السيسي: أنجزنا 100 ألف صوبة في 3 سنوات حققته دول أخرى في 40 عاما.. فيديو

قال الرئيس عبد الفتاح السيسي، إن حجم المعروض من السلع والمنتجات كان منخفضا إضافة إلى أن أسلوب عرض تلك المنتجات والسلع لم يكن جيدا، وبالتالي المواطن كان يتعرض لارتفاع أسعار.
وأضاف السيسي في كلمته بمؤتمر «حكاية وطن»، :«الناس بتطلب حماية الأسعار وبتطلب رقابة على الأسواق، لكن الحقيقة إن اللي بيشتغل في الموضوع ده هما إحنا، المواطنين اللى مسئولين عن ده مش أنا، طب الناس دي مش شغالة بالشكل الجيد هنعمل إيه، ولازم نسأل نفسنا هل إحنا بنشتغل كويس وأمناء في مهمتنا وشرفاء في تنفيذ مهمتنا».
وأشار السيسي: «إحنا اشتغلنا بآلية إننا نوفر المعروض من السلع والتسويق الجيد لها ونوفر كميات أكبر من المطلوب عشان نجبر آليات السوق أنها تحترم وتخفض الأسعار».
وتابع الرئيس:« على سبيل المثال المنتجات الزراعية، لما أنا أضخ خلال سنتين ونصف، 100 ألف صوبة يعني مليون فدان، إنتاجها يخضع ل3 عناصر في غاية الأهمية، منتج طبقا للمعايير الصحية، ومزروع بمياه جيدة، وبكيماويات مسيطر عليها، وحجم يفرض على السوق احترام آلياته».
واستطرد:«الناس بتتكلم على إن مصر دولة تدار بالزراير، وده مش حقيقي ولن يكون، ومفيش دولة في العالم تدار بالزراير، لكن احنا بنتكلم فى إطار ظروف موجودة في مصر وبنحاول نحل المسائل بشكل آخر بأفكار مختلفة إن نجحنا فيها فده توفيق ربنا ولو منجحناش يبقى تقصير مننا».
وأوضح الرئيس: «لما أقول النهاردة هضخ في السوق المصري إنتاج 100 ألف صوبة يعني مليون فدان من الخضروات والفاكهة بمعايير عالمية، انا مش هقولك أنا بديك إيه في إيدك، لكن هقولك أنا بعمل إيه لدولة، أكبر دولة عندها صوب في العالم عندها 70 ألف صوبة عملتهم في 40 سنه، احنا عملنا 100 ألف صوبة في 3 سنين، عاوز مين يقولي حد يقدر يعمل كده ازاي، وانا مش بتكلم إن أنا اللى عملت، احنا كلنا اللى بنعمل».
وأردف: «لما ندخل 40 ألف فدان مزارع سمكية في الإنتاج، مين بيعمل الكلام ده، في قد إيه وبكام، لما أقول لحضراتكم إن عندنا أكتر من 10 أو 12 بحيرة موجودة على المتوسط، وكلها اتسابت 30 و 40 سنه من غير ما نحافظ عليها، احنا اشتغلنا على إعادة تأهيلها ورجعناها مرة تانية من ضمنها محطة المعالجة اللى بتتعمل في شرق بورسعيد، عشان تستخدم في مياه البحيرات وماتفسدهاش اتكلفت محطة واحدة 17 مليار جنيه، البحيرة اللى عاوزة تتأهل محتاجة من 25 إلى 30 مليار جنيه عشان إنتاجها من الأسماك يليق بصحة المصريين، نحن نتصدى لمسئوليتنا بالفهم والفكر والإصلاح الحقيقي عشان نقضي على المشكلة من جذورها» .