البوسطجي!

بقلم : عبدالقادر محمد علي
قال الملك رمسيس الثاني لروكا الحرامي : يساورني شك بأن هناك جواسيس من النادي الأهلي تسللوا إلي داخل الحكومة .
قال روكا : فال الله ولا فالك يا عم رمسيس .
قال الملك : إذن لماذا ظهرت الاوتوبيسات الحمراء في القاهرة فجأة؟ لقد تعمدت الحكومة نشرها في الشوارع في نفس يوم فوز الأهلي الأحمر بدرع الدوري .
قال روكا : الحكومة ماتعملهاش سيادتك. أصل مش معقول تفرش الشوارع بأتوبيسات حمرا لما الأهلي ياخد الدوري ، وبعدين ترجع تفرشها بأتوبيسات بيضا السنة الجاية بإذن واحد أحد .
قال الشيخ غريب : مدد يا سيد المعلمين !
وأضاف روكا يقول للملك : سعد بيه أبو شرز أخضر بتاع الدخل المحدود مش عاجبه الأتوبيس الأحمر . قابلته إمبارح علي قهوة عنتر شايل طاجن سته وبوزه شبرين . لامم الناس حواليه وقاعد يندب ويطبل زي المجنون علي ضهر الصينية ويغني ظلموه . زعلان عشان الحكومة جابت له أتوبيس أحمر فرايحي تذكرته بجنيه بدل الأتوبيس الأخضر الجربان اللي تذكرته بنص جنيه . بيقول أنا مش قرطاس . سخسخت علي روحي من الضحك وقلت من إمتي ؟ وحاولت معاه عشان يفهم ، بس قلة الغذا خلّت دماغه أنشف من جيبه سيادتك .
قال الشيخ: جيبه أنشف وأنت الصادق يا معلم !
قال روكا: أصله بخيل جلدة . مستكتر يدفع هو وولاده كل يوم تلت أربع جنيهات زيادة لوجه الله والحكومة . ويوم ما تتمعظم ح تبقي ميت جنيه في الشهر كله . يعني تمن صينية بطاطس بلوازمها وجواها كيلو لحمة . مش عاوز يعتبرها زكا عن ماله وولاده . وبعدين لا مؤاخذة هو بيجيب الفلوس منين ؟ ده بيلهفها من الحكومة اللي لحم كتافه من خيرها .
قال الشيخ : قصدك عضم كتافه يا معلم !
قال روكا: قلت له ما أنت ح تهبر أول الشهر علاوة اجتماعية 07 جنيه بالميت . ح تقص ضوافرك وتحلق وتشتري صابونة وتدخل جمعيات وتكسي العيال . اللي يفضل إدفع منه ميت جنيه كل شهر فرق ركوب الأتوبيس الأحمر الفرايحي وإضرب الباقي في جيبك .
قال الشيخ : ملعون أبو الفلوس اللي ماتنزه صاحبها !
قال روكا : الحكومة ناصحة يا عم رمسيس . عارفة ان بتاع المحدود كذاب وهوَّال. لكن قلبها الكبير ما يستحملش المسكَنة بتاعته . جت علي نفسها وجابت له أتوبيس أحمر ومزهزه عشان يفك التكشيرة وحياته تبقي بمبي . دفعت تمنه من تعبها وشقاها وقالت كفاية عليه يرمي للكمساري نص جنيه زيادة في كل ركوبة . ومن حنية قلبها جابت له الأتوبيس مع العلاوة الجديدة . يعني مش ح يدفع حاجة من جيبه. يقبض العلاوة من خزنة الحكومة ويسلمها لكمساري الحكومة .
قال الشيخ : بوسطجي يا معلم !
قال روكا : وإذا كان مش عاجبه الأحمر يركب الاخضر الجربان أبو نص جنيه لحد الحكومة ما تدهن كل أتوبيسات البلد أحمر . وبرضه هو ومزاجه . من حقه يقف تحت أي عمود نور ويقول بالفم المليان »مش راكب الأحمر« .
قال الشيخ : .. ويبقي يقابلني لو لقي غيره !