كل ما أدلعها .. تركب دماغها !

السلام عليكم
مشكلتي في حبي الشديد لزوجتي وبسبب ده هية تقريبا كدة ركبت ودلدلت رجليها , بحبها لدرجة مش بقدر ارفضلها طلب وانا طبعي زي طبع ابويا بنحب ندلع ستات العيلة .. لكن لما ابويا كان بيعمل كدة مع أمي كانت بترد المعروف والدلع ده كله بإهتمام ورعاية وحنان وود .. لكن مراتي بتردهولي بإنها استغلت الموضوع وطلباتها ملهاش حدود ومزوداها حبتين في الإمارة على الفاضي والمليان ومع الوقت ابتدت تطنش على واجباتها ماهي خلاص اتمرعت .. وطبعا الكلام ده جاب مشاكل ما تتعدش .. المهم انا دلوقتي مش عارف اعمل ايه وخايف اشد عليها شوية حياتنا تبوظ أو لا قدر الله نوصل الى مرحلة الطلاق , وعايز اقول لكم حاجة مهمة .. انا من الرجالة اللي بحب أدلع الست وزي ما كنت بأدلع أمي وإخواتي البنات أكيد كان لازم اعمل كدة وأكتر مع مراتي ام أولادي بس للأسف الظاهر مليش نصيب في زوجة تقدر ده .
إسلام

فضفضة
محررة الصفحة .. نيفين حجازي
أستاذ إسلام .. أنا مش عارفة بصراحة أرد أقول ايه لكن ممكن أسيب الرد المرة دي بإختياري لصديقات فضفضة اللي انا حاسة بيدور في دماغهم إيه حالا بعد قراءة رسالتك .
ونصيحتي بعيدا عن الردود .. إنك لازم تفرمل الحنية بتاعتك دي شوية لغاية ما زوجتك تعيد حساباتها من جديد .. وإحنا كمان كنساء بالتأكيد هنعيد حساباتنا بسببك من جديد خصوصا المتزوجات منا .. أستاذ إسلام .. .. الله يسامحك .