التراس الاسماعيلاوي يهدد الرئاسة ويشارك في جمعه الرحيل بالتحرير

ارسل التراس الاسماعيلي رساله تهديد الي رئيس الجمهوريه محمد مرسي من اجل القصاص لاحد افراد الالتراس والذي تم استشهاده امام قصر الاتحاديه "الشهيد عمراحمد محمد موسي جاء ذلك خلال بيان رسمي عبرصفحته الرسمية علي موقع التواصل الإجتماعي "فيس بوك" يؤكد من خلاله نيته في الزحف للقاهرة لمساندة أحد أعضاء الرابطة .
وجاء في البيان :-
عمر أحمد محمد محمود مرسي .. 19 سنة .. عضو المجموعة المقيم بالقاهرة .. رسام جرافيتي ومواطن مصري له رؤية خاصة و رفض لما يعتقد بانه خطأ .. كل تهمته انه بيعبر عن اللي جواه .
اسبوعين و احنا في حالة توهان .. ولا عارفين الولد فين .. ولا عارفين هو عايش ولا مصيره ايه .. ان كنا احنا ولا اهله .
عمر نزل من بيته يوم 27 يناير .. و عند الداخلية مكتوب انه مقبوض عليه يوم 26 يناير !
عمر قعد 5 ايام محدش يعرف عنه حاجه .. علي الرغم من انه كان موجود في القسم وابوه اتاكد من كده !
عمر لف كعب داير .. من قصر النيل للجبل الاحمر و يا عالم راح فين تاني و احنا منتظرين انه يفوقلنا بالسلامة و يقولنا كل الي حصل .. و لحد ما يرجعلنا احنا باذن الله مش هنسيب حقة !
عمر مش لوحده .. و سبقه للجنة محمد الجندي و ناس تاني اتعرضوا لتعذيب و بهدلة كتير .. بس عمر عايش عشان يفضحهم باذن الله !
بكرة البداية ان شاء الله .. لاهل اسماعلية كلهم احنا بننوه اننا هنتجمع الساعه 11 الظهر عند الممر ، هنركب القطر الساعه 12.40 " واحدة الا تلت " اتجاه القاهرة .
هنتحرك من محطة القطار برمسيس للتحرير ، و منه الي المسيرة الي دار القضاء العالي ، احنا نازلين نضغط و نحرك البلاغ اللي تقدم بيه والد عمر للنائب العام عشان نجيب حقه .
احنا مش نازلين عشان عمر بس ، نازلين عشان مينفعش في دولة زي مصر و بعد الثورة الي دفعنا و بندفع كل يوم من دمنا و اعصابنا عشانها و الاخر دا يحصل لنا .. البلد دي بلدنا .
الدعوة للجميع بلا استثناء .. التراس ،حركات ، نشطاء ، مواطنين كل واحد رافض ان دا يحصل في بلدنا .
بكرة البداية .. و ان غدا لناظره لقريب !!