رجل محترم

أنا باشكر الموقع الجميل ده وكل القائمين به لإفادة من يلجأ إليهم، ودي مش أول مرة أكتب لكم وتفيدوني، أنا كنت كتبت لكم إني حبيت شخص وهو حبني وخطوبتنا إن شاء الله بعد عيد الأضحى، والمشكلة تبدأ في إن إحنا كنا كويسين جدا مع بعض وهو كان بيحبني جدا، وكنت بافتخر بحبه حتى لما كنت باغلط أنا أو هو يزعلني كان هو بيصالحني ويتأسف ليّ وكان مهتم بيّ جدا؛ لكن دلوقتي بدأت المشاكل تكتر والزعل على أسباب صغيرة، وكل واحد فينا بيستنى للتاني على أي حاجة، وبعدين نتصالح، ولما نتصالح نوعد بعض إن مش هنزعّل بعض تاني بس بنرجع تاني وهو اتغير معايا عن الأول ولما آجي أقوله كده يقول لي علشان فيه ظروف عندنا، وفعلا كان عندهم ظروف صعبة، أنا عارفة إن المفروض أعذره؛ بس مش عارفة أعمل إيه كل حاجة بيعملها بقارنها بالأول؛ بالرغم إني عارفة إنه بيحبني؛ بس أنا نفسي إنه يحبني أكتر ما بحبه، وأحس إن ما فيش حاجة شاغلاه غيري ممكن تساعدوني وتقولوا لي أعمل إيه وإزاي أرجع كل حاجة زي الأول، وأحافظ عليه إزاي من غير ما أهين نفسي وشكرا جزيلا.
توتو


صديقتنا العزيزة،،
لازم تحطي في دماغك إن الحب مش ممكن يتعايش مع الإهانة, وفي اللحظة اللي بيهين فيها الحبيب حبيبه بيختفي الحب, والإهانة دي بتكون بالضرب أو بالسبّ أو بسوء المعاملة بأي طريقة, وعلشان كده مش ممكن يكون خوفكم وغيرتكم على بعض إهانة, مستحيل يكون الاعتذار للحبيب إهانة, وطبعا مش معقول تكون مصالحتك له لو أنت اللي غلطتي إهانة لك.

أنتم داخلين دلوقتي على مرحلة جديدة من علاقتكم, هو خلاص اطمن إنك له, وبدأ يتعامل معاكِ من غير حساسية, ودي عموما طبيعة الرجل؛ لأنه بيحب يحس إن خطيبته أو زوجته شخص يقدر يتصرف معاها على طبيعته, من غير حساسية ودبلوماسية ورسميات, طبعا ده مش بيكون صح في جميع الأحوال, بس هو بيفترض إنها هتتحمله وقت غضبه وتعبه, وهتقدّر الضغط اللي هو فيه, ولازم تحاولي تعملي ده, طالما إن فيه حب بينكم, يبقى ما فيش داعي للقلق, واحدة واحدة هتستقر الأمور بينكم.

وعلشان كده مهم جدا تفهمي شخصية خطيبك وتدرسيها كويس, من خلال المواقف اللي بيحكيها لك عن حياته في شغله ومع أهله وأصدقائه, ومن خلال مواقفه معاك أنت, اعرفي اللي بيزعله واللي بيسعده, واطلبي منه يعمل زيك, اتكملوا بصراحة في كل اللي بيضايقك منه وبيضايقه منك, ولازم تتفقوا على مبدأ، وهو إنكم مش ممكن تزعلوا من بعض فترة طويلة, يعني لو اتخاصمتم بالليل لازم تتصالحوا قبل الصبح ما يطلع, وما فيش داعي الموضوع يكبر ويعرف بيه أكتر من طرف, طالما إن المشكلة بتبقى بسيطة ومش محتاجة تدخل الأهل, وكمان لازم اللي غلطان يعترف بغلطه ويعتذر, من غير ما يفكر إن الاعتذار ده مهما طالت مدته أو مهما كانت كلماته فيها إهانة له وجرح لكرامته, ولازم الطرف التاني يتقبل الاعتذار من غير ما يقاسي, ومن غير ما يزود اللوم والعتاب اللي ممكن يخلق مشكلة جديدة.

صديقتي:
الحالة اللي أنت فيها دي سببها حبك الزيادة له, بس خدي بالك, أحيانا اللي بيزيد عن حده بيتقلب ضده, بلاش خوفك على حبك له, بسبب بعض طباعه اللي ممكن تكون اتغيرت لظروف خاصة, أو بسبب تقصيره في بعض الأمور غصب عنه أو بإرادته أحيانا تتحول لخوف منه؛ لأن ده هيبعدك عنه؛ فقربي له وقربيه منك, وادعي ربنا يبارك لكم ويقرب ما بينكم, وحسسيه إنك بتحبيه ومقدرة ظروفه، وإنك لما بتزعلي منه بتكوني في الحقيقة بتزعلي على الحب اللي بينكم وبتخافي عليه؛ فاتكلمي معاه بصراحة في كل حاجة مخوفاك.

واطلبي منه بلاش يعاملك بقسوة حتى لو غلطتي، وأنت كمان اوعي تقسي, وتأكدي إن ده هيقربك منه ومستحيل يجرح كرامتك؛ لأن كرامتك من كرامته, والراجل المحترم مش ممكن يهين خطيبته أو زوجته مهما حصل, وأنت أكيد اخترتِ راجل محترم, فربنا يوفقكم ويجمع بينكما في خير.