أبوية ده منه لله .. عايزة انتقم منه !

السلام عليكم .. مشكلتي الآتي : والله انا محرجة حتى اقول الكلام دة بينى وبين نفسى بس انا محتاجة افضفض
فى البداية انا عندى 23 سنة متجوزة من سنة وحامل لسة فى شهر ونص ادعولى الحمل يثبت ويتم على خير .. احنا اتولدنا انا واخواتى مع اب بخييييييل جدا وامى كذلك كانوا بيستخسروا فينا الاكل مع انى والدى كان تاجر جملة عطارة كبير ومعاة فلوس بالهبل وبيشترى ارض كل شوية بس كان حارمنا من كل حاجة فى حياتنا كان هو وامى بيأكلونا مرة واحده فى اليوم (الغذاء فقط) واللى هو عبارة يوميا عن فول او طعمية او عدس او عسل اسود او بطاطس مقلية ومسلوقة نوع واحد بس من اللى ذكرتة يوميا طول الشهر ومحدد لنا كمان عدد الارغفة للى ناكولها غير مسموح لحد يجوع بالليل ويقول انا جعان ممكن ينشتم وينضرب او يخش من سكات يسرق رغيف وياكلة حاف ويتخمد
حتى كنا محرومين من كوباية شاى او اى مشروب
الطبيخ بيبقى اول خميس فى الشهر امى كانت بتطبخ طبيخ كتيييييييييييييييييييير زى بطاطس او كوسة مثلا من اللى هيا دبلانة فى السوق فى اخر النهار دى على فرخة واحدة او نص كيلو لحمة مجمدة ونقعد ناكل فى الطبيخ دة 3 ايام لحد ما نمسح الحلل مسح كأنها مغسولة واحنا ميتين من السعادة ان فية طبيخ اللى احنا مكناش بنشوفة اصلا ياما وانا صغيرة كنت هموت على كيس شيبسى او باكو بسكوت شمعدان (كان مشهور ايامها) او ازازة حاجة ساقعة بس مكنتش بلاقى حد يجيبلى خالص واعيط وانضرب
كتير وانا صغيرة كنت بضطر اسرق الاكل من زمايلي فى المدرسة لانى كان بيبقى نفسى فية اوى ومكنتش عارفة انا بعمل كدة ازاى بس كان غصبن عنى .. عمرى ما خدت سندوتش معايا وكنت ببقى جعانة اوى فى المدرسة اللبن مكناش بنشوفة الا اول يوم العيد بسسسسسسسسسسسسس ياما اصحابنا انا واخواتى اتريقوا على جزمنا المقطعة وهدومنا اللى كانت بتبقى صغيرة علينا اوى وضيقة وقديمة ومتخيطة فى كل حتة لما دخلت الثانوى كان بيمشينى 4 محطات مترو عشان اروح المدرسة كل يوم رايح جاى عشان ميدنيش فلوس اركب او اعمل اشتراك مترو حتى
كنت مفضوحة فى المدرسة عشان كان بيجى كل سنة يعمل بحث حالة وانة ممعهوش ويضحك عليهم ويكدب وميدفعش المصاريف لحد فينا وياخد كتب المدرسة ولبس المدرسة كل دة ببلاش وساعات اعانات من المدرسة فى المواسم كمان بس اصحابى كان بيعرفوا القصة لما الاخصائية تيجى تندة عليا فى الفصل وابويا واقف معاها وكنت مفضوحة جدا كنا بنسمع عن الحاجات ومكناش بندوقها ولا نشوفها حتى كحك العيد وحلاوة المولد والحاجات دى كنا بنتفرج على عيال الجيران وهما بياكلوها واحنا ننام معيطين عمرى ما خدت مصروف زى كل العيال الا مثلا 3 او 4 مرات فى الشهر ومصروف ميشتريش اى حاجة ولا كيس شيبسى حتى
كان نفسى اشترى لبس عيد زى باقى التلامذة مرة واحدة فى حياتى.. كان بياخدنا الجمعية الشرعية اللى هو كادب عليهم برضة ومفهمهم انة مريض وممعهوش مع انة ساعتها كان بصحتة .. الجمعية الشرعية كانت بتدينا لبس عيد معفن كدة اى حاجة والسلام ومكناش بنختار حاجة خالص بسببهم كلنا عضمنا طلع ضعيف واى خبطة فينا تلاقينا اتكسرنا ونتجبس وسنانا بتتكسروتتفتفت لوحدها كدة من قلة الكالسيوم فى جسمنا ولاننا مكناش بنتغذى حسبى الله ونعم الوكيل كنت بكرهم اوى اللى هما ابويا وامى
وكانت دايما كل احلامى وانا نايمة وانا صغيرة انى معايا مسدس وبقتلهم لما كبرت عرفت ان امى ملهاش ذنب وهو اللى طبعها بطبعة بس هيا عمرها ما اتخانقت معاه وكانت راضية عادى
المهم عرفت جوزى الحالى عن طريق صاحبتى وبصراحة انا محبتهوش فى الاول بس كنت عاوزة اتجوز وخلاص واسيب البيت دة ... كانت طاقة فى دماغى انى اسيب البيت واهرب .. هم يضحك وهم يبكى .. ربنا بعتلى جوزى دة نجدة من الفكرة المهببة دى ... خلينا فى المهم اتجوزتة وبصراحة حبيتة بعد الجواز وابويا برضة فضحنى ادمة جامد او ومجهزنيش يجى ب 4 الاف جنية على بعض .. حاجات بسيطة اوى ورخيصة اوى اوى
حتى سلايفى بتريقوا عليا وبيقولوا عليا (ام كرتونة) مسمينى كدة على اساس ان عفشى كلة كانوا كرتونتين تلاتة وجوزى هو اللى جاب كل حاجة ربنا يخلية والحمد لله جوزى غنى جدا واهلة ناس اغنيا ومحترمين وشغال شغلانة محترمة فى سفارة وكريم جدا وبيحبنى اوى خصوصا بعد الحمل وانا بصراحة اتجوزتة عشان غنى بس حبيتة دلوقتى انا بقى مشكلتى دلوقتى تتلخص فى النقط دى
* من ساعة ما اتجوزت انا بطلت السرقة الحمد لله وتبت وعرفت انى كنت بسرق غصبن عنى من الحرمان والجوع ولما بقى معايا مبقتش اعمل كدة خالص بس بقيت مبذرة اوى وبشترى حاجات من غير لزمة وبرمى نص الاكل فى الزبالة وانا سعيدة بكدة جدا بقى عندى حالة جنون بالشرى عاوزة اشترى اى حاجة وخلاص حتى لو مش محتاجاها وجوزى مبيقولش حاجة بس بقيت حاسة انى ابتدى يدايق لانى بقيت مسرفة اوى اوى ومبذرة من غير لزمة ومش قادرة امنع نفسى صدقونى وياريت حد يحس بيا
* باكل بشراهة كبيرة جدا جدا وجسمى ابتدى يبوظ وزدت بتاع 8 كيلو وانا اصلا جسمى كان زى الموديل بس مش قادرة امنع نفسى انى اكل اعمل ايةةةةةةةةة
* انا بكرة ابويا جدا وكل ما افتكرة ادعى علية وعلى كل حاجة عملها فينا مع انة دلوقتى مريض ومش بيخرج من البيت وتعبان خالص وعندة الكبد والسكر والضغط وتعب فى القلب بس انا بكرة جامد اوى ونفسى انتقم منة وبدعى علية
* ينفع اخد فلوس من فلوس جوزى واديها لاخواتى لانهم مرحومين لسة وبيتعلموا ومش بيشتغلوا وانا الكبيرة على فكرة وابويا وحتى وهو بيموت هوة هوة حارمهم وانا اتكسف اقول لجوزى هات فلوس اديها لاخواتى عشان محرومين ومش بياكلوا
اتمنى تنزلوا موضوعى وتردوا عليا بسرعة عشان الحق اشوف الردود قبل ما جوزى يجى من برة
فضفضة
كان الله في عونك والحمد لله الذي عوضك بالزوج الصالح .
صغيرتي .. أشعر تماما بالمرار الذي تسبب فيه والدك لكن نصيحة لوجه الله لا تتركي لقلبك الفرصة في أن يعرف الكراهية والإنتقام وإلا انت الخاسرة فيما بعد , وجاهدي نفسك في الدعاء لوالدك بالهداية فما رأيك في أن نكسب إنسان يمن الله عليه بالهداية ؟ .. أظنه الأفضل .. صحيح ؟ .. لا تظني في ردي السذاجة ولا المثالية بقدر ما هو ردا واقعيا , الدنيا سلف ودين كما يقول المثل وبعد إنجابك لطفلك الأول إن شاء الله لا تظني في نفسك المثالية مع أبنائك فكلنا نقع في الخطأ ولا تدرين بأي شئ ستكوني قاسية عليهم .. كوني رحيمة بأبوكي فلا تعرفين عن نشأته ما جعله هكذا .. هو بالتأكيد وقع في فخ الضغط العصبي الذي دفعه إلى غل يده على أولاده .. ويكفيه غضب الله عليه .. كوني رحيمة بأبوكي وإدفعي نفسك على مسامحته لاتدري ماذا فاعلة الأيام بك .. أقول لك نصيحتي وانا اعي تماما ما قدر الصبر على الإبتلاء .. كوني على قدر الإبتلاء وإصبري الصبر الجميل كما أوصانا الله فتربحين الدنيا والآخرة .. صلي لله وادعيه بالسجود ان يدركك التسامح فالله قادر على كل شئ .. أما فيما يخص تبذيرك المبالغ فيه .. صحيح انك معذورة لكن تذكري دائما الله فكما كنت من المحرومين هناك من هم أكثر حرمانا منك بخلاف المرض وقلة الحيلة وما أدراك بقلة الحيلة وبرغم ذلك يحمدون الله .. إذن بعد ان من الله عليك بكل هذا الخير .. قدمي يد العون لمن هم أحق بدلا من التبذير ولا تنسي مشاعرك وانت جوعانة ومحرومة يوما ما .. ألا ينشق صدرك من الشفقة على هؤلاء ؟ .. أرجوكي لا تأخذي كلامي بمحمل السخرية ولا الإستهزاء فوالله أنصحك بما أرضاه على نفسي وأهل بيتي .. ولك كل التقدير والله الموفق.
نيفين حجازي