45 دقيقة

رغدة منير : سيداتى وسادتى أهلا بكم فى حلقة جديدة من برنامج 45 دقيقة ، وكما تعودنا نبدأ البرنامج بأهم الأخبار ، نستكمل حوارنا بعد هذا التقرير
تقرير
أعلن الدكتور صلاح عبد المؤمن وزير الزراعة واستصلاح الأراضى أن الاستراتيجية الجديدة للزراعة تعطى الفلاح الأولوية من خلال توفير مستلزمات الإنتاج بالأسعار المدعمة كالأسمدة وصرفها ببطاقات التموين الذكية كما تشمل الدعم الفنى والتسويق وتحديد أسعار تضامنية للمحاصيل الرئيسة مثل القمح حيث تم تحديد سعر التوريد 400 جنيه للأردب ، أكدت وزارة القوى العاملة والهجرة أن وزارة العمل الليبية أعلنت عن أنها مسئولة فقط لاستخدام العمالة لأراضيها ووضعت مجموعة من الشروط بشأن العمالة الوافدة إليها بسبب قيام عدد من الهيئات والأشخاص بعمليات نصب على الراغبين فى العمل بليبيا ، أعلن لتحديد شهيد ومصاب الثورة وتوقع باستبعاد ضحايا الأقسام قال خالد بدوى أمين عام المجلس القومى للشهداء والمصابين أنه اتفق مع الدكتور هشام قنديل رئيس مجلس الوزراء لإصدار قانون يحدد صفة شهداء الثورة والمصابين والمتضررين فى عيد الثورة كما يجرى إعداده حاليا ، حمينا الثورة وسنظل درع الوطن الأمين السيسى فى لمسة وفاء المشير طنطاوى تحمل ما لا تتحمله الجبال الفريق صدقى يكرم أسر الشهداء خلال الثورة ، توتر فى القاهرة ومدن القناة قبل حكم القضاء فى مجزرة بورسعيد السبت القادم ألتراس أهلاوى يغلق مقر البورصة الألتراس أوقفوا المترو وقطعوا كوبرى أكتوبر للمطالبة بالقصاص للشهداء النيابة تكلف الأمن بحماية البورصة وتأجيل جميع مجالس حكم الاستئناف فى مدن القناة لعدم إحضار المتهمين فى القضايا ارتياح فى بورسعيد لضم الشهداء فى المباراة لشهداء الثورة ، بتكلفة بلغت 57 مليون جنيه محور جديدة لانسياب المرور بالجيزة قررت محافظة الجيزة الاستمرار فى إيجاد محاور مرورية جديدة لنقل حركة السيارات إلى أماكن مزدحمة بما يؤدى إلى سيولة الحركة المرورية
رغدة منير : من ضمن الأخبار اللى سمعناها تصريح الأمين العام للمجلس القومى لأسر شهداء ومصابى الثورة الأستاذ خالد بدوى اللى قال إن المجلس بصدد إعداد تشريع يقدم لمجلس الشورى عشان يحدد المجلس الشهيد والمصاب حتى لا يحصل على هذا اللقب من لا يستحقه كمان المجلس قرر تخصيص قطعة أرض لإنشاء مدينة متكاملة لأسر شهداء بورسعيد يبقى فيها كل متطلباتهم واحتياجاتهم وكان من ضمن التصريحات برضه من ساعات الأستاذ خالد بدوى قال إن تم صرف شيكات ب مليون و800 ألف جنيه لأسر شهداء ثورة يناير احنا معانا على التليفون الأستاذ خالد بدوى الأمين العام للمجلس القومى لرعاية أسر الشهداء والمصابين مساء الخير يا فندم
أ.خالد بدوى : أهلا
رغدة منير : يعنى يا فندم هو ده تشريع جديد وللا التشريع اللى كان قبل كده تم مناقشته فى مجلس الشعب ومثلا ده بند من البنود اللى هيتم إدراجها أو تفصيلها فى هذا التشريع إيه تفاصيل يعنى هذا التشريع
أ.خالد بدوى : أولا أنا عايز أوضح إن فكرة هذا التشريع قامت لتحدد وصف الشهيد ووصف المصاب الذى يقال له شهيد ثورة أو مصاب ثورة وهذا فى طور الإعداد ما زال فى طور الإعداد يعنى بدأنا فيه ولم ننتهى منه يعنى ما زلنا ندرسه حتى نقدمه كاملا إلى السلطة التشريعية هذه واحدة الثانية لم يرد على لسانى أبدا ولا فى تصريحاتى موضوع مدينة سكنية لشهداء بورسعيد هذا لم أصرح به وإنما نحن نأمل ونحلم أن نقدم الرعاية المتكاملة لكل شهداء الثورة ومصابى الثورة على مستوى الجمهورية كلها
رغدة منير : كويس إن حضرتك وضحت لنا النقطة دى لإن ده خبر تم تداوله فى العديد من مواقع الأخبار
أ.خالد بدوى : حضرتك فى التقرير كمان قيل أن الشهداء الذين سقطوا أمام الأقسام سيتم استبعادهم هذا الكلام غير صحيح على الإطلاق ولم يرد على لسانى كذلك هذه مسألة غير صحيحة على الإطلاق
رغدة منير : طيب التشريع يا فندم بقى تفاصيل هذا التشريع يعنى أنا سألت حضرتك كان فيه تشريع كان بيناقش فى مجلس الشعب كان محدد فيه المخصصات المالية ومين يحصل عليها وتقسيمها بين أسر الشهداء كان معاش وللا كان تركة شرعية يعنى تفاصيل بقى هذا التشريع تحديدا
أ.خالد بدوى : لا هو التشريع الذى صدر من مجلس الشعب هو ذلك التشريع الذى رفع قيمة التعويض بالنسبة للشهداء إلى مائة ألف جنيه لم يتطرق إلى شئ ولا إلى تفصيلات لوصف الشهيد أو وصف مصابى الثورة احنا الآن نظرا لتكامل الأحداث وكثرة الأحداث وجب أن تضبط هذه المسألة أن يضبط وصف الشهيد ووصف المصاب حتى لا يستفيد أى مصاب أو أى قتيل فى أى حدث فيه تدمير أو تخريب لمنشآت الدولة من الرعاية المتكاملة التى يقدمها المجلس القومى لشهداء ومصابى الثورة
رغدة منير : تمام أنا بشكر حضرتك شكرا جزيلا لهذه الإيضاحات الأستاذ خالد بدوى رئيس المجلس القومى لرعاية أسر وشهداء ثورة يناير شكرا جزيلا ، الخبر الثانى معانا خبر قرار محافظة الجيزة الاستمرار فى إيجاد محاور مرورية جديدة علشان تقل حركة العربيات من الأماكن المزدحمة للمناطق المختلفة وده هيؤدى لسيولة مرورية تكلفة 57 مليون جنيه كانت الأرقام اللى لقيناها على لسان محافظ الجيزة الدكتور على عبد الرحمن اللى تحدث خلال افتتاح هذه المحاور ونفترض إنها هتبقى فى يونيو القادم لمزيد من الإيضاح معانا على التليفون دكتور على عبد الرحمن محافظ الجيزة مساء الخير يا دكتور
د.على عبد الرحمن : مساء النور
رغدة منير : بنرحب بحضرتك يا فندم هذه المحاور إيه المناطق اللى هتربط بينها المحاور دى واللى أى مدى فعلا هتخف الزحمة فى محافظة مهمة وذات كثافة سكانية عالية زى محافظة الجيزة
د.على عبد الرحمن : احنا عندنا عقود أبرمت مع شركات رصف ورفع كفاءة طرق بتمويل 57 مليون جنيه بتنتهى المدة الزمنية لتنفيذ هذه الأعمال مع نهاية العام المالى الحالى اللى هو بينتهى فى يونية 2013 جملة المصروفات اللى بتنفقها المحافظة كل سنة على رفع الطرق وكفاءتها حوالى 100 مليون جنيه الطرق لها مردود مهم جدا على تنمية المحافظة الطرق بتوزع الإنفاق عليها على كافة المراكز وكافة الأحياء يعنى حتى يشعر كل مواطن إن فيه مردود من موازنة الدولة ومن التمويل الذاتى المتاح للمحافظة على كل منطقة وليس تركيز فى منطقة معينة المنطقة اللى احنا افتتحناها أمس وكنا بنشوف رفع كفاءتها هى منطقة جسر ترعة المنصورية باعتبار إن ترعة المنصورية تمر فى مناطق كثيرة فى المحافظة وتمر موازية لطريق مصر – اسكندرية الصحراوى اللى عليه حركة كثيفة دائما وفيه شكوى مستمرة من المواطنين اللى بيستخدموا هذا الطريق عند منطقة الجيزة الحضارية الطريق ده بيقى بديل لطريق مصر – اسكندرية الصحراوى بيشمل منطقة الهرم وكفر بطاطى وأبو رواش ومنطقة أرض اللواء على طريق شارع النيل الأبيض بيخدم مناطق أوسيم وكرداسة ومنشية القناطر وينتهى طريق جسر المنصورية عند قرية برقاش المرحلة الحالية وهيتبقى حوالى 2 كيلو هنستكلمهم فى مرحلة لاحقة حتى نصل إلى حدود المحافظة مع البحيرة
رغدة منير : زى ما قلنا إن شاء الله يا فندم يونيو القادم هيتم افتتاح هذه المحاور
د.على عبد الرحمن : فيه محاور لسه بنعملها وفيه محاول خلال شهر إن شاء الله عندنا محاور عرضية خلال الشهر القادم وهى محاور عرضية زى محور ترعة ثدى بيصل طريق المنصورية إلى المنطقة الصناعية فى أبو رواش إلى طريق مصر – اسكندرية فالطرق العرضية دى بتاخد من الحركة بدل ما تخش من الهرم أو لعرض الطريق من مصر – اسكندرية عرض محدود جدا لا يتناسب مع الحركة على كريق مصر – اسكندرية بمثل هذه الطرق إن شاء الله خلال يونيو اللى جاى فى الطرق اللى فيها تمويل أكثر من 10 مليون جنيه سينتهى فى شهر يونية القادم
رغدة منير : يا فندم سؤال أخير بس مالوش علاقة بموضوع المحاور المرورية احنا كان لنا اتصال مع حضرتك الأسبوع اللى فات كنا بنتكلم فيه عن حملة الإشغالات اللى بيتم إزالتها بالتعاون مع وزارة الداخلية الإدارة العامة للمرور وكنت سألت حضرتك يعنى مدى استمرارية هذه الحملات يعنى كل فترة بتطلع آه حملات وبتشيل الإشغالات لكن لإن مفيش مراقبة مفيش متابعة طول الوقت فالإشغالات بترجع ثانى وكإن احنا ما عملناش حاجة ووصلنا لفين
د.على عبد الرحمن : يعنى احنا حاليا فيه اتفاق ضمنى مع الباعة الجائلين إن مفيش أى افتراش فى طريق والحمد لله لسه محافظين على هذا الاتفاق والباعة الجائلين بينفذوا هذا الاتفاق الرصيف فى المرحلة القادمة احنا بنتكلم فيه مع الباعة على إنهم يتركوا الرصيف جزء منه للمعروضات وجزء منه يبقى للمارين ده هيبقى حل مؤقت لحين المستحقين منهم ندبر لهم أماكن تطرح عليهم لاستخدامها فى إطار قانون مع المحافظة
رغدة منير : أنا بشكر حضرتك شكرا جزيلا دكتور على عبد الرحمن محافظ الجيزة شكرا لانضمام حضرتك لنا ، هذا شهر الحبيب فيه مسك وطيب أوصلوا الهدايا إليه بكثرة الصلاة عليه صلى الله عليه وسلم أحد أهم الاحتفالات اللى بنحتفل بها كلنا كمصريين والعالم الإسلامى فى 12 من ربيع الأول هو مولد سيد الخلق صلى الله عليه وسلم الاحتفال دايما بيصاحبه عدة مظاهر عمل سرادقات كبيرة فى المساجد الكبرى فى مختلف قرى مصر والمناطق الإسلامية فى الحسين ومصر القديمة منشدين ومداحين فى حب رسول الله صلى الله عليه وسلم ولكن من أهم مظاهر الاحتفال هو الاقتداء والتأسى بسنة النبى صلى الله عليه وسلم وما أحوجنا فى هذه الأيام لسيرة الرسول صلى الله عليه وسلم خلونا نشوف تقرير ونكمل مع الدكتور محمد الشحات الجندى عضو مجمع البحوث الإسلامية عن هذه المناسبة الكريمة
تقرير
يحتفل المصريون اليوم بذكرى المولد النبوى الشريف الذين يأتى مواكبا للاحتفال بالذكرى الثانية لثورة الخامس والعشرين من يناير
مواطن : نحتفل النهاردة والعالم الإسلامى كله بذكرى الحبيب المصطفى صلى الله عليه وسلم الحبيب المصطفى الذى وحد كل شعوب العالم تحت كلمة لا إله إلا الله محمدا رسول الله فأنا أطالب المصريين كلهم أنهم يتوحدوا فى ذكرى الحبيب محمد وأن ينبذوا الخلافات جانبا وأن يعودوا لبناء مصر من أول وجديد بنطالبهم أن يقتدوا برسول الله صلوات الله صلى عليه وسلم
مواطن آخر : المفروض إن احنا نقتدى بسلوك النبى عليه الصلاة والسلام وما يبقاش فيه تشدد بيننا وبين بعضنا حتى لو واحد غلط فى واحد المفروض يبقى فيه تسامح ويبقى فيه عملية تسامح ورضا
مواطن ثالث : بلدنا جميلة وربنا يهدى الحال فى البلد وإن شاء الله يعدى علينا كل مولد النبى أحلى من الثانى وربنا يهدى
مواطن رابع : ذكرى جميلة لازم كلنا نبقى مترابطين ومتكاملين مع بعض
احتفال ارتبط به المصريون بشراء مختلف أنواع الحلوى التى تتوافر فى الأسواق المصرية فى مثل هذا الاحتفال من كل عام
مواطن خامس : خدنا حلاوة المولد علشان الأولاد يفرحوا واحنا نفرح معاهم طبعا إنما احنا من زمان متعودين على كده
مواطنة مصرية : بقول كل سنة وانتم طيبين على الأمة الإسلامية وربنا كده يعود على الأمة الإسلامية ومصر بخير ودى عادة بنشترى الحلاوة لاولادنا
مواطنة أخرى : أنا جاية بشترى عروسة لبنتى
مواطن خامس : أوديهم السيدة أوديهم الحسين أشترى شوية حاجات للعيال
طفل : جاى أشترى حلويات علشان خاطر مولد النبى
مواطن سادس : يا رب تبقى بخير على طول والشعب المصري يبقى بخير ونعيش حياة كويسة ونحب مصر
احياء ذكرى المولد النبوى الشريف تتأتى من التمسك بأخلاق الرسول صلى الله عليه وسلم فى كافة تعاملاته والتى نحن أحوج إليها هذه الأيام من أى وقت مضى
غادة منير : احنا معانا على التليفون الدكتور محمد الشحات الجندى عضو مجمع البحوث الإسلامية مساء الخير يا دكتور
د.محمد الشحات الجندى : أهلا وسهلا مساء النور
غادة منير : يعنى فى هذه الأيام كيف نعيد سيرة الرسول الكريم صلى الله عليه وسلم
د.محمد الشحات الجندى : بسم الله الرحمن الرحيم أولا كل سنة وحضرتك وكل المشاهدين والأمة الإسلامية و العالم كله من مشارق الأرض ومغاربها فى هذا الاحتفال بميلاد النبى محمد صلى الله عليه وسلم طبعا هو خير وسيلة فعلا للاحتفال بهذه الذكرى إن احنا نتأتى بأخلاقيات الرسول ونقدم ما يكمن أن نسميه بكشف حساب يعنى نحن اليوم ميلاد شخصية فذة هذه الشخصية أعطت العالم كله وليس المسلمون فقط وبالتالى للأسف ما توجد عليه الأمة الإسلامية من لا أريد من تخلف ومن عدم استقرار ومن معانى الأخوة الجميلة التى ينبغى أن تكون بيننا جميعا داخل مصرنا وعلى مستوانا العربى على مستوى عالمنا العربى والإسلامى والسلام النفسى والأمان الاجتماعى هذه معانى بعض المعانى والتسامح الذى قال عنه البعض ذلك هذه المعانى الحقيقة يعنى يا ليت أن تكون هذه فرصة فعلا ذهبية فى هذا الوقت الذى يمثل مرحلة انتقالية ومرحلة شائكة أيضا للشعب المصرى وللشعوب العربية والإسلامية إن احنا نعبر عن طريق الأخلاق المحمدية وبأخلاق الإسلام إلى بر الأمان ولن يكون ذلك فعلا إلا بكما قال القرآن الكريم لقد كان لكم فى رسول الله أسوة حسنة لمن كان يرجو الله واليوم الآخر وذكر الله كثير الاحتفال لا يجوز أن يقتصر فقط على إن احنا نشترى الحلوى إن احنا فقط يكون فيه مظاهر شكلية لكن ينبغى أن تكون الأمور تفيد الوجدان ، تفيد الأهل ، تفيد الأقارب تفيد المجتمع تفيد الجيران هذا هو التأسى الحقيقى
غادة منير : كل سنة وحضرتك طيب دكتور محمد الشحات الجندى بشكر حضرتك شكرا جزيلا عضو مجمع البحوث الإسلامية ، بكرة الذكرى الثانية لثورة 25 يناير وبغض النظر سواء اللى نازل بكرة يحتشد يحتفل يعتصم فى النهاية رسالة للجميع حافظوا على سلمية الثورة التى قمتم بها وأبهرتم بها العالم كله عيش ، حرية ، عدالة اجتماعية مطالب أساسية قامت علشانها الثورة وهتستمر طول الوقت تنادى بها ومطلوب إن احنا ننادى بها ومطلوب مننا إن احنا نبذل كل ما وسعنا عشان نحقق الثورة واللى قامت علشانه التقرير اللى جاى نشوفه عن أهداف الثورة ونتحقق ونرجع نكمل حديثنا
تقرير
ولأنها ثورة سلمية هدفها تحقيق العدالة الاجتماعية بين طبقات المجتمع المصرى كافة كان لزاما على كل مصرى نلتزم بسلمية التظاهر لإحياء الذكرى الثانية لثورة الخامس والعشرين من يناير
مواطن : نبقى إيد واحدة ونعدى اللى احنا فيه ده على خير لازم كلنا نقف إيدينا فى إيدين بعض ونعدى وبلاش مشاكل يعنى عشان نعدى الفترة دى على خير يعنى
مواطن آخر : ماشى احنا نطلع علشان نحتفل باليوم ده لإن اليوم ده غير مننا كثير وقلب حال البلد من الأسوأ للأحسن يعنى المفروض بقى الحكومة تشوف دورها كويس عشان البلطجة والشغل ده كله يعنى يخف فلازم يعملوا الناس ، الناس دى كلها طالعة علشان بتحتفل بحاجة كويسة جدا
مواطن ثالث : احنا بكرة إن شاء الله عايزينه يعدى عادى كأى يوم عادى ما يبقاش فيه مشاحنات ما يبقاش فيه مظاهرات وبدل ما نبتدى نهد تبتدى نبنى وبعدين برضه كل المظاهرات والحاجات دى كلها أنا ضدها ورافضها تماما يعنى
أصحاب الفكر والاقتصاديون لهم توصياتهم فى هذا اليوم وكذلك الآمال والطموحات لغد أفضل لمصر والمصريين
محمد عز الدين : ( مساعد رئيس تحرير الأهرام ) كل السيناريوهات بتدفع تجاه الخروج أولا إلى الشوارع جزئين جزء بيحتفل بثورة 25 يناير والجزء الآخر بيعبر عما بداخله من عدم تحقيق كل مكاسب الثورة طبعا نأمل إن بكرة يخرج بمظهر حضارى يليق بالثورة المصرية العظيمة ونأمل إن الشباب كله يكون أدامهم مصلحة مصر فى المقام الأول وذلك لأهمية حدوث نوع من الاستقرار
صالح إبراهيم : ( صحفى بجريدة الوفد ) تمنياتى إن اليوم يمر بسلام نتمنى كلنا إن اليوم يمر بسلام لكن رؤيتى للمشهد برضه من الناحية الاقتصادية فيه ترقب وفيه قلق من جانب رجال الأعمال والمستثمرين خاصة يوم السبت مش بس الجمعة يعنى لو اليومين اللى جايين الجمعة والسبت عدوا على خير إن شاء الله أعتقد إن مصر هتشهد نسبيا يعنى هتلتقط أنفاسها فيما يتعلق من الناحية الاقتصادية يعنى
عادل محمود : ( مصور صحفى ) آمل إن هو يعدى على خير بدون مشاكل ، بدون دم ربنا يستر إن شاء الله لإن لو حصل دم الموضوع هيكبر مش هيتلم يعنى
التظاهر السلمى حق يكفله الدستور المصرى وذلك إحياء الذكريات التى غيرت فى تاريخ الأمم يجب على كل مواطن مصرى محب لبلده الالتزام بالحيادية والسلمية حفاظا على واجهة مصر الحضارية أمام شعوب العالم
غادة منير : احنا رجعنا نكمل معاكم معانا على التليفون الدكتور محمود العلايلى السكرتير العام المساعد لحزب المصريين الأحرار وعضو جبهة الإنقاذ يعنى خلينى أعرف بكرة إن شاء الله جبهة الإنقاذ الوطنى هتقضى يوم 25 يناير ازاى سمعنا عن مسيرات سمعنا عن احتشادات وحشد كبير فى ميدان التحرير
د.محمود العلايلى : (السكرتير العام المساعد لحزب المصريين الأحرار وعضو جبهة الإنقاذ ) جبهة الإنقاذ بتدعو للاحتشاد فى كل ميادين التحرير فى مصر وليس ميدان التحرير فى القاهرة فقط وبندعو للاحتشاد للتعبير عن الغضب والتعبير عن الاستياء عن مسار ثورة 25 يناير لم يتغير بشكل حاد وغيرته بشكل واضح وجماعة الإخوان المسلمين فاحنا لما بنيجى نقول احنا بنرفض هذا المسار أو نريد أن يعود المسار أو هذه ثورة أو المدة الثانية من ثورة 25 يناير لاستعادة المطالب والعيش والحرية والعدالة الاجتماعية بالإضافة إلى المطالب الأخرى وهى أهمها إصدار دستور محترم يليق بمصر فعلا وليس هذا الدستور الذى خرج من هذه الجمعية التأسيسية اللى لم يوافق عليه عدد كبير من المصريين بالإضافة إلى محاولة تحجيم تأثير جماعة الإخوان المسلمين على مصر فى هذه الأحيان وتذكير الرئيس أن 50 % من الذين انتخبوه ، انتخبوه ليكون رئيسا لكل مصر وليس ممثلا لجماعة الإخوان المسلمين
غادة منير : طيب يا فندم تيارات أحزاب الاستقلال قالت إن يمكن مش يمكن هى انطوت إن هى هتعتصم فى الميدان لحين تحقيق المطالب موقفكم إيه
د.محمود العلايلى : احنا شايفين إن أى نوع من التصعيد سوف يحدده إيقاع اليوم وإيقاع الميدان وإيقاع الاعتصام فى حد ذاته إلى أن يظهر آخر اليوم ممكن أقول لحضرتك ممكن يحصل إيه
رغدة منير : بشكر حضرتك شكرا جزيلا دكتور محمود العلايلى السكرتير العام المساعد لحزب المصريين الأحرار وعضو جبهة الإنقاذ وكمان معانا الأستاذ ياسر عبد الرافع القيادى بحزب الحرية والعدالة جماعة الإخوان المسلمين أطلقت مبادرة معا نبنى مصر كنوع من أنواع الاحتفال بثورة 25 يناير وقالت إن هى هتفتتح الكثير من المراكز الخدمية كيف ستقضون أنتم أيضا اليوم غدا 25 يناير
أ.ياسر عبد الرافع : طبعا الحمد لله والصلاة والسلام على رسول الله احنا بدأنا فعلا امبارح الحملة بتاعتنا فى المحافظات والمراكز عبارة عن حملات نظافة للشوارع عبارة عن حملات تشجير زرع أكثر من مليون شجرة على مستوى الجمهورية وقوافل طبية للكشف على ما يصل إلى مليون مريض والحملة بدأت فعلا امبارح وأنا لسه جاى من محافظة البحيرة من قافلة كانت موجودة ودخل كشف فيها ما لا يقل عن ألف مريض من المصريين حوالى 200 واحد عمليات جراحية هتتم إن شاء الله فى أماكن أخرى وده اللى بيقدمه الإخوان المسلمين للشعب المصرى فى ظل هذه الثورة ثورتنا المجيدة ، الحاجة الثانية اللى عايزة أقولها لحضرتك المداخلة اللى كانت قبلى بيقول إن احنا عندنا دستور معيب أنا عايز أعرف الدستور المعيب ده جابه منين الدستور ده طلع صوت عليه 68 % من الشعب المصرى هل هو مش عاجبه تصويت الشعب المصرى لو مش عاجبه تصويت الشارع المصرى ينزل الشارع يقول يا مصريين يا اللى صوتوا على الدستور انتوا ما تعرفوش حاجة احنا بنعرف أحسن منكم احنا النخبة
غادة منير : بس فى النهاية دى برضه وجهة نظر الناس اللى قالت لا أو الناس اللى قاطعت يعنى
أ.ياسر عبد الرافع : يا فندم كل دساتير العالم نسبة الموافقة عليها لم تتعد ال60 % أنا عندى دستور موافق عليه 68 % بريطانيا ، فرنسا ، ألمانيا كل دول العالم لو راجعتى حضرتك على النت وشفتى عدد التصويت نسبة التصويت لا تتعدى أقصى دولة 60 % احنا عندنا 68 % وطالع بتاع جبهة الإنقاذ مشكورا بيقول إن الدستور معيب فعادت الأمور لوضعها الطبيعى إيه وضعها الطبيعى عندنا دستور صوت عليه الشعب المصرى لازم نحترمه انت مش عاجبك الدستور خش مجلس الشعب لو أغلبية عدل فى الدستور لو منتخب بنسبة 51 % لازم تحترمه حتة بقى إنه رئيس الإخوان وده بيمشى كلام الإخوان هذه النخب التى مل منها الشعب المصرى هذه الأصوات الكاذبة أن الإخوان المسلمون يسيطرون على الدكتور مرسى وأن الحكم حكم المرشد هذه كلها أكاذيب وإشاعات مغرضة لإثارة الفوضى فى البلاد
رغدة منير : فى النهاية برضه هى وجهة نظر برضه أنا بشكر حضرتك أستاذ ياسر عبد الرافع بشكر حضرتك ووجهة نظر حضرتك يعنى تحترم
أ.ياسر عبد الرافع : هوصل فكرة أخيرة بعد إذنك أنا أتمنى على حد من جبهة الإنقاذ من يوم ما مسك الدكتور محمد مرسى الحكم يقول لى ما هو المشروع الذى قدمته جبهة الإنقاذ وأى حزب معارض للدكتور مرسى لنهضة مصر إلا المعارضة فقط المعارضة طب بتعارض ليه طب ده مش عاجبك وده مش عاجبك إيه اللى هيعجبك وعايزين يوقعوا البلد فين
رغدة منير : أنا بعتذر لحضرتك لضيق الوقت أنا مش بقاطع حضرتك ، حضرتك طلبت منى نقطة أخيرة وأنا إديت لحضرتك الوقت شكرا جزيلا أستاذ ياسر عبد الرافع قيادى بحزب الحرية والعدالة ودائما بنأكد إن دى يعنى ساحة للرأى وللرأى الآخر ودى حق الرد مكفول شعار الثورة عيش حرية عدالة اجتماعية يعنى كان أول حاجة فى المطالب العيش والعيش ده مش بس الخبز العيش ده مش بس فكرة إن احنا بنعيش به يعنى هو يعتبر عماد الحياة عندنا وهو عماد المائدة فى لدى الأسرة المصرية سمعنا عن قرار الحكومة بتوزيع العيش المدعوم على المواطنين بنظام البطاقة الذكية هيخصص 3 أرغفة يوميا لكل مواطن وفيه ناس كثير شافت إن القرار ده هيقضى على قرار تهريب القمح والدقيق فى الأسواق واللى بتتسبب فى ضياع من 20 ل 30 % سنويا من دعم العيش طبعا من ضمن الناس دول مصادر حكومية كانت بتقول إن ده هو الهدف من منظومة الخبز الجديدة النسبة الثانية بقى شايفة إن حصة المواطن اليومية ب 3 أرغفة يوميا مش كفاية علشان تلبى احتياجاتها خصوصا إن المواطن الفقير بيعتمد عليه كحاجة أساسية موجودة على مدار اليوم يعنى مش لازم حتى يقعد لوجبة أساسية علشان يبقى عنده عيش خلينا نشوف تقريرنا اللى جاى ونرجع نستقبل ضيفنا فى الاستديو الدكتور ناصر الفراش مسئول ملف الخبز بوزارة التموين
تقرير
رغيف الخبز قوت الشعب مادة على مائدة الغنى والفقير لذا فهو يحظى بنصيب وافر من الدعم إنه عادة لا يصل إلى مستحقيه والأسباب عديدة
مواطن : اللى بيهلك العيش الدقيق بيتهرب وسلوك الناس وحش برضه وبتوع التموين هم أصلا عارفين المشوار ده كله بيبقوا قاعدين وشايفين كل حاجة وهى بتتهرب
مواطنة مصرية : هربوا الدقيق مش قادرة أقول لحضرتك ازاى يعنى لو هم مثلا عندهم 50 شوال بيهربوا 40 شوال بيدونا احنا 10 بين كل قفص وقفص بتقف بالربع ساعة وبالثلث ساعة ومحدش بيقدر يتكلم
مواطن مصرى : كل دول من الأرياف اللى بييجوا من الشرقية ومن هنا ، ومن هنا فإذن لا مؤاخذة الدقيق المدعم ده ما بيكفيناش
مواطن آخر : عشان تجيب عيش لازم تقف من 5 الفجر لو واقف من 7 الصبح يدوك 10 أرغفة بس
فصل الإنتاج عن التوزيع ، تقديم حوافز إضافية لأصحاب المخابز تغليظ العقوبات على المخالفين محاولات لم تفلح أو تصلح من جودة الرغيف المدعم وهو ما استدعى محاولة طرح الخبز بالبطاقة الذكية فهل تقبل المواطن هذا الطرح
مواطن مصرى : مش رغيف العيش اللى يتعمل عليه بالبطاقة الذكية ده يبقى عيب فى حق الحكومة إنها تعبانة قوى ، قوى إنها تحل المشكلة بتحلها بالبطاقة الذكية ده غلط
مواطنة : ما ينفعش لو ما معييش بطاقة ما آكلش عندى 3 عيال وجوزى مريض نعيش بالبطاقة وماناكلش
مواطن : انت لو جاء لك ضيوف من هنا وللا من هنا تجيب منين العيش ومعك عيال كثير هتنزل تشحت من الناس
مواطن آخر : العيال أقل عيلة بتاكل 3 أرغفة
مواطنة مصرية : أنا باكل رغيفين والحمد لله والشكر لله على ما أعطانا ده رضا
يبدو أن هناك تحولات وممارسات أخرى دخلت على الخط وساهمت بدورها فى إهدار الرغيف المدعم
فلاح مصرى : جاى من الأقاليم من جميع بلاد مصر بنيجى ناخد العيش للفراخ وبناخد العيش لا مؤاخذة للمواشى لإن مغليين الردة على العامل بتاع مصر لو الردة رخيصة وفيه رقابة الدقيق يبقى قاعد للمواطن لكن النهاردة الردة بتاعت وزارة الزراعة الردة غالية والدقيق رخيص بيأكل به بهايم بيأكل بيه أى حاجة بقى
مواطن : العيش كثير بس بييجى ناس من القليوبية وبييجى ناس من الفلاحين اللى هى بتبيع الفاكهة والحاجات دية بييجوا ياخدوا بال5 جنيه وبال 6 جنيه بيأكلوه للمواشى وللبهايم وللحاجات دى ويعملوه علفة
مواطن ثانى : المفروض يبقى فيه رقابة على الأفران كلها ويبقى فيه رغيف محترم الناس تحاول تاكل منه
وسواء نجحت هذه المحاولات فى ضبط وتوفير الرغيف أم لم تفلح يبقى رغيف العيش المدعم مادة أساسية على مائدة البسطاء حتى لو اضصطروا للاستغناء عن أشياء أخرى
رغدة منير : بنرحب بكم مرة ثانية شفنا التقرير وبنرحب بضيفنا الدكتور ناصر الفراش مستشار وزير التموين و المتحدث الرسمى باسم الوزارة يعنى خلينى أبدأ كده كان فيه من يومين كده فى الأهرام كانت نشرت بتقول إن هى بتنفرد بحل ألغاز الخبز الجديد أد كده الموضوع معقد ألغاز
أ.ناصر الفراش : بسم الله الرحمن الرحيم أولا أنا بشكر حضرتك على الاستضافة الكريمة وبشكر البرنامج وبهنئ الشعب المصرى والشعب المسلم فى جميع ربوع العالم بذكرى مولد النبى صلى الله عليه وسلم فى هذا اليوم الكريم يعنى فى الحقيقة أنا عايز أبدأ باللى حضرتك بدأتى به فى التقديم لإن الثورة قامت ب3 كلمات عيش ، حرية ، عدالة اجتماعية وقالوا كرامة إنسانية فعلشان العيش أول مطالب الثورة واحنا بنعتبره فى وزارة التموين الهدف ذا الأولوية أو ذو الأولوية كل مساراتنا فى الوزارة بتتجه إلى إن هى تصل إلى إرضاء المواطن المصرى من حيث الكم والكيف فى رغيف العيش حضرتك قلتى بقى كشف ألغاز وفك ألغاز احنا دلوقتى ماشيين ازاى وعايزين نروح فين عشان احنا لو فهمنا الحتة دى هتتحل الألغاز اللى حضرتك بتقولى عليها أولا منظومة إنتاج الخبز فى مصر اللى ماشية حاليا وهى نتاج الميراث القديم هنتخلى عن كلمة الميراث القديم ، الميراث القديم الذى خلفه النظام وعشان كده قامت عليه الثورة إلى إن احنا نقول إن مصر كانت بتدعم رغيف الخبز من الأول خطوات إنتاجه فيضيع خلال سلاسل إمداد رغيف الخبز الكثير والكثير نقول تهريب نقول أى حاجة بقى التفكير المنطقى يقول إن أنا أتجه لدعم الرغيف من آخر خطواته بحيث يصل للمواطن المصرى ب 5 قروش كما هو الرغيف البلدى المدعم اللى وزنه 130 جرام فى بعض المحافظات اللى هى بتنتج العيش الأسمر أو فى المحافظات الحدودية اللى هى 120 جرام أيا كان ده أو ده الرغيف البلدى المدعم اللى ب5 قروش طيب ما هى سلاسل إمداد الرغيف قمح بيتزرع أو يستورد بتوفره هيئة السلع التموينية الحمد لله بطمئن الشعب المصرى كله إن احنا عندنا لغاية 6 شهور أدام و6 شهور مش قليل لو هى سلعة لا تفسد بالتخزين كنا عملنا أكثر من كده لكن مأنين نفسنا 6 شهور أدام علشان المواطن يطمئن القمح ، تخزينه ، طحنه ، تصنيعه من دقيق إلى خبز هذه المراحل المختلفة الوزارة بتمشى على التوازى فى المنظومة الجديدة فى كل خطوة من خطوات إنتاج الرغيف طن الدقيق كان بيستلمه صاحب المخبز فى المنظومة القديمة وحتى الآن بجميع محافظات مصر ماعدا بورسعيد وثلث كفر الشيخ والمنيا خلاص على وشك التنفيذ أهية طن الدقيق كان بيستلمه صاحب الفرن ب 160 جنيه طبعا فيه فرق كبير بين سعر الدقيق المدعم وسعره فى السوق الحر فالفكرة إن احنا هنحرر السعر هديه له بالسعر الحر عشان يبقى زيه زى السعر اللى فى السوق وهنعطى الراجل ده حقه هو كان مظلوم أيوة صاحب الفرن وصاحب المخبز كان مظلوم فى المنظومة اللى فاتت لإن وكان تكلفة انتاج الرغيف 55 جنيه تكلفة انتاج الجوان ال 100 كيلو 55 جنيه هو كان بياخد 40 جنيه يعنى كإنك فى النظام القديم بتقول له اعمل بقى اللى انت عايزه أنا النهاردة بقول له تعالى ادخل معايا فى المنظومة دية هتاخد 80 جنيه غير سعر الدقيق لإن ال40 جنيه دول هو كان بياخدهم تكلفته و 20 جنيه جوه ال60 جنيه مقصة كده بتحصل جوه سعر شوال الدقيق فأنا النهاردة بقول له احنا النهاردة هنعطيك حقك عشان تدى المواطن حقه فببساطة شديدة أنا بقول للمواطن ما تقلقش الأيام اللى فاتت دى كان فيه عشوائية فأنا هنظم لك رغيف الخبز من خلال سلسلة إمداد محترمة لن نسمح بعد كده إن القمح يخزن فى شون ترابية فى العراء إما فى صوامع وإما فى شون صربية لحين نستكمل مشروع الصوامع ونقول إن احنا طورنا المطاحن بتاعتنا كان معالى الوزير فى امبابة فى افتتاح مطعم جديد الدكتور باسم عودة والشهر اللى قبل اللى فات كان الوزير المهندس أبو زيد الوزير السابق بيفتتح مطحن فى طنطا ضمن منظومة متكاملة يعنى احنا لنا سياسة بنكملها إن شاء الله وزير وراء وزير يبقى احنا اتكلمنا عن القمح اتكلمنا عن الدقيق إلى أن نصل إلى رغيف الخبز طبعا جربنا الفكرة اللى احنا بنقول عليها دى فى بورسعيد
غادة منير : ودى دخلت حيز التنفيذ لإن احنا معانا على التليفون المهندس توفيق شلبى صاحب أحد المخابز فى بورسعيد بيقول لى أول واحد مضى فى إطار منظومة الخبز الجديد ، حضرتك كنت أول واحد مضيت فى مشروع الخبز الجديد فى بورسعيد مش كده
م.توفيق شلبى : أول واحد وافقت على المنظومة على مستوى الجمهمورية
غادة منير : ليه بقى كصاحب مخبز يعنى أنا عايزة أبعد عن تصريحات الحكومة التصريحات الرسمية وعايزة حضرتك تقول لى كده بشكل سلس وسريع
م.توفيق شلبى : تمام هى المنظومة الجديدة بالنسبة لصاحب المخبز المحترم .... تم إنهاء البرنامج حتى ذلك