صباح الورد

جولة انتخابية في منشية القرد

قال روكا الحرامي للملك رمسيس الثاني: مدحت بيه داخل انتخابات الإعادة يا عم رمسيس .. جالي علي قهوة عنتر وقال لي أنا وقعت من السما في حِجرك يا سيد المعلمين .. ما أخدتش ولا صوت من العالم الأوباش بتوع منشية القرد. عشر تلاف جربان لو ينتخبوني في الإعادة أخش المجلس علي حصان ابيض وفي إيدي كرباج الحصانة ألَسْوع بيه اتخن تخين . زعلانين عشان مازرتش المنشية وضربت بقين كلام . أزورهم ازاي والمنشية متحاوطة بمية المجاري وأنا ما اعرفش أعوم ؟.. وحدف في حجري 05 باكو سيادتك وقال لي مش ح ألاقي أشرف منك يعمل لي دعاية في العزبة ويمسك الحلة .
قال الشيخ غريب: قصدك الحملة يا معلم !
قال روكا: قلت له طلبك عندي . ح نعمل معاك أحلي شغل . ومن غير سلاح ولله الحمد . صبياني سامبو ورامبو والعَوْ والأهتم وأبورقبة شبان زي النسمة . بيدبحوا من غير سكينة ، ويحرقوا من غير نار ، ويهدوا دايرة علي دماغ صحابها من غير بلدوزر . احنا بتوع المنافسة الشريفة .
قال الشيخ : أحسن من الشرف مافيش !
قال روكا: لميت صبياني ورحنا معاه نزور ولاد الدايرة في منشية القرد . البيه عيَّط بالدموع وقال لهم: انتم أهلي وناسي . كان نفسي آجي أسلم عليكم من زمان بس منهم لله أهلي ما علمونيش العوم . خدهم بالحضن واحد واحد ودخل عشة الزنجيري وشرب ميَّه خضرا من الزير . وبعد ما تف الحاجات اللي دخلت جوفه مع الميه اتكرع وقال أحلي ميه شربتها في حياتي . قعد ع الحصيرة وسط العيال والنسوان وقال لابن الزنجيري الصُغَيَّر تعالي في حضن عمو يا غالي يا ابن الغالية . الواد كلبش في رقبته ولزق علي حِجره. وكل شوية يمسح للواد العادم اللي بيشُر من مناخيره زي الحنفية . ماكانش ملاحق مناديل. وآخرتها سد الفتحتين وبرشم عليهم بايده ، وفرد الخريطة ع الحصيرة سيادتك وقعد يشاور بالعصاية علي مكان المطار والجنانين والنوادي والجامعات والمدارس والجوامع والكنايس والسينمات والمسارح والبنوك والفنادق 9 نجوم اللي ح يبنيها علي حسابه بعد ما يخش المجلس ويهد منشية القرد ويبني مكانها منشية الغزال .. والواد لسه مكلبش في رقبته بايديه وسنانه . قال لهم أستاذنكم نبني ملعبين جولف بس ، والكام مليون اللي يتوفروا نبني بيهم اتنين هايبر ماركت وسبع تمن حمامات سباحة سخن وبارد عشان العيال تبلبط . الباشا كان بيتكلم وإيده كاتمه علي مناخير ابن الزنجيري اللي لسه قاعد علي حِجره. بس الواد ما استحملش كتمة العادم من فوق وجابه كله من تحت لامؤاخذة البيه ضحك وقال لهم سيبوه .. ماحدش يكش فيه ولا حتي يمسح له .
قال الشيخ : أعز الولد ابن القرد !
قال روكا: شافوا الخريطة بعينيهم وقال لهم أنا مش بتاع وعود في الهوا . آدي الجمل وآدي الجمَّال . فيلا دورين لكل مواطن حواليها جنينة 05 فدان مزروعة بطيخ وكنتالوب ورمان وكافيار ايراني . وجوه الشقق حنفيات زيت درة وتمر هندي ولبن حليب . وتلاجات تعمل بدل التلج لحمه وفراخ وبط وحمام .. وجبنة فلمنك .
قال الشيخ : نسيت الجمبري يامعلم !