أشتغل ايه وأزاي في الاجازة ؟؟

ازيك يا روشا بجد انتي ماشاءالله قدوة حلوة أوي ومثال يحتذي به مش هكدب عليكي وأقول إن أنا متابعة جيدة ليكي بس أنا كنت سمعتك في "ع القهوة" مع يونس واشتركت في الجروب وكنت مستنية تعملوا حلقة كده عن حاجة هقولك عليها بس قبلها أحب أقول ربنا يجازيكي خير عشان إنتي بتعملي حاجة من أحسن الحاجات في الدنيا إنك بتيسرلي علي الناس وبتساعديهم بجد ربنا يجعله في ميزان حسناتك يارب أنا ياستي في تانية طب أزهر
من زمان وأنا نفسي أشتغل في الأجازة وهو ده الموضوع اللي كنت نفسي تتكلموا فيه شغل للطلاب في الأجازات أنا عن نفسي معنديش أي مانع أشتغل بائعة في محل لأني بحب أتكلم مع الناس وأساعدهم وبحب أي حاجة فيها ناس بس طبعا ماما وبابا مش يوافقو علي حاجة زي دي تشتغلي في محل " تمسحيه " بقولهم إن فيه فرق بين بائعة وعامل نضافة وإن في أمريكا والدول المتقدمة كل الطلاب بيعملوا كده أغنيا فقرا مش حوار محتاجين أو مش محتاجين بالنسبة ليا احتياجي للشغل احتياج معنوي الأجازة بتضيع الشغل يعني التزام تنظيم وقت حاجة بتصحيلها كل يوم حاجات أنا بجد محتجالها ومش هخبي عليكي حتي لو الواحد بياخد مصروف محترم من باباه بيحب إحساس إنو كسب من تعبه وليه بوكت money
أنا في حاجة كمان بحبها أوي وهيا الكتابة ودي ممكن أشتغلها في أجازة أو دراسة نفسي ألاقي مجلة أكتب فيها بحب كمان أتكلم في التليفونات وأرد علي الناس يعني نفسي أشتغل خدمة عملاء بحب حاجات كتير ونفسي أعمل حاجة ممكن ألاقي شغلانة يوافق عليها ماما و بابا من غير مايكون معايا مؤهل جامعي؟
أنا الإنجليزي بتاعي الحمدلله كويس لأني بحب الانجليزي أوي وكنت أزهر نموذجي بناخد انجليزي High level والكمبيوتر صراحة أعرف فيه اللي بستخدمه بس آسفة إني طولت عليكي بجد وربنا يكرمك يارب
بصي بجد انتي حد جميل اخر 800 حاجه .... بصي يا ستي الحقيقه احنا فعلا كنا هنوفر فرص عمل للشباب أو بمعني ادق تدريب صيفي لكن فترة الصيف كانت مقفوله اخر حاجه .... طبعا علشان رمضان و الاجازات و الحوارات دي كلها ...
نرجع باه لرأي أهلك .... هم عندهم حق ... لكن احنا ممكن ننفذ الي احنا عايزينه بطريقة تتوافق مع البيئه المحيطه بينا يعني نعمل ايه يعني ..؟؟؟؟؟
في فتره الصيف ممكن تتدربي في صيدلية مثلا .... انتي دكتور و هتشتغلي و تاخدي فلوس في حاجه محترمة ...أو ممكن تشتغلي اون لاين في الابحاث الطبية مثلا .... أو انك تشتغلي في مستشفي حتي لو شغلانه بسيط او مركز طبي ... يعني دوري في الاتجاه الي ميخليش أهلك يتضايقو ... او مثلا ادخال بيانات في معمل تحاليل ... يعني الافكار كتير ...اخرجي بره الصندوق .. و دوري علي حاجه مناسبه .... بصي لو خرجتي بره الصندوق هتلاقي افكار كتير جدا ...
خدمة العملاء دي ... اي كول سنتر ممكن تشتغلي بسهوله جدا حتي لو كنتي طالبه ... دا موضوع سهل .. اجمعي عناوين الكول سنت رالي في القاهره و روحي حطي السي في عندهم ... بيكلموكي علي فكره...
بالتوفيق