عبد الرحيم يوسف:مسألة الفصل الواحد

واخد ف وشُّه .. وهاجج !
وسايبني متبعتر فِ تفاصيل تشلّ !
باجري على حبال مالهاش أول من آخر
وبتسقط منِّي بلاد كان نفسي أفتحها
مواعيد كان نفسي أضربها
مواويل مالحقتش أغنِّيها
وبنات مالهاش بخت !
ماعنديش وقت عشان أبني العالم من جديد
ولا حيلتي صبر عشان أتحمل جحود العباد !
√
x
ماشي أعلِّم ع الناس والبيوت
خطي المايل مابيلتزمش بخط الأفق
ودماغي المعووجه مش شايفه حاجه عِدله
مرَّه ..
قاللي راجل خبير فِ اللغوصه
: ” إنت ناقصك الخبره الحقيقيه ”
وأنا صدقته !!
زيّ أيّ واحد ماعندوش خبره
بيكلِّم راجل خبير فِ اللغوصه !
كان قدَّامي حل من اتنين :-
- أنطّ فِ كرش أيّ تجربه معديَّه
أو – أكمِّل حل الكلمات المتقاطعه 25 x 25
بس أنا اخترت الحل الخامس
ولبست وش طبيعه صامته
عندها استعداد تستوعب كل عيوب الجمهور
وتصدَّر له الحتَّه اللي تريَّحه
من غير ماتفقد طبيعتها !
راخر الدنيا ادِّيتني من وَسَع
وبقت واخداني راكور حسب الطلب :-
- مرَّه سجاده ع الحيطه
- مرَّه طقم روميو وجولييت
- مرَّه بزَّازه للعيِّل
- مرَّه حكمة العدد
- مرَّه حصان بيجري فِ مكانه
- مرَّه واحد صعيدي ..
- مرَّه البحر بيضحك ليه !
- مرَّه ضلع فِ مربع
- مرَّه حكايه لزوم الطريق
- مرَّه مربع ناقص ضلع
وصلت عشر مرَّات ؟ّ!
ولسَّه ..
مرَّه قاللي راجل مايعرفشي الألف من كوز الحمَّام :-
” جرى إيه يا ابن امبارح ؟!
تعرف إيه انت عن الدنيا !! ”
وأنا صدقته !!
زيّ أيّ ابن امبارح
بيكلِّم راجل مايعرفشي الألف من كوز الحمَّام !
ساعتها .. كان قدَّامي حل من تلاته :-
- أحفر على بُعد تلات شجرات .. وأدفن نفسي
- أحرق القصيده اللي قعدت أكتبها خمسين سنه
- أحدف روحي ف كوز الحمَّام .. وأدلقها عليه
بس أنا ما اخترتش أيّ حاجه !!
مواضيع ذات صلة
1. عبد الرحيم يوسف : حكايات الإزاز المِلَوِّن
2. يوسف رخا: إلى محمد أبو الليل في غربته*
3. أزمة في حراسة نادي الزمالك بعد إصابة عبد الواحد
4. عمرو السعودي : حلم العيال
5. عبد الواحد السيد يحرس مرمى الزمالك في لقائه مع الاسماعيلي بالمسكنات