السلام عليكم ورحمة الله وبركاته ،، مشكلتي أستاذة نيفين بدأت من بعد وفاة جوزي وأخواتي الرجالة الاتنين وابوية في حادثة عربية كلهم كانوا في نفس العربية ربنا يرحمهم جميعا ويصبرني .. ومش فاضل من عائلتي غير أمي واخويا الأكبر وعندي ولد لسة طفل .. ومشكلتي دلوقتي ان أخويا ده مش راضي يسلمني ميراثي في ابويا بحجة انه الكبير وهوة أولى يراعي فلوسنا ويشغلها وان الستات أصلا ملهمش حق في الميراث وانه هيديني الفايدة بتاعتي من الأرباح كرم اخلاق منه مش اكتر .. طبعا اتكلمت معاه انا وأمي كتير من غير فايدة وأنا بطولي في الدنيا بعد ربنا .. و عايزة اربي بنتي ومش عارفة وأمي ست كبيرة وقلبها وجعها من المناهدة في الموضوع ده ،، انا شايفة انه بيستهبل وأكل حقي رسمي لكن برضه مش قليل علية اني ادخل مع أخويا في مشاكل كبيرة وخصوصا من النوع ده لكن انا كمان من حقي أعيش واخد حقي الشرعي . انا دلوقتي في ورطة ومش عارفة اعمل ايه ارجوكي تفيديني بحل وشاكرة مجهودك . س. ط
فضفضة محررة الصفحة .. نيفين حجازي قبل أي كلام لابد من الاعتراف بان اخوكي الأكبر خالف شرع الله ولا يوجد في الدين ما يحرم المرأة من الميراث وبما ان لديه هذا القدر من الجرأة ليتعدي على حقوق البشر إذن لابد ان يكون لديك ايضا نفس القدر من الجرأة لاسترجاع حقك وان اضطرك الى رفع قضية ولا بديل لهذا في حالة ما تحدثتي معه للمرة الأخيرة وذكرتيه بدين الله خاصة فيما يخص الميراث .. سيدتي الفاضلة الحل اما في ممارسة الضغوط عليه أو اللجوء الى القضاء واعتذر لك عن عدم رغبتك بالدخول في مشاكل من هذا النوع لكن هو من حلل لنفسه من البداية ما حرمه الله وفي هذه الحالة انتي لا تحاربي اخوكي بقدر ما تستردين حقك الشرعي .