طريق النور

صرخة المساكين

الربيع جالك يابلدي.. وكان شكله بديع.. كلنا فرحنا معاه من قلبنا وقولنا حقناح يرجع لنا.. مش راح يضيع.. وفاتت سنة ووراها سنة.. والضحكة كانت سوسنه.. والورد فتح في العيون قبل الربيع.. وكلامنا كان بالأمس زي الهمس.. دلوقتي بقي مسموع للعالم والجموع.. رغم المطر رغم الصقيع..
وفي جمعة الحساب.. كان الخطر ع الباب.. الكل بقي أغراب.. والكلمة محشورة في حلق القلوب تستني الجواب..والأهة توهة في الميدان والصرخة طالعة للسحاب.. والصدق صبح كداب.. والعيون شايفة الحقيقة سراب.. ودم الشهيد ضاع مع حوافر الجمال.. وإندفن تحت التراب.. والبراءة جت للمتهم بجراءة ومن غير حساب.. والورق مكتوب بحبر مغشوش ومرشوش ومفيش عقاب.. وثوابنا عند الله وكله محفوظ في الكتاب.
يارب ياخالق كل الخلايق.. إمتي تعود للنفوس الضماير ومعاها الحقايق.. ونعرف الظالم من المظلوم في ثواني ودقايق.. ونجيب حق الشهيد ونطفي نار الحزن جوه قلوب الامهات ونهدي في عيونها الحرايق.. والكون يكون براح للكل ويساع الحبايب.. ونربي العيال بالحلال وبال رايق.. ونتعاهد سوا علي كلمة الحق لانخاف من سلطان ولا سجان ونعيش مع بعضنا إخوان هلال وصليب الكل جيران وصحبه وقرايب وكلنا نقول كلمتنا ونعرف سكتنا ونكون أخوة وشقايق.
ده كل شيء في القلب لازم ياصاحبي يبان.. إجمع قوتك تاني وقول كلمتك وإكتب علي الجدران..دا أنت معاك الحق وخصمك ذليل وجبان.. وما تخافشي من الخطر.. دا الخطر فيه الأمان.. وافتح كتاب الزمن وإقراه من تاني وإعرف العنوان.. وعلم ولادك الصدق والحرية في المدرسة والجامعة وانشرهم في كل ميدان.. وحارب الظلم بالعقل والحكمة وكل شيء بأوان.. وأصبر تنول النصر.. والنصر جاي لمصر ومعاه أجراس الكنايس وصوت الآدان.
حق الشهيد واجب علينا في كل ساعة تمر.. وحق الغلابة اللي سرقوه الديابة لابد يوم راح يرجع والسحابة والكآبة في العيون تتبدل ملامحها وبسمتها علي الوجوه بتسر.. ودولة الظلم ح تعيش ساعة ودولة الحق بإيدينا تكون جايه بالعرق ويصبح كل واحد فينا حر.. ونأكل من زرعنا وتعبنا ودمنا ونقول لكل العالم ابن مصر الكريمة راجع تاني بربيع يكون صافي من غير عرق أوحر.. والشتا يخبط علينا ندفي بعضينا بالحنية وكلامنا علي اللسان يصبح شهد وننسي المرُ.
ما أحلي العرق لما يضوي ع الجبين ويروي الغيطان وينور الميادين.. ما أحلي الشباب بالغنُا بعد الأنين.. ما أحلي الحرية لما تيجي بعد تعب السنين.. ما أحلاك ياضحكة الطفل الوديع جوه العينين.. دي الدنيا ناس رايحين وناي جايين وناس عايشين خلف الحيطان مساجين.. وكلمة الحق تفضل في القلوب توجع الشرايين.. لحد ما يجي اليوم ونقولها بعزم الرجال وصرخة المساجين مع المساكين.
وبكرة ح ييجي .. بنهار جديد .. ولون جديد .. فجره أكيد .. ضاحك سعيد .. وبقلب صاحي.. ح اشفي جراحي.. وأكتم نواحي.. وأقول لكل الدنيا والناس.. الحق اللي كان ضايع .. ح أجيبه بأديه ولو كان بعيد.