صباح الورد .. حمَّام الهنا!

قال روكا الحرامي للملك رمسيس الثاني : الدنيا نار سيادتك والحر سيّح نوافيخ الناس . إمبارح قابلت مسعد بيه أبوشرز بتاع الدخل المحدود علي قهوة عنتر. حافي ولابس شورت بدون كمام ولافف حوالين دماغه خيشه بتشُر مَيَّة. كل الخيشه ماتنشف ينادي صبي القهوجي ويقول له خرطومك الحلو فين يا شعبان . الواد يسحب الخرطوم من دورة المية ويرش الخيشه. الميَّة عملت بركة غويطة قدام القهوة والعيال قلعوا ونزلوا يستحموا فيها. واللي معاه سنارة دلدلها وقرفص يستني رزقه . قلت له حَّمام الهنا يا مسعد بيه . بس ليه بتستحمي لا مؤاخذة وانت لابس الشرز البني بتاعك .. قال لي أصل قَلَعَان الشرز محتاج مصاريف، وانت عارف يا سيد المعلمين ان العين بصيرة والجيب حصيرة .
واضاف روكا يقول للملك : أصل مسعد بيه قبل ما يقلع الشرز لازم يتبنج، وسيادتك ملك قديم وعارف ان حقنة البنج تمنها الشيء الفلاني. ولازم اتنين رجالة بالهم طويل يسلتوا الشرز بالراحة من علي جلده . أصل الشرز والجلد خدوا علي بعض من طول العشرة وحلاوتها ودايما لازقين في بعض. الراجل كافي خيره شره وما بيقلعهوش. لكن لو عيل من عياله سخسخ وقطع النفس من الريحة عقله بيطير . أصل الضنا غالي سيادتك . ساعتها يستبيع ويقول مابدهاش. يقلع الشراب ويحط دماغه في فتحة الغسالة ويقول لهم إدفسوني. ولما يقفلوا عليه بابها يشاور من ورا الإزاز ويقول لهم أشوفكم أمس. ساعة والثانية ويطلع من جواها بيلمع هو والشرز.
وأضاف روكا: مسعد بيه بخيل جلدة سيادتك . زي كل بتوع الدخل المحدود . يستخسر في نفسه اجازة جمعتين ع البحر يبعزق فيها خمس ست بواكي ع العيال. فالح يقعد ع القهوة وينغنغ نفسه ميَّه بخرطوم شعبان ويلعن أبو الحر ويقول حسبي الله ونعم الوكيل في الحكومة . بيفتري عليها سيادتك وهو عارف ان مالهاش دعوة بالحر .
قال الشيخ غريب : ولا بغيره يا معلم !
قال روكا: الحكومة بتحب الناس سيادتك . نفسها تغمّض عين وتفتَّح عين تلاقي حالهم اتشقلب وبقوا مبسوطين .
قال الشيخ : الكذاب بيروح النار يا معلم !
قال روكا: الحكومة فحتت للناس في كل حتة بحر عينك ما تجيبش آخره ويساع خلق مالهاش أول ولا آخر، عشان اللي حرَّان يلم عياله ويحطهم في القطر ودوغري علي هناك. وإذا كان مستكتر التذكرة ام ثلاثين جنيه بلاش القطر. التكاسي ملطوعة في الميادين . ياخد عربية مخصوص 7 راكب يا دوبك تشيله هو والمدام وعياله الخمسة. ولما يوصل بالسلامة والسواق يطلب حسابه ربنا يعمل اللي فيه الخير . والقعدة ع البحر بتراب الفلوس . كراسي وشمسية وبراد شاي وإزازة ميهَ بميت جنيه يوماتي ما فيش غيرها .
نام الشيخ غريب ، فاقترب روكا منه وصرخ في أذنه : فيه أحلي من كده يا مولانا ؟
صاح الشيخ مفزوعا : مافيش يا معلم !