هيثم طه يكتب : اشتغل على نفسك و نميها قبل .. ما التراب يكتر عليها

خلونا نجيب كبايه ميه من الفرنساوى النضيفه الغاليه قوى دى و نسيبها في اوضه مقفوله 6 شهور و بعد كده هينفع نشربها؟؟متخيل شكلها ؟ اهى دى دماغك لو ما إتشغلتش عليها و طورتها بصوره مستمره .
علشان تطور نفسك صح لازم تكون عندك حاجه إسمها الدرايه بالذات يعنى فاهم نفسك صح و عارف إنت عايز تقدم على وظيفه إيه و عارف إيه إلأى ناقصك بالظبط .
هنا يا معلم يأتى دور الإنترنت ..تدخل على النت و تكتب إسم الكورس او الشهاده إلأى محتاجها و تسال عنها .. التكلفه؟ الوقت المطلوب؟؟ الاماكن إلى بتدرسها؟ الناس إلى اخدوها عملو بيها إيه؟
و هنا فيه غلطتين ارجو إنك ما تقعش فيهم اول واحد يا سيدى هو الشهاده المعتمده ..ده وهم .. مراكز الكورسات بتستغل إن مش كل الناس عندهم درايه و بيبعو لهم كورسات غاليه جدا مقابل ورقه ماحدش هيبص عليها .. انا عمرى ما شفت شركه بتسال موظف عن شهاده كله بيعمل إمتحانات ..بمعنى بتعرف إنجليزى حل الإمتحان ده ... بتعرف إكسيل إعمل لى المعادله دى و هكذا كلنا عارفين حوارات الغش في ال/تحانات و الشهادات إلى بتضرب فمش هنعين حد بناء على ورقه .
الغلطه التانيه هى إنك تضيع عمرك و فلوسك في كورسات و ما تشتغلش بيها ... إسمع منى إلى ما بتشتغلوش بإيدك بتنساه على طول سوا كان لغه و كلنا عارفين إن اهم حاجه في اللغه هى الممارسه او حتى كان كورس تيكنيكال كله بيتنسى يا معلم فما تضيعش وقت و فلوس غير في حاجه تقدر تمارسها على طول علشان ما تنساهاش .
خلاااااااااص إتطورنا و اخدنا الكورس و إتعينا و الدنيا حلاوه.. حلاوه؟؟ حلاوه!! لا مش حلاوه ما تنساش قصه كبايه الميه ..دايما بص حواليك و إعرف السوق محتاج إيه و إشتغل على نفسك و نميها قبل التراب ما يكتر عليها .