مجرد الحلم خطوة نحو تحقيقه

أنا هافضفض زي ما إنتوا كاتبين؛ بس مش في الحب..؟ أنا بجد تعبان، ومش عارف أعمل إيه. أنا لسه متخرج ومعايا بكالوريوس محاسبة، عاوز أشتغل، وعاوز أبدأ حياتي على طول، مش عاوز أقعد في البيت. أنا الحمد لله ماديا كويس؛ بس أنا عاوز أشتغل عشان نفسي ومش عارف أبدأ منين؟
أنا نفسي أشتغل في الدعاية والإعلان، ما آخدتش كورسات فيها؛ بس حاسس إن مستقبلها كويس، وأنا لما باقعد على الكمبيوتر بحب الجو ده، وعندي أفكار إعلانات، ونفسي في المستقبل أفتح مكتب دعاية وإعلان.
بس أبدأ منين؟ أنا أول ما خلصت امتحانات اشتغلت في مطعم؛ بس كانت تجربة وخلاص جربت. أنا عاوز أعمل حاجة تبقى خطوة لمستقبلي.. يا ريت تساعدوني، عاوز أعرف إيه الكورسات المهمة عشان أشتغل في الكارير ده..
مش عارف إنتوا ممكن تساعدوني ولا إيه؛ بس أنا جايز اتعودت لو فيه حاجة أكتب هنا. أنا باتابع الموقع من 5 سنين تقريبا. أنا هواياتي الشعر والقراءة والكمبيوتر هاستنى تردوا عليّ يا ريت ما تتأخروش. السلام عليكم.
صالح

صديقنا العزيز صالح، أهلا بيك دايما وبفضفضتك، وأنا شخصيا سعيدة جدا إن الفضفضة مش في الحب "بتاع اليومين دول" وإن كان حب من نوع آخر، أنا شخصيا باسميه "حب الحياة".
أول حاجة: تعالى ننسى الكلام السلبي اللي دايما بنقوله لنفسنا وأوله كلمة "أنا تعبان ومش عارف"، تعالى نقول لنفسنا دايما "أنا إنسان قوي وهاقدر إن شاء الله أعمل حاجة لمستقبلي حتى لو كان الطريق صعب، أنا هاتحمل وهاكمل وهاحقق أحلامي"، صدقني السطرين دول ممكن يغيروا حياتك تماما لو رددتهم على نفسك من وقت للتاني؛ بس مش كل حاجة.. دي مجرد بداية، أحيانا بعض ناس بيسموها "النية".
تاني حاجة مهمة جدا: هي إن إنت تحدد إنت عاوز إيه؟ قم هات ورقة وقلم واكتب في 3 أسطر متخيل نفسك إزاي على وضعك الحالي وبظروفك الحالية بعد 5 سنين.
دلوقتي حالا... ما تستناش لما تقرأ نهاية الرد.
.
.
.
.
دلوقتي تعالى نكتب سوا في تلات أسطر برضه الصورة اللي أنت نفسك تكونها بعد 5 سنين... حلمك:
دلوقتي عاوزاك تطرد الصورة الأولانية خالص من ذهنك وما تفكرش غير في الصورة التانية وتحفظها كويس جدا في رأسك.
دلوقتي نبدأ في التخطيط والتنفيذ، إزاي بقى نوصل للحلم ده؟
أحسن طريقة تعرف بيها تشتغل إيه؟ هي إعلانات الشغل نفسها هات أهرام الجمعة أو الوسيط أو من على النت؛ بس المرة دي إنت مش هتدور على شغل، أنت هتدور على كارير:
امسك في إيدك قلم ودور على وظائف في مجال الدعاية والإعلان، وابدأ حط دواير على كل الوظايف الممكنة، وشوف أسماءها مثلا "مصمم جرافيك، مونتير، آرت كاريتور" وشوف أنت عاوز تشتغل إيه بالظبط؛ اسأل نفسك أحب التصوير والتصميم ولا الفيديو ولا وضع الأفكار والتأليف؟
تاني خطوة هتبص على متطلبات الوظيفة فهتلاقي مكتوب مثلا: "خبرة كاملة ببرامج الفوتو شوب والفاينال كات مثلا" أنت كده عرفت المفروض تاخد كورسات في إيه؟
الحاجات دي حط لها ساعتين أو تلاتة، اقعد فيهم على النت وقرر إنك تركز تماما تقرا إعلانات الشغل في مجال الدعاية والإعلان. ركز على معرفة اسم الوظيفة ومتطلباتها وسيبك من بند الخبرة. وما فيش مانع تاخد بالك حجم المرتب.
ساعات لما الواحد ما بيكونش عنده خطة أو حاجة معينة عاوز يعملها، دي بتكون فرصة كويسة جدا إنه يختار اللي عاوز يكونه فعلا. خد فرصتك واختار طريقك، اختار مسمى وظيفتك الجديدة اللي هتخليك إنسان ناجح ومعاك كل اللي بتحلم بيه بعد 5 سنين واعرف متطلباتها كويس قوي: لو لغة إنجليزية، أو برامج كمبيوتر، أو قدرات خاصة محتاج تنميها، زي تقديم العروض والتحدث أمام جمهور.
وبانصحك كمان إنك تقدم في كورس "تنمية المهارات الأساسية اللازمة لسوق العملBBSA ( التابع لجمعية جيل المستقبل؛ لأنه مش هيكلفك أكتر من 300 جنيه؛ لكن في الوقت نفسه فايدته عظيمة. ومكان التقديم في جامعة القاهرة أمام كلية الإعلام. وربنا معاك وتلاقي نفسك والشغل اللي بتحلم بيه.