ديك النهار... (حلوة ديك النهار دي؟) شفت خير اللهم اجعله خير عرض لمجموعة من الشباب الموهوب... الحقيقة ان العرض ده فتح نفسي اكتب علي كام موضوع كده فيما يخص الشأن المسرحي عندينا ف بر مصر... مش هاكلمكم عن الشباب اللي زي الورد اللي كان واقف يمثل بحرارة ف درجة حرارة حداشر لما الجمهور قفقف م البرد وتحولوا لالواح تلج بنهاية العرض مافكهوش الا تصفيقهم بحب للشباب اللي كان واقف سعيد علي خشبة المسرح واللي طول الوقت وهما بيحيوا بقيت عمال اقول ربنا يستر ومايجيلهمش التهاب رئوي لما يخرجوا بره.... عادي شباب متحمس ويعرض فنه ف اي حتة... ومش هاكلمكم عن اعلان المسرحية اللي علي باب المسرح اللي العبقري اللي عمله.. عمله ورا شجرة وارفة مغطية نص الاعلان... عادي بتحصل ف احسن العروض جايز الشجرة طلعت شيطاني بعد ما حطوا الاعلان مش عايزين نظلم حد... انما هاكلمكم النهاردة عن عدد المتفرجين... اللي يا حبة عين امهم لم يتعدوا الخمستاشر نفر وانا عاددهم نااااافر نااااافر. واللي كان مجنني ان الممثلين المساكين اللي مصدقين ف اللي بيعملوه واقفين يحزقوا وينتعوا ويقولوا من جوووووه قوي تبص بقي ع الناحية التانية تلاقي خمس ست متفرجين من نفس عينة العيال الحلوة دي متحمسين قوي برضه وبيصقفوا من جووووه قوي برضه... وباعتبار ان انا بيصعبوا عليا المخلصين اللي لسه مصدقين ان لسه في امل... واللي عمرهم ما هايبطلوا تمثيل رغم كل الاحباطات... كان لازم اسأل لييييه؟.. طب ايه؟ هايفضل الموضوع عامل كده؟ ناس تتعب وتشقي وتعمل فن تدوب فيه روحها واعصابها واربعة خمسة ستة بيتفرجوا وغالبا ما بتكون فيه معرفة بين الممثل والجمهور بتاعه اما لانهم بيبقوا ولاد خالته او عمته او سلفته او لانهم من المتفرجين المجاهدين اللي بيجوا كل يوم... وده اللي دايما يدفعني اقول... ياخوانا المسرحيات دي مالهاش اهل؟ مالهاش حد يسأل عليها؟ مقطوعة من شجرة؟.. يتيمة... وانتوا عارفين اليتيم بيجي عليه يوم ومايلاقيش اللقمة ويشحت... وده اللي بيحصل بالظبط.. هما يومين الافتتاح الحلوين اللي بيبقوا تمام زي شهر العسل ثم قحط.. جدب.. صحراء جرداء لا زرع فيها ولا ماء... وتبقي واقف علي خشبة المسرح وعلي مدد الشوف ف الصالة شايف متفرج وللا اتنين... الصالة بتبقي عاملة زي الارض المشققة اللي مستنية ست شادية تفتح الهاويس وطبعا انتوا سيد العارفين ان الارض لو عطشانة نرويها بدمانا. قال لك عملنا ادارة تسويق مش كفااااية الحكاية مش واحد شايل بوسترات العروض وحاطط البوسترات اللي فيها نجوم ع الوش واللي مافيهاش بيسوقها فوق البيعة.. الحكاية اكبر من كده بكتييير.. علشان نرجع الناس يتفرجوا ع الانتاج اللي لازم ف الاول طبعا يكون يستحق... لازم كل الناس تشتغل... الادارة والمخرج والفنانين واجهزة الاعلام وكله... لو عايزين جمهور يجيي بجد يبقي الشغل من اول وزارة التربية والتعليم لحد الاعلام لحد التعليم العالي... ولانه موضوع كبير مش هاخلصه ف مقالة واحدة انما وراه وراه. ان شالله ياخدله عشر مقالات لان الجميع مشاركين في التعتيم عالعمل الفني اللي وزارة الثقافة شغلتها تبدعه وتدعم مبدعيه. يطلع واحد ويقوللي يا خالد باشا (انا احب ابشبش نفسي) انت خلاص بقيت متشائم... اقول له اتليس.. انا جايلك ف الكلام.. ان كان ع الانتاج الوزارة دي اللي انتوا عاملين تهاجموها ليل نهار.. وحاطين نقركوا من نقرها زي ماتكون زوجة السيد الوالد... بتنتج ف السنة فوق الخمسميت عرض لشباب والكبار والصغار والمائدة عمرانة قدامكوا بس مين ياكل؟ جابت رجل مسرح رائع اسمه رياض الخولي ما بينامش وبيجري ورا الممثلين يتفق معاهم ولو ف بيوتهم وقريب هاتشوفوا سميحة ايوب ورشوان توفيق ورغدة واحمد عبد الحليم وسمير العصفوري وعصام السيد وغيرهم وغيرهم... وكان فيه حاجة ناقصة ابتديت الاحظها ان ماكانش فيه ادارة اعلام حقيقية دلوقتي البيت الفني جاب شاب متحرك ومتحمس اسمه عادل حسان وهو ناقد ومخرج ايضا ومسكة ادارة الاعلام والراجل ده هاري العروض دلوقتي برامج واخبار ف التلفزيون وف كل حتة لدرجة ان اخبار المسرحيات بقت تيجي ف نشرات الاخبار وهارجع للموضوع ده المقالة الجاية... اصل طب ماهو لييييه... ماكان م الاول... لما هو ينفع نذيع عالناس لنشر الثقافة ف الاخبار ليه ده ماحصلش اخر خمستاشر ستاشر سنة كده... مش مهم... المهم انه بدأ يحصل... طيب العروض اللي مافيهمش نجوم من عينة قهوة سادة واللعب ف الدماغ... والتجارب اللي من النوع ده واللي ممكن تتعرض خمسميت سنة والجمهور مايقلش لحظة حصلت ازاي؟ سحر؟ جبنا دجال من بلاد الواق الواق ظبط لنا الجمهور؟ نومه مغناطيسي؟ لا طبعا لان بلاد الواق الواق بعيدة، قووووم اكيد فيه معادلة تخللي الناس ماتسيبش المسارح... معادلة تخللي الثقافة علي اجندة كل مصري... داخل ف المعادلة دي بتاع تلت اربع وزارات شغلتها كده... وداخل ف المعادلة ادارة العرض المسرحي... وداخل فيه ايضا و بنسبة كبيرة وهامة صناع العرض من الفنانين اللي لازم مايناموش الليل طول مافيه ناقد فني واحد او برنامج ثقافي واحد ماشافش عرضهم وكتب عنه علشان الناس تعرف بوجودهم وتفرح بيهم... يا جدعان دا البياعين ف العتبة مابيناموش بذمتك منك له حد فيكم راح العتبة وما شنفش ودنه لحن.. بجنيه ونص وتعالي بص... طولت عليكم... والي اللقاء ف الحلقة القادمة بإذن الله...