصلهم ناقصات عقل ودين، وواحد تاني يطلعلك من الصندوق ويقولك ياااه يا أخي وعليهم نكد وغيرة تخنقك، أحب أقولك عزيزي القاري لو مكناش موجودين في الدنيا مكنش هيبقي ليكوا أي هدف فى تكوين أسرة واستقرار ونجاح في حياتك، وهقولك جملة شهيرة جدًا: "وراء كل رجل ناجح امرأة".
البنت هي الطفلة الصغيرة المدللة في منزل أهلها سواء كانت كبيرة أو صغيرة، أهلها كبروها وعززوها لكى تصونها وتحترمها ومتحسسهاش أنه في فرق بين بيت أهلها وبيتك، راجل دلوقتي هيرد عليا ويقولي: "يا سيتي انا عايز واحدة تفتح بيت وتربي عيال وتخلي بالها مني، مش واحده أدلع وأحايل فيها"، هرد عليك ودي هتكون اول نصيحة مني ليك: "أوعي تعاملها بأنك اشترتها وأنت تأمر وهي تنفذ، عاملها أنها أميرة في بيتك وتنفيذ طلباتك لطف وزوق منها، صدقني هتلاقي نفسك عايش من غير متطلب وهتلاقيها بتنفذلك كل حاجة بحب وهتتعلم كل حاجة عشانك".
هناك أنواع من الرجالة، النوع الأول نوع هم "الرجالة المسيطرة" تحت كلمة "أنا راجل" وكلمتي هي اللي هتمشي بمزاجك أو غصب عنك، النوع ده تجنبي التعامل معه نهائي، لأنه عمره ما هيفكر أنه يتناقش معاكي أو ياخد رأيك في حاجة، هو واخدك في بيته لمجرد أداء مهمة هى إنجاب الأطفال وخدمته وبس، مش معني كده انك متتجوزيش واحد كلمته هي العليا بالعكس، وهناك نوع من الرجال هو "الزوج الراجل" هو قبل اي اتخاذ قرار في الحياة لازم تكوني طرف فيه برأيك حتي لو الرأي ده مش هيمشي، ولازم يكون فاهم أن القرار ده مش هيسببلك اي إزعاج ولو شايف من وجهة نظرة انك غلط يتناقش ويقنعك، صدقني أنت كمان لو عملت كده هتبقي في نظرها أحسن راجل في الدنيا من غير ما كل شوية تقولها: "أنا راجل متنسيش هااا".
وهناك نوع "الراجل.. حبيب ماما"، مش معني كده اني بقولك ماما وحشة؛ بالعكس رضا الأم ودعائها هو سبب نجاحنا في الحياة، بس هقولك علي الشعرة اللي بين "حب أمك" وبين أنك تكون "ابن أمك"، الولد اللي بيكون متعلق بأمه اوي لدرجة انه بيدخلها في كل حاجة في حياته بتكون حياته الزوجية فشلة جدًا، وده مش عشان ماما وحشة بالعكس، ماما بتحبك وعايزك مبسوط، بس لحظه هنا حضرتك لما ترتبط ببنت وتقولها أنا القرار وأنا الرأي وأنا راجل البيت أزاي هتشوفك كده وأنت أصلا مبتخدش رأي من دماغك وتفكيرك، أنت حتي لو غلط أكيد مش هتزعل منك، بس الزعل لو البيت ماشي برأي "ماما"، ومش معني كده أن مراتك أو خطبتك بتكره مامتك بالعكس هي بتحبها عشان جابتك وحبتك واتجوزتك وربتك، الراجل هو المسئول الأول بأسلوبه إن مراته تقول عندي "حماه" أو تقول عندي "أم تانية"، نصيحة الفكرة دي عشان تكون ذكي خليها هي اللي تستشير مامتك في أمور حياتكوا لو وقفت ومش عارف تاخد قرار وده ذكاء الرجل، وقتها بس هتلاقي حماتها هي صحبتها وأختها وحبيبتها والحياة هتختلف 360 درجة.
"الراجل الودني " هذا نوع آخر من الرجال مش هتكلم عليه كتير لأنه غالبا كده قبل اي قرار بيكلم صاحبة عشان يقوله يعمل ايه، وطبعا هنا الكارثة العظمي أن الصاحب ده بيفرض عليه رأي وتفكير شخصيته هو مش شخصية اللي بيكلمه، وده بيكون خوف عليه لكن اللي مش فاهمه انه صاحبه مش هو وهو مش صاحبه، يعني مراتك محبتش دماغ صاحبك هي حبت دماغك أنت، فامشي بدماغك أنت أرجوك، وهنا المفاجئة البنت بتلاقي رد فعل غريب غير الشخصية اللي حبتها وارتبطت بيها، ودي بداية المشاكل، الحاجة الأجمل بقي لما تكون العلاقة مقربة بين الأصدقاء وتلاقي صاحبه ده بيكلمك ويقولك متعمليش كذا واعملي كذا عشان صاحبي اللي هو أصلا زوجك، وقتها لمي شنطة هدومك يا بنتي وارجعي بيت اهلك في هدوء.
طب والحل،، هبدأ بالولد اللي شرحت فكرته عن البنت في أول فقرة، أنت غلطان يا حضرت، البنت كائن بسيط التعامل معه، هي بس تحتاج منك كام حاجة لو أنت شايفها تافهة، والحاجات دي بالنسبالها طوق النجاة في اي علاقة زوجية، هقولك هي عايزة إيه وحاجات بسيطة ومش مكلفة خالص، يعني مش هتيجي تقولك "عايزة ورد يا إبراهيم" ممكن كمان توفرلك حق الورد، وتجيبوا بدالة بسطرمة تتعشوا بيها أحسن.
البنت عايزة الحنية، أيوة الحنية، حسسها إنها بنتك الصغيرة اللي بتدلعها اللي لو غلطت بتقولها اقعدي قدامي أنتي غلطي في كذا وكذا وكذا "بصوت واطي"، لو عاملتها بالأسلوب ده هتقولك صح وآسفة مش هيتكرر تاني .
الأسلوب ده حتي مع البنت العندية اللي مبتحبش صيغة الأمر صدقني هتندهش من الرد وهتفرح بنفسك أوي أنك عرفت تسيطر علي دماغ بنت عندية بأسلوب جميل وبسيط.
الأمان،، لو متجوزين ابعد عن كلمة "هطلقك" لو عملتي كده تاني وقتها ومن غير متتكلم أعرف انك بتخسر حبها بالتدريج يوم بعد يوم، أزاي هتحس بالأمان معاك وأنت كل شوية تقولها كلمة زي دي حتي لو بهزار وأنت كمان بتحبها، ابعد كلمة "طالق " من قاموس حياتكوا.
وأوعي تاخد قرار في وقت عصبية لأنك هتندم عليه، وابعدوا عن رأي الناس، وفكر وفكري في الشخصية اللي حبيتها وعيوبها ومميزاتها، أنت الوحيد اللي قادر بتصليح العيب ده مش "الناس".
في النهاية هقول للبنت فكري واحترمي وحبي، فكري في شخصية شبهك روحها زيك، احترمي الشخصية اللي معاكي حتي لو في اختلاف بسيط ومقبول حاولي تعودي نفسك علي الأحسن معاه، حبي كل حاجة حلوة بيحبها، اهتمي، ركزي، ابعدي عن رأي اصحابك البنات، وخليكي بطبيعتك وشخصيتك، وعلى الرجل أن يحافظ علي البنت، الأمان أهم من الحب صدقني لو في يوم قولتلها مبحبكيش ومش هسيبك هتبقي متأكدة انك بتحبها جدا بس بلاش أسلوب "الضغط" البنت الطيبة، العندية، المسالمة، اي نوع من أنواع البنات بتكرهه "صيغة الأمر"، وافرض عليها رجولتك بأسلوبها عشان تتقبله صدقني هتحس انك ملك في مملكة أنت الحاكم فيها.
