كيفية‬ التعامل مع الزوج البصباص

دايما بنتكلم عن كيفية التعامل مش كيفية التغير .. وخصوصا النوع ده من الرجالة استحالة يتغير لان ده مرض قلوب .. وطول ما القلب بعيد عن ربنا طول ما هيبقى مليان امراض اصعب من دى لكن تعالى نشوف نتعامل ازاى
اولا بس عايزاكى تحددى هل زوجك فعليا بصباص ولا هو بيعمل كده نوع من انواع التقصير منك واهمالك فى نفسك
بصى ربنا لما حب يكافئ الرجال فى الجنة رزقهم الحور العين .. عشان عارف ان الشئ القريب من قلبهم هو النساء ده فطرة فيهم .. الرجل بطبيعته بصرى بيميل للنظر للأشياء الحلوة الا ما رحم ربى طبعا ... معرفتك بطبيعته هتخليكى فاهمة ليه هو مايل للنظر الى النساء بالشكل ده ومش بالضرورة يكون تقصير منك ..
ومن المعنى ده تعالى اسألك ايه الفرق بين الرجل العادى والرجل البصباص ؟
الرجل العادى هو مايل للنظر للنساء لكن بيحاول يغض بصرة .... مرات يقدر مرة لاء بس بيحاول .. الرجل البصباص هو الرجل اللى مفيش فى قاموسه معنى لكلمة غض البصر .. ودايما هتلقيه بيقولك انا ببص من اجل الفضول ومفيش حاجة ومين اللى مبيبصش .
الفكرة لو زوجك طلع زوج عادى حسب الفرق اللى قولته بلاش لو لحظتى مرة انه مغضش بصرة تلوميه جامد ومن ثم توصفية انه عينه زايغة وتكررى قدامه الجملة دى فيبدأ يفكر فيها ويبص فعلا ويبقى ده الطبيعى بتاعه ...
لو طلع زوجك فعلا بصباص .. انسى انه يتغير ..الحاجة الوحيدة اللى ممكن تغيره هى قربه من ربنا .. حاولى بطريقة غير مباشرة تتكلمى عن غض البصر وان مفيش راجل يحب حد يبص لأهل بيته .. بس طبعا من غير ما تحسسيه انه قاعد ياخد منك نصائح .
من غير زعل ممكن يكون التقصير منك اهتمى بمظهرك وكونى دايما متجددة وبلاش التكرار فى الشكل واللبس واسأليه دايما ايه الشكل اللى يحب يشوفك بى ؟
بصى لو زوجك من الرجالة اللى بتحس عبرى عن كمية الحزن اللى بيدخل قلبك لما بتلقية بيعمل كدة ..الراجل مبياخدش باله غير لما انتى تقوليله ويمكن من بعدها يحس شويا ويحاول .
طب لو مطلعش بيحس اتاكدى انك طول ما بتقابلى تصرفاته بضيق هيزيد اكتر حاولى تهزرى وتاخدى الموضوع بشكل فكاهى انا بقول حاولى عشان عارفة ان الموضوع مش سهل .. بس حاولى تضبطى اعصابك قدامه .
اول حاجة بتحصل لى اى زوجة متزوجة من رجل بصباص انها تفقد ثقتها بنفسها رغم ان دى الحاجة الوحيدة اللى هو محتاجها .. اتعاملى وانتى واثقة جدا من نفسك واعرفى ان ده عيب عنده مش عيب فيكى .. متتحوليش لشمعة خلصانة وترجعى تسألى هو بيدور على النور برة ليه؟
دايما دعمية كل ما تلاقى اى تغير للأفضل ظهر عليه واجتنبى الكلام ده ( انت اصلا عينك زايغة / انا مهما اتكلمت معاك انا عارفة ديل القطة عمره ما يتعدل ) وقولى الكلام ده دايما (انا عارفة انك من اصل طيب / انا عارفة انك مترضاش كدة لبناتك ولا اخواتك ولا عليا / انا عارفة انك نفسك ربنا يرضى عنك / انا عارفة انك بتحاول تكون دايما شخص نفتخر بى / كفاية عليا انك بتحاول .
وده الأخير عليكى بالدعاء ثم الدعاء ثم الدعاء... الدعاء بصلاح الحال ده سحر وافتكرى دايما (من ارادت ان يصلح الله بينها وبين زوجها فالتصلح ما بينها وبين الله )