«ياسمين» تصمم الإكسسوارات وتحلم بالوصول للعالمية

تعشق الإكسسوارات ومزج الألوان وتستطيع دمج القطع لتصنع منها تحفا فنية، إنها ياسمين محمد شعبان مصممة الإكسسوارات والتي تقبل الفتيات علي اقتناء منتجاتها في جميع محافظات مصر بل وفي بعض البلدان العربية أيضا مثل الإمارات والمغرب.
وتقول ياسمين محمد شعبان مصممة الإكسسوارات ذات ال 22 عاما والتي تدرس بكلية الصيدلة جامعة القاهرة إنها منذ طفولتها وهي تعشق الألوان والملابس والإكسسوارات، شأنها شأن جميع الفتيات الصغيرات وكانت تري أن الألوان تستطيع تجميل كل شيء مهما كان بسيطا، ومنذ أن كانت في التاسعة من عمرها بدأت تصميم الإكسسوارات البسيطة لنفسها ولأصدقائها وكانت تصميماتها تنال إعجاب أصدقائها ويقبلون علي ارتدائها إلا أن مع تزايد أعباء الدراسة لم تستطع تطوير موهبتها إذ أنها كانت تحرص علي التفوق في دراستها.. وتكمل »كنت طول عمري متخيلة إن مفيش وقت وخايفة أجازف وآخد خطوة واطلع مش قدها ويكون شوية حماس من اللي بيبقوا في الأول دول وخلاص، وبعد لما دخلت الجامعة والكلية اللي كنت بتمناها وابتدت اهتماماتي واحلامي يكبروا ابتديت أفهم إن في وقت كبير اوي في يومنا ممكن نعمل فيه 100 حاجة مش بس حاجة واحدة بس احنا اللي مش متخيلين وفكرت إني آخد خطوة وأبدأ اعمل حاجة بحبها حاجة مش هضيع وقتي بالعكس هترتبه، وهتخليني قادرة أكمل في دراستي بطاقة أكبر لأني بعمل اللي أنا بحبه.
وتقول ياسمين محمد شعبان مصممة الإكسسوارات: من هنا جاءتني فكرة إطلاق مشروع NY Designs لتصميم الإكسسوارات وهو الفن الذي أعشقه وموهوبة فيه وبالفعل بدأت منذ عامين بصفحة علي المواقع الاجتماعية واستطعت تحقيق خطوات لم أكن مجرد أحلم أن أصل لها ونجح المشروع أكثر مما تخيلت بكثير، وأتلقي يوميا العديد من ردود الأفعال الإيجابية من أصدقائي وعائلتي وعملائي معربين عن انبهارهم بالتصاميم والألوان مما يعطيني حافزا كبيرا.
وتضيف: قدرت اوصل شغلي تقريباً ل80٪ من محافظات مصر، وكمان صدرت لبلاد مختلفة زي الإمارات والمغرب ولما الناس بتسأل ازاي المشروع بقي فعلاً كبير علي أنه بتاع بنت وكمان لسه متخرجتش وازاي قادرة توفَّقي بين دراستك الصعبة دي والمشروع ده لوحدك وازاي مجاش عليكي وقت تستلمي زي اللي بييجي علينا كلنا ده لما الحماس بيروح وازاي بتقدري تتابعي العملاء وتشتغلي وتشحني المنتجات ولسه بتجيبي تقدير ومهتمة بنفسك، إجاباتي علي كل ده كانت ببساطة اللي انا اتعلمته من السنتين دول أول حاجة وأهم حاجة اتعلمتها هي تنظيم الوقت هو أهم حاجة هو اللي بيخليك تحس انك فعلاً قوي وقادر تعمل كذا حاجة في نفس الوقت، وقتنا بيضيع في حاجات كتير جداً مش مفيدة لو جمعنا كمية الوقت اللي بتضيع في كل يوم هنلاقي نفسنا محرومين من حاجات كتير ممكن نعملها ونحققها وهي ده التحدي لو كل واحد بيدرس ويتأمل كده هو بيعمل إيه في يومه هيلاقي نفسه بيعمل مثلاً حاجتين أو تلاتة بالكتير ومتخيل أنه مضغوط جداً ومعندوش وقت بس الحقيقة انك ممكن علي ال 3 حاجات دول تعمل حاجة رابعة وخامسة و10 كمان طول ما انت مرتب وقتك وبتستثمره صح»‬.
وتوضح أنه من الأشياء التي ينبغي علي كل إنسان فعلها هو تخصيص وقت ولو بسيطا دائما لأهله وأصدقائه لأنهم المصدر الحقيقي للدعم والتشجيع وهم من سيشجعونك ويدعمونك كي لا تستسلم وتصل لحلمك، لافتة إلي أن تعاملها مع مختلف الطبقات والشخصيات والجنسيات أثر بها وأصبحت علي وعي ودراية وخبرة أكبر.
وتقول ياسمين محمد شعبان مصممة الإكسسوارات: »‬محدش علمني ازاي اشكّل الإكسسوارات، انا اللي علمت نفسي وحب التجربة في كل حاجة خلاني اعرف انا متميزة في إيه اكتر واركز عليه، ومبقررش انا هشتغل في إيه قبل مبقعد وأجيب الخامات قدامي، انا أول مبشوف الألوان وامسك الخيط بلاقي نفسي بدأت واندمجت».
وتضيف ان اكثر ردود الأفعال التي شجعتها للاستمرار والتميز هي أنها في بداية مشروعها قالت لها إحدي عميلاتها »‬انا شايفة نفسي في الحاجة» وهو ما جعلها تشعر بالفخر أن عملاءها يشعرون بالرضا والسعادة وان الإكسسوار مصمم خصيصا ليلائمهم.
وتحلم ياسمين محمد شعبان مصممة الإكسسوارات أن يكبر مشروعها حيث إنها مازالت تسوق منتجاتها أونلاين وأن تمتلك علامة ومتجرا، لافتة إلي أن والدها ووالدتها وأصدقاءها وأسرتها يدعمونها ويثقون بها وهو ما دفعها لتحقيق حلمها والنجاح والتميز.