مساحة للرأى

أميمة ابراهيم: مشاهدينا الكرام السلام عليكم ورحمة الله وبركاته حول زيارة الرئيس للبرازيل .. يسعدنا ويشرفنا ان يكون معنا الخبير الاقتصادي الاستاذ صلاح جودة الخبير الاقتصادي المفوضية العلاقات الاوربية العربية دكتور صلاح رأي حضرتك في الزيارة
أ.صلاح جودة: الزيارة دي نمرة 15 منذ مجئ السيد الرئيس محمد مرسي يوم السبت 30 يونيو والسؤال ايه هي العلاقات اللي مصر مدها خلال مع اكبر 5 اقتصاديات نامية وصاعدة في العالم .. ؟ وتاني حاجة السيد الرئيس راح وفد مع السادة الوزراء اللي حلفوا اليمين قبلها ب10 ساعات هل يعلموا الملفات دي فيها ايه ..؟ اكيد لا .. لانه هو لسه جاي والملفات اللي رايحة والعلاقات اللي عاملينها ولما يكون رئيس لدولة في قمة وقامة مصر يروح عشان يفتتح مركز بحزث زراعية هذا نوع من عدم اللياقة بقيمة وقامة مصر السؤال الهدف من الزيارة ايه هل انا رايح استلهم التجربة البرازيلية لازم اخد معايا مجموعة من الخبراء على مستوى السياحة والاقتصاد والتعدين وخلافه ..
أميمة ابراهيم: مين اللي بيختار المجموعات اللي بتسافر
أ.صلاح جودة:المفروض السادة المستشارين مع السيد الرئيس
أميمة ابراهيم: معظم الدول اللي عملت طفرة في اقتصادياتها اغلقت على نفسها.. لا اقترضت ولا استلفت
أ.صلاح جودة:طبعا التجارب من الهام الشعوب ناخد مثلين اهم وزيرين في المملكة العربية السعودية وزير البترول ووزير الحج هل يصلح ان احنا نعمل عندنا وزير الحج ..!! ماينفعش لانه معندناش .. وكمان اهم وزير في البرازيل وزير الغابات لانه عندهم غابات بيستفيد منه وهنا عندنا اكبر ثروة تعدينية في العالم ومعنديش وزارة تعدين وعندي تلت اثار العالم انا مابستفدش من التجارب الي موجودة عندي ومابعظمش العائد منها .. مصر تمتلك من الموارد التي تجعل مصر في 36 شهر ماليزيا.. احنا محدش بيدينا فلوس لانه مش فاهمين العقلية الامريكية يعني السيدة ميركل في زيارة الرئيس لالمانيا بتديلنا من الخزانة الألمانية اللي بيمولها دافع الضرائب اللي بيقوم من 5 الصبح يشتغل ويرجع 5 بعجد الضهر لا يمكن هي تاخد فلوسه وتديهالنا كده واحنا نايمين علشان احنا دولة محورية او قمنا بثورة لانه دا كلام ضد المنطق.. افاجئ حضرتك بخبر هيئة المساحة الجيولوجية والثروة المعدنية كان بيبقى عندها 30 بعثة سنويا بتقوم على مساحة مصر بالكامل والنهاردة بقوا بعثتين اتنين..؟
أميمة ابراهيم: لو زمان كده ايام طلعت حرب
أ.صلاح جودة:ايام الاحتلال وطلع طلعت حرب عمل بنك مصر و38 شركة اللي احنا متمتعين بيهم لحد دلوقت وشركات الطيران وشركات السياحة وشركات الطباعة واول مطبعة اتعملت في مصر هنا على يد طلعت حرب بمساهمة كل الشعب ومثال اخر للتجربة المصرية محمد علي جه 1805 وقعد يحكم مصر 44 سنة وكان الفلاح المصري ما بيخشش الجيش وعمل تجارة وصناعة وزراعة النهاردة عندك 8 مليون فدان و91 مليون نسمة .. فاحنا عندنا خبراء مصريين نستطيع ان نستلهم التجارب منهم
أميمة ابراهيم: خفض التصنيف الائتماني لمصر
أ.صلاح جودة:يعني ايه التصنيف الائتماني ..؟ فيه 3 مؤسسات عالمية بتعمل تصنيف ائتماني يعني جدارة ائتمانية سواء للبلاد او البنوك اوالشركات او المحلات على مستوى العالم بما فيهم امريكا وهي تقوم بتصنيفها ال3 مؤسسات دول ممنوع واحد يدي قرض لاي مؤسسة الا لما يسالها والاتحاد الاوربي عشان يتعامل معاكي لازم تاخدي شهادة من شهادات التصنيف والتصنيف الائتماني باختصار شديد درجات نجاح وقوة الدولة ومقدرتها على سداد ماعليها من التزامات .. فيه ناس سداد ماعليها من ائتمانات ياخدوا امتياز وفيه جيد جدا وفيه جيد وفيه مقبول وفيه ضعيف وفيه ضعيف جدا و احنا وصلنا لضعيف جدا
أميمة ابراهيم: طب احنا هنعمل ايه
أ.صلاح جودة:خلال 15 شهر اي اننا بمعدل كل شهرين بننزل والسؤال ايه الخريطة والخطة اللي انا عملتها.. لايوجد كل الي عملناه ورقة كلها امال طيبة ولكن لا يوجد اي معالم لاي خريطة اقتصادية موجودة بالتالي لا تستطيعي ان تستدعي استثمارات واحنا رحنا الصين اللي جابه 300 عربية موجودة اللي عهما بتوع الشرطة وقلنا هنعمل اتفاقيات ومفيش حاجة حصلت والريس راح روسيا
أميمة ابراهيم: عندي مشروع تنمية محور قناة السويس وعندي الصكوك احنا هنعمل ايه
أ.صلاح جودة:مشروع الصكوك تم اقراره من مجلس الشورى ومش هنقدر نغير فيه حاجة انا معنديش خطة يبقى هسدد منين ..اما مشروع محور قناة السويس محدش يعرف ايه الهدف من المشروع انتوا بتقولوا انه فيه 3 انفاق من تحت قناة السويس طب العائد بتاعهم ايه ومين اللي هتقوم بيه محدش يعرف كل دي حاجات مغيبات بالمناسبة مشروع القانون دا موجود على الموقع بتاع وزارة الاسكان.. ايه اللي خلى الدكتور عصام شرف يستقيل هو والهيئة الاستشارية بتاعته عشان الدكتور وليد عبد الغفار شاب نابه وكويس وهو المختص بالموضوع دا انا بقية الخطط تترمي وياخدوا حاجة تانية خالص طب ماهو احنا برضه شركاء في هذا الوطن
أميمة ابراهيم: ليه وزير الاسكان بس
أ.صلاح جودة:يعني وزير الاسكان المفروض يبقى ممثل والقوات المسلحة تبقى ممثلة ووزارة السياحة والثروة المعدنية والتعدين
أميمة ابراهيم: وفيه كمان حد رقابي بيقول ان راس المال اللي داخلك دا
أ.صلاح جودة:لما جينا نعمل السد العالي اتعملت وزارة برئاسة صدقي سليمان بدرجة نائب رئيس وزراء ولما جينا نعمل قناة السويس الرئيس عبد الناصر ادى لمحمود يونس اللي هو رئيس القناة على 3 محافظات السويس والاسناعيلية وبورسعيد قرار باختصاصات رئيس الدولة علشان يبقى فيه قوة للقرار بس احنا متفقي على الخطة كلها ايه اللي هيتم واحنا مش متفقين
أميمة ابراهيم: وهو خبير في مجاله
أ.صلاح جودة:وايه الخطط ايه الهدف من التنمية اعمل صناعة ولا مجتمع عمراني
أميمة ابراهيم: الناس كلها قاعدة مستنية الفلوس لكن انا هاخد فلوس عشان اعمل ايه مابقاش دا الطموح
أ.صلاح جودة:يبقى انا قاعد مستني واحد يقولي حسنة لله في سبيل انا مبقومش اشتغل لاني خايف اني امشي من المكان اللي انا بشحت فيه ييجي حد تاني
أميمة ابراهيم: هؤجر له المكان
أ.صلاح جودة:طيب ماتقوم تشتغل انت ..احنا نستطيع ان نعظم العائد يبتاعنا من المواد الخام اللي عندنا
أميمة ابراهيم: المشروعات اللي موجودة كتير وعندي المواد الخام والتربة الصالحة
أ.صلاح جودة:انا عندي في مصر 15 مليار طن ملح مصر بتستورد الملح وما بتستخدمش الملح بتاعها عشان فيه ناع بين 3 وزارات على ملكية ابيار الملح وبتستورد ملح سنويا ب10 مليار دولار
أميمة ابراهيم: دكتور صلاح جودة الخبير الاقتصادي العالمي ومستشار مفوضية العلاقات الاوربية العربية بشكرك.. مشاهدينا الكرام وصلنا الى ختام الحلقة نترككم في رعاية الله وامنه وسلمت يامصر وسلم شعبك والسلام عليكم ورحمة الله وبركاته