عزيزى إبراهيم

اعذرنى لو لقيت بعض كلامى مش مترتب بكتبلك الجواب ده و أنا على استعجال أصلى خلاص لازم أمشى بعيد عن هنا و غصب عنى مش هعرف ارجع تانى، حاولت أقابلك و اتكلم معاك و أقولك كل الكلام اللى جوايا واللى عرفته الكام يوم اللى فاتوا بس لما سألت عليك قالولى إنك لسه مجتش .. معلش مش مكتوبلنا نتقابل كالعاده بس متقلقش ده اخر جواب هكتبهولك، كل مرة كنت بستنى منك رد و أنت ما بتردش،المرة دى الرد مش هيكون ليه لازمه.. طلبى منك بس إنك تحاول تفهم كلامى كويس، أنا ضيعت كل السنين اللى فاتت وأنا غلط عشان كده النهارده لما عرفت الصح فين كان لازم ابعتهولك مش هطول عليك خلينا ندخل فى الموضوع .
طول السنين اللى فاتت كنت بحلم ..بحلم بواقع أحلى من اللى أنا عايشه، بحلم ببكره تتصلح فيه كل الحاجات البايظه فى حياتى، بحلم أنسى كل حاجة غلط حصلت فى حياتى، بحلم البنت اللى كنت بحبها ترجعلى تانى، بحلم اشتغل شغلانه أحسن من اللى أنا فيها، و أحلام تانيه كتيييير مختلفه عن بعضها بس كلها كانت مشتركه فى حاجه واحده بس .. ان كل حلم كنت بحلمه كان بيبقى فيه عدم رضا عن الوقت الحاضر اللى بحلم فيه و تمنى أن المستقبل يبقى أحسن من الحاضر و الماضى .. طبعا أنت جواك بتقول ما هو ده الطبيعى .. أنا كمان كنت فاكر كده لحد النهارده.
النهارده عرفت إنى ماشى من هنا، النهاردة اخر يوم فى حياتى وسط الناس، اخر ساعات ليا فى الحياه أصل النهارده هو اليوم اللى اتكتب إنى أموت فيه .. متتخضش كده طلع اللى هيموت بيحس إن النهايه جت بس عارف اللى بيخوف ايه؟ انك مينفعش تأجل النهايه دى لحد ما تخلص حلم بتحلمه او تعمل حاجه جديده ..عارف كمان المشكله ايه ؟ انى لقيت نفسى بحلم برده .. بس بحلم بامبارح مش ببكره، بحلم اروح شغلى اسلم على زمايلى بطريقه احسن من اللى عملتها امبارح، وأنى أخلص الشغل اللى كان فاضيللى عشان ابقى قفلت المشروع اللى بقالى شهر فيه، و إنى اروح لأمى أقعد معاها واحكيلها عن يومى كان عامل ازاى واحنا بنشرب الشاى فى البلكونه، و أكلم البنت اللى بحبها أقولها أنا آسف حتى لو مش أنا اللى غلطان مش هتفرق المهم نرجع سوى، حاجات كتيير كانت قدامى وكنت سايبها عشان بحلم بحاجة أكبر هتجيلى مكانها ادينى ولا استمتعت باللى كان قدامى ولا لحقت اخد حاجه أحسن ..عارف أنا دلوقتى حاسس بايه؟ حاسس إنى كنت غبى و إنى كان حواليا حاجات كتير حلوه بس أنا اللى مكنتش بعمل اللى عليا عشان حياتى تبقى حلوه بالحاجات دى ..اكتشفت إن المشكله مش فى ظروفنا ولا فى الوقت ولا إنى لما آقعد مبعملش حاجه مستنى بكره يجى أحسن فأعيشه يبقى أنا كده بحلم .. الدنيا ديما هى هى و الظروف اللى حوالينا هى نفس الظروف بس فيه واحد بيسعى و يرضى برزقه و يفضل يسعى عشان يكبر و يحقق أحلامه و ده واحد يستحق الأحلام و يستحق إن حياته تكبر، وواحد تانى بيعلق فشله على شماعة الظروف و إنه هيقعد يستنى الظروف تتحسن عشان أحلامه تتحقق و كأن الدنيا هى اللى المفروض تسعاله و ده هيموت و هو ولا راضى ولا له قيمه.. أنا عارف إنك كنت ديما بتبعد عنى عشان طريقتى و عشان مكنش عاجبك اللى كنت بحاول أقنعك بيه و إنك تبطل تمشى عكس الناس و تجرب حاجات جديده و تعمل حاجات كتير كانت من وجهة نظرى ملهاش لازمه و كنت بستغرب ديما أنت ليه مبسوط مع إنك مكنتش محقق حاجة آكتر منى بالعكس كنت بتعمل مجهود أكتر منى و نتايجه مش واضحه ولا معروفه و كنت بتقول إن أكيد كل خطوة بتعملها دلوقتى هتتحط فى مكانها فى الحلم عشان ساعة ما تيجى اللحظة المناسبة تبقى جاهز تعيش حلمك صح .. النهارده أنا بقلك آسف إنت كنت صح و زى بقيت أحلامى نفسى ارجع بالأيام و اعمل زيك على الأقل جايز كنت ابقى مبسوط بحياتى زيك ..دلوقتى أنا لازم امشى و اسيبك تكمل مشوار أحلامك اللى بدأته .. تحياتى.
الإمضاء..
أنت من الجانب المظلم فى حياتك