روى عمر جابر، لاعب نادي الزمالك، للمرة الأولى الأسباب الحقيقية وراء رفضه المشاركة في مباراة إنبي باستاد الدفاع الجوي التى راح ضحيتها 19 من مشجعى وايت نايتس. قال جاير في مداخلة هاتفية لبرنامج "هنا العاصمة" :" وإحنا في الأتوبيس، كان فيه ضرب غاز وقنابل مسيلة للدموع، كانت حاجة صعبة جدا حاولنا نفتح باب الأتوبيس وقعدنا نجري بسبب الدخان فى الصحراء إلى جاءت مدرعة أخدت اللاعبين". وأضاف: "قالولنا محدش مات واشتباكات وانتهت.. أنا قررت عدم لعب المباراة وأنا في الأتوبيس بسبب مشهد قنابل الغاز والدخان لأننى أنا صحيًا ونفسيًا غير مؤهل ولم أكن أعرف أن هناك ضحايا". وتابع:" لو كنت أعرف إن فيه حد مات كنت هقول لباقي زمايلي في الفريق، لإني عارف إنهم رجالة ومكنوش هيلعبوا .. أبلغت الجهاز الفني للفريق بعدم قدرتى على اللعب ولما نزلت التسخين حسيت إني في حلم مش في ماتش.. وأخدت حقنة علشان مكنتش حاسس بنفسي ورغم كده الحقنة معملتش حاجة فيّ، والجمهور قعدوا يشتموا اللعيبة علشان بيلعبوا، والجمهور بعدها شجعني، وقلتلهم علشان خاطري محدش يشتم اللعيبة.
