المقال ده لكل ست ربنا وعدها ببني آدم استنزف روحها ومشاعرها .. اقري بعقلك وقلبك شوفي ياست الكل ..زمان كانوا بيقولوا في المثل(اللي خدته القرعة تاخدوه أم الشعور).والحقيقة من صغري كان بيلفت نظري اوي القوة والثقة اللي في المثل ده ..وازاي ممكن تتحول مشاعر حب حقيقية وصادقة للاستغناء التام ومش بس كده عزوف النفس عن الشخص .. وكملوا بمثل تاني لايقل قوة وباء عن الاولاني(اللي رميته الهانم .. تاخدوا مساحة السلالم) يعني في كناية عن تضئيل وتحقير الشخص اللي بيسيب ام العيال أو رفيقة العمر أو حبيبته علشان ست تانية الحقيقة ان الامثال دي مفيهاش قوة ولا حاجة فيها وجع والم نفسي وإحساس بالإهانة وجرح لكرامة الست مخليها عاوزة تدفن كل ده وتطس وشها بشوية مية وتقابل هذا العالم البائس بابتسامة ثقة لأنها رفضت الدور اللي رسمهولها حبيبها وهو انها تكون ضحية.. متسابة .. ومش علشان مثلا مش متفاهمين ولا مفيش كيميا بينهم.. لا ده علشان واحدة تانية ..هتفضل فكرة ان (انثى تانية)خطفت سبع البرومبا قاتلها.. ومهما كانت واثقة في نفسها ومهما كانت بمعايير الناس اجمل وارق.. هتفضل حاسة بوجع والم ونزف مابيقفش الحقيقة هتعيش في دوامة اسئلة طب يمكن انا قصرت في حاجة.. طب يمكن مش مريحاه..طب يمكن كبرت وشكلي اوحش.. طب يمكن ويمكن ويمكن ومليون يمكن من غير ولا اجابة واحدة تريحها الحقيقة ان الاجابة الوحيدة المنطقية في الغالب (ان البيه يشعر بالملل)عاوز يجرب حاجة جديدة فبيفضل يدخل في علاقات عاطفية سطحية علشان معندوش (نضج عاطفي) يعني خليكي واثقة في نفسك انتي زي الفل انا شفت نماذج كتير لستات لما ده حصل معاهم اتطفوا ..اتطفوا ودبلوا حرفيا عايشين كما الاموات بجد وفيه منهم عملوا تغيير جذري في شكلهم عمليات تجميل.. قلعوا الحجاب مثلا.. فيه بدأوا يدخنوا.. وفيه انعزلوا عن العالم في اكتئاب مزمن وفيه نوع شاف نموذج (الانثى الاخرى) وبقوا نسخة .. تركز معاها وتراقبها.. تلبس زيها.. تتتكلم زيها.. تصبغ شعرها لونها ..لحد مابتبقى مسخ .. لا هي حصلت تبقى زي غريمتها.. ولا هي حافظت على شخصيتها وتفردها في نوع تاني بيعيش الموضوع بمراحل طبيعية.. الصدمة.. الغيرة.. الرفض لكل الحدث.. الحزن العميق.. وبعدين اخر مرحلة (التقبل).. فكرة التقبل دي بأة اهم نقطة.. تقبل فكرة تفضيل حبيبها لحد غيرها مش سهلة .. بس مريحة .. مريحة لو قريتها بعمق.. وعشتي مع الموضوع كأمر واقع دربي نفسك تعزلي نفسك تماما عن الست التانية او الستات التانيين لو كان (دنجوان) حسي بقيمة نفسك ومتقلليش منها بمراقبة حد انتي اكبر من كدة طوري نفسك وانجحي وحاولي تملي عقلك وروحك بفكرة الاستغناء.. ماتوجهيش وماتعتبيش وماتنهريش ..تجاهلي وترفعي اوي اتعلمي تاخدي قرار.. ابعدي فورا انفصلي بلاش تباني ضعيفة لان جوزك عمره ماهيحس بقيمتك وانتي شخص ضعيف ومنهار هتثيري شفقته بس ده لو عنده احساس لازم تتأكدي انك ست جميلة .. صدقي نفسك .. صدقي الفكرة.. وحبي نفسك ومتهنيهاش ولا تعذبيها لانها امانة ربنا وهبهالك في ستات كتير شفتهم بيكملوا بس في علاقة زي دي علشان الاتي(مشمتش الناس فيا... لا اسيبهولها بعد ما استحملت قرفه السنين دي.. بعد ما وقفت جنبه وبأة حاجة.. لا مش ممكن اسيب المستوى المادي اللي عايشة فيه ) اسباب كتير اوي اوي غير الحب .. وغير العيال بتخليها مكملة في علاقة بايظة احب اقولك انتي هتموتي بالبطئ وبتهدري روحك وعمرك هدر.. والله من غير تمن مفيش اي حاجة في الدنيا تساوي لحظة راحة نفسية وراحة بال صدقي نفسك انتي مش قرعة انتي ام الشعور.. وقولي المثل من قلبك فعلا ماتاخده .. مع الف سلامة .. ودايما افتكري ابلة فاهيتا وحكمتها الاذلية(مايستهلوشي) والله مايستهلوشي ياست البنات
