مركز النديم يدشن حملة لمناهضة العنف ضد النساء

دشن مركز النديم للعلاج والتأهيل النفسي برنامجا جديدا لمناهضة العنف الموجه ضد النساء، البرنامج اخذ شكل حملة توعية بصيغة مختلفة وجديدة اذ تم توزيع بيانات مكتوبة باللغة العامية في محاولة لمخاطبة ضحايا العنف بلغتهم دون تعال حيث كان الجميع يأخذ علي الحملات السابقة التي تدشنها معظم المنظمات الحقوقية انها متعالية علي الواقع وعلي النساء وتخاطب النخبة.
النص الذي وزعه مركز النديم بالتعاون مع شبكة سلمي لمناهضة العنف ضد النساء والمدعوم من الاتحاد الاوروبي، مكتوب بلغة جميلة تستحق النشر، وهنا ننشر نصه كاملا الذي حمل عنوان "العنف مش مكتوب علينا.. مع بعض ممكن نوقفه". في مصر زي في بلاد تانية كتيرة.. الستات بتتعرض للعنف في البيت.. وفي الشارع.. وفي الشغل.. والعادات والتقاليد احيانا بتظلم الستات.. وتلومها وتدور علي اي عذر للراجل اللي بيعتدي علي الست ويمارس عليها العنف. ايه هو اللي بتعتبره عنف ضد الستات؟ وايه هي اشكاله؟
العنف ضد الستات
هو اي تصرف عنيف او التهديد بتصرف عنيف او اجبار او حرمان من الحرية يمارسه راجل علي ست ويتسبب او ممكن انه يتسبب في اذي جسدي او جنسي او نفسي للبيت.. وكل ده ممكن يحصل في البيت او بره البيت.. وهو في كل الاحوال عنف، ولو الحكومة سكتت عنه او سمحت بيه تبقي الحكومة كمان بتمارس العنف علي الستات.
اشكال العنف
خلينا نحكي اللي بتقوله الستات في زياراتها للمركز او في الابحاث.. ايه اللي هي شايفاه اذية؟.. وبتيجي تشتكي من ايه؟
العنف الجسدي
فيه ستات وبنات اشتكت انها بنتضرب.. والستات اوقات بتنضرب وهي حامل ومن كل 100 ست حوالي 40 واحدة بتتعرض للضرب. منهم اللي ما كانش لها حظ في التعليم.. ومنهم الجامعية.. وكمان اللي معاها شهادات اكبر من شهادة الجامعة.. والضرب بيكون بالايد او بأي حاجة قصاد الراجل.. وساعات الضرب ده بيسبب اصابات كبيرة.. وشفنا ستات عندها كسور او جروح شديدة.. ده غير الكدمات والتورمات.. وفيه حالات كان لازم تدخل المستشفي.
العنف النفسي
فيه ستات تانيه اشتكت ان جوزها دايما يحقرها ويشتمها قصاد العيال.. الاهل.. الجيران.. دايما يزعق.. يدور علي اي سبب.. يتلكك علي اي حاجة.. وفيه ستات قالت ان جوزها ما بياخدش رأيها في اي حاجة ويقولها انها ما بتفهمش او انها غبية او ان رأيها مش مهم.. وفيه ستات اشتكت ان جوزها اتجوز عليها او بيخونها.. او انه ما بيصرفش عليها ولا علي الاولاد.. او انه بيمنعها من الخروج او من التعليم.. او من الشغل.. والستات دي عادة بتحس بالخوف من جوزها وبتبقي حاملة الهم ومش فاهمة ايه اللي هيخليه يغضب او امتي هيغضب ولما هيغضب هيعمل ايه.. ممكن ما يمدش ايده عليها ابدا.. ومع ذلك ينقل لها طول الوقت احساس بانها غلطانة او اقل منه او ما تستحقش انه يتشاور معها.. ومع الوقت الستات دي تبتدي تشتكي من مشاكل في النوم وفي الاكل وفي علاقتها بعيالها وبالناس.. وكمان ممكن تشتكي بصداع او اوجاع في الجسم والعظام والمفاصل ووجع المعدة وغيره وغيره.. وده من تأثير المعاملة الوحشة والاهانة والخوف، وتقعد تلف علي الدكاترة تدور علي المرض وتدور علي العلاج والحقيقة ان تعبها الحقيقي سببه العنف النفسي اللي بتتعرض له في علاقتها بجوزها.
العنف الجنسي
اوقات الزوج يفرض علي مراته المعاشرة الزوجية غصب عنها.. ما يراعيش ان كانت تعبانة ولا حزينة ولا في فترة حداد، ولا ما لهاش نفس في اليوم ده بالذات.. واوقات البنات والستات بتتعرض للتحرش بجسمها سواء بالمس او بكلام جنسي او بالاغتصاب.. فيه ستات اتعرضت لده في الشغل او المواصلات او في الشارع وفيه كمان ستات وبنات اتعرضت لده جوه البيت واللي عمل فيهم كده مش دايما بيكون حد غريب.. واحيانا ده بيحصل في المدارس واحيانا بيكون حد من الجيران او الاقارب او حتي الاب او الاخ او زوج الام.. يعني حد من المحارم.. الاعتداء علي جسم الست بالطريقة دي.. حتي لو من الزوج مع مراته غصب عنها.. بنسميه عنف جنسي.
عنف العادات والتقاليد
ولسه فيه حاجات تانية برضة اسمها عنف لانها بتتسبب في الاذية للستات والبنات.. مثلا: قطع جزء من جسم البنت زي ما بيحصل في ختان البنات هو عنف ضد البنات لان الموضوع ده موروث من زمان اللي بيعملوه بيتصوروا ان الختان بيضمن الاخلاق والطهارة مع ان اخلاق البني آدم سواء كان راجل ولا ست، مضمونة بعقله وتفكيره وتربيته ومش بحرمانه من اي حتة في جسمه.
كمان لسه فيه عادات قديمة موجودة زي الدخلة البلدي اللي بتأثر علي الست جدا وتؤذي نفسيتها وتهين كرامتها لانها بتشكك في اخلاق البنت.. كمان الزواج المبكر هو في الحقيقة عنف ضد البنت اللي تلاقي نفسها متحملة مسئولية الجواز والخلف وفتح البيت وتربية الاطفال وهي نفسها لسة طفلة محتاجة للرعاية.
العنف مش مكتوب علينا، احنا ممكن نمنعه.... وكل واحد له دور
الستات اللي بتتعرض للعنف
لازم ما تخافش.. لازم تتكلم وتحكي وتشتكي.. الستات لما ما تحكيش ما حدش هيعرف اية اللي بيحصل والست برضة ما تشتكيش وترفض، الناس بتفتكر ان الست قابلة ومرتاحة ومش ناقصها حاجة.. ده حتي فيه ناس بتقول ان الستات بتحب العنف.. وبتنبسط لما تنضرب.. واحنا عرفين ان ده مش حقيقي.. عشان كده لازم نتكلم ونحكي ونرفض.. لازم نرفض الاهانة.. اي اهانة مهما كان شكلها.. لازم نصر علي الاحترام في عائلاتنا.. مش بس احترام الصغار للكبار لكن كمان احترام الراجل للست والاخ لاخته والكبار للصغار.. لازم نعرف ان ما حدش في الدنيا.. لا كبير ولا صغير.. له حق انه يمد ايده علينا او يسبنا او يهيننا.. اي حاجة عنده حاجة عاوز يقولها ممكن يقولها بالمودة والتفاهم والاحترام.. وده مش بيقلل من قيمة حد.. بالعكس.. البني ادم بني ادم لان عنده عقل.. يشغله ويستخدمه ويحكمه.
والرجالة اللي بتمارس العنف
بنسألهم: يا تري بتكون مرتاح لما تمد ايدك علي مراتك ولا اختك ولا بنتك؟ تكون مرتاح لما لسانك يفلت ويهين الست اللي بتشاركك الحلوة والمرة؟ تفتكر لو كنت مكانها واتعرضت لنفس الاهانة احساسك حيكون ايه؟ ويا تري لو رئيسك في الشغل عمل حاجة ضايقتك بتمد ايدك عليه؟ بتشتمه؟ ويا تري لو جوز بنتك مد ايده عليها هيكون احساسك ايه؟.. جرب تكون صديق لمراتك ولزوجتك ولبنتك.. يكونوا سندك وانت سندهم.. تفكروا سوا.. تخططوا لبكرة مع بعض.. تقضوا اوقات حلوة مع بعض.. حتلقي الحياة بقت اجمل.
والدولة كمان
عليها تحمي كل الناس من اي عنف ممكن يتعرضوا له سواء في البيت او في الشغل او في الشارع او في المستشفي او في قسم الشرطة.. والاعلام لازم يوعي الناس بالعادات المؤذية لصحتهم وحياتهم.. ومجلس الشعب لازم يغير القوانين اللي بتسمح بالعنف ويشرع قوانين تحمي الستات والبنات وتعاقب اللي بيمارس العنف عليهم.