وجهة نظر

أ.عبد اللطيف المناوى: السيدات والسادة مساء الخير هل إعلان روسيا ثالث أكبر منتج للقمح فى العالم حذرها لتصديره بدأ من 15 أغسطس الحالي حتي نهاية ديسمبر المقبل هل هذا يُعد إعلانا عن عودة أزمة جديده للغذاء العالمي ؟ القرار الذى جاء بسبب أسوأ أزمة جفاف تتعرض لها روسيا خلال قرنٍ قفزت بأسعار القمح فى الأسواق العالمية الي أعلى مستوى لها خلال عام وهو ما يتوقع الخبراء أنه سينعكس على أسعار ومنتجاته خاصةً الدقيق والمكرونة والحلويات والمخبوزات والعجائن وإذا كان العالم كله سيعانى من الفجوة الغذائية فكيف سيكون الحال فى مصر اكبر مستورد للقمح فى العالم ؟ السيدات والسادة تساؤلات عديده هل ستتأثر مصر بأزمة القمح العالمية ؟ رمضان قادم على الأبواب فهل إستعدت الحكومة لزيادة الإستهلاك خلال الشهر المبارك ؟ وما المخزون المتوفر لدينا من القمح وما هى الكميات التى كنا نستوردها من روسيا ؟ وهل هناك أسواق بديلة للسوق الروسى ؟ والي أي مدي سترتفع أسعار القمح ؟ وما إستعداد موازنة الدولة لتلك الزيادة ؟ السيدات والسادة ليس بعيدا عن الموضوع القمح فإن مصر لديها أكبر شبكة إتفاقيات تجارية على مستوى العالم هذه الشبكه أضيفت اليها مؤخرا اسواق أمريكا اللاتينية والتي وقع إتفاقية الإنضمام إليها السيد المهندس رشيد محمد رشيد وزير وزير التجارة والصناعة والذي عاد مؤخرا من هناك فى جولة تسعي لفتح أسواق جديدة أمام الإستثمار المصري فما الذي يعنيه إنضمام مصر الي هذه الأسواق وكيف ينعكس ذلك علي الإقتصاد فى مصر؟ .. السيدات والسادة اليوم نناقش قضية تهم كل بيت فى مصر تتعلق بالأمن الغذائى المصري نستمع فيها الي وجهة نظر المهندس رشيد محمد رشيد وزير التجارة والصناعة .. أهلا بك
م . رشيد محمد رشيد : أهلا وسهلا
أ.عبد اللطيف المناوى: نبدأ الأول بمسألة إجرائية تعريفية هل ما يحدث اللآن فى سوق القمح يمكن أن يُطلق عليه تعبير أزمة أم ماذا ؟
م . رشيد محمد رشيد : أكيد هى أزمة لإن طبعا القرار اللي أخذته روسيا من أيام ببساطه أعلنه رئيس الوزراء الروسى بوتين بمنع تصدير القمح طبعا هو إجراء غير متوقع وإجراء غير مألوف فى التجارة الدولية بالنسبة لسلع أساسىة زي القمح ولكن هو كان طبعا له مقدمات زي ما قلت هناك أزمة كبيرة جدا ناحية الجفاف فى روسيا وحصل تأثر فى محصولهم وكان هناك مخزون حقيقى موجود من العام الماضى ولكن تقديرات الحكومة الروسية إن هم هيخشوا فى أزمة داخلية وبالتالى أعلنوا هذا القرار .
روسيا ليست أكبر مُصدِّر للقمح فى العالم ولكن روسيا من ترتيبها حسب كل السنوات بيبقى نمره 2 أو 3 بييجي بعد أمريكا بييجي بعد الإتحاد الأوربي ولكن طبعا خروج روسيا من هذا السوق عمل نوع من الأزمة وهى أزمة وقتية يعني أزمة لم تستمر طويلا لإن طبعا دائما بيحصل في تفضيل بين الإسعار وبين العرض والطلب وهذا ما حدث فعلا الأسعار إرتفعت بنسبة تصل الي 40% في خلال الشهور الماضية – كانت البداية لما الناس توقعت إن المحصول الروسى هيبقي ضعيف مع الجفاف لما إبتدت هذه المعلومات تبقي أكثر تأكدا منها إبتدت الأسعار ترتفع وإنتهت طبعا بهذا القرار اللي أخذه رئيس الوزراء الروسي فأيوه فى أزمة لكن هى أزمة أقل من أزمة 2008 .
أ.عبد اللطيف المناوى: إذا هل دي ممكن نلاقي مرة ثانية أزمة الغذاء العالمي اللي حصلت ؟
م . رشيد محمد رشيد : لأ مش أشوف 2008 عشان نقول بالأرقام سعر القمح كان بالنسبة لنا وصل تقريبا 500 دولار من سعر 200 دولار غير متوقع بالمرة إن إحنا نصل لهذا المستوى
أ.عبد اللطيف المناوى: إحنا النهاردة حوالى 300 تقريبا ؟
م . رشيد محمد رشيد : النهاردة في حدود 300 بنتكلم تسليمات مصر كتكاليف وإحنا كنا فى بداية السنة 220 فطلعنا من 220 الي 300 إنما متوقع إن هذه الأسعار تستمر على هذا المستوى أو تزيد أو تقل بنسبة 10% فطبعا دا
أ.عبد اللطيف المناوى: هل دا معناه إنك بتعتبره إن قمة الأزمة اللي إحنا فيها دلوقت مش مرشحة للزيادة؟
م . رشيد محمد رشيد : شوف هو حتي جميع وكالات الأنباء والصحف اللي تناولت هذا الموضوع ركزت علي مصر ليه ؟ أنا هأشرح لك ليه لإن مصر أكبر مستورد للقمح الروسي وإحنا فعلا فى الفترة اللي فاتت كنا وقعنا مع روسيا عقود ب540 الف طن فلما طلع هذا القرار طلع فى مواجهة 540 ألف طن عقود روسى
أ.عبد اللطيف المناوى: دا بعد 15 أغسطس
م . رشيد محمد رشيد : بالظبط فإحنا أصبحنا أكبر دولة وأكبر عميل متضرر من هذا القرار فديه كانت الأزمة إنما أنا عايز أطمن الناس - أحنا هنتكلم أنا عارف بس خلينا في البداية بس أطمن الناس عشان ما يبقاش فيه قلق إمبارح إحنا إشترينا 240 ألف طن من فرنسا فالإحساس إن فيه نوع من التعثر أو نوع من النقص اللى هيبقي فى مصر إنتهي إمبارح مصر إشترت ربع مليون طن من فرنسا
أ.عبد اللطيف المناوى: دا معناه إن إحنا فى منطقة أمان فى هذا الموضوع ؟
م . رشيد محمد رشيد : لأ شوف خلينا أبتدي من الأول .. خلينا أقول إحنا عندنا داخل مصر داخل الأراضى المصريه حاليا تحت يد هيئة السلع التموينية والجهات الحكومية عندنا مخزون يصل الي لايقل عن 4 أشهر الى 4 شهور ونصف دا اللي جوه عندنا دا غير اللى جاى فى المراكب اللى إتشحن .
أ.عبد اللطيف المناوى: دا غير ال240 ألف ؟
م . رشيد محمد رشيد : لأ غير – وقبليهم بقه فيه حاجات بتتشحن كل إسبوع فأنا عندى رصيد لأربع تشهر والناس اللى قلقانه على رمضان يعنى يعلموا إن رمضان ده القمح بتاعه والأكل بتاعه جم من 3 شهور دا مش هييجي النهارده .
أ.عبد اللطيف المناوى: كان موجود
م . رشيد محمد رشيد : آه موجود من 3 أو 4 أشهر إحنا بنتكلم على ما هو بعد 4 شهور و5 شهور الرصيد اللى موجود داخل البرد يزيد عن 4 أشهر المشكلة اللى حصلت مع روسيا إحنا عوضناها بالأمس يعنى أنا رغم إن أنا ما كنتش موجود إنما طلبت إن المناقصة تتم بسرعة وطلبت إن نبت فيها وبتينا فيها إمبارح وأخذنا ربع مليون طن من مصدر فرنسي والنهارده بين المصادر الفرنسية والأمريكية والكنديه أنا ما عنديش مشكلة خلاص أنا بعد اللى أنا إشتريتهم إمبارح أنا ما عنديش مشكلة فى التوريدات لإن أنا عندى كل إسبوع كل إسبوعين مناقصات بتتم بصفة مستمرة الحاجه التانيه النهارده أنا بعت جواب رسمي للحكومة الروسية – بعتنا جواب رسمي للحكومه الروسية لوزير التجارة اللي هناك من خلال السفاره هنا في مصر وطلبنا منه إن العقود اللى موجوده بيننا وبينهم يتم تنفيذها من خلال لجنه مشتركة يتم تحديد مواعيد تناسبهم وتناسبنا أنا ما يهمنيس أنا مش مستعجل عليهم خلاص دلوقت ولكن فيه عقود تمت بأسعار معينه طلبنا إن هم ينظروا في إن إحنا نعين لجنه مشتركة من الناحيتين يشوفوا إيه المواعيد المناسبة لهم لإن إحنا لو كانوا هم فعلا بيتعرضوا لأزمة ماشى بإحنا هنسيبهم يواجهوا الأزمة الداخليه بتاعتهم الأول ولكن قد يكون فى الأشهر القادمة ممكن إن هم يبتدوا يوردوا معانا فدا جواب وفعلا جالى رد قبل ما أنزل من المكتب النهارده إن نائب رئيس الوزراء الروسى هيتصل بي بكره اللى هو مسؤل عن هذا الملف هيتصل بى وهنشوف إزاي هنتحرك فى هذا الموضوع.
أ.عبد اللطيف المناوى: طيب يعني هنا خلينا نقول الثانيه هناك تأكيدات وضحة بأن مصر فى وضعها فيما يتعلق بالمخزون من القمح كافي تماما ليست هناك أي مشكلة رمضان منتهيه أموره من 3 أشهر .
م . رشيد محمد رشيد : رمضان منتهى من 3 -4 أشهر آه وبالمناسبه ليست بس فى القمح كل السلع .
أ.عبد اللطيف المناوى: فى كل حاجه سلع رمضان
م . رشيد محمد رشيد : يعنى الناس بتفتكر رمضان قبليها بشهر ولا قبليها بإسبوعين ولا حاجه إنما إنت لو كنت بتتكلم على سياسة النهاده تجاره الكلام دا بيبتدي قبليها من 3 – 4 أشهر لكى تصل وضع
أ.عبد اللطيف المناوى: فإحنا رمضان عارفينه من قبل كده إن هو رمضان جاى هههه
م . رشيد محمد رشيد : إحنا بنتكلم على العيد الكبير دلوقت
أ.عبد اللطيف المناوى: هههه فبالتالى لأ النقطه هنا التانيه المشكله إذأً مصر مؤمنة ال 4,5شهور القادمه وهناك إتفاقيات
م . رشيد محمد رشيد : المشكلة يا أستاذ عبد اللطيف هى فلوس
أ.عبد اللطيف المناوى: هو ده هنا عايز أسأل هنا فلوس على مستويين خلينا أبدأ بالفلوس اللي على كاهل الناس وبعدين نتكلم على الفلوس علي كاهل الدولة هو الإثنين واحد في النهايه بشكل أو بآخر ؟
م . رشيد محمد رشيد : ما هو الإثنين الناس شايلنهم برضه
أ.عبد اللطيف المناوى: بشكل أو بآخر هم الإثنين واحد ولكن خلينا نقول فيما يتعلق التأثير السريع المباشر هل هذه الأزمة يمكن أن تكون مبرر لأى مستوى من المستويات على مستوى القطاع الخاص أو القطاع العام أو المستهلك النهائي لزيادة أسعار أي سلعه من السلع التى يدخل فيها القمح ؟
م . رشيد محمد رشيد : خلينا نفسر .. أولا كل ما هو مرتبط برغيف العيش مدعوم من الدولة وبالتالى الدولة هى اللي هتتحمل أى زيادة في التكلفه لا يوجد اي تغيير في سياسة الدعم أنا كنت على إتصال بالسيد رئيس مجلس الوزراء صباح اليوم إديته الموقف كامل وهو أكد تماما إن سياسة الدعم ما فيهاش أي تغيير فلو كان هينتح النهارده سياده فى التكلفة الحكومه هتتحملها وهتروح لمجلس الشعب ويبقي فيه تعديلات في الموازنة بناءا عليه ودا الجزء الخاص برغيف العيش الجزء اللى خارج رغيف العيش واللي بيستعمل فيه الدقيق أكيد هيحصل فيه تغيير لإن طبعا النهارده فيه زياده زى ما أنا قلت بتصل من 20 الى 30 الى 40% فى الأسعار ولكن الموضوع طبعا برضه في النهايه هو عرض وطلب يعني أنا لسه جائني بيان من دول أوربيه – الدول الأوربية مثلا كمثال كل الدول الأوربيه رفعت أسعار العيش النهارده يعنى رغيب العيش فى إنجلتر إرتفع 8 بنس إبتداءا من الإسبوع ده يعنى 80 قرش دا زياده فى الرغيف
أ.عبد اللطيف المناوى: زياده عن السعر الأصلى
م . رشيد محمد رشيد : فرنسا رفعوا وكل دول الخليج ولكن إحنا برضه بنأكد رغيف العيش ما بنقربش منه زى ما هو والدولة متحملاه هل ناك فيه بعض الزيادات فى بعض الحاجات التانيه هتحصل ولكن مش متصور إنها هتحصل قبل رمضان
أ.عبد اللطيف المناوى: خليني أسأل ليه إستجابة السوق لرفع السعر المنتح النهائى سريعه على الرغم من وجود توفر فى الكميات موجوده بأسعار كانت مناسبه قبل كده يعنى بمعنى إن إحنا الأسعار اللى موجود المخزون الحالى مخزون ال220 دولار ال 300 دولار أو 320 دولار دا لسه علي المخزون بعد أربع أشهر – ما سوف يشترى بعد أربع اشهر السؤال ليه الإستجابه سريعه ؟
م . رشيد محمد رشيد : هو ديناميكية السوق فى رفع الأسعار بتبقى دائما رد الفعل سريع ليه لإن إنت النهارده عندك شوية قمح سعر الإستبدال بتاعهم يعنى إنت النهارده القمح بتاعك ب 220 مثلا وإنت هتستبدلهم ب 300 قد يكون في بعض خطوط الإنتاج فى المصانع بيشتغلوا بإسلوب عادى ما فيش مشكله ولكن لو تخيل نفسك إنت النهارده كتاجر موجود مش هتبيعهم ب220 وإنت عندك البديل لهم 300 لإن إنت اللي هتبعهم له بسعر رخيص ممكن يأخذهم ويرجع يبيعهم ثانى ما خلاص إنت حطيت سلعه قدامك اصبح فيها ربح معين لو إنت ما أخذتوش اللى جانبك أو اللى جانبك هيأخذه فاللي بيحصل دائما أو ما بيبقي فيه إرتفاع في الأسعار إن هذه القميه الإضافية بتتحقق بسرعة المقاومه هنا بتيجى منين بتيجى من المستهلك النهائى مقاومته ضعيفه العكس بقه الناس تقول لك طيب لما الأسعار بتنزل بتنزل ببطئ ليه ؟ بتنزل ببطئ لإن المقاومة هنا بتيجى من عند التاجر أو من عند الصانع ومقاومته أعلى
أ.عبد اللطيف المناوى: متحكم ويملك
م . رشيد محمد رشيد : لأ مش شرط إنما لو لقي 2-3 تُجَّار وجابو سلع أرخص منه هيضطر إن هو ينزل بسرعه وعشان كده إحنا بنركز دائما إن إحنا نفتح القنوات بتاعة تداول السلع بسرعه عشان خاطر المنافسه هى اللي تقدر تساعد علي تنزيل الأسعار ودا حصل وشوفناه فى سلعه مهمه زي الحديد وشوفناها فى سلع مهمه زي السكر وشوفناها فى سلع مهمه زي الأرز – الأرز من إسبوعين ثلاثه كانت إرتفعت الأسعار ورجعت نزلت ثانى لما إنت بتفتح القنوات اللى موجوده – إنما نرجع ثانى لقصة القمح انا ما قلتش لك الرقم أنا لازم أقول لك الرقم
أ.عبد اللطيف المناوى: انا عايز الرقم الخاص بينا بس أنا عايز أوصل فيما يتعلق بالنسبة للمواطن العادى الدولة ملتزمه بإنها سوف تقدم كل المواد الملتزمه بها فى إقرار الدعم المدعومه لن يتأثر
م . رشيد محمد رشيد : كل ما هو موجود فى البطاقه التموينية ورغيف العيش
أ.عبد اللطيف المناوى: لن يتأثر لا وزنا ولا جوده ولا سعرا إطلاقا
م . رشيد محمد رشيد : لأ ما فيش حاجه خالص
أ.عبد اللطيف المناوى: طيب النقطه الثانيه فيما يتعلق برضه بالمستهلك النهائى المنتجات المرتبطه بالقمح واللى هى خارج إدارة الدولة فى مسألة الدعم متوقع أن يحدث فيها إرتفاع السؤال هنا هل سوف يكون هناك دور للدولة بأى شكل من الأشكال فى محاولة ضبط هذا الإرتفاع بشكل أو بآخر ؟
م . رشيد محمد رشيد : هو المنافسه يا أستاذ عبد اللطيف لإن أنا مهما تدخلت لو ما كنش فيه وفره فى العرض هيبقى فيه سوء سوداء لو أنا قلت أى حاجه وما كنتش موجوده سوء سودا معناه إن واحد ويخزن عنده والكلام دا كله فاللى إحنا بنعمله دلوقت إن إحنا بنتأكد إن فيه وفره كبيره فى العرض وبنفتح كل المنافذ اللى موجوده ان يبقي فيه كميات كبيره موجوده .
أ.عبد اللطيف المناوى: وديه حلناها
م . رشيد محمد رشيد : وديه موجوده يبقى خلاص إنتهى الكلام ده حدث الناس إبتدت تحس بالأزمة من يومين ثلاثه إحنا الموضوع ده شغَّالين فيه بقالنا 3 أسابيع لإن إحنا كنا مترقبين إن هيحصل
أ.عبد اللطيف المناوى: نتيجة أزمة الجفاف اللي حصلت
م . رشيد محمد رشيد : بالظبط
أ.عبد اللطيف المناوى: أتنقل بقه فى الفتره اللي هو فاتورة الدولة اللي هي دولتنا فى الآخر إحنا بنتحمل بشكل أو بآخر
م . رشيد محمد رشيد : المواطنين اللي بيدفعوا
أ.عبد اللطيف المناوى: إحنا هندفعها بشكل أو بآخر السؤال هو كيف سوف تؤثر هذه الأزمة فى دخولنا ؟
م . رشيد محمد رشيد : هو للأسف طبعا إحنا بنتكلم على إرتفاع أسعار لإن زي ما أنا قلت إحنا بنضمن الكميات ودا الشيئ الأساسي نمره واحد لإن الوفره هى الأولويه الأولى عندنا إحنا مش عايزين نصحى من النوم الصبح نلاقى إن إحنا ما عندناش قمح يكفينا رغيف العيش أو أي سلعه ثانيه وده الحمد لله إحنا ضمناه إن هو النهارده فيه منظومه شغَّله فيه ولكن ما حدث اليوم إن هو حصل إرتفاع فى الأسعار إحنا طبعا مقدمين موازنه للدولة وهذه الموازنه إعتمدت من مجلس الشعب تقديراتنا الحاليه بناءاً علي ما يحدث فى أسعار القمح إن الفاتوره الإضافيه هتتراوح بين 2,5 الى 4 مليار جنيه فى السنه الماليه 2010 – 2011 يعنى إيه 2,5 الى 4 يعنى أحسن سيناريو 2,5 وأسوأ سيناريو 4قد تكون بينهم قد تكون 2,5 وربنا يعنى يلطف بينا شويه وأنا إمبارح كنت فى حديث مع السيد وزير الماليه وإتكلمنا مع بعض وشرحت له الموقف شكله إيه طبعا عشان يحضر نفسه إنما للأسف دا واقع موجود النهارده إن هذه الفاتوره موجوده على الدولة ويجب إن إحنا نتحملها لإن إلتزام واضح رئيس الوزراء واضح فى هذا الموضوع إحنا مش هنمس كميات ولا هنمس أسعار السلع وبالتالى اللى هيدفع هذا الفرق موازنة الدولة
أ.عبد اللطيف المناوى: وفيه توجيهات بالمعنى ده وفيه إلتزامات واضحه طيب فيما يتعلق حضرتك أشرت الي التعامل مع الجانب الروسي هناك إتفاقيات وأشرت في البدايه الى إن هذا الإجراء الروسي إجراء غير مألوف طيب في مسألة التجارة الدوليه الإلتزامات الدوليه إلتزامات الدول بهذه المسألة ألا يوجد ما يحميها ألا يوجد ؟
م . رشيد محمد رشيد : فيه هو طبعا روسيا ليست عضو في منظمة التجارة العالميه لو كانت عضو في في منظمة التجارة العالميه كان هيبقى قيود أكثر في إنها تنفذ مثل هذا الإجراء لإن يجي أن يكون هناك شروط لتنفيذها وهناك حتي فيه ناس أثارت كلام إن هذا الإجراء إتعمل لحماية تُجَّار فى روسيا بمعني إن هناك تُجَّار كانوا واخدين عقود بأسعار واطيه والأسعار إرتفعت عليه فأصبح هناك ضرر الكلام ده انا بأقوله ومنشوف فى كثير من التحليلات اللي موجوده في المجلات والنشرات الدوليه وبالتالي إنت قدام وضع فيه شيئ مبهم بعض الشيئ لإن روسيا عندها رصيد كبير من السنه اللى فاتت صحيح عندها محصول أقل السنه ديه ولكن روسيا دولة لها إستقلاليتها ومن حقها تأخذ الإجراء اللي هي عايزاه وليست مرتبطه بإرتباطات حاليا زي منظمة التجارة العالميه
أ.عبد اللطيف المناوى: طيب تعاقدات بينها حتى لو ما كنتش عضو مش فيه تعاقد بيلزم ؟
م . رشيد محمد رشيد : فيه تعاقد بس في التعاقد ده بيعتبروا إن منع التصدير قوى قهريه لإن هو طبعا التبرير بتاعها إنها جايه نتيجه لكارثه طبيعية هذه الكارثه الطبيعية كانت جفاف وبالتالى هذا سبب يعتبر قهري ومبرر إنك إنت توقف التصدير
أ.عبد اللطيف المناوى: هل دا شبه القرار اللي إحنا أخذناه من سنه تقريبا خاص بالرز لما وقفنا تصديره؟
م . رشيد محمد رشيد : صحيح 2008 كثير من الدول أخذت هذه القرارات ولكن خلى بالك إحنا لما بنأخذ القرارات ديه لازم بنبعت تبرير لشركائنا التجاريين وبنبعت لمنظمة التجارة العالميه وزى ما بأقول لك 2008 أزمة الغذاء كثير من الدول أخذت القرار ده بالذات فى سلع زى الأرز إحنا أخذناه والهند أخذته وأظن الفلبين أو أندونيسيا أخذوه 4-5 دول أخذت قرارات مماثله إنما طبعا علي سلعه زى القمح سلعه تعتبر إستيراتيجيه وبالأهميه بتاعتها ماهياش حاجه مألوفه إن يتعمل قرار زى ده .
أ.عبد اللطيف المناوى: أنا هنا بأحط سؤال إصتداقي وأظن هيطرح في وقت من الأوقات تعدد مصادر الحصول علي القمح كان أحد الأهداف الأساسيه والرئيسه اللى قررتم كحكومه وكدولة إنها تتخذها أظن أن من كان ضد هذا التوجه دا هيكون سبب كافي جدا إنتم إعتمدتم وآدي روسيا ولو كنتم ظليتم بتعتمدوا علي المصدر الأوحد أو الأساسي اللي حنتم بتعتمدوا عليه كان الوضع أصبح منتهي .. السؤال هو كيف تقيم أنت مسألة تنوع المصادر فى هذه الحاله ؟ السؤال هو هل بتعتقد إن كان فيه قدر من التركيز على روسيا فى مسألة إستيراد القمح علي حساب الأطراف الأخرى بحيث إنه ما كنش تنوع حقيقي وكان تنوع نقل إعتماد كلي من دولة الى دولة أخري ؟
م . رشيد محمد رشيد : لأ بالعكس الموقف اللي إحنا بنقابله دا أكبر دليل إن هذه السياسه سياسه كانت في محلها ومطلوبه وعايز ءأكد لك إن إحنا لولا إتخاذ هذه السياسه ما كناش عرفنا نواجه 2008 وماكناش قدرنا نواجه هذه الأزمة بهذه السرعه وبالبساطه اللى إحنا إتعاملنا بها إن أنا آخذ قرار إن أنا أجيب ربع مليون طن من فرنسا في ظرف 3 أيام دا كان نتيجة إن إحنا فتحنا هذا المصدر فرنسا ما كنتش أحد المصادر المفتوحه لنا من 3-4 سنوات إحنا فتحنا أسواق زى روسيا فتحنا أوكراينا فتحنا كذاخستان طبعا بالإضافه الى أمريكا بالإضافه أستراليا بالإضافه الى
أ.عبد اللطيف المناوى: طيب لماذا أغلقناها ؟
م . رشيد محمد رشيد : ما أغلقناش حاجه عندنا نسب
أ.عبد اللطيف المناوى: فيه بعض المناطق يعنى عندنا أستراليا تقريبا ؟
م . رشيد محمد رشيد : لأ أستراليا عندها مشكله لإن مشكلة إستراليا هم كان عندهم جفاف فى السنتين ثلاثه اللى فاتوا فكانت أسعارهم عاليه جدا وحتى لغاية دلوقت الصوره لم تتطضح استراليا مازال عندها مشكله السنه ديه مش معروف المحصول بتاعها هطلع إيه ولكن هذا المصدر مفتوح لنا أنا عايز أقول لك حاجه زياده إحنا لما جينا مثلا عملنا المناقصه إمبارح إحنا حطينا شرط إن كل مصادر البحر الإسود ما تشتركش فيها ليه روسيا كذخستان اكرانيا لإن كذخستان وأكرانيا لم يحددوا موقفهم بعد من عملية منع التصدير وبالتالي أنا ما كنتش عايز اشتري منهم ويجي بعد إسبوع يمنع فقلنا لهم خليكوا إنتم بقه لغاية ما تحددوا موقفكم إيه أنا رحت ل كان عندى أمريكا كندا فرنسا عرضوا علينا قد إيه مليون طن إمبارح كان معروض علينا مليون طن فده طبعا لما إحنا بنقول إفتح ونوع المصادر الكلام ده مش مجرد إنك إنت بتعمل مناقصه إنت بتعتمد القمح وبتبقى سكك مفتوحه وبتبقي المواصفات محدده وإسلوب الشحن وغيره فبالعكس إحنا النهارده نتيجة هذه السياسه وتنوعنا للمصادر إحنا عرفنا نواجه هذا الموقف بالطريقه اللي إحنا واجهناه بيها فى 48 ساعه اللى فاتوا نضيف علي هذا إن فى خلال الزياره اللى كنا فيها الإسبوع اللي فات فى الأرجنتين والبرازيل تم الإتفاق على فتح سوق الأرجنتين للقمح – الأرجنتين من الدول المصدره للقمح فى العالم وإحنا يمكن زمان كنا أخذنا منهم وبرضه توقفنا وقفلنا هذا المصدر النهارده الأرجنتين بتصدر 5% تقريبا من صادرات العالم بتيجي من الأرجنتين بالمقارنه روسيا بتصدر 9% رقم 5% ما هواش رقم صغير يعني – يعني أكثر من نصف الصادرات الروسيه فإحنا إتفقنا مع الأرجنتين بر ضه ولكن هناك المواسم مختلفه هناك الشتا صيف والصيف شتا فالمحصول بتاعهم لسه ما طلعش دلوقت ولكن سياسة تنوع المصادر هى سياسة حياه أو موت بالنسبة لمصر
أ.عبد اللطيف المناوى: إحنا حجم إعتمادنا إيه على القمح الروسى تقريبا ؟
م . رشيد محمد رشيد : شوف بيتنوع يعنى إحنا بدأنا كنا مثلا من 10% وبنصل الى 50% طبعا أنا ما عنديش مشكله أوصل الى 40 -50- 60% طالما المصادر الثانيه كلها مفتوحه أنا يهمني إن ما أقفلش حد منهم يعني القمح الأمريكي كان وصل فى وقت من الأوقات الى 65% السنه اللي فاتت كان فى حدود 7-8 % قد يصل السنه ديه لنسب أكبر لإن إحنا أكيد هناخد من المصادر الغربيه أكثر من المصادر الشرقيه ولكن دا ما يضرنيش .
أ.عبد اللطيف المناوى: هل عدم وجود القمح الأمريكى دا كان حاله الإنسحاب عن التعاون والا كان إختيار تجارى بحت من عندنا .
م . رشيد محمد رشيد : لا .. لأ كان موضوع تجارى أنا فى النهايه عايز قمح بمواصفات معينه بأحسن الأسعار وبأحسن شروط وكل دولة بتتنافس علينا إحنا أكبر دولة بتستورد قمح فى العالم وبالتالي إحنا يجب إن إحنا يكون عندنا قدره إن إحنا بشروطنا ناخد أحسن عروض ممكنه ودا بيحصل فعلا وبالتالى هم يتنافسوا بينهم وبين بعض انا ما بأحددش حصه خلى بالك .
أ.عبد اللطيف المناوى: ما فيش حصص هو دا اللي أنا عايز أوصل له ما فيش دولة هاخد منها نسبه أو حد أدنى أو كذا
م . رشيد محمد رشيد : لأ ما عندناش حصص أنا ما بأحدتش حصه خلى بالك لإن القمح سلعه زراعية وليست مصنع وبالتالى بتعتمد زى ما إحنا شايفين الطبعيه فيه مصر ما فيش مطر الجو كويس الجو وحش فيه جفاف ما فيش جفاف وده بيحصل كل سنه فى منطقه من المناطق بتلاقى إن فيه كارثه طبيعية بتحصل في منطقه من المناطق بتأثر على المحصول إحنا بنتكلم حجم تجارة القمح في العالم 130 مليون طن دول اللى بيتداولوا فى العالم إحنا بناخد منهم تقريبا 6 يعني إحنا بناخد تقريبا من 4,5 الي 5% من حجم تجارة القمح اللى موجوده فى العالم النهارده ولكن زى ما شايفين المصادر اللى موجوده اللى هى النهارده موجوده أمريكا وروسيا واستراليا و كذاخستان واكرانيا والأرجنتين وكندا دول المصادر النهارده اللى موجوده النهارده مصر البلد الوحيده اللى ما كناش فتحنا معاها الأرجنتين تم فعلا المفاوضات معاها الإسبوع ده بهذا التفاوض وبهذا الفتح هتبقى كل الدول النهارده بتشتغل مع مصر
أ.عبد اللطيف المناوى: سوق مفتوح تماما إحنا بنختار ما يناسبنا فيها طيب فيما يتعلق بأزمة الجفاف اللي حاصله أشرت حضرتك إن هو حتى الآن كذاخستان وأكرانيا لن يعلنوا بعد عن موقفهم توقعاتكم إيه أو المؤشرات إيه اللى موجوده وهل دا برضه له تأثير هيكون علينا ؟
م . رشيد محمد رشيد : لأ خلاص إنتهينا هى كانت زى ما أنا قلت لك الوضع اللى إحنا كنا محطوطين فيه إن كان عندنا عقود ب540 ألف طن من روسيا إحنا ما عندناش موقف مماثل مع كذاخستان ولا أكرانيا دلوقت فلو هم قرروا بكره الصبح إن هم يقفلوا مش هتأثر معانا فى أى شيئ والعالم كله بالمناسبه فيما يخص الأسعار وفيما يخص الكميات بيتعامل مع هذه الأسواق إنها مش موجوده دلوقت لإن هم متوقعين بطريقه أو بأخرى إن هم هيقفلوا لإن الأسواق ديه قريبه قوى من روسيا فهيلاقوا نفسهم مضطرين يمكن يقفلوا فى الأيام اللي جايه.
أ.عبد اللطيف المناوى: أحد الموضوعات التى تُطرح دائما وأظن هذه مناسبه لطرحها بشكل واضح فكرة أن تمتلك قدرتك على إنتتاج الغذاء وهتُطرح هذه القضيه بالتأكيد لما مصر بتنتج حوالى 40% تقريبا من إستهلاكها من القمح السؤال هو هل هذا الموضوع أصبح مطروح هل المسأله إقتصاديه طرحها مناسب هل المسألة مرتبطه بفكرة الكرامة الوطنيه والأمن الغذائى ؟ أسمع رأى حضرتك
م . رشيد محمد رشيد : لأ هو مفهوم النهارده الكفايه أو الإكتفاء الذاتي فى الغذاء له تفسيرات كثيره إنت ممكن النهارده تيجي تقول لى أنا عايز يبقى عندي قمح كله ماشي طيب لو إنت عندك القمح كله هتعمل إيه فى الأرز هتعمل إيه فى الذره والصويا اللى إنت محتاجهم لتغذية المواشي والدواجن هتعمل إيه فى الخضروات والفاكهة يعني هل الإكتفاء الذاتي إنك إنت تنتج 100% من الغذاء أكيد لو أنا عندي 100% من الغذاء يبقي أنا عندي إكتفاء ذاتي ولكن إحنا نعلم والسيد وزير الزراعه شرحها أكثر من مره إن مشكلة مصر هى الميه مش الأرض إنت عندك أراضى كثيرة جدا والصحراء ممكن بكره الصبح تتزرع لو عندك أرض ولكن إنت عندك حجم معين من المياه هيديك إنتاجيه معينه في الزراعه تقسمها إزَّاي للأسف هذا الحجم بالصله بالسكان ما يقدرش يدي لك كل طلباتك يعني ما يقدرش يدي لك القمح والذره والأرز واللحمه أو الفراخ وهكذا فبالتالي إنت عندك إختيارات الإختيارات ديه يجب أن تكون مرتبطه بالميزه النسبيه اللى عندك يعني أنا النهارده لو بأنتج قمح فى مصر وتكلفة هذا القمح بتبقي ضعف اللى هو جاي من بره يبقي يجب إن أنا أثير السؤال هل أزرع قمح وأستغنى مثلا عن سلعه ثانيه برضه هأستوردها وأنا عندي فيها ميزه طيب أنا النهارده مثلا بأتوسع فى زراعة البنجر لإن أنا عايز برضه أكتفى ذاتيا من السكر – المهم بدون دخول فى تفاصيل الواقع النهارده بيقول إن إنت ما تقدرش يبقي عندك إكتفاء ذاتي 100% وإحنا عندنا طبعا وضع ثانى خطير وهو الزياده المستمره فى نسبة السكان إنت بتتكلم النهارده في زياده 2 مليون كل سنه وبالتالي معندك إنت ميه بتزيد كل سنه صحيح إنت ممكن تزود إنتاجية الأراضى ولازم تزود إنتاجية الأراضي ولكن فى النهايه إنت أكيد هتستورد جزء كبير جدا من الغذاء بتاعك يجب بقه فى ظل إستيراتيجيه واضحه المختصين هم اللى يحددوا إيه الحاجات اللي هي فيها ميزه هل أتوسع في السكر ولا أتوسع في القمح ولا أتوسع في البرسيم وأطلع منه لحمه ولا أتوسع في الذره وأعمل منه دواجن وهكذا
أ.عبد اللطيف المناوى: فكرة السله المتوازنة – السله المتوازنه للإحتياجات الكلية – طيف هنا برضه أحد القضايا المطروحة فى موضوع القمح في مسألة إستيراد القمح هل فى ظل هذه الأزمة هل سوف نتوقع بأن نجد هناك من يتحدث عن تنازل نسبى حول جودة القمح المستورد هل سوف نستمع الي قضايا خاصه بقمح فاسد قمح غير صالح للإستخدام الآدمي السؤال هو هناك ضمانات كافية فى هذا الإطار فى هذا الموضوع وحدود إلتزامكم أمام المجتمع بهذا الموضوع؟
م . رشيد محمد رشيد : أكيد 100% لا يوجد أى توجه من ناحية الدولة إن إحنا نتنازل عن مواصفات القمح أو أى سلعه غذائية لإن دا غير قابل للتفاوض ثانيا ليس هناك لزوم لهذا أولا المحصول موجود فى العالم ثانيا إحنا دافعين الفاتوره وزيادة
أ.عبد اللطيف المناوى: بالسعر العالمي
م . رشيد محمد رشيد : وبالسعر العالمي فإحنا ما عندناش النهارده أي سبب إن إحنا النهارده نغير من مواصفات أو نقلل من المواصفات إللي بيحثل إن إحنا بنغير مصادر ودا عادةً اللي بيثار في كثير من الحالات لما بنوصل لمستوي الدقيق وعملية معاملة الدقيق نفسه والعيش وغيره إن القمح الفرنسى غير القمح الروسى غير القمح الأمريكانى وغير القمح الأسترالى بيبقي له خواص مختلفه ليست مرتبطه بجودتها يعنى مش مرتبطه بالجوده ولكن هى خواص مختلفه المتعاملين فيه بيبقوا عارفنها ولكن لأ ما فيش طبعا أى نوع من التنازل عن أي شيئ من هذه الأمور والكلام اللي بيثار دائما حوالين الموضوع ده وأنا قلت أكثر من مرة إن إحنا بنتعامل مع سلعه زراعية ما نستورده هو ناتج أرض زراعية وليس منتج نهائي بييجى هنا لما بيروح النهارده في المطاحن بتاعتنا بيحثل له عملية تنظيف وتكرير وتهذيب و.. و.. الكلام ده كله – الناس بتتصور إن القمح اللي جاي من الخارج ده حتحط إيدها فيه وتأكله .. لأ دا سلعه زراعية لو إنت النهارده شوفت القمح اللي بيجيلنا من مصر المحلي هو بنفس المستوي بيبقي فيه حاجات وبتاع لإن ده بيخش على مصنع أو بيخش على مطحن يحصل له تنظيف وغيره ولكن مرة ثانيه بأكد مافيش طبعا أى نوع من التغيير أو التنازل فى هذه الأمور
أ.عبد اللطيف المناوى: هل بتعتقد إنه من المهم في هذه المرحلة أن يكون هناك دور لرقابة الأسواق بشكل أعلي من قبل الدولة وهل دا متوقع أو هل تم مناقشة هذه المسألة برقابة الأسواق فى هذه المرحله ؟
م . رشيد محمد رشيد : طبعا دائما لما بترتفع أسعار القمح بالذات بيبقى فيه مشكله فى عملية التسرب من السلع المدعومه للسلع الغير مدعومه للأسف طبعا لإن طبعا لإن طبعا الفرق بيزيز النهارده المخبر اللي بأخذ دقيق شوال دقيق بسعر معين أصبح السعر فى السوق أعلى
أ.عبد اللطيف المناوى: فهي من أرباحها
م . رشيد محمد رشيد : فالحافز بيبقي أعلي فبالتالى بيحط طبعا ضغط أكثر على الأجهز الرقابية الخاصه بالتموين والسلع المدعومه والمخابز إنها تراقبها للأسف طبعا ديه نوع من السلبيات اللي موجوده فى أي نظام دعم إنك إنت طبعا وجود سعرين بيعمل فجوة وبيعمل مشكلة كبيرة
أ.عبد اللطيف المناوى: مهندس رشيد أظن فيما يتعلق بموضوع القمح إحنا غطيناه ولكن تأكيدا في النهاية لا إرتفاع فى الأسعار الخاصة بالسلع المدعومة وبالخبز
م . رشيد محمد رشيد : العيش طبعا
أ.عبد اللطيف المناوى: العيش تحديدا علي وجه التحديد – دعم الدولة مستمر جوده مضمونه
م . رشيد محمد رشيد : ما فيش مشكله فى الكميات خالص
أ.عبد اللطيف المناوى: على الإطلاق الكميه مضمونة مصر آمنه فيما يتعلق بالإحتياطي الإستيراتيجي الخاص بسعر القمح والأزمة أمتصيناها ومرينا بيها
م . رشيد محمد رشيد : إمتصناها إمبارح أشترينا كميات من فرنسا مع روسيا إحنا بنتفاوض معاهم الفاتوره هتبقى من 2,5 الى 4 مليار جنيه ولكن الوضع كله تحت سيطره كامله
أ.عبد اللطيف المناوى: ولا تراجع عن مسألة تنوع مصادر القمح ؟
م . رشيد محمد رشيد : بالظبط وديه أثبتت جدواها فى هذه الأزمة بالعكس إحنا بنزودها فى الفتره اللى جايه
أ.عبد اللطيف المناوى: مهندس رشيد هأتوقف فاصل قصير ثم نستكمل حوارنا حول تجربه مهمه وزياره مهمة
م . رشيد محمد رشيد : وهى مرتبطه بالموضوع برضه
أ.عبد اللطيف المناوى: وهى مرتبط بالقمح هناك رابط بينها ههه
م . رشيد محمد رشيد : جزء من سفرنا الى أمريكا اللاتينية تأمين مصادر الغذاء لمصر في ال 30 -40 سنه اللي جايه
أ.عبد اللطيف المناوى: وقبل ما نتحدث عن أمريكا اللاتينية دعونا نذهب الي بعض أجواء أمريكا اللاتينية وأرقام أمريكا اللاتينية ونلتقى بعد هذا الفاصل
فاصل
أ.عبد اللطيف المناوى: السيادت والسادة أهلا بكم من جديد مع هذه الموسيقي البرازيلية اللاتينية مع هذا الإشراق التوهج النظره الى المستقبل .. مهندس رشيد إنت لسه راجع فجر النهارده من عدة ساعات من جولة أمريكا اللاتينية تقريبا ديه أطول جوله إنت زرت خرجت بها الخارج حوالى 9 أيام تقريبا قبل ما أسأل فى تفاصيل الجوله أنا ممكن أقول حاجه إحنا ال دي في دي مدته أكثر من 5 دقائق أنا شفته كله اللي عرضناه حوالي دقيقتين شكله جميل شكله لطيف وإحنا نقدر نعمل حاجه برضه أكبر وأقوي من كده بكتير بس السؤال هل ده واقع حقيقي ولا ديه مسألة شكل من أشكال البروبجنده اللي معموله للبلد ؟
م . رشيد محمد رشيد : لأ هى طبعا أكيد فيها نوع البروبجنده ولكن اللي أحب ءأكده لك إن طبعا اللي إحنا شوفناه فى البرازيل وهى دولة النهارده بتمثل الإقتصاد الثامن فى العالم ترتيبهم يعني على الواقع الوضع هناك أكثر تأثيرا حتي باللي إنت شايفه فى الدي في دي – البرازيل طبعا دولة غنيه جدا جدا جدا يعني بكل المقاييس سواء كانت من الناحيه الزراعية المائيه من ناحية المعادن من ناحية الأراضى ومن ناحية البترول ومن ناحية الإمكانيات بكل صوره ولكن ما حدث فيها من طفرة إقتصاديه فى ال 15 سنه اللي فاتو شيئ مذهل والبرازيل أكيد يعني هم حطوا رؤيه لنفسهم إن هم يبقوا الإقتصاد رقم 5 فى العالم قبل سنة 2020 وهذا سيحدث يعني ثقه كبيرة جدا إن هذا هيحدث تطور كبير جدا فى الإنتاجيه الزراعية تطور كبير جدا فى الإنتاجيه الصناعية تطور كبير جدا فى إستقرار الإقتصاد وأصبحت النهارده قوي أقتصادية العالم كله بيبص لها بإحترام ويمكن نموذج يمكن أكثر توازنا من حتت ثانيه يعنى إحنا بنتكلم على الصين على الهند بنتكلم روسيا بنتكلم على – يعني ديه الإقتصادات الباذخه في العالم – العالم كله بينظر لها البرازيل توازنها قوى جداً بالنسبة لهذه الإقتصادات يعني الصين مثلا لو جيت تلخص وضعها الإقتصادي إيه بتتكلم علي رخص التكلفه فى الإنتاج والناس كلها بتسأل طيب لما الرخص ده هينتهي هيحصل إيه هذا الرخص مرتبط بمستوى المعيشه طيف لما مستوى المعيشه في الصين هيحصل إيه تيجى على النموذج الروسي فيه بيقولوا مرتبط بالخامات بالغاز والبترول والكلام ده كله طيب لما حصل زي فى الأزمة الإقتصادية إنخفض هذه الخامات راحت فين لأ البرازيل التركيبة الإقتصادية أقوى من هذا وهذا التركيبه الإقتصادية بتاعتها مرتبط بثروات طبيعية ولكن إنتاجيه عاليه الإثنين مربوطين ببعض ومستوى معيشه مرتفع النهارده المرتبات مثلا فى ساوباولو اللي هي العاصمة الإقتصادية فى البرازيل ضعف المرتبات فى نيويورك لإن هناك طفره كبيره جدا بالأنشطه ومطلوب تخصصات كثيره
أ.عبد اللطيف المناوى: أنت لا تذكر مهندس رشيد إتكلمنا فى موضوع التجربه البرازيليه منذ عدة أشهر فى ذات البرنامج وهنتكلم فيها جزء تفصيلي أكثر ولكن قبل أن ندخل ليها خلينى أسأل فى الأول على كان بلغة الإتقصاد دائما هناك ما يسمى دراسات الجدوي – الجدوي الإقتصاديه قد يكون هذا الشيئ هو أفضل شيئ قد تكون تلك العلاقه هي أفضل علقه قد يكون ذلك الإقتصاد هو أفضل إقتصاد ولكن تظل في النهاية الحاسم فى هذه المسألة الجدوي الإقتصادية السؤال هو ما هى الجدوى فى أن نذهب الى آخر العالم نبحث عن فتح أسواق هناك أونفتح لهم أسواق لديهم ولا ننظر حول – السؤال هو هل الجدوى الإقتصادية فى صالح مصر فى هذا القرار أو فى هذه الفتره ؟ إحنا عارفين إيه؟
م . رشيد محمد رشيد : شوف خليني أديك خلفية كده سريعه توصلنا لهذه الإتفاقية اللي هي وقعناها الإسبوع الحالى أو الماضى مع المركز – الخلفيهت النهادره إن أنت كدولة مستقبلك الإقتصادى مرتبط بشيئين الشيئ الأول أنا بأبسط ولكن مرتبط نمره واحد بقدرتك على التصدير وتواجدك فى أسواق خارجيه لإن دا هخلق فرص عمل هيزود إنتاجك هيزود دخلك – هيزود الدخل على مستوى البلد كلها ونمره 2 قدرتك على مزيد من الإستثمارات إن أنها تنجذب الى مصر سواء من محليين أو من أجانب طيب النهارده عشان نقدر نصدر أكثر عشان نستثمر أكثر جزء من قدرتنا على تحقيق هذا مرتبط بقدرتنا علي النجاح فى دخول هذه الأسواق الخارجية النهارده الواقع بيقول إن إحنا إنتاجيتنا وتنافسيتنا ليست علي المستوى المطلوب وديه حقيقه أنا النهارده لو إتحطيت جنبا الي جنب مع الصين مثلا والا مع الهند والا مع سنغافوره ولا مع كذا هتلاقي الإنتاجيه بتاعتهم أعلي هنا بتيجي أهمية الإتفاقيات التجاريه لما أنا بأروح أعمل إتفاقية تجارية مع أوربا بأتفق معاهم إن السلع بتاعتي ما يخدوش عليها جمارك هذه الميزه بتدينى ميزه عن المنتج الصيني أو الهندي أو الأردني أو الجنوب الإفريقي أو كذا فبتدي بداية قوية للمنتجين بتوعي فالإتفاقات التجاريه هي قوة الدفع الأولانية اللي بتخليني أخش هذه الأسواق طبعا من المفترض إن أنا بعد فترة لما حجمي بيزيد وشغلي بيزيد إن أنا إنتاجيتي بترتفع وتنافسيتي بترتفع وهذا ما حدث للعالم كله فأنا النهارده كمصر أصبح عندي شبكة من أحسن الشبكات اللي موجوده فى العالم للتجاره الخارجيه إزاي أنا عندى إتفاقية النهارده مع اكبر سوق إستهلاكي فى العالم السوق الأوربى دا موجود عندي إتفاقية تجاره حره معاه كل السلع بتخش فيه عندي إتفاقية مع الدول العربيه كلها نفذت فى سنة 2005 كنا خايفين منها ولكن نفذناها – عندي إتفاقية بتضم 22 دولة فى أفريقا وكوميسا وإحنا النهارده بندور علي توسعها وتطويرها – عملنا إتفاقيات تجاريه مع دول مستقلة زي أمريكا عندنا إتفاقيه من خلال المناطق الصناعية المؤهلة عملنا إتفاقية مع تركيا عملنا إتفاقية مع دول الإفتا منطقة البحر الأبيض المتوسط أصبح النهارده أي مصنع أو مزرعه موجوده فى مصر تقدر تصدر كل هذه الأسواق بدون أى جمارك دا فى حد ذاته بيديني ميزه فى التصدير ولكن بيدينى ميزه كبيره جدا في الإستثمار كثير من المصانع اللي جت سواء إستثمار محلي أو أجنبي جايه بسبب الإتفاقيات ديه لإن بيقول لك أنا ممكن أروح كل الحتت ديه طيب جينا نبص للمستقبل إحنا أسواقنا التقليدية أوربا أمريكا المنطقه العربيه أفريقيا ديه الأسواق لو جيت بصيت لتاريخ مصر فى التجارة الخارجية هتلاقى أوربا بتمثل دائما كانت 30 – 40% - أمريكا بتمثل 20% الدول العربيه 20% والباقي شويه في أفريقيا والباقي متوزع طيب المستقبل رايح فين – مستقبل رايح فين ؟ مستقبل العالم ده النهارده مش زي ما كان من 20 سنه أمريكا وأوربا واليابان هم اللي ماسكين العالم أصبح لأ النهارده فيه مناطق جديده طالعه فين المناطق الجديده ؟ آسيا ومنطقة روسيا ومنطقة أمريكا الجنوبية من هنا كان تحركنا في السنوات اللي فاتت إن إحنا جينا النهارده قلنا هنفتح مفاوضات تجاره حره مع روسيا وفعلا إحنا ماشيين معاهم في هذا الإتجاه بنحاول نعمل إتفاقات مع آسيا بصوره أو بأخري من أهمه مع سنغافوره وأمريكا اللاتينيه لإن هذه الأسواق بعد 10- 15 سنه هتمثل 40 ل 50% من إستهلاك العالم ما إنت مش معقول تتمنع يجب إنك إنت تروح إنك إنت تفتح سوق وتتواتجد فيه على مستوى التجارة الخارجية دا مشوار بيأخذ 10 سنين 15 سنه ولكن يجب إنك تبدأه وبالتالي أنا النهارده بدأت – بدأت في الصين والهند – بدأت النهارده في كثير من دول أسيا ولكن أمريكا اللاتينية زى ما إنت بتقول زهنيا ومعنويا كده بعيده عنا رغم إن المسافه يعنى هى صحيح مشوار طويل لكن الفرق بينها وبين أمريكا ساعتين ثلاثه يعني إنت بتروح النهارده نيويورك مثلا فى 8-9 ساعات من أوربا والا من هنا 11 ساعه لو طلعت على البرازيل هتطير ساعتين ثلاثه زياده ولكن زهنيا كده عندنا كلنا دا فى عالم ثانى
أ.عبد اللطيف المناوى: إحساس بالبعد
م . رشيد محمد رشيد : دا فى كوكب ثانى ما هواش الكوكب بتاعنا وبالتالى إحنا النهارده رحنا عملنا معاهم إتفاقيات دول ماركسور اللي هي بتمثل أهم إقتصاديات موجوده فى أمريكا اللاتينية البرازيل الأرجنتين أروجواى وبرجوى دول الأربعه بتوع كرة القدم
أ.عبد اللطيف المناوى: ديه إسمها أيوه جايز تكون فيه فرصه برضه هههه يكون فيه عدوى فى كرة القدم منهم
م . رشيد محمد رشيد : آه يعي دول الأربعه اللي كانوا بيلعبوا فى كاس العالم ولكن الأربع دول دول
أ.عبد اللطيف المناوى: دول اللى بيكونوا المركز
م . رشيد محمد رشيد : آه وداخل معاه تشيلى دلوقت وهيخش – يعني هم بيتوسعوا وداخل معاهم دول ثانيه ولكن هم بيمثلوا الكيان الأساسي أو دولة عربيه توقع معاهموتاني دولة خارج أمريكا اللاتينية توقع معاهم هى مصر ودا شيئ إجابي معنى الكلام ده إيه معني إن أنا عندى النهارده 250 مليون مستهلك جديد هيأخذوا السلع المصريه النهارده معفيه من الجمارك في الفتره اللي جايه – عندي ميزه إضافيه النهارده فى الإستثمار إن أنا أروح أقول لأى مستثمر إنت عندك سوق أمريكا اللاتينيه فاضى
أ.عبد اللطيف المناوى: يعني تقدر إن إنت يجى المستثمر للتصنيع بغرض التصدير للمكان هناك
م . رشيد محمد رشيد : عشان يبيع دا حدث هناك قبل حتى ما نمشى نفس المناقشات اللي هي حدثت في إطار إتفاقية التجارة الحره من تركيا إن إبتدى يجولى ناس برازيليين يقولوا لي طيب ما إنتوا التكلفه عندكم أقل من عندنا ممكن نيجى ننتج عندك وأصدر للبرازيل تانى ؟ زى ما حصل من تركيا إن فيه مصانع إتنقلت
أ.عبد اللطيف المناوى: آه تركيا موجوده دلوقت
م . رشيد محمد رشيد : فأخذت كل هذه التحركات النهارده إقتصاد واعد إقتصاد بينموا بنسب عاليه جدا 7-8 % مستوى معيشه أبتدى يبقى مرتفع إستهلاك ضخم النهارده دولة زى البرازيل بتستورد تقريبا ب200 مليار دولار سنويا سلع مختلفه .. الشيئ الآخر برضه اللى أنا أحب أقوله زي ما كنا بنتكلم فى الفتره اللي فاتت احنا بنستورد قمح بنستورد أكل وللأسف إحنا هنكمل نستورد أكل فترة طويله لإن تعدادنا مش هيقل هيزيد
أ.عبد اللطيف المناوى: مع الزياده ومع محدودية موارد المياه
م . رشيد محمد رشيد : يعنى إحنا لو قدرنا نحافظ علي نسبة ال 40% اللي بننتجها دا شيئ فى حد ذاته هيبقي شيئ كويس وبالتالي إحنا هنكمل نستورد طيب النهارده لما تيجى تبص على إستيراتيجة مصر فى التجارة الخارجيه إنت مش بتبص على التصدير بس الإستيراد مهم بالنسبة لك طيب أنا بأستورد النهارده سكر وبأستورد قمح وبأستورد صويا وبأستورد ذره وبأستورد لحوم وبأستورد النهارده يعني بروتيناتك بصوره أو بأخري – أكبر منقطة فى العالم منتجه للغذاء هى أمريكا اللاتينية ومتوقع إنها تكمل هذا التوجه لعقود طويله
أ.عبد اللطيف المناوى: إحنا بدأنا إتفاقيات بالفعل للقمح مع الأرجنتين
م . رشيد محمد رشيد : طبعا وبالتالى يجب ءأمن دلوقت مصادرى دا جزء مهم إحنا شوفناه فى 2008 وشوفناه لما بنتكلم على إزمة زي القمح مسؤوليتك إنك إنت تأمن مصادر غذائك أيوه إنت عليه سياسه ثانيه إنك إنت تزود إنتاجك فى مصر أنا ما بأستبعدهاش ولا بأقول نحن نبطلها ولكن يجب أن يكون عندك تأمين لمصادرك لإن إحنا الحمد لله إحنا لم نتعرض لأزمة في نقص سلعه من السلع فى كل السنوات اللي فاتت إنما لك أن تتخيل لو فيه سلعه من السلع مش موجوده أو ناقصه هيبقى شكل السوق إيه وشكل الناس هتبقى إيه وبالتالى جزء من هذه الإتفاقية كمان تأمين هذه المصادر تأمين النهارده مصادر للحوم والسكر والقمح والذره والصويا والحاجات اللى أحنا محتاجنها لفتره طويله جايه إنشاء الله
أ.عبد اللطيف المناوى: إيه رد الفعل أو النتيجه السريعه المباشره لهذه الإتفاقيات مثلا فى الوقت الحالى ؟
م . رشيد محمد رشيد : لأ شوف أنا مش عايز أضحك على الناس وأقول إن بكره الصبح هيحصل حاجه هذه الإتفاقيات ليس طبيعتها
أ.عبد اللطيف المناوى: مش هنلاقى مرادونا هههه على الأقل موجود معانا
م . رشيد محمد رشيد : لأ دا ممكن يحصل ههه يعني إحنا إتكلمنا على مرادونا وإحنا هناك لإن طبعا مرادونا بالمناسبه بيثير أزمه كبيره هناك لإن هم مشوه ورئيسة الجمهوريه كانت عايزه ترجعه تانى فكان حدث كبير فى الأرجنتين كل يوم الصبح بتكلموا عنه فيه مشدة بين الحكومه وإتحاد الكره ولكن النتيجه السريعه إن إحنا نلاقى إن هناك إتصالات كثيره إحنا هيطلع من عندنا بعثات كتيره هتطلع لهناك إحنا عندنا إتفقنا إن إحنا هنجهز بعثه هتروح للصناعات الزراعية والصناعات الغذائية لإن دا مجال كبير بيننا وبينهم هم بيستوردوا أسمده إحنا بنصدر أسمده إحنا عايزين نستورد منهم غذاء ولكن عايزين نستورد معدات زراعية عايزين نستورد تكنولوجيا زراعية تصنيع غذائى كل هذه الأمور ممكن نعملها فيه شركات من عندهم عايزه تيجى تتعامل فى هذه الأمرو عندنا هنا عندهم صناعة سيارات كبيره جدا اكثر من 4 مليون سياره بينتجوهم هناك برضه فيه مكونات سيارات وسيارات هنشتغل مع بعض صناعة الغزل والنسيج كبيره ولكن ممكن تكون تكامليه لإن هم بيعتمدوا إعتماد كبير على الألياف الصناعية وإحنا بنعتمد على القطن فهتلاقي مجالات كثيره ممكن إننا نشتغل مع بعض فيها
أ.عبد اللطيف المناوى: طيب هنا أظن برضه ده من المطروح على الساحه إحنا بنضيف الى إتفاقيات الجات القديمه إتفاقيه جديده وكما ذكرتم على أهميتها بالنسبة للمستقبل وكذا ولكن بيظل أيضا السؤال موجود ماذا فعلنا نحن بكل إتفاقيات الجات القديمه هل لبينا ما يُنتظر منا تلبيته فى ظل هذه الإتفاقيات ؟
م . رشيد محمد رشيد : لأ شوف هو الإتفاقيات دي زي ما شرحت لك هي ليست إلتزام عليه ولكن ميزه إنت بتكتسبها السؤال بقه هل إحنا وصلنا يعني لإن إحنا نستغلها أحسن إستغلال ممكن أكيد لأ – طبعا لأ يعني إحنا النهارده عندنا خطة لمضاعفة صادراتنا ودا زى ما قلنا قبل كده معتمده إن إحنا نجحنا فى الأربع خس سنوات اللى فاتوا إن إحنا نضاعف صادراتنا وكانت تقريبا حاجه وأربعين مليار أنا بأتكلم على الصادرات الغير بترولية وغير الغاز إرتفعت من 40 مليار الى 95 مليار جنيه سنويا حطينا خطه إعتمدناها مجلس الوزراء أعتمدها وعرضت علي السيد الرئيس إن إحنا فى الأربع سنوات اللى جايه لغاية 2013 هنرتفع ل200 مليار جنيه طيب أولا مضاعفة صادراتك كل 4 سنوات شيئ جيد جداً علي المستوي العالمي جميل ولكن يجب إن إحنا نتذكر إن الأرقام اللي إحنا بنتكلم عليها اقل لسه من الطموحات والأمكانيات اللى إحنا ممكن نصل لها جزء منا مرتبط طبعا بهذه الإتفاقات التجاريه ولكن كان هناك تركيز قوى جدا على أمريكا وأوربا ما كنش حد متوقع زي ما إحنا شوفنا في السنتين اللي فاتوا كان ديه الأسواق اللى بتدرب فى الأزمة الإقتصاديه ويحصل فيها نوع من الهبوط حجم الزياده فى الإستهلاك ضعيف فى هذه الأسواق إنت النهارده لما بتيجى تخش السوق أوعى تتخيل إن السوق دا قاعد مستنيك السوق دا فيه ناس بتخدمه فإنت لازم هتخش تاخد جزء منه حاجه من الإثنين ياإما الزياده اللي هم جايين بيها يعني هم بيشتروا 100 السنه اللي جايه هيشتروا 110 هتاخد من ال10 الجداد دول حاجه يا إما تضطر تطلع واحد وتاخد مكانه لما السوق النهارده زي السوق الأوربي والأمريكانى ما بيكبرش المنافسه بتبقى أعظم ضغط فإنت لازم تطلع واحد عشان تاخد مكانه زى ما قلنا فى البداية الإتفاقيه التجاريه تسمح لك بهذا لإنك إنت النهارده عندك ميزه عنه ولكن برضه زى ما قلنا ديه بتغطى نقص عندك فى الإنتاجيه إنت بتحاول إنك إنت تتعامل فاللي أنا بأقصده هنا مازال الطريق طويل ولكن هذه الإتفاقيات بتفيدك فى توجهات مختلفه كل ما تبقى عندك إتفاقيات أكتر كل ما هيبقى عندك فرصه أحسن والمشوار لسه طويل
أ.عبد اللطيف المناوى: هو ما يبقى علينا دلوقت الإستفاده الأمثل والقصوى بما هو ميسر
م . رشيد محمد رشيد : والمشوار طويل
أ.عبد اللطيف المناوى: أنا بأرجع معاك فى تساؤلات أخيره على التجربه البرازيليه إحنا إتكلمنا على التجربه البرازيليه قبل كده وبنتكلم عنها دائما بقدر من الإعجاب خلينا أسميها
م . رشيد محمد رشيد : طبعا أنا بأتكلم برضه أكيد فيه ناس كتيره كانت بتسمع عن البرازيل والأرجنتين أخبار سيئه جدا الكلام ده كان بيحصل من قبل 15 سنه كانت هذه الدول مثال للإداره السيئة فى الإقتصاد كانوا كل شويه يفلسوا ويقوموا ويفلسوويقعوا
أ.عبد اللطيف المناوى: هو ده بالظبط اللي أنا عايز انطلق منه بالسؤال – السؤال هو لماذا نجحت البرازيل فيما لم ننجح فيه نحن لديهم هدف واضح بالإقتصاد رقم 8 لديهم هدف إن هم يكونوا الإقتصاد رقم 5 قبل 2020 وتؤكد وفقا لقراءتك المهندس رشيد بإنهم خلاص هينجحوا فى ذلك السؤال هو لماذا لا يكون لدينا إحنا مثل هذه الخطوات المحدده الماين إستون زي ما بنسميها
م . رشيد محمد رشيد : شوف يعني أنا مش متفق معاك إن إحنا ما نجحناش فيما هم نجحوا فيه ولكن بالعكس خلينا ءأكد لك إن إحنا لم يكن لنا إن إحنا نمضى معاهم هذه الإتفاقيه لولا إن هم رؤيتهم لنا مشابهة للى إحنا شايفينه عنهم – يعني هم بيبصوا لمصر وبيقولوا ديه دولة صاعده ودولة إقتصادها بينمو في منطقه مهمه وهيبقه حجم مستقبل كبير اللي أنا بأحكيه لك عن البرازيل أكيد قاعد هناك وزير تجاره بيحكيه عن مصر برضه بس من منطلق ثاني فإحنا وضعنا فى هذا المنحني قبليهم هم زى ما أنا بأقول لك تقدموا زائد الثروات الطبيعية اللي موجودة عندهم أنا هأضرب لك مثال البرازيل النهارده أنا قعدت مع وزير الزراعة من 3 أيام أو يوم الخميس البرازيل النهارده بتزرع 160 مليون فدان حبوب بيطلعوا 165 مليون طن حبوب فى السنه جنبهم 280 مليون فدان مراعى جنبهم 250 مليون فدان صالحين للزراعه لسه ما زرعهمش – إنت بتتكلم هنا فى مصر
أ.عبد اللطيف المناوى: عندنا 6 مليون أيوه
م . رشيد محمد رشيد : 7 مليون شوف بقه أنا كام 200 مليون أنا قلتهم لك لغاية دلوقت فإنت بتتكلم مثلا في 700 مليون فدان موجودين عندهم بين البرازيل والأرجنتين 20% من مية العالم يعنى مع كل الزراعات ديه إنت بتتكلم مثلا بينهم هم الإثنين بيزرعوا لهم مثلا 800 مليون فدان يعني مثلا 100 ضعف اللي عندك هنا وعندهم مياه بالزياده .
أ.عبد اللطيف المناوى: كان عندهم إداره سيئه وعندهم أزمات ومشكلات تحولوا؟
م . رشيد محمد رشيد : تحولوا لإن حصل توازن وحصل سياسه مشابهة كثيرا لما يتم فى مصر من إصلاح إقتصادى إحنا ماشيين على نفس السياسه هذه السياسه توجهها كالآتي البرازيل والأرجنتين تركيبه الإقتصاد وتركيبة الدخل القومى مشابهة لمصر عندهم نسبة كبيره من ناس تحت الفقر لغاية النهارده وعندهم نسبه كبيره من الناس اللى عندهم دخول عاليه وعندهم طبقه متوسطة ناشئه بتطلع فالتركيبه مشابهة وبالتالى هم التوجه بتاعه إن هم توجهوا لإقتصاد حر النهارده البرازيل برضه عشان أديك مثال البرازيل عندها 70 الف كيلومتر طرق عماله عملاها شركات قطاع خاص 70 ألف كم طرق – البرازيل عندها طالعه يمكن فى الفيلم عندهم 2100مطار بإستثناء 4 نتعن والباقى كلهم قطاع خاص – شبمكة السكه الحديد 104 ألف بيديرها شركات خاصه فى البرازيل فمن ناحيه هم توجهو النهارده إقتصاد حر منافس وفصال على منافسه ولكن توجهو ببرامج بعاله جدا لمعالجة الفقر يعنى البرامج بتاعتهم حتى يمكن زميلى وزير التضامن كان راح من فتره وشاف البرامج بتاعتهم البرامج اللى هى أصبحت كلها برامج مشهوره إللي هو بيقول لك آه أنا بأدفع ضمان إجتماعى كده بس بشرط الولاد يروحوا المدارس الولاد يأخذوا صحه قال لك أنا مش ممكن هأفضل أدي فلوس للناس وأسيبهم فى الفقر إيه العوامل اللى تخليهم طلعوا من الفقر تعليم كويس صحه كويسه رعايه كويسه للأطفال كل الكلام ده عملوه
أ.عبد اللطيف المناوى: تخطو مراية الفقر
م . رشيد محمد رشيد : المهم اللي أنا بأقصده إن فيه توازن من ناحية توازن إهتمام بالطبقات كلها وبالشعب ومن ناحيه ثانيه توجه لمزيد من المنافسه ومزيد من الحريه الإقتصاديه الموجود داخل الدولة رغم إن رئيس البرازيل النهارده كان رئيس نقابة عمال وكان توجهاته شيوعيه 100% قبل ما ييجي وكان هناك علامات إستفهام هل لما هييجى رئيس البرازيل لولا هل هيُعيد النظر فى هذا التوجه؟ علي العكس النهارده لولا بيشطب يعنى خلاص مدته الثانيه وهينتهى من الرئاسه بعد 5 أشهر ولكن يعتبر زعيم أصبح له مكانة عاليه جدا لإنه حافظ
أ.عبد اللطيف المناوى: إنتقل حافظ على القائم وإنتقل به ,
م . رشيد محمد رشيد : حافظ إنتقل بمستوى أعلى حافظ على التوجه الإقتصادى فى صوره فيها كفاءه من ناحية المنافسه وفتح القطاعات للقطاع الخاص وغيره وغيره ولكن ركز برضه على الجانب الإجتماعي بكفاءه عاليه وإزَّاي يتعامل مع منظومة الفقر وإزاي يتعامل مع منظومة محدودي الدخل هناك فالطريق واحد ولكن اللي مطلوب الإستمرارية هو يمكن الفرق اللي بيننا وبين بعض هذه الدول المدد اللي إنت بتمشي فيها .
أ.عبد اللطيف المناوى: هو إستمرارية ونفس أمل يدي يخلق أمل للناس على الأقل ما نعيش هذه الحاله من .. مهندس رئيس حمدلله على السلامه
م . رشيد محمد رشيد : الله يسلمك
أ.عبد اللطيف المناوى: وكل عام وأنتم بخير
م . رشيد محمد رشيد : وانت بالصحه والسلامه
أ.عبد اللطيف المناوى: السيدات والسادة رمضان قادم بعد أيام قليله كل عام وأنتم بخير كل شيئ فى رمضان تم الإستعداد له قمح آمن خبز آمن السلع التموينيه آمنه
م . رشيد محمد رشيد : وأنتوا والمسلسلات جاهزه عندكم.
أ.عبد اللطيف المناوى: والمسلسلات جاهزة عندنا فى التليفزيون. وبالتالى كل شيئ مستقر كل عام وأنتم بخير السيدات والسادة شكرا لكم والى اللقاء فى مراتٍ قادمة بإذن الله .