من نص التحقيقات.. ماذا قالت عائشة خيرت الشاطر عن إعتصام رابعة وتظاهرات مدينة نصر؟

يواصل موقع صدى البلد نشر نص إعترافات عائشة خيرت الشاطر، نجلة القيادي خيرت الشاطر نائب مرشد جماعة الإخوان، في القضية رقم 1 لسنة 2021 جنايات أمن الدولة طوارئ مدينة نصر ثان، والمقيدة برقم 703 لسنة 2021 كلي القاهرة الجديدة، وبرقم 1552 لسنة 2018 حصر أمن الدولة العليا.
وأدلت المتهمة عائشة محمد خيرت سعد الشاطر، مواليد 18 ديسمبر 1980، ربة منزل، بإعترافات تفصيلية أمام جهات التحقيقات، وينشر موقع صدى البلد في الجزء الثالث من الإعترافات، تفاصيل مشاركة عائشة خيرت الشاطر في إعتصام رابعة العدوية، وتظاهرات مدينة نصر.
وقالت المتهمة عائشة خيرت الشاطر، في إعترافاتها أمام جهات التحقيق، سبب مشاركتي في اعتصام رابعة أنه كان السبيل الوحيد للاعتراض على الاحداث اللي كانت بتحصل وعزل محمد مرسي والقبض على قيادات الجماعة، وكنت بشارك في الاعتصام لحد يوم الفض، بس أنا خرجت لما الشرطة قالت للناس تخرج ومشيت وبعدها شاركت في بعض المظاهرات اللي كانت بتطلع من مسجد السلام في مدينة نصر، وكانت تطالب بعودة مرسي والإفراج عن المحبوسين.
وتابعت عائشة خيرت الشاطر، انا كان نفسي أبويا يخرج من السجن علشان كدة كنت بشارك وقتها في المظاهرات دي بس مكنتش بعمل حاجة يعني ولا كنت بشيل لافتات ولا حتى كنت بهتف مع اللي بيهتفوا.
واستكملت عائشة خيرت الشاطر، انا كان عندي حساب على الفيسبوك، باسم عائشة خيرت الشاطر وكنت بنشر منه بوستات عن المحبوسين وعن والدي وعن اخواتي وبطالب بإخلاء سبيلهم والدعاء ليهم وساعتها كنت بقبل أي حد يضيفني على الفيسبوك لان صفحتي مش بكتب عليها أي حاجة شخصية مفيش مشكلة أن أي حد يكون موجود فيها وساعتها كان عندي واحد اسمه أحمد عبدالباسط كنت اتعرفت عليه في مسيرة من المسيرات وعرفت أنه دكتور في جامعة القاهرة وتم فصله وكان بيشارك عشان يرجع الجامعة.
وأضافت عائشة خيرت الشاطر، الدكتور كان عندي على الفيسبوك وعملي دعوة لجروب على الفيسبوك اسمه العائلة وهو كان جروب اجتماعي بيتكلم عن الاحداث وحالات الزواج والوفاة وبيكتب عن المصابين والمحبوسين وهو كان قائم على ادارته والكلام ده كان بعد فض اعتصام رابعة، وانا لقيت ناس كتير من أبناء المصابين والمحبوسين في الجروب.