شد وجذب

هي دي مصر...

كلنا مش عاوزين نصدق ان احنا في حالة حرب بجد وإن الأعداء في الخارج مازالواحتي الان ينتظرون ان نسقط لتتحول مصر إلي سوريا او ليبيا
تركب مع سواق تاكسي يفضّل يلف بيك ولو المشوار ب10 جنيه يقولك 20 جنيه يابيه.. تروح تشتري كيلو طماطم من محل خضروات في الرحاب يقولك ب5 جنية تطلع التجمع يبقي ب2 جنيه.. تجيب فني دش علشان يظبط الريسيفر يقولك 100 جنيه تقوله كتير يقولك طب ادفع 50 علشان خاطرك وهو أصلا ما عملش حاجة تستأهل 10 جنيه.. تركن في أي شارع تلاقي واحد طلع من تحت الأرض يقولك ارجع يا باشا وبعدين يقولك 5 جنيه ولو سألته ليه يقولك بناكل عيش كل سنة وانت طيب.. تجيب مدرس في البيت يجبرك إنك تعمل مجموعة من 5 أفراد وإلا تدفع 250 جنيه لوحدك في الحصة طبعاً ويقولك أنا بحب البن غامق والحاجة الساقعة بالثلج.. تفتح التليفزيون تلاقي 2 مذيعين محترمين بيردحوا لبعض وكل واحد يقول للتاني اسكت بدل ما احكي تاريخك الأسود.. أو مذيع أهبل قاعد قدام ميكرفون مش عارف بيقول إية وعمال يشتم في الناس عمال علي بطال.. بالذمة دي بلد ولا ده شعب عاوز يتقدم.. لا ضمير ولا أخلاق ولا احترام ولا أي حاجة كويسة.. اللي بقوله دة واقع كلنا عايشين فيه وبنتعرض له كل يوم بس تقريباً جتتنا نحست وبقينا عايشين وخلاص.. كان الله في عون الرئيس والحكومة.. الشعب اللي المفروض يقف جنب البلد في الظروف السودة اللي احنا فيها عمال يقطع في بعضه والرحمة راحت من قلوبنا ومفيش حد بيفكر في التاني كلة بيقول يا نفسي.. إيه رأيكم نبدأ من جديد كلنا كدة ونرجع زي زمان لما كان الصغير بيحترم الكبير ولما كنت تلاقي ست كبيرة ماشية في الشارع وشايلة شيلة تقيلة تجري عليها وانت ما تعرفهاش وتقولها انا هوصلك يا أمي.. ولما كان البقال يقولك الجبنة اللي عندي مش حلوة تعالي خد بكرة.. أو لما سواق التاكسي كان يقف في الإشارة والعداد يعد وانت نازل يقولك جنيه بس حتي لو العداد عمل 2 جنيه.. ما أهو اللي مخلي الواحد هيتجنن من السلوك ده أنه شاف نفس الشعب في نفس البلد وهو بيتعامل بضمير ولما تسأل حد إيه اللي حصل يقولك إفرازات الثورة.. ملعونة الثورة اللي خلت الأخلاق تغيب واللي خلت الضمير يموت واللي خلتنا بناكل في بعض زي الحيوانات وكل واحد ممكن يدوس علي اللي جنبه علشان يوصل وبس.. احنا كلنا مش عاوزين نصدق ان احنا في حالة حرب بجد وإن الأعداء في الخارج مازالواحتي الان ينتظرون ان نسقط لتتحول مصر إلي سوريا او ليبيا.. لو كان ربنا سترها معانا بفضل الناس الغلابة اللي بتدعي من قلبها احنا كمان لازم نعمل الصح ونفتكر ان احنا الشعب اللي صدر الحضارة لكل دول العالم وعلمنا الشعوب الاسلام اللي هو (قايم أصلا)علي الصدق وعدم الغش والأمانة والنظافة وحب الخير للآخر.. ايه اللي حصل يا مصريين بطلنا نخاف علي بعض ليه وبطلنا نحب بلدنا ليه.. لو كُنتُم فاكرين ان الرئيس السيسي هيعمل كل حاجة لوحدة تبقوا غلطانين.. الراجل لما بيطلع يقول أنه مش هيقدر يعمل كل حاجة لوحده هو بيتكلم بصدق لأن البلد دي مش هتقوم طول ما احنا بنعتمد علي بعض.. اللي فاكر أنه عايش علي حساب غيره هييجي اليوم اللي مش هيقدر لا هوه ولا غيره علي الصمود لأن الموضوع كبير علينا كلنا ومحتجنا كلنا علشان نعدي من مرحلة الخطر اللي كل ما بنقول فرجت تطلع لينا مصيبة ترجعنا تاني للخلف.. أنا مصدق أن الاعلام هو سبب نكسة البلد وان التخاريف والهيافة اللي يبخرج بيها الإعلاميين علي الشعب كل يوم من اهم أسباب تردي مستوي الحوار بين المصريين.. ده انا ما شفتش برنامج واحد بيتكلم علي ان البلد في حالة حرب وكل يوم بيسقط شهداء من الجيش والشرطة والقضاة علي يد الإرهابيين الخونة وكان الأمور أصبحت عادية ومن أساسيات الحياة اليومية.. ومشفتش برنامج بيقول للتجار ان الغش حرام واستغلال الناس حرام وان اللي يخرب بلدة أو يسرق أخوه يكون إنسان سلبي ويبقي بيخالف تعاليم الدين.. فين البرامج الهادفة. وفين الأفكار المحترمة.. خلوا بالكم العالم بقي شايفنا زي ما انا بقول بس احنا مع الأسف مش عاوزين نشوف الحقيقة وعايشين في دور اللي فاهمين كل حاجة واحنا مش فاهمين اي حاجة.. لو كان في فرصة أخيرة للخروج من هذه الحالة البائسة ياريت نسارع كلنا ونفتكر اننا في مركب واحد وان اللي بيخرم في المركب واحنا واقفين نتفرج علية هيكون مصيرنا كلنا الغرق لان ماعرفناش نقول علي الغلط غلط وقعدنا كلنا في كراسي المتفرجين.. اللهم احفظ مصر وشعبها وابعد عنا الغش والفساد واللا مبالاه واجعلنا من الذين يسعون للخير في الأرض.. وتحيا مصر