طريق النور

دموع علي خد مصر

محمد أبوذكرى
يابهية.. يا حنية.. يا أفراح.. أنا كلي جراح.. والأرض معدتش براح.. والصوت أهو راح.. لكن دايما صاحي وصداح.. أكتب أحلم.. أرسم.. وساعات أسرح.. وساعات أكون ربان أو ملاح.. وإن كنت صعيدي أو فلاح الدمعة تفر من العين لو جالنا الأفراح.. ونقول أسترها معانا يارب من كل جراح عايشين جنب جنينة أحزانا.. ودايما في نواح.
ولأنك أمي.. وترابك أرويه من دمي.. الحزن في عينك زاد همي.. والجرح الواصل لوريدي بيألمني.. إحضني يا أمايه جروحي.. طبطبي علي روحي.. ضميني وغطيني ونوحي.. خبطي علي كل الخلق وقولي لأهل الغرب وأهل الشرق.. القدس خلاص حطوها في الشق.. وأهي سينا كمان في إيديهم.. واحنا زي خيال مرسوم ع الحيطة.. وعيونا وقلوبنا مش عارفه طريق الحق.. وسلامنا معاهم كان مفروش بالورد.. لكنه كان شوك مغروس في الضهر ونازل دق.. ومعونة بتيجي بتهديد ووعيد وصبحنا عبيد لإتفاقية غبية.. وترابك يا بهية نبيعه لصهاينة وحرامية.. ونعيد من تاني الأغنية والحزن يملا العين والخد. ونعم بنقولها علي طول من غير لأ.
شايف يا أمايه دمعايه علي خدك.. وبتحاولي تخبي الخوف جوه الضحكاية اللي بتحضن جرحك.. وإترسمت مع ليل الأحزان علي أرضك وفي صورتك. لكن يا أمايه أنا عارف إني خذلتك.. وتركت الأرض وغلطت في حقك.. وصغرت في عنيك جداً وظلمتك.. ونسيت حواديتك وبراءتي وطفولتي وأنا لسه في حضنك.
دا أنا مني عيني يا أمايه أجيبلك ورد العالم مليون لون.. وأفرشه قناديل بتنور تملا الكون.. وعبيره ونوره يصبح ساكن فيا ومسكون.. لكن يا أمايه أنا خايف يعملها الملاعين ونتوه دنيا ودين.. وإحنا في غفلتنا نايمين تحت تراب الأحلام.. ونحسب أيامنا في عتاب مع خوف وظنون.. ونقول مع كل منام خطوة لقدام.. يرجعنا الخوف للماضي ونبكي علي اليوم الملعون.. ويفضل حلمنا وأقف مربوط بحزام الأيام.. مشدود علي رعشة خوفنا المسجون.. ولأمتي يا أمايه ح نفضل في عيون العالم أقزام.. وسلامنا كان بس كلام معجون حنية وموزون.. ونستني ونتمني يجلنا صلاح الدين من تاني يحرر أراضينا.. وترجع لينا سينا.. من غير أوراق مسمومة ومدهونة بكذا وش ولون.. وأتمني يا أمايه أكون قدامك إنسان تملاه الجرأة ويبقي جسور وصوته يهد الخوف ويعلا ويملا الكون.
ونصيحتك يا أمايه ليه.. ولأيامي الجايه.. شايلها في قلبي وعينيا.. الفجر أهو لاح.. والخوف إنزاح وبكرة ح نغني لسينا بجد.. وترابك يحميه أولادك ونكتب أول سطر حياتنا بحروف من نور المجد.. ونرفع علم الحرية بأرواحنا مع ثورتنا الجاية فوق الحد.. وترفرف أيامنا من تاني وفرحنا يرجع للعين والخد.. والهم المرسوم ع القلب لازم ينشال ينهد.. ونبني علي أرضك أيامنا بطول الكون من غير عد.. ونغزل فرحتنا ونرسمها علي أكبر حيطة ونكسر أكبر سد.. وكلامنا يصبح هادي وديع.. والحكمة والصبر تكون دستورنا ولا نخاف من حد.
كلمة وبقولها بحق ومليانة دموع.. وبإدعي من قلبي اللي صبح موجوع.. يارب علمني العطش والجوع وخفف عننا أحمالنا.. وإجعل لعيني دموع تبكي علي حالنا.. وإجعل لقلبي ضلوع تشكي لأحوالنا.. وإجعل صوتي أمل وتحقق لنا أمالنا.. وإجعل سؤالي عمل وإجابته عنوانا.. وعرقي يصبح ترياق وميه تروي أوطانا.. وترجع لنا سينا والحب والخير يشملنا.. ويهل علينا النور مع شمس أحلامنا.. وبعزم الرجال الشداد نرفع رايتنا وأعلامنا.