انضميت ل الإخوان في الكلية.. اعترافات زوج عائشة الشاطر: درست مناهج الجماعة وبقيت عضو عامل

حصل "صدى البلد" على نص اعترافات زوج عائشة خيرت الشاطر، المتهم محمد أبو هريرة محمد عبد الرحمن، في القضية رقم 1 لسنة 2021 جنايات أمن الدولة طوارئ مدينة نصر ثان، والمقيدة برقم 703 لسنة 2021 كلي القاهرة الجديدة، وبرقم 1552 لسنة 2018 حصر أمن الدولة العليا، والمتهمة فيها أيضا عائشة خيرت الشاطر، ابنة القيادي خيرت الشاطر.
وأدلى المتهم محمد أبو هريرة محمد، 32 سنة، محامٍ، باعترافات تفصيلية، ينشر منها موقع "صدى البلد" في الجزء الأول تفاصيل انضمامه إلى جماعة الإخوان المسلمين، ومشاركته في اعتصام النهضة عام 2013.
محمد مرسي كان ضعيفا.. عائشة خيرت الشاطر تتبرأ من الإخوان: معرفش حاجة عنهم
شراكة حسن مالك.. اعترافات عائشة خيرت الشاطر: والدي ترك العمل التجاري وتفرغ ل الجماعة
وقال زوج عائشة خيرت الشاطر: "أنا من مواليد 10 مايو 1987 بمنطقة الهرم في الجيزة، والدي كان صاحب مخبز ووالدتي كان اسمها حورية نصر ربة منزل، وعندي أخت وأخ، دخلت كلية الحقوق سنة 2003 وأخدت منها الليسانس سنة 2007 وبعدها سجلت في نقابة المحامين وكملت بعدها شغلي كمحامي حر عادي وكنت باخد قضايا الطلاب اللي بتتفصل من الجامعة سواء إخوان أو غيرهم وبتابعها في مجلس الدولة لحد سنة 2014 لما اشتغلت في مؤسسة التنسيقية المصرية للحقوق والحريات، وسيبتها في 2016 ومن بعدها اشتغلت محامي في مجال العقارات".
زوج عائشة خيرت الشاطر: درست مناهج الإخوان.. ومالش منصب تنظيمي في الجماعة
وأضاف محمد أبو هريرة، زوج عائشة الشاطر: "أنا ملتزم دينيا وبحافظ على الصلوات وده كان الدافع إني أدخل جماعة الإخوان، وده كان تقريبا سنة 2003 لما دخلت كلية الحقوق جامعة القاهرة وتعرفت على واحد اسمه محمد المصري وده كان مسئول أسرة الجماعة في جامعة القاهرة، ودرست مناهج الإخوان زي كتب "في رحاب الإسلام" و"مبادئ الإسلام"، وتدرجت فيها لحد ما بقيت عضو عامل، لكن أنا كمحامي مشغلتش أي منصب تنظيمي في هيكل الجماعة، وبعد التخرج على طول مهتم بقضية الطلاب اللي بتتفصل من الجامعة وكنت باخد القضايا الخاصة بهم".
عائشة الشاطر: مرسي كان ضعيفا.. ومقدرش ينجح في إدارة البلاد
وكان "صدى البلد" نشر نص اعترافات عائشة خيرت الشاطر، ابنة القيادي خيرت الشاطر نائب مرشد جماعة الإخوان، في القضية رقم 1 لسنة 2021 جنايات أمن الدولة طوارئ مدينة نصر ثان، والمقيدة برقم 703 لسنة 2021 كلي القاهرة الجديدة، وبرقم 1552 لسنة 2018 حصر أمن الدولة العليا.
وقالت المتهمة عائشة خيرت الشاطر، في اعترافاتها أمام جهات التحقيق: "لما لقيت إن المشاركة مع التنسيقية المصرية للحقوق مش هتوصلني لحاجة بخصوص والدي، تركت العمل فيها ومكنتش بشارك، حتى زوجي محمد أبو هريرة مكنش بيشارك في أي حاجة فيها وعشان كدة مشوه منها، وبعد ما تركت العمل فيها وتركت العمل الخيري".
وأضافت عائشة خيرت الشاطر: "في الفترة الأخيرة بقيت أشتري لحوم من الجزارات وأبيعها على الإنترنت بعد ما أزود على الكيلو 10 جنيه علشان أزود دخلي من خلال صفحة اسمها "طازج الريف"، وكنت ببعتها بمندوب للناس وده كان عشان أساعد زوجي في المصاريف، لحد أكتوبر 2018 كنت في البيت ومحمد كان نازل يقابل إبراهيم عطا عشان يغير منه دولارات بتاعته معرفش جايبها منين لأن إبراهيم كان بيكتب على الجروب إنه لو حد عايز يغير عملة هو ممكن يساعده، وبعد ما نزل سمعت صوته عالي جدا وبصيت لقيت ميكروباص أبيض وعربيات ملاكي والشرطة في الشارع تحت البيت ومحمد شاورلي ادخلي جوه، وبعدين تم تفتيش الشقة والقبض علينا".
وتابعت عائشة خيرت الشاطر: "كل اللي أعرفه عن جماعة الإخوان أن مؤسسها هو حسن البنا ومعلوماتي أنها جماعة دعوية في العالم كله، وأداء محمد مرسي كان ضعيفا في الحكم، يعني مقدرش ينجح في إدارة البلاد".
واختتمت عائشة خيرت الشاطر حدثها قائلة: "أنا كنت بشارك في الاعتصام بصورة فردية ومكنتش بعمل حاجة وبقعد لوحدي، ويوم الفض خرجت مع الناس اللي خرجت من الممرات بتاعة الشرطة".