النهارده الحمد لله فرح 80 مليون مصرى على قيد الحياه وفرح زيهم او اكتر منهم حبه ناس ميته فى سجل الوفيات طول 30 سنه اثبت المدعى العام حسن النيه وانه لا احد فوق القانون وطبعا هننسى 5 مليون بنى ادم ( ببقشش من جيبى فى العدد ) باقى ال85 مليون ونقول ان دول اللى بيقولوا وحشتنا ياريس اسفين ياريس .......دول حزانى وبيعيطوا ...هم احرار وربنا يصبرهم خلاص الثوره خدت 10 من 10 فى اولى ابتدائى ونجحت والحمد لله فى اول مطلب ليها جه وقت الشغل ياترى الخطوه الجايه ايه؟ سؤال مهم جدا ... الخطوه الجايه من وجهة نظرى المتواضعه اننا خلاص نضفنا الارض من التعابين بس لسه البيئه اللى بينمو فيها التعابين موجوده ولازم نجتثها، يعنى لازم ما نخليش البلد مرتع لاى تعبان براسين وتلاته وعشره وتنانين تيجى تعشش تانى وسطنا ايه اللى بيخلى اى تعبان يعيش ويتوحش الفساد ...والفساد معناه عدم وجود رقابه وان القوانين تفصيل وانه فيه ناس فوق القانون الفساد معناه كلمه انت مش عارف بتكلم مين؟؟؟ اموت واعرف بكلم مين او كلمه انا هوريكم .... او كارت بيطلع يسهل الامور كل ده فساد الفساد ناس تدخل باقرارات ذمه ماليه فاضيه وتخرج وهى مريشه او تكدب وتدعى ان عندها ملايييييييين وهم شحاتين عشان لما ييجوا يخرجوا يبقوا ما كدبوش الفساد هو ان المحسوبيه تخلى ابن الوزير والدكتور والظابط يمسك منصب عالى وهو غير مؤهل وغيره رغم انه كفائه يفضل عاطل الفساد ان الرقص والهلس يكسب والكتاب والقلم يشحتوا الفساد له الف مليون معنى الفساد بنشارك انا وانت فيه دى حقيقه ....ليه؟ لاننا بنرشى موظف عشان يخلص لنا ورقنا اللى هو مظبوط وتمام التمام بس عشان ما يطلعش عيننا قدامه ويضيع يومنا ووقتنا هدر طاب نعمل ايه اذا الموظف متنح مش عاوز يتحرك من مكانه؟ ماهو يا ابقى صالح وارفض ومصلحتى تضيع او اطبق له الخمسه جنيه ومصلحتى اللى هى حقى تمشى بس البلد تضيع طاب والحل؟ الحل ان لما مصالحك تقف دون مبرر تشتكى وفورا يكون فيه حل ...فورا يعنى فورا الحل ان اللى وراك فى الطابور يفهموا ان ده لمصلحتهم وما تتشتمش لان الموظف اللى شكيته هيحرن ويبطل شغل وتبقى بدل ما انت الصح تتحول بقدره قادر لراجل ظالم ومفترى وضيعت الموظف دلوقت الريس واعوانه وشله مارينا كلهم اتحبسوا.... ثم؟ ثم يا سيدى الفاضل لازم وحتما نبدأ نفوق لنفسنا ونسد وداننا عن ثوره مضاده وفلول والكلام ده كله ...بمعنى اصح خللى اللى يعوى يعوى ثم اننا نعامل بعض كبنى ادمين محترمين ثم ان اعرف اخد حقى بمنتهى الاحترام والعدل لا ازيد ولا اقل ثم ... وثم وثم والف مليون ثم عشان نروح سنه تانيه وتالته ونتخرج كلمه اخيره : الحمد لله المجلس العسكرى اثبت حسن نواياه رغم بطئه الا انه انجز...وما ينفعش نقول عشان يدارى اى حاجه فعمل كده ...ما ينفعش خالص وعشان تبقوا عارفين فى الفتره الجايه هنشوف مهازل وناس مالها لا فى التور ولا الطحين هيرفعوا قضايا بالهبل على الريس وعياله كل واحد له حق او مالهوش حق هنا هنبقى بجد بندمر اللى بنيناه لانه ببساطه المحاكم هتتملى واغش وكل قضيه لازم تتفحص عشان نعرف اذا صح او غلط وعشان ده ما يبقاش عبء عالدوله ولا القضاه ونسيبهم يتفرغوا للاهم لازم يكون فيه غرامه ماليه مهوله على اللى هيثبت كدب ادعاؤه .... الأخوه والأخوات ....خلاص النهارده تقدروا تناموا وتحلموا احلام سعيده وتقدروا بجد تحلموا بأما بعد...
