عمرو الليثي: من العاصمة البريطانية لندن أستكمل معكم ملف من قتل أشرف مروان . فاصل عمرو الليثي: مثلما عاش أشرف مروان غامضا في نظر العديد من المراقبين فإن رحيله أيضا كان على نفس الدرجة من الغموض ، فإذا كانت كل الشواهد تدل بسهوله ويسر على جريمة قتل محكمة التنفيذ ، فإن الوقوف على شخصية القاتل عملية في غاية الصعوبة ، في ظل تاريخ الرجل وعلاقاته المتشابكة بين المال والسياسة والسلطة ، غير أن صعوبة البحث في شخصية القاتل لم تثنينا عن خوض تجربة البحث والتدقيق في حياة الرجل وتاريخه فقد يكون في بحثنا سبيلا لمعرفة القاتل ودوافعه . فاصل د.عبد المنعم سعيد: أشرف مروان واضح من كل ما تحدث عنه وكل ما كُتب عنه أنه شخصية مُركبة بمعنى أن لها وجوه عِدة بمعنى أنه في وقت من الأوقات هو جزء من أسرة الرئيس جمال عبد الناصر بالتالي هو جزء من تاريخ مصر اللي له صفات معينة من ناحية تانية هو الشخص اللي أصبح لصيق جدا للرئيس السادات بعد كده بقى عندنا أشرف مروان العربي اللي هو من خلال الهيئة العربية للتصنيع بقت علاقاته في مجال التسليح بالدول العربية أخير بقى رجل businessman ، فالوطني الثوري في فترة عبد الناصر ، المؤتمن للسادات البطل المخابراتي الرجل اللي له علاقات عربية واسعة وبعدين رجل الأعمال كل دي الوجوه الخاصة بأشرف مروان عمرو الليثي: أستاذ محمد كيف بدأت علاقتك بالدكتور أشرف مروان ؟ محمد نصير: من زمان الحقيقة أيام زوجتي الله يرحمها كانت كريمة السيد عبد اللطيف بغدادي عضو مجلس قيادة الثورة وكانت العلاقة بين أعضاء مجلس قيادة الثورة قوية وبالتالي كنت بشوف منى فحصل تعارف بيني وبين أشرف وحضرت جوازه عمرو الليثي: قيل إن الجواز تم بشكل تم الضغط فيه على الرئيس جمال عبد الناصر تحت مسمى قصة الحب العنيفة بين الدكتور أشرف مروان والسيدة منى عبد الناصر هل ده صحيح ؟ محمد نصير: حرام لأنها مكنش عندها فرصة إن يبقى عندها قصة حب عنيف دي بنت جمال عبد الناصر هو آه حصل حب وتعارف عن طريق النادي في مصر الجديدة فاصل عمرو الليثي: أنا عاوز أعرف أتجوزتي أزاي هل حبيتي وقلتي له بابا أنا بحب واحد وعاوزة أتجوزه وهو طالب يجي يقابلك ولاّ هو قال لك يا بنتي واحد أتقدم لك أحكي لي كده أيه اللي حصل أتجوزتي أزاي من الدكتور أشرف مروان ؟ السيدة/ منى عبد الناصر: وقت ما كان أنا عاجبني أشرف قوي – أشرف كان لازم يعجب كل واحدة - ...... أشرف بقى عمرو الليثي: أتعرفتي عليه أزاي ؟ السيدة/ منى عبد الناصر: اتعرفت عليه في ميامي في البلاج أنا كنت بروح عند خلتي في كابينة ميامي وهو كانت قريبته نادية الأزهري أخت إيهاب الأزهري جنب كابينة خالتي كنا زمان نلعب راكيت وبعد كده كان في نادي هيليوبوليس .. فرحت قلت له فيه واحد قالي مين أبوه قلت له أبوه عميد في الجيش فقالي تعرفيه منين فقلت له في البلاج شفته في ميامي قلت الحقيقة لأن بابا كان بيقول الكذب جُبن فقالي واثقة من أخلاقة وكان أشرف فيه ميزة كان الأول على طول كان شاطر فقالي طب هاتي أسمة طبعا كلم المخابرات وقال لهم عايز كل حاجة عن الشخص ده فجت كل حاجة من أول لما كان تلميذ كان شكله أيه وندهني وقرالي كل التقارير اللي جابتها المخابرات عنه وعن والدة طبعا من يوم ما دخل الجيش وعن مامته وعن أخواته وعن كل العائلة .. وقالي إنه طالب ومش ممكن تتخطبي لطالب يبقى تستني لما يتخرج – كان هو في بكالوريوس علوم – بس كان عارف وقتها إن إحنا مستنين لما يتخرج وعدت السنة وأتخرج بامتياز وقلت له يتقدم فبابا قالي بيشتغل أيه فقلت له ما بيشتغلش هات له وظيفة فقالي أجيب وظيفة لجوز بنتي لا هو يروح يدور على وظيفة فرحت للمشير عامر - كنت أحبه قوي – وقلت له أنا عندي أشرف وعايزة وظيفة قالي معرفش أوظفه غير في الجيش فوظفه في الجيش واتعين وأخد أول ماهية وجه أتقدم وكتبنا الكتاب 14 أكتوبر فاصل عمرو الليثي: هل زواجه من ابنة الرئيس جمال عبد الناصر ساهم في تصعيد أو سرعة تصعيد اشرف مروان؟ صلاح الثيروباتي : آه طبعا بالتأكيد عمرو الليثي : يعني نقله إلى مكتب السيد سامي شرف هل دا كان مرتبط بأنه كان متزوج من ابنة الرئيس جمال عبد الناصر؟ صلاح الثيروباتي : آه ..طبعا بالتأكيد يعني لو لم يكن جوز بنت الرئيس ماكانش قدر يشتغل في لأنه أصبح بقى من الأسرة وأحد الثقات وكان الريس جمال عبد الناصر يحبه جدا وكان مدلل عند عبد الناصر فاصل د. عبد المنعم سعيد: لو لم يتزوج بنت الرئيس عبد الناصر ما كان أحد ليلقي ضوء على هذه الشخصية ربما تكون وعلى الأرجح ستكون أيضا ناجحة في مجالات أخرى لأنه واضح إنه كان بيتمتع بذكاء كبير جدا وعنده الطموح الكافي وعنده كمان الإقدام الرغبة في إنه يحقق شيء في حياته وأنا اعتقد إنه كان حيبقى إنسان ناجح في كل الأحوال فاصل عمرو الليثي: إيه رأيك في الرأي اللي بيقول إن أشرف مروان استفاد من جوازه من منى عبد الناصر ؟ السيدة/ منى عبد الناصر: وأنا استفدت من جوازي منه عمرو الليثي: أزاي هو استفاد إيه وأنتي استفادتي إيه ؟ السيدة/ منى عبد الناصر: يعني لما تتجوز جوازه وتبقى مش تعيس تبقى استفدت عمرو الليثي: أنا بتكلم عن الاستفادة الوظيفية وتضخمه وقوته حال إنه جوز أبنة جمال عبد الناصر بالتأكيد ده مكان كان يتمناه أي شاب في مصر ؟ السيدة/ منى عبد الناصر: طبعا ثقة الرئيس السادات فيه كانت بترجع لكونه جوز بنت عبد الناصر خصوصا لما فقد الثقة في كل من حوله فاصل عمرو الليثي: ذكرت الصحف الإسرائيلية إن مواطنا مصريا قد جاء هنا في لندن إلى مقر السفارة الإسرائيلية وطلب أن يتعامل مع إسرائيل لكنهم ترددوا في قبوله لكن بعد فترة بسيطة وعندما عرفوا أن هذا الشخص هو الدكتوراشرف مروان كان هناك تعاملا آخر حيث تردد أيضا انه تم لقاء جمع بينه وبين احد مسئولين السفارة في اليوم التالي وقيل أيضا إن كل لقاء كان يتم بين اشرف مروان ومسئولي السفارة الإسرائيلية ومسئولي المخابرات الإسرائيلية كان ثمنه 100 ألف دولار فاصل إيلي زاعيرا – رئيس المخابرات العسكرية الإسرائيلية عام 73: أشرف مروان قدم لنا معلمات مهمة جدا وهو حوار السادات مع بريجينيف والتي فيها السادات يقول بشكل واضح إذا لم تعطوني السلاح فلن أذهب للحرب هذا ما نقله لنا أشرف مروان . .فاصل عبد المجيد فريد- وزير الدولة لرئاسة شئون الجمهورية السابق: يعني يروح السفارة الإسرائيلية أنا أستبعدها نهائيا بالنسبة لطباع اشرف مروان وحرصه حتى لو هناك تخطيط انه يعمل معلومات كاذبة مش ممكن يكون عن طريق السفارة فاصل د. مصطفى الفقي – رئيس لجنة العلاقات الخارجية بمجلس الشعب: اشرف مروان ماكانش ممكن بحكم شكله المعروف ، شخصيته ، ووظيفته الرسمية ، ونسبه للرئيس الراحل جمال عبد الناصر عليه رحمة الله أن يكون أبدا بيقوم بعمل ضد بلده ويظل هكذا مستحيل ،عملا حتى بالتفكير إنما هو كان بيعمل اتصالات علنية .. يقولك وجاء إلى السفارة الإسرائيلية مش عارف في سنة 69 وقدم نفسه ..خلاص دا يبقى تكليف ..انتهينا فاصل د.عبد العزيز حجازي - رئيس مجلس الوزراء الأسبق: العملية السياسية طبعا بيلعب فيها دور كبير طبعا مقدرش أقول انه مصر مكانش ليها اتصالات سواء سرية أو حتى بس معظمها هيبقى سري ومفيش شك فيه أشخاص كانوا بيلعبوا دور فيما يتعلق كيف يمكن أن تخرج مصر من الأزمة الخاصة باحتلال الأرض واحتلال الأراضي العربية فاصل د. عبد المنعم سعيد: الثابت إن هو راح من 69 ومعنى ذلك إن المسألة بدأت في عهد الرئيس عبد الناصر الحلقة دي محتاجه كشف إيه اللي حصل ما بين 69 و 70 أنا برجح إنها بدأت 69 وفي 70 جه الرئيس السادات كان طبيعي يروح له أشرف مروان ويقول له على اللي حصل خلال العام الماضي باعتباره سري يخص رئيس الجمهورية لأن عملية أشرف مروان كانت كلها بتدار من رئاسة الجمهورية مش من المخابرات لكن عارفة بيها وكانت تقوم بدور فيها إنما الإدارة الدقيقة كانت تتم من رئاسة الجمهورية فاصل عمرو الليثي: هكذا يرى المسئولين في مصر حقيقة اشرف مروان ولكن على الجانب الآخر فقد اختلفت وجهات النظر حول ولائه ولحساب من كان يعمل ؟ فاصل تسيبي زامير- رئيس الموساد:نحن فقدنا أهم مصدر في التاريخ أيلي زاعيرا – رئيس شعبة الاستخبارات العامة: كان عميلا مزدوجا وأنا لم اكشف عن ذلك هذا هو خطئي ربما كان آخرون كان أيضا يجب عليهم اكتشاف ذلك ولكن هذا شأنهم .. فاصل عمرو الليثي: في الوقت الذي انشغلت فيه المؤسسة الاستخباراتية بالإجابة عن السؤال حول ما إذا كان الدكتور اشرف مروان عميلا مخلصا أم عميلا مزدوجا جاءت صور نشرت في التليفزيون المصري لزيارة قام بها الرئيس المصري محمد حسني مبارك لضريح الرئيس جمال عبد الناصر بمناسبة ذكرى حرب أكتوبر في عام 2005 وحسب صحيفة يديعوت احرونوت فان عناق الرئيس مبارك لأشرف مروان من شأنه وضع حد للنقاش داخل هذه الأجهزة حول شخص مروان الأمر الذي تأكدت معه إسرائيل أنه رجل مصر وانه كان جاسوسا مزدوجا فما كان لرئيس مصرأن يستقبل الرجل ويصافحه ويعانقه بحفاوة بالغة إذا كان حقا عميلا لإسرائيل فاصل د. عزيز صدقي – رئيس مجلس الوزراء الأسبق: فيه كلام أنه Dabble agent مع إسرائيل إذا كان هذا الكلام صحيح وبما اعرفه عنه اقطع انه إذا كان فعل ذلك فانه فعله ليحقق خيرا لمصر فاصل د. عبد المنعم سعيد: أنا أقطع بإن هو كان زرع مصري وجد في العقل الإسرائيلي وكان مهم في إدارة الصراع مع إسرائيل واعتقد إنه لعب دور جوهري في ذلك خاصة فيما يتعلق بالعملية الأساسية التي كان يجري التحضير لها من 69 لغاية 73 فاصل السفير محمد بسيوني: سفيرمصرالأسبق في إسرائيل: لقد ثبت أن أشرف مروان لم يكن عميلا ولكن كان عميلا مزدوجا يعمل لصلح المخابرات المصرية لذلك لما الرئيس السادات جه قال إذا كان لديكم معلومات أن أشرف مروان يتصل بالموساد فهذا بعلمي هو اللي مخطط هذا الكلام كله فلم يكن أشرف مروان يوما من الأيام عميلا هم صحيح قالوا عليه العميل بابل وقالوا عليه النسيب على أساس إنه نسيب عبد الناصر .. بدليل حاجه بسيطة جدا الرئيس السادات والرئيس مبارك قالوا إن أشرف مروان كان وطنيا مخلصا فاصل عادل حمودة: قضية اتهام اشرف مروان بالعمالة لإسرائيل تصاعدت بدأت بكتاب عن تاريخ إسرائيل قاله مؤرخ عادي أستاذ في الجامعة ثم بعد عام واحد من كشف هذا الموضوع خرجت وثائق إسرائيلية مباحة عن حرب 73 تؤكد مثل هذا الأمر وتصفه بجاسوس بابل والاهم من ذلك ربما حدث ذلك في فترة قريبة من عملية موته الغامضة انه رفعت قضية في المحكمة العليا في إسرائيل بتطالب بالتحقيق في هذا الموضوع لأنه رئيس المخابرات الحربية رفع قضية على رئيس الموساد وطلب منه أن يدفع تعويض حوالي خمس ملايين من الشيكل بدعوى انه قد اضر بمصالح إسرائيل ففحصت المحكمة العليا وهي محكمة لا يجوز الطعن فيها لأنه المحكمة التي تحاكم الرئيس هناك الرئيس الإسرائيلي من الممكن أن تحاسب رئيس الوزراء من الممكن أن تلغي الانتخابات هي محكمة بالنسبة للمجتمع الإسرائيلي محكمة لها كلمتها ولها قرارها المؤثر خرجت المحكمة دي وقالت إن اشرف مروان كان جاسوسا للموساد فاصل د. مصطفى الفقي: يعني هما الإسرائيليين بيحاولوا يهدفوا من هذا إلى عدة أمور كان يقصدها المؤرخ الإسرائيلي .. واحد .. تحطيم ثقة الشعب المصري في مسئوليه ، أتنين .. الإساءة إلى اسم جمال عبد الناصر وأنور السادات معا الأولاني جوز بنته أهو شوف بيعمل حاجات ضد بلده والتاني مش حاسس بحاجة رئيس جمهورية مش دريان .. تالت حاجة ، أنهم عايزين يعيدوا الثقة للشعب الإسرائيلي في جهاز مخابرتهم فاصل عادل حمودة: حتى لو كان ذلك هدفا جانبيا فان قضية اشرف مروان هي قضية إسرائيلية في الداخل تهم إسرائيل هي قضية صراع بين أجهزة قضية حرب جرت فيها هزيمة لإسرائيل قضية تهم المجتمع الإسرائيلي بالدرجة الأولى ومحاولة تبسيط القضية على إنها قضية تشهير بمصر أو تشهير بالمصريين هو يعني تفسير ساذج فاصل د.عبد المنعم سعيد: القصة لم تذاع بعد لم تخرج من الأجهزة الرسمية المصرية لأنه الأجهزة المصرية ترى كما يقولون أرصدة مصرية داخل إسرائيل قد يعرضها مثل هذه الإذاعة للخطر ، إنه من المهم جدا إن الإسرائيليين يفضلوا مختلفين حول موضوع أشرف مروان ناس بتقول ده كان ضدنا وناس بتقول ده كان معانا طب إحنا نريحهم ليه يعني فيه أكثر من سبب لكن أنا أعرف إن الرئيس السادات أشاد بأشرف مروان وقال إن هو قام بأدوار وطنية وقلده وسام وهو يعرف ما معنى هذا الوسام ومش بس كده نفس الكلام أتقال على لسان الرئيس مبارك برصه الرئيس مبارك رئيس جمهورية كل الأوراق دي والأسرار دي راحت عنده ومن ثم إنه يقول هذا الكلام هو يعنيه تماما كجزء من هذه العملية اللي امتدت من 69 لغاية على الأقل 78 فاصل السفير/ محمد بسيوني: في 15 مايو الحقيق كان هناك مجموعة بتعمل على تنحية الرئيس السادات وقدموا استقالتهم كلهم على أساس يحصل فراغ دستوري فاصل عادل حمودة: اشرف مروان الذي حمل الاستقالات الجماعية اللي قدمها رجال عبد الناصر .. كل اللي كانوا موجودين في الحكم فاصل السفير/ محمد بسيوني: فالسادات بيقول له أنت أتأخرت ليه في تقديم هذه الورقة فقال له إن سامي شرف لم يسمح له بالخروج من مكتبه - لأنه كان سامي شرف هو الرئيس بتاعه – لأنهم كانوا حيعلنوا في التلفزيون والإذاعة الاستقالات دي حتى يحدث فراغ دستوري فأشرف مروان فضل إنه يقف مع الشرعية ووقف مع الرئيس السادات في هذه الحركة عمرو الليثي: البعض بيرى أنه أخطاء عندما دعم الرئيس السادات في أحداث 15 مايو لأنه معروف إنه هو اللي قدم الاستقالات الخاصة برجال عبد الناصر للسادات وقبل السادات الاستقالات وبناء عليه لم يحدث فراغ دستوري وقام بتعيين آخرين وتم اعتقال رجال عبد الناصر ودخلوا السجون بعد محاكمات استمرت شهور طويلة تعقبك أيه هل ده مش غريب ؟ السيدة/ منى عبد الناصر: لا أنا كنت موجودة ساعة ما جه الرئيس السادات وقال أنا رايح الرباط و ندهت أنور وحلف اليمين كنائب لرئيس الجمهورية عشان أنا طالع بالطيارة وممكن الطيارة دي يصطادوها بال م / ط عمرو الليثي: ال م / ط اللي هو أيه؟ السيدة/ منى عبد الناصر: ال م / ط اللي هو المضاد للطائرات والعدو على القنال وأهم حاجة في مصر الاستقرار ولو حصل خلخلة العدو حيعدي .. فدي رسالة ربنا ادهالي إن أنا الوحيدة اللي كنت واقفة فوق مع الوالدة وأسمع الكلمة دي واتحطيت في نفس لموقف إن حيحصل خلخلة والعدو على القنال ، فأشرف كلمني وقالي على الاستقالات فقلت له جري تروح تحذره بس أنا ما خطرش في بالي لا دول ولا دول أنا خطر في بالي مصر والاستقرار وبس فاصل جمال مروان: القرار اللي أخده الدكتور اشرف مروان إن دا مش كويس لاستقرار مصر وأهم حاجه كانت عند الزعيم الراحل جمال عبد الناصر استقرار البلد والعدو على الحدود ما ينفعش يحصل ثانية مفيش حكومة لهذا السبب الدكتور اشرف مروان مارضيش وحذر سيادة الرئيس محمد أنور السادات عمرو الليثي: بس خللي بالك الدكتوراشرف سهل للسادات القبض على رجال عبد الناصر ؟ جمال مروان: لو كان جمال عبد الناصر عايزهم هما اللي يمسكوا بعديه كان عينهم فرؤية جمال عبد الناصر وهو عايش إن انسب واحد يبقى نائب رئيس جمهورية محمد أنور السادات ودول كانوا موجودين فاصل السفير/ محمد بسيوني: والسادات قال مرة إن أشرف مروان نوّر طريقي .. أيه قصة نوّر طريقي الحقيقة إن سامي شرف بعد تقديم الاستقالة إنه أعطى تعليمات لمدير مكتبه أنه ينقل الخزينة بتاعة المعلومات بتاعة سامي شرف وكل ما بها من أسرار التنظيم الناصري وغيرة خارج القصر الرئاسي فأشرف مروان تعرض لهذه السيارة وأخد المستندات والخزينة وقدمها للسادات وهذا الذي يقصد به السادات أن أشرف مروان نوّر طريقي فاصل عمرو الليثي: الموضوع ده ما عملش حساسية بين أخواتك وبين أشرف مروان يعني علاقته بيهم على ما يرام ، علاقة عادية ، علاقة غير عادية ، علاقة فاترة ؟ السيدة/ منى عبد الناصر: عمل طبعا حساسية لفترة بس بعد كده عدت ما استمرتش بس حصل طبعا حساسية شوية عمرو الليثي: لماذا اختار الرئيس عبد الناصر الرئيس السادات نائبا له وليه ما اختارش حسين الشافعي مثلا وليه ما اخترش زكريا محيي الدين؟ السيدة/ منى عبد الناصر: أكيد كان له نظرة لأن مش في النهاية عبرنا .. أنا ما سألتوش ولا حسأله لكن هو لايمكن حيختار لمصر حاجة – زي ما أنا بقرأ – صدفة .. لا صلاح الثروباتي: وبعدين السادات طلب من انه يمسك مكتب سامي شرف ..تاني يوم طلب اجتماعه مع مكتب سامي شرف واشرف مروان كان فيه أحمد رزق ومنير حافظ وفتحي سعد مجموعة كبيرة يعني وقالهم - دا نقلا عن المرحوم احمد عبادي- إن أنا يعني بامسك المكتب دا مؤقت لان بعد كده السيد سامي شرف كان هيرجع لمكتبه تاني ومفيش أي حاجة وان شاء الله كل الأمور تمشي تمام وبعد كده مشيت القصة انه قبل انه مسك مكتب الأستاذ سامي شرف فاصل عمرو الليثي: طب في تقديرك أنت على أي أساس اختاره الرئيس الراحل أنور السادات سكرتيرا للرئيس للمعلومات مكافأة ليه على موضوع إفشال محاولة الانقلاب الدستوري في 15 مايو ؟ جمال مروان: هو يوميها الدكتور اشرف أخد قرار لمصلحة البلد انه هو يوقف الانقلاب .. أظن أي رئيس جمهورية حد جه ووقف انقلاب عليه وعلى الدولة في وقت حرج جدا للدولة سيادة الرئيس السادات أخد القرار دا هو كان اشرف مروان دا شخص أنا ممكن أثق فيه وأداله مهام .. نفذ المهام دي بجودة ، أداله مهام اكتر ، ومهام اكتر ، ومهام اكتر ، ومهام ما حدش يعرف عنها ، ومهام الناس عرفت عنها بعد ما توفى فاصل عمرو الليثي: ذكرت الصحف الإسرائيلية إن الدكتور اشرف مروان قد جاء هنا إلى مقر السفارة الإسرائيلية في لندن في يوم 5 اكتوبر عام 73 وانه قد التقى بالعميل " ذ " وهو ظابط استخبارات اسرائيلي واطلعه على موعد هجوم مصر على اسرائيل لكنه اضاف اربع ساعات على موعد هذا الهجوم أي انه سيكون في تمام الساعة السادسة مساء فهل اربع ساعات كافية لتضليل اسرائيل فاصل السفير/ محمد بسيوني: اللي كان بيشغلة هو الرئيس السادات وكل شيء حدث لأشرف مروان كان الرئيس السادات هو الذي يعمل على تشغيله حتى يحقق خطة الخداع الاستراتيجي ، أنا كنت عاوز أوصل للعدو خطة خداع واللي قام بتوصيلها هو أشرف مروان ، أشرف مروان راح إسرائيل بالتنسيق مع الأجهزة المختصة في مصر وأبلغهم إنه إذا لم يتم حل المشكلة بالطرق السلمية فإن الرئيس السادات سيقوم بالهجوم على إسرائيل ولكن علشان يهجم على إسرائيل لابد أن يحصل على حاجتين وبدونهم مش حيحصل هجوم .. الحصول على طائرة مقاتله قاذفة قادرة على الوصول إلى عمق إسرائيل ، مش ححارب إلا لما مصر تحصل على صاروخ أرض أرض يصل لعمق إسرائيل .. وعشان السادات يأكد هذه المعلومة أرسل خطابا إلى مجلس السوفيت الأعلى من عشر صفحات وقالهم أنا ما بطالبش إن يكون عندي تفوق على إسرائيل على الأقل أديني سلاح يعمل توازن مع إسرائيل أنا اللي أرضي محتلة أديني سلاح يعمل توازن ، وما عنديش طيارة مقاتلة قاذفة تصل إلى عمق إسرائيل .. وهو يعلم أن هناك في مجلس السوفيت الأعلى هناك يهود حيسربوا هذه المعلومات إلى إسرائيل فتقاطعت المعلومة .. المعلومة اللي جايه من أشرف مروان والمعلومة اللي جاية من مجلس السوفيت الأعلى إن السادات مش حيحارب إلا بعد وصول هذه الأسلحة فاصل عمرو الليثي: قامت شعبة الاستخبارات الإسرائيلية بوزارة الدفاع الإسرائيلية بتسريب وثيقة سرية للغاية بتاريخ السادس من أكتوبر عام 1973 توضح نية مصر وسوريا في استئناف القتال وجاء بها أولا : وفقا للمصدر الذي يعتبر ذا وضع عليم ومقرب من مصادر المعلومات فان مصر تنوي استئناف القتال وقت غروب شمس 6 أكتوبر 73ثانيا : النقاط الأساسية التي ستشمل خطة الهجوم أولا الهدف احتلال الضفة الشرقية للقناة ، مقدمة سيناء حتى المعابر بما في ذلك احتلال شرم الشيخ ثانيا الجدول الزمني وهو ساعة الصفر ستكون يوم 6 أكتوبر قبل غروب الشمس وتستمر العمليات من خمس إلى سبعة أيام ثالثا : طريقة إدارة المعركة هجوم مشترك ومتزامن للجيش المصري والسوري في الليلة الأولى للحرب سيعبر الجيش المصري بجبهة عريضة من القناة وسيحتل الضفة الشرقية حتى المضايق بشكل كامل ليصل الى شرم الشيخ ثم يتم انزال قوات جوية وعبر الماء ونقل وحدات عبر محاور القناة تلك الوثيقة وان كانت قد أشارت ضمنا إلى اشرف مروان فإنها لم تؤكد أو تشرح كيفية تسريبه لتلك المعلومات فاصل أرية شلو – الرئيس الأسبق لشعبة الأبحاث في المخابرات العسكرية: المصدر لم يكن متأكد أعتقد طوال الوقت أن السادات لن يذهب للحرب هذا مانقلة لنا فاصل د. عبد المنعم سعيد: لو أشرف مروان ما قلهمش دا كان حيبقى معناه إنه زرع طول الوقت ، الرئيس السادات كان حريص إنه يخلي عميله الأول والمهم في هذه المسألة شغال لمرحلة المعركة وما بعد المعركة لكن لازال فيه blackout على المرحلة دي .. إحنا عارفين بعض من أنشطة أشرف مروان وعلى فكرة الإسرائيليين ما قالوهاش الإسرائيليين اللي قالوا إن هو كان زرع زيي رئيس المخابرات العسكرية الإسرائيلية اللي قال إن أشرف مروان خدعنا وعمل كتاب على هذا الموضوع هذا الرجل ما قالش حاجة عن أيه اللي تم بعد يوم 6 أكتوبر بعد اللقاء اللي تم فيه فجوة هنا معلوماتية أنا رأيي حتبقى مثيرة جدا لما تظهر في يوم من الأيام فاصل لواء/ سامح سيف: يعني أعلى مستوى من المعلومات المطلوبة من عميل هو توقيت الحرب مفيش أهم من كده .. كون بقى أن يبقى عندي عميل- لو فرض- بهذا المستوى وقالي على ميعاد حرب والحرب نجحت من الطرف الآخر يبقى بالتأكيد العميل دا ماقليش حاجة لان لو كان الخبر دا سليم كانوا خدوا بالهم وكانوا وقفوا صدوا الهجوم لكن الجيش المصري نجح في العبور ولم يجد بالعكس في الفترة الاولانية ماكانش فيه أي دفاع إسرائيلي موجود إلى أن صحيوا بعد المفاجأة ما تمت وصدوا الهجوم ..اذن بالتأكيد ماقلهمش لأنه لو قلهم كان الناس دي أفشلت الهجوم المصري فاصل عمرو الليثي: غير أن ما اثأر الجدل فيما قيل عن علاقة اشرف مروان بإسرائيل هو هذا التواصل بينه وبين المؤرخ الإسرائيلي بيرجمن والذي يعتبر أول من أشار إلى علاقة م؟روان بالمخابرات الإسرائيلية في كتابه "تاريخ إسرائيل" حيث دار بينهما اتصالات وحوارات طويلة حول ما جاء بالكتاب فاصل عمرو الليثي: هل كانت لديك أي معلومات انه كان على صلة ببعض الأشخاص من الأصدقاء الإسرائيليين ؟ جمال مروان: لا .. الحاجة الوحيدة اللي عرفتها لما كذا حد كتب كتاب وحط اسم الدكتور اشرف فيه والدكتور اشرف بدأ في المذكرات بتاعته انه أتكلم مع الكتاب دول عمرو الليثي : هل كان من ضمنهم المؤرخ الإسرائيلي اللي أعلن انه كان علاقة بين الدكتور مروان والمخابرات الإسرائيلية وانه كان عميل المخابرات الإسرائيلية ؟ جمال مروان: ماهو فيه كذا كتاب انه مؤرخ فيهم عمرو الليثي: آخر كتاب بتاع اهارون؟ جمال مروان: مش متأكد بس أنا دايما أبويا كان بيقولي خلي الصديق قريب والعدو اقرب فاصل عادل حمودة: هو اللي حصل طبعا إن كنا في رمضان جالي على التيكرز خبر انه كتاب اسمه تاريخ إسرائيل يتحدث عن جاسوس لم يذكره بالاسم ولكن كما قلت سماه العريس أو الصهر وكان دا صهر جمال عبد الناصر ... كان من الطبيعي انك تنشر الترجمة ولكن بتدقيق اكتر يعني فاتصلت بأشرف مروان وقلت له إن فيه كتاب بيقول كذا كذا وبيتهمك بالعمالة لإسرائيل فطلب مني أن نتقابل فقابلته في مكتبه القريب من شارع العروبة في مصر الجديدة بالقرب من بيت الرئيس وشفته ..قعد الحقيقة يتكلم في كل حاجة لأكتر من ساعتين دون أن يقترب من الموضوع ولكن أصريت على الموضوع وكان رأيي انه عليه أن يرد على الراجل ولو في سطور قليلة وبالفعل قال انه هذه القصة خرافية وإنها قصة بوليسية خرافية لا أصل لها ولا صحة وانه لم يعرف شيئا عنها من قبل فنشرت هذا الكلام وكان كل اللي يهمني في هذه السطور القليلة أن أشير إلى اسم اشرف مروان اللي الكاتب الأصلي ما اشارش ليه فاصل لواء/ سامح سيف: في كلام كتير أتقال على إنه هو احد الصحفيين الإسرائيليين طلع كتاب وطلع مقالة وأنا برضه باقوال إن دا تم في فترة لما المخابرات المصرية أعلنت عن عدة قضايا ورا بعض لعملا إسرائيليين في مصر .. بتصور قد يكون ، قد يكون ودا تصوري الشخصي إن إذاعة هذا الكلام على اسم كبير بهذا الوضع هو محاولة الرد من المخابرات الإسرائيلية على المخابرات المصرية بأنه انتوا مسكتوا لنا كذا قضية طب إحنا كمان فلان الفلاني بيشتغل معانا فاصل عمرو الليثي: كما كان الكتاب مثار اهتمام الصحافة المصرية كان كذلك للصحافة الإسرائيلية . فاصل جمال مروان: كلام جرايد معلش يعني عمرو الليثي: هو كان رد عله إيه لما قرا في الجرايد انه بيتهموه انه كان على صلة بالمخابرات الإسرائيلية قالكوا إيه ؟ هل حاول يبرر ؟ هل حكى لكم أي حاجة ؟ جمال مروان: قاللي شوف الهبل دول كاتبين إيه عمرو الليثي: ماحاولتش انك تقاضي الصحف الإسرائيلية اللي نشرت هذه الاتهامات على والدك ؟ جمال مروان: لا الدكتور اشرف قاللي بالظبط يعامللوا الصحف الإسرائيلية ككلاب سعرانة قلت له يعني إيه قاللي يعني أنت لو ماشي في الشارع وكلب هوهو عليك لو اتدورت وقلت للكلب وزعقت للكلب أو أي حاجة ح يهوهو اكتر ويلم بقية كلاب الحتة لو فضلت ماشي ح يهوهو عليك شوية و ح يزهق يروح يهوهو على حد تاني فاصل عمرو الليثي: هل فكرتي في إنك تقاضي الصحف الإسرائيلية اللي أساءت للدكتور أشرف مروان أبان حياته بعد وفاته ؟ السيدة/ منى عبد الناصر: حد بيقاضي العدو !! حنقاضيهم عشان أتكلموا ولاّ حنقاضيهم عشان رمونا بالقنابل فوق دماغنا ما ينفعش أقاضي حد بيرميني بالقنبلة فوق دماغي عمرو الليثي: طب تردي بأيه على البعض اللي بيتهمة بهذه الاتهامات ؟ السيدة/ منى عبد الناصر: مش مستهلاين الرد ومش حقول حاجة ومش حدي أي حد معلومات عمرو الليثي: الرئيس مبارك يوم وفاة الدكتور أشرف مروان أعطى تصريحات لرؤساء تحرير الصحف قال فيها أن الدكتور مروان قدم خدمات جليلة لمصر .. ما طبيعة هذه الخدمات الجليلة التي قدمها لمصر ؟ السيدة/ منى عبد الناصر: كل حاجة طُلبت منه عملها بكفاءة شديدة عمرو الليثي: ممكن نُلقي الضوء عليها ؟ السيدة/ منى عبد الناصر: لا عمرو الليثي: ليه ؟ هل هي سر؟ السيدة/ منى عبد الناصر: لا مش سر عمرو الليثي: يعني مثلا السادات لما إدالة الوسام قال إن هو ساهم ووفر البترول والطائرات في حرب أكتوبر كان واضح حيثيات منحه هذا الوسام .. لما الرئيس يقول قدم خدمات مش من حق المواطن إنه يعرف خصوصا من الزوجة اللي هي بتحافظ دائما على زوجها وبتحب زوجها أبدا وعاشت معاه حياتها على الحلوة والمرة أدينا فكرة أيه اللي قدموا لمصر ؟ السيدة/ منى عبد الناصر: قدم كل حاجة طُلبت منه بكفاءة ، بكفاءة عالية بحيث أنهم كانوا بيطلبوا منه المزيد عمرو الليثي: لغاية أمتى؟ السيدة/ منى عبد الناصر: لغاية ما مات عمرو الليثي: إذن علاقته بالعمل الوطني أستمرت لغاية يوم وفاته؟ السيدة/ منى عبد الناصر: لا مش للآخر لأنه مرض 8 سنين مرض شديد لكن طول ما كان بعفيته طبعا فاصل جمال مروان: كنت ساعات أحس إن هوا ...... صعبان عليه نفسه ، أنت فاهم قصدي أيه ودا اللي كان بيزعلني كأبن لأب ، كنت بقول له م تقول ، قالي ما ينفعش أقول أي حاجه فيع حاجات سرية للبلد ، وكان دايما يوقفني ويقولي أنت مالكش دعوة عمرو الليثي: هل كنت تشعر أن والدك على صلة بالمخابرات المصرية حتى فترة قريبة ؟ جمال مروان: والدي علاقته كويسة بأنظمة كتيره جدا وبمصر بالذات كانت علاقته كويسة جدا فاصل محمد نصير: كانت علاقته قوية جدا بكل المخابرات العربية عمرو الليثي: كان دوره أيه ؟ محمد نصير: كان دوره مدير مكتب رئيس الجمهورية للمعلومات كان حيبقى دوره أكتر من كده أيه فاصل د. علي السمان : زي كل الناس اللي لها علاقة بالأمن القومي صعب أنه يجي يصرح ويقول لا والله دا كان دوري كذا و كذا يعني الموضوع بحالة متصنف سري جدا عمرو الليثي : نستكمل معكم هذا الملف الشائك والمثير في الحلقة القادمة فتابعونا.
