اختراق

عمروالليثى : مساء الخيروأهلا بكم فى إختراق احنا كنا تحدثنا منذ فترة عن المخابرات العامة المصرية وكان من أهم الموضوعات التى طرحناها ملف السيد صلاح نصررئيس المخابرات العامة الذى يعتبره البعض هو الذى بنى المخابرات المصرية الحديثة لكن أيضا فى المقابل كان هناك الكثيرمن الانتقادات التى وجهت للسيد صلاح نصر بعد دقائق وبعد الفاصل الدكتور هانى صلاح نصر يتحدث لأول مرة لإختراق
فاصل تقريرى
أميمة إبراهيم : صلاح نصرأشهر رئيس لجهاز المخابرات المصرية فى الفترة من عام 57 وحتى عام 67 يعد من أكثرالشخصيات التى أثارت الكثير من الجدل ، ولد صلاح الدين محمد نصرفى شهرأكتوبر من عام 1920 بإحدى قرى محافظة الدقهلية تخرج فى الكلية الحربية عام 36 انضم للضباط الأحراروشارك فى ثورة الثالث والعشرين من يوليو كان قائدً لإحدى الكتائب عينه الرئيس جمال عبد الناصر نائبا لرئيس المخابرات عام 56 ثم رئيسا لجهاز المخابرات عام 57 ، صلاح نصر له دوربارز ومشهود فى تطوير جهازالمخابرات ، فى عهده قامت المخابرات المصرية بأهم عملياتها وأشهرها ضد إسرائيل تلك العمليات التى أصبحت تدرس فى معاهد المخابرات الدولية ارتبط اسمه بقضايا تعذيب وتجنيد السيدات فى أعمال استخباراتية أمرالرئيس جمال عبد الناصر باعتقاله وتقديمه للمحاكمة حكم عليه بالسجن 40 عاما الأولى بعد إدانته فى قضية انحراف المخابرات والثانية فى قضية مؤامرة المشير قضى من العقوبة 7 سنوات حتى أفرج عنه الرئيس السادات فى أكتوبر من عام 1974 استمرت معاناته مع المرض حتى وفاته فى عام 1982
عمرو الليثى : دكتور هانى أهلا بك
د/ هانى صلاح نصر : أهلا بك
عمرو الليثى : وسعيد بوجودك معانا فى برنامج إختراق
د/ هانى صلاح نصر : أنا أسعد
عمرو الليثى : عايزأعرف عندما توفى الوالد فى عام 1982؟
د/ هانى صلاح نصر : فى عام 1982
عمرو الليثى : كان عندك كام سنة تقريبا؟
د/ هانى صلاح نصر : حوالى 23 سنة
عمرو الليثى : يعنى انت ممكن تكون شاهد عيان شاف الكثيرمن الأحداث اللى دارت فى فترة حياة الوالد الله يرحمه أبدأ معاك من البدايات وعايزأعرف دورالسيد صلاح نصر فى ثورة 23 يوليو 52؟
د/ هانى صلاح نصر : هو طبعا نرجع من أول إنضمامه للضباط الأحرار كانت إزاى هو الوالد خريج الكلية الحربية دفعة 1936 وكان بيكبرهم بسنة فى الكلية كان المشيرعبد الحكيم عامرسنة حوالى 47 المشيرعبد الحكيم عامرصرح للوالد بالانضمام لتنظيم الضباط الأحرار وكان عاوز يبقى زميله فى التنظيم وكانوا حضرتك مجموعات ما كانوش يعرفوا بعضهم لكن هوعرف إن جمال عبد الناصر هو قائد هذا التنظيم وابتدى يندمج فى التنظيم سنة 49
عمروالليثى : وافق بقى على المقترحات اللى هم حاطينها ، وافق على الأفكار اللى هم طرحوها؟
د/هانى صلاح نصر : آه هو كان ماسك أركان حرب كان واخد كتيبة بعد ما خد أركان حرب كان ماسك أركان حرب كتيبة 13 والكتيبة دى كان يرؤسها كان قائم مقام أحمد شوقى ساعتها كان قائد الكتيبة والكتيبة 13 دى كان فيها أكبرعدد من الضباط الأحرارفى الثورة ودى طبعا قامت بمهمة يوم الثورة كانت هى مكلفة مع الكتيبة بتاعت مخلوص الصديق بالاستيلاء على مقرالقيادة والاستيلاء على الإذاعة وتأمين قصورالملك اللى هى فى الأسكندرية
فاصل
عمروالليثى : كان بيكره الملك فاروق؟
د/ هانى صلاح نصر : لا بالعكس
عمرو الليثى : يعنى بالعكس يعنى بيحبوه ؟
د/ هانى صلاح نصر : لا مش ما بيحبوش ما بيحبش تصرفاته ما هو في فرق ما بين الشخص وما بين تصرفاته .
عمروالليثى : يعنى عايزأقول يعنى هل في واحد انضم للضباط الأحرار كان فعلا مؤمن بأفكارها وللا التغيير لمجرد التغيير؟
د/ هانى صلاح نصر : لا كانوا مؤمنين بأفكارها تماما.
عمرو الليثى : السيد صلاح نصر.
د/ هانى صلاح نصر : آه طبعا.
عمرو الليثى : عايز يغير؟
د/ هانى صلاح نصر : آه طبعا وإلا ما كانش إنضم للتنظيم لان انت عارف حضرتك إن التنظيم ده لوكان فشل كان زمان الناس دى كلها فى المشانق ساعتها
عمروالليثى : تفتكر كلهم؟
د/ هانى صلاح نصر : أكيد ليه لا
عمروالليثى : وللا اللى ظاهر منهم؟
د/ هانى صلاح نصر : ما هم كلهم كانوا ظهروا فى الآخر يعنى معروفة
عمروالليثى : آه بس ظهروا بعد ما تم الاستجابة لطلباتهم والملك انسحب وقبل على توقيع الاستقالة والتنازل عن العرش
د/ هانى صلاح نصر : بس هم ظهروا فى الأحداث يعنى اللى هم حاصروا القيادة العامة فى عصرالملك ولوكان حصل أى حاجة وإتمسكوا فالناس دى كانت شايلة أرواحها على ...
عمروالليثى : الوالد كان بيحب الرئيس عبد الناصر فى الفترة دى يعنى هل ...؟
د/ هانى صلاح نصر : هو كان رغم الخلاف اللى كان بينهم هنقول
عمرو الليثى : هنوصل له لسة.
د/ هانى صلاح نصر : آه
عمرو الليثى : وكان بيحب عبد الحكيم عامر؟
د/ هانى صلاح نصر : طبعا
فاصل
عمروالليثى : تفكتر إنه كان فى مذكراته صادق وللا ممكن يكون فيه وجهة نظر شخصية للتبرئة والدفاع عن ساحته كبنى آدم؟
د/ هانى صلاح نصر : والله لو انت بتقول حاجات منطقية وفى وجود ناس أحياء يشهدوا عليها أعتقد إنها ممكن تكون صادقة بدليل إن الوالد نفسه فى المذكرات بتاعته بيقول أنا لما بانقض الثورة ؛ ثورة 23 يوليو أنا يعتبر بانقض نفسى لان أنا مشارك فيها ولوكان له رأى إن بعد 67 إن النظام كله فشل يبقى النظام كله كان لازم يرحل فأيا كان مين كان المقصر فيه
عمرو الليثى : يعنى هو كان مؤمن تماما إن هو فشل أيضا عشان كده .....؟
د/ هانى صلاح نصر : هو فشل لانه جزء من النظام لكن لو إتكلمنا على دورالمخابرات فهى ما فشلتش فى 67 بالنسبة لدورها فى 67 بالتأكيد المخابرات ما فشلتش
عمرو الليثى : احنا كسبنا المعركة فى 67؟
د/هانى صلاح نصر : ما كسبناش
عمرو الليثى : أمال إيه يا دكتور يعنى ؟
د/هانى صلاح نصر : أدت دورها المخابرات إيه دورها يا فندم جمع المعلومات ووضع القائد فى الصورة ووضع تقديرات وهو له حرية اختيارالقرارالسياسى
عمروالليثى : انت شايف إن فى 67 المخابرات أدت هذا الدور هل السيد صلاح نصر أمد الرئيس عبد الناصر بالمعلومات لما قال له فيه حشود عسكرية موجودة هناك على سوريا قال له لا مفيش حشود عسكرية على سوريا ولما اتخذ قرار سحب القوات من شرم الشيخ قال له هذا القرارا خاطئ وللا قال له سحب القوات من المعركة قال له هذا القرار خاطئ قامت بدور إيه المخابرات
د/هانى صلاح نصر : لا طبعا نظام المخابرات العامة الناس بتخلط ما بين المخابرات العامة والمخابرات العسكرية أى حاجة لها علاقة بالحاجات العسكرية ده دورالمخابرات العسكرية المخابرات العامة لها بتتنبأ بتجيب معلومات وبتقدم تقريرات وأعتقد المخابرات العامة إن قبل الحرب ساعة خليج العقبة فيه تقاريرمن المخابرات إن ده هيؤدى إلى الحرب واحنا غير مستعدين لدخول الحرب
عمروالليثى : يعنى السيد صلاح نصر بعت تقرير للرئيس جمال عبد الناصر قال له نحن غير مستعدين لدخول الحرب نتيجة كذا وكذا وكذا اللى هو إيه؟
د/هانى صلاح نصر : اللى هو إن الجيش منهك من حرب اليمن واحنا غيرقادرين على دخول الحرب فى هذا الوقت التوجهات السياسية مش فى صالحنا قفل مدينة العقبة يعنى دخول حرب وبعدين الرئيس عبد الناصر قرر قفل مضيق العقبة
فاصل
جمال عبد الناصر : أهلا وسهلا بهم احنا مستعدين للحرب قواتنا المسلحة خليج العقبة يمثل المياه الإقليمية بتاعتنا المصرية ولا يمكن بأى حال من الأحوال إن احنا نسمح للعلم الإسرائيلى أن يمرفى خليج العقبة بيهددوا بالحرب اليهود بنقول لهم أهلا وسهلا بهم احنا للحرب لا يمكن بأى حال من الأحوال أن نتنازل عهن حق من حقوقنا هذه المياه هى مياه
عمروالليثى : إذن أنت هنا تؤكد أن الوالد قال بالفم المليان للرئيس عبد الناصرأن المخابرات العامة ترفض دخول مصرفى أى مواجهات عسكرية مع إسرائيل؟
د/ هانى صلاح نصر : آه يا فندم
عمرو الليثى : طب لما لقى الرئيس عبد الناصر خد القرار وقال هنخوض احنا جاهزين ومستعدين فى مايو 67 كان رأيه إيه؟
د/ هانى صلاح نصر : والله هو رأيه من خلال تقارير يعنى لو انت خدت قرار إنك هتخش الحرب يبقى يستحسن إنك كمان ما تاخدش الضربة الأولى كان برضه تقرير المخابرات إنه ما ياخدش الضربة الأولى
عمرو الليثى : يعنى المخابرات العامة هى اللى طلبت من الرئيس عبد الناصر إن هو لا يتلقى الضربة الأولى
د/هانى صلاح نصر : آه لو خد الضربة الأولى يحصل إجهاض للقوات الجوية وبرضه أعتقد إن قادة القوات الجوية قالوا كده قالوا كده فى مذكراتهم حضرتك لو هى بس عشان أرد على حضرتك لوالمخابرات كانت قصرت كان الرئيس عبد الناصر كان وجه لها تهمة التقصير فى إبداء المعلومات كان زودلهم التهمة دى ما كانتش هتخسر حاجة يعنى
عمروالليثى : طيب نعود للبدايات وكيف التحق السيد صلاح نصر بالمخابرات العامة أعتقد كلفه الرئيس عبد الناصركان أيامها السيد على صبرى كان السيد على صبرى ساعتها رئيس المخابرات ؟
د/هانى صلاح نصر : هى المخابرات العامة كانت أسست سنة 53 ، 54 كان السيد زكريا محى الدين
عمروالليثى : مضبوط
د/هانى صلاح نصر : وكانت المخابرات عبارة عن شقتين أو تلاتة فى وسط البلد وكانت فرع من المخابرات العسكرية وسنة 56 مسكها السيدعلى صبرى وكانت الأجواء فى الفترة دى كان مصر بحاجة لجهاز مخابرات قوى يواجه أجهزة المخابرات العالمية
عمروالليثى : تمام
د/هانى صلاح نصر : ففكرعبد الناصرفى إنشاء الجهاز ده فجه سنة 56 قال للوالد يعنى أنا دورت لقيت انت أنسب واحد تمسك جهازالمخابرات
عمروالليثى : مع على صبرى؟
د/هانى صلاح نصر : لا انت هتمسك النائب بتاع على صبرى لمدة سنة وبعد كدة هطلع قرار تبقى رئيس المخابرات عشان على صبرى هياخد وزيردولة أو حاجة زى كده
عمروالليثى : تمام
د/ هانى صلاح نصر : وفعلا كان القرارإتمضى وكان فى حرب 56 رجع تانى لبس البدلة العسكرية و 57 مسك المخابرات العامة
عمروالليثى : يعنى نعتبر إن البداية الفعلية لتولى رئاسة المخابرات العامة هى 57؟
د/هانى صلاح نصر :57
عمروالليثى : طب هو تأثرفى الفترة دى بالمخابرات الأمريكية ؟
د/هانى صلاح نصر : هو مش تأثر
عمرو الليثى : قال إن بناء مخابرات تحدى مخابرات السى آى إيه المخابرات الأمريكية يعنى على أى أساس؟
د/ هانى صلاح نصر : لا هو مش تأثر هو قال أنا درست كل أجهزة المخابرات ولقيت إننا ممكن يناسبنا أكتر النظام الأمريكى مع تعديل ما يلائم النظام المصرى يعنى هو درس وكان عنده مشكلة إن هو كانش يقدر يبعت الضباط الصغيرين يتدربوا برة أو حاجة زى كده فكان بيبتع القادة اللى هم موثوق فيهم وهو ينقلوا الخبرة للضباط بعد كده
م/ حلمى السعيد : وهوسافر طلع بنفسه سافرعشان يتصل بضباط مخابرات اللى فى العالم كله جمال قصدى صلاح نصرعمل أعمال جليلة بنى المخابرات كلها من الصفر وكل عهد صلاح نصر كان نجاحات
فاصل
عمروالليثى : فى الفترة دى من المفترض إن دورالمخابرات كانت حماية مصرمن الخطر الخارجى لكن إتضح فيما بعد إن كان لهم نشاط داخلى على أى أساس وده يتعارض مع نشاطها سواء أمن الدولة أو المباحث العامة
د/ هانى صلاح نصر : ده بعدين عايز تقول إيه حضرتك.
عمروالليثى : يعنى تقدر تقول كده إن المخابرات كان لها دورداخلى فى مصر ؟
د/ هانى صلاح نصر : ما كانش لها دور قبل 67
عمرو الليثى : خالص؟
د/ هانى صلاح نصر : خالص مفيش أى قضية داخلية المخابرات مسكتها حضرتك الإخوان المسلمين إتمسكوا فى المخابرات تم التحقيق معاهم فى السجن الحربى إيه علاقة السجن الحبرى بالمخابرات العامة ده يتبع المخابرات الحربية ، الشيوعيين القضايا الشيوعية لم يتم التحقيق فى المخابرات بالعكس الوالد قدم استقالته سنة 65 أعتقد أو64 مش فاكر لما الرئيس عبدالناصرحب يوكل قضية الإخوان المسلمين للمخابرات العامة ورفض ذلك وقدم استقالته قال له انت كل ما تكون مش عاجبك حاجة تستقيل حتى ساعتها لقاء الانتكاسة سنة 62 ومفيش أى قضايا داخلية الكلام ده تم نتيجة مدولة الكلام فى الصحف والجرايد بعد كده
عمروالليثى : يعنى عايز تقول إن المخابرات طول فترة رئاسة الوالد كان لها بس اهتمام بالشأن القومى ؟
د/هانى صلاح نصر : اللى هو التجسس
عمروالليثى : آه ، إيه أهم القضايا اللى ضبطت فى تلك الفترة؟
د/ هانى صلاح نصر : كتيربقى يفرج عنها دلوقتى فيه قضية طبعا القضية المشهورة وفيه قضية ليمون وفيه
عمروالليثى : فضيحة ليمون؟
د/هانى صلاح نصر: فضيحة ليمون وفيه قضايا للشيوعيين كتيروقضايا تجسس لصالح المخابرات الأمريكية أشهرها طبعا قضية الصحفى الراحل مصطفى أمين
عمروالليثى : هل صحيح إن الأستاذ مصطفى أمين له قضية يعنى كلمنى يعنى البعض النهاردة بيقول لك هذه القضية لفقت لمصطفى أمين واللى لفقها السيد صلاح نصر؟
د/هانى صلاح نصر : ليه يا فندم أنا بسأل حضرتك
عمروالليثى : بتعليمات من الرئيس عبد الناصر.
د/هانى صلاح نصر : وليه جمال عبد الناصر يلفقها له؟
عمروالليثى : لأسباب كثيرة جدا.
د/هانى صلاح نصر : دى مانقدرش نحكم عليها لكن اللى أقدرأعرفه من خلال معايشتى للوالد إن القضية دية الوالد انت عارف كان مسجون فى القصرالعينى والسيد مصطفى أمين كان مسجون فى القصرالعينى وبعض الأطباء منهم أحياء إلى الان مصطفى أمين بعت للوالد قال له أن الرئيس السادات هيفرج عنى إفراج صحى وأنا هطلع وهتوسط عند الرئيس أنور السادات إنه يطلعك وهتبنى حملة صحفية لتبرئة ساحتك من الرئيس عبد الناصر ظلمك رفض الوالد أولا لو هو مقتنع 100 % إن هو مش جاسوس إيه اللى هيرفض واحد مسجون بالتالى هيمسك فى أى حاجة عشان يطلع وبعت لانور السادات وقال له أنا مش عاوزأخرج عن طريق كذا لان حصل كذا كذا أبقى بقية عمرى فى السجن على إنى أخرج على إيد جاسوس هوكان مقتنع إن هو جاسوس ليه القضية بتقول كده هوكان بيبنى دفاعه كله بيقول إن عبد الناصر كان مكلفه كان مكلفه بهذه الأمور
عمرو الليثى : كان عمل زى السيد إبراهيم نافع؟
د / هانى صلاح نصر : لا معرفش السيد إبراهيم ، لكن النهاردة كان سهل جدا يقول لمين الرئيس الراحل عبد الناصر يقول أنا مكلفه وخلاص لكن المخابرات قامت بشغلها ، المخابرات لم تكن تراقب مصطفى أمين على فكرة كانت تراقب العميل الأمريكى اللى هو اللى بيشتغل فى السفارة الأمريكية وبعدين لقوا إن السيد مصطفى أمين بيركن فى حتة بعيدة وكان بيقابله بطريقة أو بأخرى وابتدوا يراقبوه من هذا المنطلق
عمرو الليثى : بلغ الرئيس عبد الناصر بالقصة دى؟
د / هانى صلاح نصر : قال له احنا لقينا كذا كذا فقال له طب راقبوه وشوف هيحصل إيه وبعدين بدأ يحصل له تسجيلات واتقبض عليه واعترف الراجل اعترف وله تسجيلات وله حاجات يعنى ودى حاجات ممكن لا أذيع سرا حضرتك لو رحت المخابرات العامة هتلاقى إن القضية دى موجودة فى المتحف
عمرو الليثى : أنا رحت المخابرات وشفت المتحف كمان لكن يعنى اللى أنا بقوله يا دكتور هانى وهذه القضية لا تحسب على الجيل الحالى للمخابرات العامة يعنى عشان خاطر أنا أكون بتكلم بوضوح فى هذه الفترات احنا سمعنا الكثير عن تلفيق القضايا يعنى وسمعنا عن التخويف والفزع اللى كان بينتاب الناس من تلفيق القضايا يعنى كنا بنسمع يقول لك الراجل بيقعد يهزر مع مراته فى أوضة النوم كانت بتتسجل مين اللى كان بيسجلها
د/ هانى صلاح نصر : ما هو حضرتك برضه فى مصر الناس كلها ما تعرفش إيه الفرق بين الأجهزة الأمنية المختلفة فيه حاجة اسمها مخابرات عامة زى ما قلت لحضرتك دى بيخصها الأمن القومى ، فيه حاجة اسمها المباحث العامة اللى هى النهاردة اسمها مباحث أمن الدولة اللى هى بتهتم بالأمن الداخلى وفيه المباحث الجنائية وفيه المخابرات العسكرية فكل الناس فاهمة إن أى حد بيسجل لها وبتاع دى مخابرات عامة ليه نتيجة الحملة الشرسة اللى تم بها اغتيال المخابرات فى عهد الوالد
عمروالليثى:هواغتيال المخابرات فى الحقيقة تم محاكمة الوالد اغتيال المخابرات أكبر بكتير من أى شخص مع احترامى طبعا للوالد أوغيره لكن المخابرات أكبرمن الوالد فى الفترة دى ؟
د/هانى صلاح نصر : يعنى تم تصفية المخابرات ليه نتيجة تصفية الحسابات السياسية كتشهير أكتر واحد اتعرض لتشهير فى يمكن فى العصرالحديث وما كانش له الحق فى إن هو يرد لما بييجى يرد مفيش حد بينشر له
فاصل
عمروالليثى : فى الفترة دى كان فيه فريقين ؛ فريق الرئيس عبد الناصروفريق المشير عبد الحكيم عامرالوالد كان مع مين مع أنهى فريق؟
د/هانى صلاح نصر : هو الوالد من مذكراته وفى الكلام اللى كان بيتكلمه مع الأصدقاء إن هو كان صديق الاتنين وكان بيحاول إن هو طبعا حصل فيه خلاف بين المشيرعبد الحكيم عامروالرئيس عبد الناصر بعد 62
عمرو الليثى : اللى كتب فيها استقالة مسببة؟
د/هانى صلاح نصر: اللى حصل بقى إن كان فيه نوع من الشك بين الاتنين وابتدى يبقى فيه عيون للرئيس عبد الناصر على المشير وعيون للمشير على الرئيس عبد الناصر وابتدى يبقى فيه شك بين الاتنين
عمرو الليثى : الوالد كان فى جبهة مين؟
د/هانى صلاح نصر: الوالد على حسب كلامه إن هو كان وسيط بينهم
عمروالليثى : ما كانش ليه فى اتجاه عبد الحكيم عامر؟
د/هانى صلاح نصر : لا ما كانش فى حكاية عبد الحكيم عامربدليل إن المشيراستقال والوالد استمرفى السلطة فترة لغاية 13 يوليو ممكن يكون كان بيحب عبد الحكيم عامركصديق فيه فرق لما أحبك كصديق وفى الشغل حاجة تانية هو كان الوالد بيحب عبد الحكيم عامربالتأكيد وبيحب عبد الناصرويمكن حضرتك عارف إن الوالد لما جت له جلطة فى المخابرات العامة فى يولية 67 الرئيس عبد الناصرزارة وكانت لحظة إنسانية بينهم هم الاتنين وقاله سلامتك يا صلاح وقاله صالح عبد الحكيم وصفوا الأمور بينكم يتحمل مسئوليته بس الصداقة لازم تدوم
عمروالليثى : دى كانت إمتى يا فندم الواقعة دى؟
د/ هانى صلاح نصر:13 يولية
عمرو الليثى : يوليو 67؟
د/ هانى صلاح نصر : 67 والوالد فضل تعبان فى الجلطة دى لغاية فضل فى المخابرات العامة حوالى أسبوعين تلاتة وبعدين ابتدى قدم استقالته للرئيس عبد الناصر فعلا وقال له أنا صحتى ما تسمحش إنى أكمل فى المخابرات العامة لان عندى جلطة وخلاص مش عارف أستمرقال له لا انت هتشد حيلك بس روح استريح فى استراحات الرياسة شوية وهترجع تانى الشغل انت عارف إن بعد الحرب مباشرة الوالد قام بدورمضنى للمخابرات أيا كان لوعايزين نتكلم فيه هنتكلم
عمروالليثى : عمل إيه؟
د/ هانى صلاح نصر : طبعا تقييم الموقف على الجبهة سافربنفسه راح السويس وراح الاسماعيلية ، عمل اتصالات مع الأمريكان بتكليف من الرئيس الراحل عبد الناصر لان الرئيس قال له عاوزين طبعا انت عارف إن العلاقات إتقطعت وكان فيه سفارات السفارة الإسبانية هى اللى كانت
عمروالليثى : الوسيط؟
د/هانى صلاح نصر: الوسيط فقال نتصل بالأمريكان نشوف هيعملوا إيه بعد الحرب شغل السياسة يعنى فالوالد اتصل بالأمريكان بعت لهم عن طريق المندوب اللى فى السفارة وتم الرد عليهم فى رسالة من الرئيس جونسون رسالة موثقة موجودة فى المخابرات والرئيس جونسون قال رغم العلاقات المتردية بين البلدين أمريكا تسعى إنها تحسن العلاقات بينهم
عمروالليثى : عرض الكلام ده على عبد الناصر؟
د/هانى صلاح نصر: قال له خلى الاتصالات موجودة وابتدى يعمل الاتصالات من خلال السفارة الإيطالية وتم ترتيب لقاء كان هيسافر تقريبا وزيرالخارجية أوحاجة زى كده والولايات المتحدة بعتت نقط محدودة للحل منها الانسحاب ومنها التعويض ومنها مشكلة اللاجئين وعرضها على عبد الناصر وهوكان موافق على الحل ده فى الأول لكن أعتقد إن الاتحاد السوفيتى وقتها تدخل كان جه وقتها زائر من الاتحاد السوفيتى فقال له خلاص أوقف الاتصالات زائد دوره فى الفلوس للبلد البلد ما كانش فيها فلوس خالص
عمروالليثى : عمل إيه؟
د/ هانى صلاح نصر: باتصالاته دبر10 مليون دولار لان الخزينة كانت خاوية وخد ال 10 مليون دولار تبرع من الملك فاروق كان موجود فى مصركلاجئ سياسى
فاصل
عمروالليثى : غريب قوى إن الوالد يعمل كل هذه المواقف المشرفة لمصر بعد نكسة 67 ثم يحدث هذا الانقلاب الدراماتيكى عليه إيه اللى حصل؟
د/ هانى صلاح نصر: اللى حصل إن طبعا الرئيس عبد الناصر اقتنع 100 % زى ما انت حضرتك بتقول زى ما كنت بتسألنى سؤال هل هو فى صف المشير عبد الحكيم عامر بعض الناس أقنعوه إن المشير هيقوم مع بعض الضباط عاوزين يقلبوا نظام الحكم ولا يمكن يكون الحاجة دى هتتم بدون موافقة صلاح نصر أو مشاركته بطريقة أو بأخرى صراع سياسى فكان لازم المشير أو عبد الناصر واحد فيهم هيكمل هو كان مقتنع 100 % والمشير ما كانش عايز يعمل حاجة لعبد الناصر
عمروالليثى : طيب الوالد قدم استقالته وللا أجبر على الاستقالة؟
د/هانى صلاح نصر: لا هو قدم استقالته لان هو فى حوالى 26 أغسطس 25 أغسطس جه الأستاذ أمين هويدى راح له الجهاز قال له إنه هيبقى مشرف على الجهازفى فترة النقاهة بتاعتك وراح الجهاز معاه قايمة من الناس مطلوب إن هم يمشوا من الجهاز وابتدى يمشى ناس من الجهاز ويحققوا مع ناس فالوالد خدها دى على عاتقه إزاى انتوا تحققوا مع ناس وأنا موجود فقال له خلاص أنا هقدم استقالتى لان أنا اللى مسئول عن أى شئ فى الجهاز ده بس
عمروالليثى : يعنى هو قدم استقالته السيد صلاح نصر قدم استقالته فى 26 أغسطس لما شعر أن هناك ملاحقات قضائية سوف تنال بعض العاملين فى جهازالمخابرات من قبل الرئيس عبد الناصر
د/ هانى صلاح نصر : بالضبط
عمروالليثى : مضبوط
د/ هانى صلاح نصر : تمام
عمروالليثى : قدم ليه وبعدها بيوم؟
د/هانى صلاح نصر: لا مش بيوم هو فضل بعد ما قدم استقالته وهوكان قاعد فى استراحة الرياسة فقال إنه ليس من اللائق إن هومقدم استقالته ويقعد فى استراحة الرياسة فراح مروح البيت وفى أوائل 9 ابتدى ينشر فى جريدة الأهرام أيامها إن المخابرات العامة اكتشفوا إن فيه تجاوز فراح مكلم حسنين هيكل ورد على الكلام دوة ف 5 – 9 و 6 – 9 تم تحديد إقامته
عمروالليثى : تحديد إقامته؟
د/هانى صلاح نصر : آه
عمروالليثى : فين؟
د/هانى صلاح نصر : فى البيت
عمروالليثى : فى البيت؟
د/هانى صلاح نصر : آه
عمرو الليثى : لمدة؟
د/هانى صلاح نصر : على ماأعتقد تم تحديد الإقامة حوالى أسبوعين كده
عمرو الليثى : وبعدين؟
د/هانى صلاح نصر : وبعد المشير اللى حصل له فى 14 – 9 أو حاجة زى كده
عمروالليثى : مضبوط
د/هانى صلاح نصر: طبعا الوالد كان ثائر جدا فى هذه الفترة نتيجة صديقه توفى وجاء له إحساس إن هو أدين بطريقة أو بأخرى أيا كان فيه خلاف سياسى الراجل يموت بالطريقة دى فجت له يعنى كان عنده اقتناع بنسبة مؤكدة إن هو قتل فابتدى يبعت رسايل بقى شديدة اللهجة للرئيس عبد الناصر
عمروالليثى : يقول له إيه؟
د/هانى صلاح نصر:هو الرسايل ممكن حضرتك تنشرها بعد كده
عمروالليثى : أهم حاجة يعنى؟
د/هانى صلاح نصر: إن انت ضحكت على الصداقة وما راعيتش حاجة وكلام شديد يعنى فطبعا بعدها مباشرة كان لازم الراجل ده يبعد أو يسكت يعنى فنقل سرا وراح مستشفى القوات الجوية وحتى والدتى راحت معاه أياميها وقالت مفيش حاجة على بطنه ولا حاجة خلوا بالكم يعنى وطلع هو له حادثة شهيرة طلع فى مستشفى القوات الجوية وقال لهم أنا فلان الفلانى ومسجون والمشير عبد الحكيم عامر قتل هو قال كده ولو مت هبقى أنا الحالة رقم 2
عمروالليثى : طلع فى البلكونة؟
د/هانى صلاح نصر : مضبوط
عمروالليثى : فتح البلكونة وقال لهم يا جماعة عبد الحكيم عامرإتقتل وأنا ممكن يقتلونى أنا كمان
د/هانى صلاح نصر: بالضبط كده
عمروالليثى : وإيه اللى حصل؟
د/هانى صلاح نصر: راح على السجن الحربى مباشرة
عمرو الليثى : تمام بعد الكلام ده على طول ؟
د/هانى صلاح نصر: كان ساعتها حضرتك لورجعت للجرايد ساعتها محاولة قلب نظام الحكم لما كانوا متهمين فيها ما كانش فيها إسم الوالد دخل بعد كده المتهم رقم 3
م/ حلمى السعيد : حادثة البلكونة دية أنا كنت حاضرها فى مستشفى القوات الجوية ، مستشفى القوات الجوية دى فيها أحمد يونس أخويا كان رئيس القوميسيون وكنت أنا بحقق مع صلاح هو طلع فى البلكونة يزعق وكان بيزعق بإيه بيقول يا شعب مصر تعالوا شوفونى أبصرإيه أنا صلاح نصر أنا الوطنى أنا .. بس واحد بيفضفض إنما لا قال على عبد الحكيم وماكانش عبد الحكيم حصل له حاجة
فاصل
عمروالليثى : تم التحقيق مع الوالد بعد كده بعد رحيله للسجن الحربى مضبوط؟
د/ هانى صلاح نصر: آه
عمرو الليثى : من النيابة العامة مضبوط؟
د/ هانى صلاح نصر: آه ، لا تم مساومات الأول
عمروالليثى : إيه المساومات بقى؟
د/ هانى صلاح نصر: الرئيس عبد الناصر كان بيبعت له ناس من النيابة العامة السيد على نورالدين تحديدا عشان نكون واضحين وكان بيقول له الريس لسة باقى عليك بس انت تسكت شوية ما تتكلمش وهوعارف إن انت وطنى وعارف وعارف هو الوالد كان ثاير يعنى خلاص واحد ثاير وبيتكلم وعاوزينه يسكت دخلت القضية فى المحكمة ووجهوا له الاتهامات اللى حضرتك عارفها بقى اللى هى قلب نظام الحكم وانحراف جهاز المخابرات
عمرو الليثى : الوالد كان متهم أنه يقوم بالتجسس على الشخصيات العامة فى الدولة والوزراء وكبارالمسئولين وإمداد الرئاسة يوميا بتلك التسجيلات للاستماع إليها هل هذا صحيح أم غير صحيح؟
د/هانى صلاح نصر:هذا غير صحيح يا فندم
عمروالليثى : إيه بقى الصحيح؟
د/هانى صلاح نصر:الصحيح إن الرئيس الراحل جمال عبد الناصركان عنده جهازمراقبة تليفونات فى بيته واخد بال حضرتك لانه بعد 62 كان متشكك ومرتاب فى كل من حواليه كان عنده جهازمراقبة بيديره السيد سامى شرف بتاع المعلومات فى بيته والوالد قال حتى إنه كان عنده جهازبدائى فى بيته كان مجرد إنك بتحط ال3 حروف اليمين بعد ما تطلب النمرة يبتدى يراقب على طول فكان خايف أو متوجس منهم واحد بيحمى نفسه وحتى مرة من المرات المراقبات اللى تمت فى هذه الفترة الوالد كان بيزور الرئيس الراحل فقال له خد يا صلاح شوف ده كان تسجيل لشخصية مهمة يعنى شخصية نسائية مهمة زوجة حد مهم الرئيس عبد الناصر كان مسجلها وقال ده شغل المخابرات الكلام ده كان بيتم عن طريق سامى شرف المخابرات العامة لم يكن لها أى صلة بالتسجيلات إلا من خلال قضايا التجسس يعنى بيراقب حد بطريقة أو بأخرى
عمروالليثى : يعنى ما كانوش بيراقبوا يا فندم فنانات ولا حاجة؟
د/هانى صلاح نصر:لا فيه فرق إن نخش فى قصة فنانات وتانية
عمروالليثى : أنا كنت باخد لها المدخل.
د/هانى صلاح نصر:آه ممكن يراقب فنانة بس تكون الفنانة دى شغالة فى المخابرات
عمروالليثى : هو كان فيه فنانات بيشتغلوا فى المخابرات؟
د/هانى صلاح نصر : عدد قليل
عمروالليثى : زى مين؟
د/هانى صلاح نصر : أعتقد مفيش داعى لذكر أسامى لان أنا نفسى ما كنتش أعرفهم أساسا
عمروالليثى : دول كانوا ضباط فى المخابرات؟
د/هانى صلاح نصر : مجندين آه
عمروالليثى : مجندين؟
د/هانى صلاح نصر : آه
عمروالليثى : كيف تم تجنيدهم؟
د/هانى صلاح نصر: كان بيقول لها انتى هتشتغلى فى المخابرات بطريقة أو بأخرى وبتمضى على إقرارإن هى هتشتغل فى المخابرات وبتاخد ماهية ولها ملف ولها فايل والعملية اللى بتقوم بها بتاخد مكافئة وبعض من الستات دول قاموا بأعمال جليلة كان لا يمكن للرجال إنهم يقوموا بها
م/ حلمى السعيد : في بنات واخدين كلية آداب قسم إنجليزى وقسم فرنساوى وبيشتغلوا ويتارس فى الهيلتون أول ما طلع أو ما افتتح فالبنت بتشتغل ويترس يعنى لما تقول لها تعالى وكان بيدى 40 جنيه فى ذلك الوقت 40 جنيه يعنى كان خريج الجامعة بياخد 12 جنيه فكان بيدى هو المخابرات 40 جنيه اللى بترضى تشتغل بتيجى معايا فكانوا بييجوا المبلغ كبير
عمروالليثى : وإيه رأيك فى اللى بيتقال إن الوالد كان بيعمل على الواحدة حاجة إسمها عمليات الكونترول إنه كان يورط الفنانات أولا فى علاقات مع بعض الشباب ويتم تصويرهم بكاميرات سنيمائية ثم يتم مواجهتهم بهذه الشرائط ويقال لهم تشتغلوا معانا وللا هنذيع الأفلام دية
د/ هانى صلاح نصر: لا الكلام ده مش مضبوط الكونترول ده كان بيتم مع العملية لان الفنانات برضه نرجع نقول إن هم قليلين جدا اللى اشتغلوا لكن الستات كتيراللى كانوا بيشتغلوا فى المخابرات ييجى 100 واحدة كانوا بيشتغلوا فى المخابرات
عمروالليثى : 100 واحدة؟
د/هانى صلاح نصر : 100 واحدة تقريبا الفنانات يمكن ما يزيدوش عن 3 أو 4 فنانات
عمروالليثى : كانوا مشهورين يا فندم ساعتها؟
د/هانى صلاح نصر : آه كانوا مشهورين
عمروالليثى : معروفين؟
د/ هانى صلاح نصر : آه وحضرتك القضايا اللى كان بيشتغل فيها السيدات كانت بتتم لما يكون فيه حاجة ماسة لهم مش كل قضايا المخابرات بيشتغلوا فيها الستات ومش معنى ست بتشتغل فى المخابرات إنها تكون علاقة مش مضبوطة أو علاقة سرير ممكن تكون علاقات عامة ، واحدة تلاقيها سيدة مجتمع فبتجيب معلومات بطريقة أو بأخرى الست اللى انت حضرتك بتقول كونترول عليها اللى هى ست بتوقع عميل ما هى دى مجندة يعنى بتقول معلومات ممكن تبيع يعنى طبعا معلومات مخابراتية فلازم يكون عليهم كونترول فأغلبيتهم كان بعلمهم
فاصل
عمروالليثى : هل كان السيد صلاح نصر موافق على استخدام الجنس فى الحصول على معلومات؟
د/هانى صلاح نصر : هو اللى اقترح الموضوع ده هو الرئيس جمال عبد الناصر المعلومة دى أول مرة أقولها الوالد كان معارض فى الأول تشغيل ستات انت عارف المجتمع المصرى بيرفض هذه الفكرة لكن بعد ما قعد واقتنع إن كل أجهزة مخابرات العالم وبالذات إسرائيل بطريقة عالية جدا فابتدى يستخدمها بطريقة محدودة مع كونترول على بعضهم
م/ حلمى السعيد : لا ما حصلش كده صلاح نصر راح ألمانيا ده هو اللى قال لى يعنى لقى الألمان بيستخدموا الستات فنزل رجع استخدم الستات, وهو عبد الناصر هيدخل ليه يستخدموا ستات وللا يستخدموا رجالة ما كانش عبد الناصر بيتدخل بالشكل ده **
عمروالليثى : طب والرئيس عبد الناصر فكرفى هذه الفكرة ليه يعنى فكرة إيجاد سيدات فى العمل أو فى جهاز المخابرات ومعروف إن عملهم هيكون من خلال السرير ؟
د/ هانى صلاح نصر : عجبته
عمروالليثى : إيه الفكرة يعنى كانت ليه يعنى ؟
د/ هانى صلاح نصر : الفكرة إن أجهزة المخابرات التانية بتقوم بهذا العمل وما ينفعش انت النهاردة يكون أجهزة المخابرات التانية إذا استدعى الأمر لان أغلبية الجواسيس هم ستات فى الحقيقة يعنى المشكلة كلها حضرتك فى حاجة معينة إن مفيش دولة بتبين الجهاز بتاعها بيشتغل إزاى يعنى انت النهاردة يعنى الشغل المخابراتى هو شغل فيه مباح ولكنه غير قانونى يعنى حضرتك لما تكلمنى النهاردة إنه بيشغل ستات فيه قسم السموم آه فيه قسم للسموم
عمروالليثى : بيفتحوا خزن؟
د/ هانى صلاح نصر : آه بيفتحوا خزن هو ده شغل قانونى لا مش قانونى لكن مباح .
عمروالليثى : ما هو السؤال يا دكتورالحقيقة مش حكاية إن يقال إنه مباح أوغيرمباح هو الكلام بس إسمح لى هو فيه انحراف وده اللى قيل يعنى الوالد استغل سلطته كرئيس للمخابرات وانحرف بهذه السلطة فأقام علاقات مع بعض السيدات هؤلاء وضغط عليهن بالعلاقات معهن من أجل اللذة الشخصية أولا وأيضا تم استغلال هذا الموضوع فى علاقات شخصية ليس لها علاقة بالعمل العام أو عمل المخابرات وهديك نموذج إذا كنت عايزأديك نموذج هديك إسم السيدة إعتماد خورشيد هذا ما قالته اعتماد خورشيد فى العديد من المقابلات التليفزيونية وفى مذكراتها تعقيبك إيه؟
د/ هانى صلاح نصر : أنا هرد عليك فى النقطة دى أولا حضرتك عايزنى أرد لك على اعتماد خورشيد ولا على السيدات عموما
عمروالليثى : رد لى على ده وعلى ده.
د/ هانى صلاح نصر : طيب السيدات عموما المخابرات كانت لا تجبر أى سيدة على العمل بالجهاز والنهاردة حضرتك بتقول إنه بيتضغط عليهم بالعكس الناس كانت بتتطوع إنها تشتغل فى جهازأمنى زى ده كان بيديهم امتيازات
عمروالليثى : زى إيه الامتيازات؟
د/ هانى صلاح نصر : بتاخد فلوس وبتاخد علاقات
عمروالليثى : كانت بتاخد كام يعنى؟
د/ هانى صلاح نصر : لا ماليش دعوة
عمروالليثى : إيه اللى يخلى فنانة تروح تاخد مرتب عشان خاطر هى عارفة إنها هتمارس الجنس مع شخصية عشان تجيب منه معلومات وهى أولريدى فنانة بتكسب كويس؟
د/هانى صلاح نصر:انت حضرتك عاوزنا نتكلم فى الموضوع ده
عمروالليثى : معلش أصل حضرتك قلت لى فنانات وشخصيات عامة.
د/ هانى صلاح نصر : آه
عمروالليثى: يعنى انت اخترت لى نوعيات أو فئات من المجتمع المصرى مش محتاجين الشخصية العامة دى محتاجة فلوس فى إيه دى واحدة عندها فلوس إيه اللى هيخليها إن هى وهى سيدة وزوجة وسمعنا موضوعات زى كده تروح إنها تعمل؟
د/ هانى صلاح نصر : مفيش زوجة يا فندم
عمروالليثى : يعنى بياخدوهم آنسات يا فندم كانوا مفيش واحدة زوجة يعنى كانوا بيشترطوا إن العمل للانسات؟
د/ هانى صلاح نصر : لا هم يا آنسات يا متزوجات
عمروالليثى : مطلقات يعنى؟
د/ هانى صلاح نصر : مش هنخش فى كلام من ده
عمرو الليثى : أنا بقول إيه اللى يخلى شخصيات عامة مش محتاجة فقيرة مثلا ده حتى الفقراء شرفاء وإيه اللى يخلى فنانة محترمة أو فنانة مش محتاجة على الأقل ما فيه برضه منهم فيه الصالح وفيه الطالح إنها تروح تاخد مرتب ما أعتقدش إنه هيوازى اللى بتاخده فى الأفلام فى سبيل إنها تشتغل فى المخابرات وهى عارفة هتعمل إيه كويس قوى مش عايز تقول لى إن مفيش ضغوط
د/هانى صلاح نصر : لا
عمروالليثى : ومفيش سيطرة.
د/هانى صلاح نصر : لا
عمروالليثى : دكتورهانى دى فنانة كبيرة دخلت المخابرات العامة لما حست إن هى سوف يمارس عليها ضغوط سابت البلد وخرجت برة مصر ومش هقول إسمها.
د/ هانى صلاح نصر : الكلام ده إتكتب فى الجرايد يعنى كل اللى حضرتك بتقوله كلام جرايد
عمروالليثى : وذكر فى قضية فى تحقيقات النيابة وقضية انحراف المخابرات.
د/ هانى صلاح نصر : زى مين ؟
عمروالليثى : مش هقول إسمها
د/ هانى صلاح نصر : لا معلش الكلام اللى انت بتقوله دوة إتقال فى الجرايد فى حملة للتشهيروأنا عارف إنها فنانة كبيرة الفنانة ابتعت لها لما الوالد إترفع عليه قضية إزاى إنها تقول حاجة زى كدة الست أنكرت إنها قالت حاجة زى كده فكان أى واحد يكتب النهاردة تقول إيه ده فلانة قالت وفلانة عادت هاتوا الست دى عايز
عمروالليثى: عايزأقول لك حاجة يا فندم معلش ما هو بعضهم يا فندم مش عايز يتفضح وبعدين حتى اللى ما اشتكوش ما اشتكوش عشان الفضيحة لان على الأقل الملفات كانت فى المخابرات لكن لما هتخش فى التحقيقات دى سيدة تروح تقول أنا كنت بعمل كده هيسيبوا
د/هانى صلاح نصر: وهى لو كانت خايفة من الفضيحة لو كان الكلام صحيح هتطلع فى الجرايد تقول أنا كان فلان
عمروالليثى : خلاص ما هو مشى.
د/هانى صلاح نصر: لا طب ما تيجى تقول الكلام ده وتقول هى جت اشتغلت فى المخابرات إزاى .
عمروالليثى : ما أنا عرفت بعد ما خرج من السلطة وبعد ما اترفع عليه قضية
د/هانى صلاح نصر : بص حضرتك الحاجات دى كلها الكلام ده ما حصلش
عمروالليثى : على فكرة أنا مش عايزأجيب حد بس أنا بنقل لك اللى أنا بحكيه لسيادتك ده هذاهوالانطباع العام السائد لدى الكثيرين عن السيد صلاح نصر كرئيسا للمخابرات فى تلك الفترة.
د/ هانى صلاح نصر:مين اللى قال الكلام ده كان بعيد عن قضية انحراف المخابرات وهحكي لك ولا حد من المخابرات اللى انت بتتكلم عليها دى حد قال عليها حاجة ما هم كان ممكن يقولوا أقوالهم لوكانوا هم عايزين
عمروالليثى:هم هيقولوا إيه يا دكتور هانى فيه ست محترمة إضغط عليها عشان تمارس الجنس مع شخصية عربية أو شخصية أجنبية عشان تاخد منه معلومات هتروح تحكى تقول أنا إضغط على؟
د/هانى صلاح نصر : آه تقول ما تقولش ليه
عمروالليثى : يعنى إزاى تقول إزاى مش دى زوجة وأم وعندهم أولاد واحدة منهم كانت زوجة يا دكتورهانى وكانت فنانة معروفة وكانت زوجة وبرضه مش هقول إسمها وربنا يرحمها ؟
د/هانى صلاح نصر:حضرتك قضية المخابرات مفيش فيها غير ست واحدة بس كل الأسامى اللى حضرتك بتقول عليهم مشهورين ومش مشهورين محدش رفع قضايا على الوالد ولا شهد عليه ولا قال كلام فى الجرايد
عمروالليثى:أناعلى فكرة اللى أنا بقوله لسيادتك ده من خلال ملفات قضية انحراف جهاز المخابرات اللى أنا بقوله ده مش بقوله من دماغى وعندى نسخة كاملة أديها لك وموجودة.
د/هانى صلاح نصر:يا ريت والله لو فيه قضية حضرتك اللى انت بتتكلم عليه دوة الملف اللى هو بتاع النيابة مش القضية نفسها كمان ادعاءات النيابة يا فندم لكن القضية ، دى فيها ادعاءات لها ردود أى حد شاف الردود دى ولا محدش شاف الردود دى
عمروالليثى: احنا العبرة فى النهاية للحكم .
د/هانى صلاح نصر:الحكم منين يا فندم؟
عمروالليثى : من المحكمة
د/هانى صلاح نصر: إسمها إيه ؟
عمروالليثى : من المحكمة
د/هانى صلاح نصر: إسمها إيه المحكمة دى؟
عمروالليثى : محكمة الثورة
د/هانى صلاح نصر: مين رئيسها؟
عمروالليثى : رئيسها موثوق فيه يا فندم؟
د/هانى صلاح نصر: حضرتك دى تصفية حسابات سياسية وده مش قاضى ودى محكمة استثنائية
عمروالليثى : يا سلام ما هى محكمة الثورة دى قامت من 54 حاكمت الإخوان ما بقيتش شرعية غيرلما بس حاكمت صلاح نصر.
د/هانى صلاح نصر:انا مش مسئول عن مين اللى عمل محكمة الثورة ولا الرئيس عبد الناصراللى كان عاملها أنا بتكلم فى الجزئية اللى تخصنى فقط لا غير, لكن النهاردة دى مش محكمة وده مش قاضى
م/ حلمى السعيد : في محمد نسيم قدم تقرير قال إن المخابرات العامة فيها انحرافات نسائية ومالية فحرصا من جمال عبد الناصرأويعنى فى رأيى إن هو حرصا من جمال عبد الناصر على صلاح نصر قال إن اللى يحقق معاه هو حلمى السعيد فرحت أحقق معاه رحت المخابرات فما حققتش مع صلاح نصر فى الأول أول ما شفت لا ما شفتوش خالص أنا لما رحت رحنا خدنا أوضة فى المخابرات وبدأنا نتكلم على إيه هى الانحرافات إيه كلمة انحرافات دى قالوا انحرافات ستات طب هاتوا الستات فجبنا الستات يعنى فلانة وعلانة وكده يعنى كمية ستات أهم واحدة اعتماد خورشيد ؛ اعتماد خورشيد كانت بتكتب شكاوى فجاءت اعتماد خورشيد وقالت كلام كتير وقالت على أسماء الناس والبنات فالبنات اللى قالت عليهم واللى قال عليهم محمد نسيم واللى لقينا لهم تسجيلات فى المخابرات جبتهم وحتى حققت معاهم إيه اللى حصل ففيه ستات منهم أو سيدات منهم ما قالوش حاجة فيه منهم كلفوا من المخابرات بعمل حاجات معينة وفيه منهم جابوا قضايا يعنى فيه ناس من البنات دى جابوا قضايا جابوا لقوا الخواجة ده بيتكلم لقوا ده بيوضب انقلاب بيسرق معدات كده ففيه منهم جابوا قضايا ودى كانت من النجاحات بتاعت جهاز المخابرات
فاصل
عمروالليثى : فند لى فكرة اختيارالسيدات للعمل بالجنس وفند لى فكرة إنه انحرف بالسلطة واستغلها وأقام علاقة غيرمشروعة مع إحدى مندوبات المخابرات اللى هى اعتماد خورشيد فندها لى؟
د/هانى صلاح نصر: هفندها لك بالنسبة للسيدة اعتماد خورشيد بالذات
عمروالليثى: أولا هل هى فعلا كانت زوجة والدك؟
د/هانى صلاح نصر: إطلاقا وأنا بتحداها من خلال البرنامج النهاردة إنها تقدم أى مستند احنا رافعين عليها قضية على فكرة اسمها قضية تقديم مستندات انت عمالة تقولى جواز ومش جواز وكان بيعذبها فين المستندات
عمروالليثى: وضغط عليها إنها تسيب جوزها؟
د/هانى صلاح نصر:تقدم مستند الجواز العرفى عشان نطعن فيه بالتزوير وتحديناها ما بتقدمش دى واحدة بتتربح من هذا الكلام وبعدين حضرتك حاجة أهم حكم المحكمة اللى صدر فى الاتهامات يدين هذه السيدة فيه حكم محكمة قوى جدا طلع رفعه محامى احنا ما نعرفوش خالص خد حكم بمنع هذا الكتاب وفيه أسباب الحكم مثبوت إن هذه السيدة الكتاب كله يعتمد على الأكاذيب وليس لها أى إثباتات للأقوال المرسلة بتاعتها وأساءت لرموز وطنية وأساءت لفنانين وأساءت لفنانات وهذه السيدة لم تكن شاهدة على انحراف صلاح نصر ولا كانت شاهدة على فجورأوأى انحراف هذا حكم محكمة مش أنا اللى بقول حكم محكمة فالنهاردة أنا هاجى أبنى تاريخ مصروأقول صلاح نصرعلى شهادة واحدة خدت الحكم ده
عمروالليثى : مش غريبة إن اعتماد خورشيد تكتب فى كتابها أسماء وتقول الأسماء فى بعض البرامج ومحدش من هؤلاء الفنانات اللى هم على قيد الحياة حتى يقاضوها ويقولوا الكلام ده ما حصلش؟
د/هانى صلاح نصر:قالوا
عمروالليثى:مين قال ، البعض نفى ونفى لأسبابه لأسباب شخصية وبعضهم تم تطليقه وسيادتك عارف ده كويس قوى إن فيهم واحدة كانت متجوزة وإتطلقت من جوزها بعد ما كشف إسمها
د/هانى صلاح نصر:هى ما قالتش آه أو لا ايه دى حاجة
عمروالليثى:اللى أنا عايز أقوله إن مفيش دخان من غير ناريا دكتور هانى.
د/ هانى صلاح نصر:والله ساعات بيبقى فيه دخان من غيرناربالذات لوانت ما عندكش فرصة إنك تتكلم أو ترد
م/ حلمى السعيد : يعنى اعتماد خورشيد دى عارف أنا الموضوع كان الموضوع له يعنى حقيقة ما هى كانت عندها استديواعتماد خورشيد استديوبتأجره للتصويروصلاح نصركان مديرالمخابرات عايز هذا الاستديو علشان يصور فيه ناس يصور فيه يعمل أفلام يعمل أى حاجة فحصل خلاف إنه ياخده منها يأجره منها حاجة زى كده حصل هناك يعنى خلاف وهو كان رئيس المخابرات طبعا هى خافت ويعنى حصل يعنى هى بتقول أو يعنى قالت كده هى ما تقدرش تقف قصاده هو خد منها الاستديو أنا ما أعرفش إذا كانت مراته وللا لا إنما أنا اللى أعرفه إن هو كان بيروح لها البيت ، بيروح لها البيت مع جوزها موجود وكان بيبقى معاه سكرتيره
عمروالليثى : يعنى إيه اللى يدفع سيدة متزوجة وعندها أولاد وجوزها رجل مدير تصوير معروف وعندها استديو إنها تقول إن هوالأول أوقع بى وبعدين لفق لى وبعدين إتجوزنى وبعدين شغلنى كمان إن أنا أعمل عمليات استخباراتية لصالح المخابرات وفرض على علاقات معينة تفتكر انت إيه الدافع يعنى إذا افترضنا إن هى بتدعى عليه كذبا ؟
د/هانى صلاح نصر: هى استغلت فى قضية انحراف المخابرات ؟
عمروالليثى : مين يا فندم؟
د/هانى صلاح نصر:من الأجهزة اللى كانت تريد الإيقاع بالوالد.
عمروالليثى: اللى هما مين؟
د/هانى صلاح نصر: الرياسة
عمروالليثى: رياسة الجمهورية؟
د/هانى صلاح نصر: الرياسة هم اللى عاوزين يعملوا قضية
عمروالليثى: يعنى الرياسة هم اللى جابوها؟
د/هانى صلاح نصر: آه
عمروالليثى : أعتقد ده شئ..
د/هانى صلاح نصر : بص حضرتك انت النهاردة عاوز تعمل قضية لازم يكون فيه إثباتات النهاردة انت من خلال 100 واحدة كاون بيشتغلوا فى المخابرات ما لقوش إلا الست دى اللى عندها استعداد إنها تتكلم بهذا المنظروالوالد كاتب فى مذكراته ده مش كلامى أنا انها تقاضت مبلغ مقابل الشهادة بتاعتها دى معرفش هوعرفها بطريقة أو بأخرى يعنى
عمروالليثى : الوالد قال إن هى خدت فلوس عشان شهادتها من مين؟
د/هانى صلاح نصر: أعتقد إعفينى من الأجابة على هذا السؤال عشان ممكن يكون فيه حرج شوية
م/ حلمى السعيد : يعنى هى جهاز المخابرات ما يعملش كده يعنى ما يدفعش ضد صلاح نصريعنى الموضوع ده خطأ فى تقديرى أنا يعنى
عمروالليثى : طيب إيش عرفه ؟
د/هانى صلاح نصر: ممكن يكون عرف عن طريق أصدقاؤه اللى بيشتغلوا هناك
عمروالليثى: فيه حد بيدى فلوس هيعرف حد إنه بيدى فلوس؟
د/هانى صلاح نصر: لا الناس اللى كانت فى هذا الجهاز.....
عمروالليثى : ما هو برضه هذه المعلومة ممكن تكون غيردقيقة.
د/هانى صلاح نصر: أيا كان يعنى ممكن
عمروالليثى: يعنى ممكن يكون تبرير منه بيحاول يبرر ؟
د/هانى صلاح نصر : لازم يكون في منطقية فى كلامه ممكن يكون عندها دوافع تانية كتيرة ممكن يكون عندها دافع الشهرة
عمروالليثى : تسيب جوزها وتشتكيه لانه أجبرها ..
د/هانى صلاح نصر: ما سابتش جوزها فى القضية .
عمروالليثى : آه بس قالت إنه خلاها تسيب جوزها.
د/هانى صلاح نصر : إمتى؟
عمروالليثى : مؤخرا.
د/هانى صلاح نصر: فى السبعينات لما جوزها موت نفسه ، جوزها الحقيقى مات والناس كلها ابتدت تتكلم ما قالتش الكلام ده ليه فى القضية بتاعت 67 لوهى عايزة توقع به
عمروالليثى : هى قالته فى 67 فنده لى بقى اتفضل؟
د/هانى صلاح نصر: قالت فيما معناه إن هوكان بيعمل علاقة معاها وإن هوأجبرها على العمل فى الجهاز وإن هو بيشغل ستات الكلام اللى هو.....
عمروالليثى: أنا النهاردة السؤال لك واضح هل الوالد انحرف بالسلطة واستغلها لإقامة علاقات شخصية جنسية مع بعض المندوبات وبعض السيدات اللائى كانوا يعملن فى جهازالمخابرات ده الكلام اللى ذكر؟
د/هانى صلاح نصر:ده كلام مش مضبوط لو انت بتتكلم على الوالد ، الوالد بيقول أن السيدات دول ما كانش فيهم واحدة صعب الوصول إليها يعنى ...
عمروالليثى:يعنى كل واحدة كانت بتروح تقول له أنا عايزة أشتغل فى المخابرات .
د/هانى صلاح نصر:هومن اتصالاته مع الناس بيلاقى واحدة تحب تشتغل فى المخابرات مش هو اللى بيقول لهم ده فيه قسم مخصوص للقصة دى
عمروالليثى:ممكن تقول لى إيه المنفعة اللى ممكن تعود على السيدة غير الفلوس؟
د/هانى صلاح نصر:علاقات شخصية على علاقات مع جهاز قوى بيساعدها فى بعض الأمور
عمروالليثى : زى إيه؟
د/هانى صلاح نصر : لهم مصالح
عمروالليثى: زى إيه برضه؟
د/هانى صلاح نصر:أكيد اللى بتشتغل مع جهازالمخابرات دى بتاخد منافع يعنى
عمرو الليثى : يعنى المكافأة دى مكافأة رمزية ، مكافأة معنوية ، مكافأة مادية؟
د/هانى صلاح نصر:بياخدوا ماهيات
عمروالليثى : طب إيه مقابل إن الانسان ياخد فلوس مقابل إنه يبيع إسمه يعنى هل هذا يساوى أنا عاوز أقولها تحت مسمى مصلحة الوطن لا أنا بتكلم على أرقام يا دكتورهانى أنا كل اللى أناعاوزأوصل له مش حاجة واحدة أناعاوزفكرة إن هؤلاء من قبل السيد صلاح نصر من خلال بعض العمليات اللى قلت لك عليها والسيطرة عليهم هتشتغلى وللا؟
د/هانى صلاح نصر:لا الكلام ده مش مضبوط ما حصلش كان بيسيطر عليهم بعد كده لما كانوا بيشتغلوا فى المخابرات عن طريق تصويرهم عشان ما يقولوش كلام يضر الجهاز أو يبقى عميل مزدوج
عمروالليثى : يعنى لما بقت مندوبة وهى بتقيم علاقة جنسية بتتصور ؟
د/هانى صلاح نصر : وساعات بتبقى عارفة
عمروالليثى : وهى عارفة؟
د/هانى صلاح نصر : ساعات
عمروالليثى : ليه؟
د/هانى صلاح نصر:لما كان التصوير ده مثلا بيصوروا شخصية معروفة أو عامة بتبقى عارفة
فاصل
عمروالليثى:هل هدف التصوير فى هذه الفترة هو السيطرة عليها كمندوبة ولا السيطرة على الشخص؟
د/هانى صلاح نصر:على أساس الشخص اللى معاها وهى برضه يبقى عليها كونترول إنها ما تقولش كلام ده
عمروالليثى :طب انت مش شايف إن الصورة دى صعبة قوى يعنى شئ يعنى ممكن يثير الإشمئزازلماالواحد بيقول إنهم بيتصوروا فى العلاقات الجنسية عشان خاطر يتأكدوا من ولاءهم ده مش انحراف يا دكتور هانى؟
د/هانى صلاح نصر:والله هنرجع تانى ونقول شغل المخابرات يعنى لوعايزأعرف المخابرات كلها بتشتغل إزاى مش هقول حلال وحرام والكلام ده انت مش محلل والله أعلم أجهزة المخابرات بتشتغل إزاى قبل كده ودلوقتى إزاى ده شغل المخابرات
عمروالليثى : أمال ليه اتحولت لقضية سموها انحراف المخابرات؟
د/هانى صلاح نصر:تصفية حساب سياسى
عمروالليثى :ما هو ساعتها إيه قيمته السياسية الراجل طلع خلاص على المعاش واتحط خلاص تحت التحفظ ولا بيهش ولا بينش؟
د/هانى صلاح نصر:خايف منه
عمروالليثى : خايف منه ليه؟
د/هانى صلاح نصر:خايف منه عنده معلومات فحضرتك بيعمل حاجة اسمها كراكتر أسييشن عاوزاغتيال شخصية عشان الراجل ده ما يتكلمش أو لواتكلم ما حدش يسمعه
عمروالليثى : وهو كده مش هيتكلم ؟
د/هانى صلاح نصر : ما اتكلمش عمره ما كان عنده المتاجرة بالأسرار الشخصية بدليل إن الوالد كان عنده كل الأسرار الشخصية بتاعت كل الناس فى مصرهل هو شهر بحد ولا قال ده عمل .
عمروالليثى : عنده إيه يا فندم؟
د/هانى صلاح نصر: يعرف كل حاجة فى مصرالراجل مديرالمخابرات العامة
عمروالليثى : عنده الأسرار الشخصية لكل الناس فى مصر بيجيبها منين؟
د/هانى صلاح نصر:أيوة نتيجة من خلال المعلومات اللى بتيجى من خلال الناس
عمروالليثى:ما هوده اللى كنت بتكلم فيه يا دكتورهانى أنا سألتك قلت لك هو كان بيسجل للشخصيات العامة قلت لى هو شغله كله خارجى وبعدين قلت لى إنه يعرف كل حاجة .
د/هانى صلاح نصر: لما يكون واحد شخصية عامة ويكون متورط فى حاجة معينة معقول المخابرات العامة مش هتعرفها
عمروالليثى : فى إيه؟
د/هانى صلاح نصر: فى قضية مع
عمروالليثى : يعنى واحد طلق مراته دى كانت من ضمن اهتمامات المخابرات ، واحد مصاحب واحدة هل دى سيادتك بتقول إنه كان عارف كل الأسرار الشخصية للشخصيات العامة؟
د/هانى صلاح نصر : الشخصيات العامة اللى هى الوزراء
عمروالليثى : ويعرفها ليه إيه المناسبة؟
د/هانى صلاح نصر: من خلال العلاقات ده تانى واحد فى البلد بعد الرئيس عبد الناصر
عمروالليثى: أيوه تانى واحد يعرفها إزاى إلا من خلال المراقبة .
د/هانى صلاح نصر:يعنى مش لازم يكون هواللى بيراقب
عمروالليثى : أمال مين؟
د/هانى صلاح نصر:هو بيراقب من خلال قضايا وفيه أجهزة تانية
عمروالليثى : يعنى اسمح لى يا دكتورهانى يعنى اللى أناعايز أقوله إن أحيانا الاستمرار فى السلطة مش مفسدة يعنى مش بيدى أو تحت مسمى إنك انت تحت إيدك جهاز ممكن تراقب به س و ص وع وغ كانت العملية شوية يعنى العملية كانت مفتوحة بدليل إن فعلا اللى حضرتك قلته نفسك الناس كانوا تحت المراقبة دائما من قبل صلاح نصر
د/هانى صلاح نصر:لا أنا ما قلتش كل الناس أنا قلت لك الناس اللى هى شخصيات معروفة
عمروالليثى: كانوا بيتراقبوا ليه ؟
د/هانى صلاح نصر: يتراقبوا عن طريق العلاقات العامة
عمروالليثى : وهو فاضى إن هو يعرف أخبارهم ولا فاضى لشغله فيه تربص بيننا وبين العدوالإسرائيلى
د/هانى صلاح نصر: طيب انت حضرتك بتتكلم النهاردةعلى شخصية دخلت فى حاجة غلط والمخابرات لقطتها كان عارف ده عمل كذا وده عمل كذا مش شرط إن هو يكون بيراقبه لكن عارف بطريقة أوبأخرى مع اتصالاته مع الرئيس واتصالاته
عمروالليثى :ما حقيقة أن السيد صلاح نصر كان ينفق أموالا كثيرة تحت مسمى الأموال السرية أو الباب السرى الذى كان موجود لدى المخابرات العامة؟
د/هانى صلاح نصر : المصاريف السرية دى كان لها دفاتر خاصة ومثبتة وكان بيمضى عليها مديرمالى ومديرإدارى وفي إمضاءات معتمدة بتطلع بشيكات وبتخش فى ميزانية الدولة
عمروالليثى : آه بس مش عارفين الفلوس رايحة لمين ؟
د/هانى صلاح نصر: لا ما يعرفوش لان ده شغل المخابرات فما يعرفوش طبعا
عمروالليثى : هل والدك كان ميسور الحال؟
د/هانى صلاح نصر : الحمد لله
عمروالليثى : يعنى هل مرتبه فى المخابرات كان معيشه؟
د/هانى صلاح نصر: المرتب أعتقد فى الستينات كان المعاش معرفش ساعتها المرتب كان كام
عمروالليثى : ثروته بعد وفاته كانت كام يا دكتور هانى فى إقرارالذمة المالية بتاعه؟
د/هانى صلاح نصر: ماعندوش أى حاجة غيرالبيت بتاعه اللى كان ساكن فيه
عمروالليثى : بس؟
د/هانى صلاح نصر: آه أنا والدتى كانت ميسورة الحال
عمروالليثى:هل كان يسهل للمشيرعامرالحصول على بعض هذه الأموال السرية من ضمن المصروفات السرية؟
د/هانى صلاح نصر : لا
عمروالليثى : تردد هذا الكلام؟
م/ حلمى السعيد: سألت أنا صلاح على الفلوس قال لى الفلوس كلها فى نوتة ومعروفة بالمليم وبوريها لعبد الناصر كل ساعة لانها كانت مصاريف سرية المصاريف دى كانت سرية المصاريف السياسية دى كانت بتتصرف للناس السياسيين يعنى للاجئين السياسيين ، السياسيين اللى احنا عايزينهم يبقوا مع مصر فى البلاد العربية أى حاجة زى كده
فاصل
عمروالليثى : نستكمل حوارنا مع السيد هانى صلاح نصر فى الحلقة القادمة إن شاء الله فتابعونا