أحلام بتتحقق

خالتى تحية
مش مجرد ست عادية
ومن امتى الست المصرية ست عادية
طول عمرها بألف
ولا تعرف خوف ولا تعرف ضعف
تخاف على بيتها وعيالها
وتسمع كلام راجلها
ولا تشمت فيه ولا فيها حد
ست يحلف بيها التاريخ
يحلف على حق
ماهو مين اللى يختشى م الحق
وخالتى تحية جوه دارها مدراية
مشغولة فى البيت والعيال
ميهمهاش مين حكى ومين قال
يا بنى خلينا ف حالنا
كل حى وله موال
ودايما تصحى م الفجرية
تأكل فراخها
وتسقى بهايمها
وتحضر الفطار
وتبتدى حصة النقار
قومى يا بنت اصحى يا واد
ماتغلبونيش
ده اللى يغلب أمه يخش النار
اصحوا الجرس ضرب
والشمس ملت الدار
يا عيال اصحوا خلص النهار
اصحوا خليكوا شطار
خالتى تحية تحس إنها ف دنيا لوحدها
وعمره ما يخلص صبرها
ومالهاش دعوة بحد
حتى لو قدام دارها ألف
وفى المندرة ميه
مشغولة ببيتها ملكوتها
وربك منور بصيرتها
ماهى لاتبطرت مرة
ولا كرهت مرة عيشتها
أحسن من غيرنا كتير أقله
بناكل كل جمعة فطير
وعندنا فرشة وسرير
ربنا يكون عون الغلابة
ده فى اللى مش لاقيين حق الطعمية
وتبوس إيدها وش وضهر
وتقوم تصلى الضهر
ولو غابت عن الصالة شوية
تلاقها ف أوضة جوانية
تسأل سؤالها اللى مالوش آخر
يا ترى أطبخ إيه
والفلوس هتقضى
ومعاى كام جنيه
وتسرح
العيال اشتاقوا للزفر
كلها شهر والطير يكبر
والخير يبقى مطر
أبوهم فلاح غلبان
وده النصيب وده القدر
وتفتكر تسرح تانى
الواد الكبير عاوز جزمة
آه منه أبو مخ جزمة
كل يوم يعيط ويعمل لمة
وأبوه مفلس معاهوش
يادى الحوسة ويادى الأزمة
والمضروبة عاوزة توكة وشنطة
تتعايق وتغيظ بطة
وأنا لوقلت لأبوها
لا مش هأقوله
الجدع مش ناقص نقطة
يادى الشيلة ويادى الحطة
آه يا زمن
امتى هتجرى
وتعدى بحر المحن
ونفرح بعد الشقى
ونغنى بعد الشجن
تعرف نفسى قبل ما أموت أحج
بس الأول أجوز العيال
تفتكر هيجى اليوم ده يا واد
ويبقى لنا مع السعد معاد
ياه ده أنا ساعتها
يمكن أموت م الفرحة
أما شوف نوسة لبسة الطرحة
عارف قرب هنا لا الحيط يسمعنا
حلمت عمن أول
إنى راكبة عربية
ومعاى فلوس كتير
وعندى مية جلبية
أوعى إياك تحكى الحلم لحد
عارف إنك عاقل
بس برضه
مش عاوزة مشاكل
خلى سرى ف بير
لجوزى يقول اتجننت
وهتلبس طراطير
ياه ده الليل دخل
تتعشى معاى
عندى جبنة وجرجير
فضل ونعمة وخيره كتير
وتزغدنى ف كتفى وتكمل
سبنى أحلم هى الأحلام بفلوس
يمكن الحظ يصادف مرة المتعوس
والبخت يجيله بألف فانوس
إلا صحيح قولى يا محروس
أمك بقالها جمعتين ما طلتش
على رجليها نقش الحنة
طب أنا مشغولة وإيدى مش فاضية
وهى قاعدة عايقة ورايقة
قولى بس وراه إيه
تهجر بيتى ما تبص عليه
يارب تكبر يا ابن أختى واشوفك بيه
مش زى ابن شوقية جته إيه
عشان مسك الورقة أم جنية
من يومها ما طل على
ولا ندرته يوم بعنيه
ربنا يسهله بس برضه زعلانة منه
المهم أخبارك إيه
وكنت جاى ف إيه
وده كان حال خالتى تحية زمان
أيام ما كانت نص الحاجة شكك م الدكان
دلوقتى العيال كبرو وراحوا إطاليا
ومسكت الورق أبو ميه
وتهزر مع الجارة معاكى فكة 100 يورو
يووووه دورى كويس يا وليه
والحال آخر تمام
والدهب ف إيدها لحد الكيعان
ونسيت الحزن
وبتضحك على دى ايام
وتغمزنى
شفت عزال نوسة
غظت بيه الأعادى والجيران
والكفر ماشى يكلم نفسه
ويقول ده شغل جنان
ربك خيره كتير
ليه أبخل على بنتى
وأبيت جوزها زعلان
وناوية أطلع الحج كل عام
وأطلع عمرة رمضان
وأزور النبى العدنان
عليه الصلاة والسلام
واخد الرجل معاى كمان
حقه يفرح بقى
طول عمره شقيان
صحيح الزكى بيطلع امتى
قصدى ف شهر كام
وعاوزة أتبرع للأيتام
صحيح يا عين خالتك تتعشى
ما تقوليش شبعان
داسة رز وحاشية حمام
واكل خسارة
يا بنت
هاتى الخوخ والرمان
والكيكة وبلح الشام
أجيب لك رز بلبن فى والله كمان
كله من خير الرحمن
بصراحة مقدرتش امسك روحى
وفاض بى وطلعت روحى
م الضحك أنا زوران
فضحكت لما شبعت
وقلت الله عليكى يا خالتى
والله زمان
غضبت بسرعة وقالت
اخص عليك يا جبان
بتعايرنى بليالى زمان
وتفكرنى باللى كان
امشى قوم من هنا
يابت انتى يابت
هاتى دوا النسيان
الواد عكر دمى
آه منه ابن الإيه
لو يعرف بحبه قد إيه
وإنه ساكن دمى
سمعتها وأنا خارج
قلت متزعليش
وأنا والنعمة كمان