طريق النور

إزاي نسامح بعضنا

الأرض أرض عمار.. والخوف دمار.. والالم جوه العيون تكوي دموعه النار.. والزمن عمال بيسرق من عمرنا أعمار.. والحزن بالقنطار.. والطريق مليان حريق واخد في سكتة شمس النهار.. وكلنا ماشيين بضهرنا ومش عارفين نبدأ منين أول المشوار.. عام والتاني والتالت عدو علينا ولسة أمانينا وأحلامنا واقفة في محطة الانتظار.. والكل مش عارف ياخد قرار.
الارض أرض الخير.. لكن زرعها طوال عمرها للغير.. وأهل بلدي صبحوا متفرقين شمال ويمين وكل واحد منهم مستني النفير.. والشر غلب الخير.. والعلم بابه اتقفل والجهل والأرهاب بنغلفه ونحدفه في وش بعض ومحضرينه للتصدير.. وشبابنا طايح ورايح يقفل ببان الجامعة بالجنازير.. وأزهرنا الشريف بقي ملطشة وحروفه منعكشة وشياطين الانس نازلة عليه تدمير.. والبلد ملهاش كبير يلم خلق الله علي كلمة صادقة ومشروع كبير .
وإن كنا عايزين الخير لينا ولبلدنا وولادنا من بعدنا وللغير.. لازم نغير نفسنا ونضف قلبنا ونبدأ التغيير.. وبمناسبة السنة الهجرية علينا نفتح صفحة جديدة ونصالح بعضنا ونكتب أول سطرنا بحروف من نور ونتعلم من نبينا المصطفي الفكر والتدبير.. والعلم والتنوير.. ونسامح ونغفر لكل من اساء لينا علشان مركبنا تسير.
دا نبينا المصطفي الهادي كان قلبه مليان صفاء .. وطريقه لنشر الدعوة كان كله ضياء.. وعمره ما سب ولعن في المشركين ولا الكافرين ودعا بالهداية لكل البشر من غير حقد ولا بغضاء.. وعلمنا السماحة والصراحة والنقاء.. ورسم لينا الطريق وقال لنا عليكم بالقرآن وإتباع سنتي في كل أمر من أموركم علشان تعيشوا سعداء.. وحتي مع الإعداء سامح الكل وعمل مصالحة مع الفرقاء.. وقال كلمته بحكمة اذهبوا فأنتم الطلقاء.
وعلشان نلم شملنا من تاني.. لازم نحاسب نفسنا ونعرف اخطاءنا فين ونعالجها في ثواني.. قبل ما تصبح هم وغم وآلم نرويها ونحكيها في أغاني.. ونعرف إن المصالحة هي الطريق الصح وكل واحد مننا يبدأ بنفسه ويعلمها إزاي تسامح وتغفر وميبقاش أناني.. ونعرف طريق الحق والعدل ونكتب علي جدران الزمن اجمل معاني.. وننسف خلافاتنا وحكاياتنا والعمل يكون عنوانك وعنواني.
دي بلدنا محتاجة كل إيد.. دستور جديد.. وربان يضرب بإيد من حديد علي كل فاسد وحاقد وخاين لتراب الوطن وعنيد.. وإن كان حلم المصريين إن السيسي يكون هو ربان السفينة ويرسم معانا تاريخنا المجيد.. من قلبي بقوله بلاش خليك مكانك.. إحمي ضهرنا من بعيد لبعيد.. واختار معانا ربان جديد.. يكون وليد.. عزمه اكيد.. يمسح دموعنا.. علشان شموعنا وياه تقيد.. ونمسك معاه الدفة.. والزفة تبقي بجد ونغني ياليلة العيد.
وعلشان نحقق حلمنا.. ونأكل من عرقنا ونزرع ارضنا.. علينا نسامح بعضنا.. والدم اللي سال مننا.. ولسة نازف في قلبنا.. نجيب من اللي اغتاله حقنا.. ونبدأ مع عامنا الهجري الجديد أول بداية عمرنا.. ونفوت الفرصة علي أعدائنا واللي واقفين بالمرصاد لنا.. والعلم يصبح هو الأمل والعمل وطريقنا لمجدنا.. وأيامنا اللي جاية تكون مركب نعدي بيها ع الاحزان وأرضنا نفديها بدمنا.. وثورتنا التالتة تكون علي نفسنا.. نعلمها ونأدبها ونربيها ونحميها ويكون التسامح عنوان لنا كلنا.. بس نبدأ بصدق ونسيب الباقي علي ربنا.