بسبب الدشاش.. أحمد البنداري يكشف مفاجأة حول خلافه مع محمد سعد

كتب المخرج أحمد البنداري، منشورًا توضيحيًا -عبر حسابه الشخصي على موقع التواصل الاجتماعي فيسبوك- ليوضح من خلاله الجدل المُثار حول فيلم الدشاش ل محمد سعد، بعدما حذر من التعامل مع الأخير في منشور سابق.
وكتب البنداري، في منشوره عبر فيسبوك: «توضيح للسادة الصحفيين انا ماقولتش الفيلم فكرتي أو تأليفي.. هو تأليف جوزيف فوزي والبوست موجود ماتعملوش أي edit مفهوش الكلمة دي خالص ولا حتى تلميح لكده أنا سردت اللي حصل والمجهود اللي بذلته و الغدر اللي حصل فقط».
وتابع أحمد البنداري: «وتوضيح تاني كان المفروض هينتج الفيلم تحالف انتاجي متكون من: الماسة - هاني رشاد، تريو - محمد نقرو، رن فيلز - كريم الشربيني، الجوريو - هيثم حسن، ديجيتال لاب - عز غنيم».
واستطرد قائلًا: «و الصديق المشترك هو محمد كرم المقيم في دبي وهو صديق شخصي لمحمد سعد وصديق مقرب جدا مني وكل الناس دي تشهد اني ماشتغلتش على الفيلم اسبوع واحد فقط زي ما المؤلف قال.. يمكن هو يقصد بعد قعدة محمد سعد هما اتفقوا بعد اسبوع انهم يعملوا الفيلم من غيرنا بدون علمنا لأن بعد اختفاء سعد كنا مرشحين ممثل تاني خالص».
وأوضح أحمد البنداري، قائلًا: «بالمناسبة في الأعراف السينمائية بيتكون ارتباط شبه كاثوليكي بين المخرج والمؤلف مادام المخرج ملتزم بالعمل على الفيلم بصرياً بالتوازي بتسويقه عند المنتجين و ده بيثبت الجدية في التعامل.. فلما آخد سيناريو وآشتغل عليه بصريا بالشكل ده وأسوقه عند المنتجين بيبقى صعب المؤلف يقول "من حقي اسحبه في اي وقت" او "اصل النجم مش عايزه" دي كده نبقى باعة جائلين مش سينمائيين خالص».
وأضاف البنداري: «النجم اللي انا رشحته و كلمته وأنا اللي أخدت معايا المؤلف احتراماً ليه.. المهم بعد المجهود المبذول و المذكور في البوست الأصلي بالتفصيل.. انا حاولت أستثني المؤلف من الموضوع ده حفاظاً على صداقتنا اللي خانها قبل كده وأنا سامحته.. لكن معرفش ليه هو خد صف الناحية التانية لتاني مرة معايا من غير اي أذى من ناحيتي بالعكس أعتقد انه ماشفش مني غير كل خير والتزام».
منشور أحمد البنداري
أحمد البنداري يحذر من التعامل مع محمد سعد
وكان أحمد البنداري، كتب في منشور سابق عبر فيسبوك: «فيلم الدشاش ده اصلا اسمه كعب داير و كان مترشحله نجوم تانية يا ريتني كنت روحت لأي حد فيهم.. المهم عن طريق صديق مشترك وديته لمحمد سعد تحت اسم "الحاوي" و كان سعد ترشيحي انا رغم تحذير ناس كتير من التعامل مع سعد كنت مصمم عليه و شايفه نقلة ليا وليه».
وتابع أحمد البنداري: «المهم بعد 3 شهور شغل عليه من اللف على المنتجين بالتوازي شغل على التصور البصري كله directors treatment و visual file و شكل الشخصيات واللبس والديكور وطريقة الإخراج والمونتاج وال color pallet وستوري بورد كاملة علشان أروح للنجم بتصور كامل للفيلم مش رايحين نهزر يعني.. المهم بعد مكالمات ومواعيد كتير روحتله البيت أنا والمؤلف (اللي مش بالوم عليه لأنه بقاله كتير مستني فرصة من نجم المفروض انه كبير)».
واستطرد البنداري، قائلا: «المهم.. المفروض السيناريو كان عاجب سعد جداً ومتحمسله جداً خصوصاً انه كوميدي دراما مش فارس كوميدي زي كل افلامه.. وكان في شركة كبيرة ومنتج كبير موافق على الفيلم بحذر طبعاً لسمعة محمد سعد مع المخرجين لكني طمنته وقولتله ماتقلقش سعد عاجبه الفيلم ومتفقين على الخطوط العريضة كلها وكان شرط سعد الوحيد أن المنتج مايعترضش على أجره الكبير.. ده كان كلامه بالحرف».
وأضاف: «المهم المنتج ده كلم سعد واداله أكتر من ميعاد وسعد لغى كل المواعيد لأسباب مختلفة.. لحد ما في يوم كلم هو المنتج وقاله أن الفيلم مش عاجبه وأن السيناريو ضعيف وأنه عايز يبقى يحدد معاه ميعاد على فيلم تاني (لما نجم المفروض كبير يقول لمنتج أن الفيلم اللي بقالي شهور مجننه معايا فيه أنه فيلم ضعيف ووحش هو قتلي فرصي مع المنتج ده وقتها) المهم.. لما المنتج كلمني وقالي استغربت جدا لأن ده عكس كلامه 100٪؜».
محادثات الواتساب
وتابع أحمد البنداري، قائلا: «المهم بعدها كلمتة قالي نفس الكلام انه الفيلم مش عاجبه ماحبتش اطول في المكالمة خصوصاً أن ده حقه أنه يعجبه فيلم أو ما يعجبوش مع أنه مقالش كده من الأول بالعكس والحمد لله على نعمة التكنولوجيا الواتساب كله موجود.. بس الغريب أني اكتشف بعد كدة أن الدشاش هو الحاوي مع مخرج تاني ومنتج تاني ليهم كل الإحترام و التقدير والتمنيات بالتوفيق.. مع الفارق في نجم كبير جدا مش هقول اسمه روحتله بفيلم.. شوفت منه صراحة ووضوح في اللي عاجبه واللي مش عاجبه وقاري الفيلم كويس مش حد قاري وحاكيله الفيلم ده غير التزام رهيب في المواعيد مع أنه حقيقي مش فاضي لحد آخر 2025 يعني ممكن مانشتغلش الفيلم ده أصلاً مع بعض لكن عرفني ليه الراجل ده محافظ على نجوميته بقاله 20 سنة تقريباً لأنه بيسمع للأخر وبيقرأ كويس وملتزم لأقصى الحدود».
واختتم أحمد البنداري، منشوره قائلا: «ربنا يوفق الجميع وده كان تحذير لأي صانع أفلام من التعامل مع محمد سعد من غير ما يكون مأمن نفسه ومجهوده 100٪؜ لأن مجهودك والتزامك وصدقك دول شرفك في الشغلانة دي.. وهما اللي هيخلوك تعرف تحط صوابعك في عين التخين وتقوله كده غلط وعيب وما يصحش كده أنت المفروض كبير والكبير مابيلفش ويدور.. عموما انا بعد الموقف ده و موقف شبيه حصلي السنة اللي فاتت بدعي و بقول يا رب 5 مليون دولار ونبطل شغل».