الجواز ده مالوش كبير فعلا !

ازيكم يا أساتذة يارب تكونوا بألف خير
المشكلة اني اتجوزت من سبع شهور .. جديد لسة .. لكن واضح كدة ان موضوع الجواز ده مالوش كبير اكنه فخ بالظبط واتنصب للمغفلين اللي زيي مع ان مراتي بصراحة فيها ميزات كتير لكن انا اللي مش قادر أو مش عارف أو مش طايق أتقبل فكرة المسئولية وان فيه حد قاعد على دماغي ليل نهار خصوصا ان أهلي متوفيين من زمان وأخواتي متجوزين وكنت عايش في بيتنا لواحدي ملك زماني ده أصحابي كانوا حاسديني ويوم فرحي قالولي إحنا ماتلنا الرايق بتاعنا ههههه العيال قلبهم كان حاسس باللي هيجرالي .. المهم انا دلوقتي مش طايق نفسي انا مليش في الجو بتاع هاتلي وانت راجع كيلو موز ههههههه ولا تعالى معايا للدكتور ماتروحي يامه مع نفسك هوة انتي عيلة صغيرة ؟؟ غريبة والله !! لا لا لا الموضوع تقيل جداً على قلبي وشكلي كدة هطلق في البدري قبل ما البس في عيل ولا حاجة ولا انتم رأيكم ايه ؟ وشكراااااا
عصام

فضفضة
محررة الصفحة .. نيفين حجازي
شوف يا أستاذ عصام .. المسئولية شئ ممتع مش زي ما انت متصور .. المسئولية حتى وان كانت تقيلة بس بتخلي الإنسان حاسس انه عايش على وش الدنيا زي الشغل بالظبط بكل متاعبه وهمومه وكل مشكلتك هي انك مش متعود بس على النوع ده من المسئولية لكن بالقطع الحياة الأسرية المنظمة شئ جميل ومريح وزي ما تفضلت وقلت ان زوجتك فيها مميزات يبقى لازم تعود نفسك على شكل الحياة الاجتماعية الجديدة وشوف الجانب الإيجابي الموجود فيها هتلاقي بعد فترة مش بعيدة الدنيا اختلفت للأفضل .. ولو كلامي غلط أو مش جاي على مزاجك انا هسالك سؤال .. لما كانوا اهلك عايشين وانت قاعد في وسطهم كانت الحياة عاملة أزاي ؟ ولما كان حد فيهم بيتعب وتنزل معاه للدكتور كنت برضه بتحس بان الموضوع مهمة تقيلة ولا واجب عليك ومستمتع بيه كمان ؟ هية دي مش مسئولية ؟ ولا لما المسئولية اتحولت في اتجاه الزوجة بقت تقيلة ؟ طيب ما ده واجب برضه بعدين إحنا مش بنتكلم على واحدة زميلتك دمها تقيل إحنا بنتكلم على مراتك وبكرة ان شاء الله تبقى ام أولادك اللي هتتهنى بيهم .. انا رأيي تراجع نفسك وتستهدى بالله كدة وصدقني حياتك هتبقى افضل بكتير عن زمان اللي عيشته لواحدك بعدين خد بالك إحنا بنكبر في السن مش بنصغر ومع مرور الوقت الواحد لازم يحتاج سند ليه .. الدنيا يا أستاذي العزيز من المستحيل إنسان يقدر يعيش فيها لواحده .. صلي على النبي كدة وخليك لطيف مع نفسك ومراتك وبص لقدام بلاش تبص تحت رجليك وربنا يكرمك ويهنيك بحياة زي الفل ان شاء الله خراب البيوت مش سهل خصوصا ان مفيش مشكلة أصلا .
Fadfada@elfagr.com