حديث المدينة

مفيد فوزى: أهلا بحضراتكم هذه المساحة من حديث المدينة هى فى واقع الأمر محاولة للإقتراب أكثر من عقل الدكتورة نادية زخارى وزيرة الدولة للبحث العلمى بي قوسين 35 سنة مع البحث العلمى قبل كرسى الوزارة
فاصل
مفيد فوزى: دكتورة نادية عايز أعرف مفهومك لبعض المعانى المهمة فى الحياة منها مثلا لما نقول الفن أنا والعلم نحن بتفهميها إزاى ؟
د. نادية زخارى: الفن لو أنا رسمت لوحة أبقى أنا المبدعة أنا الفنانة وأنا المسئولة عنها لو أنا عملت أى حاجة فنية حتى لو أنا فى وسط تيم فى تمثيلية أبقى أنا بردوا هيبان إذا كنت أنا ممثلة كويسة أو مش ممثلة كويسة لكن لما أنا بعمل بحث علشان البحث يطلع كويس لازم يكون فيه تيم وورك لأن مفيش عالم ملم بكل مناطق العلم أنا ليا تخصص فلان ليه تخصص نكمل بعضينا فالعلم نحن لأن كتيم وورك لازم نتكلم أو نتعامل فى تيم وورك ككل واحد لى جزئية بتكمل التانى ومنها بنقدر نطلع بحاجة علمية
مفيد فوزى: لما أقول إن التفكير العلمى يزيل الغشاوة عن العقول
د. نادية زخارى: أه دا طبعا مش عايزة كلام ودا اللى بنحاول كوزارة دلوقتى إن إحنا نوصل العلم لكل بنى أدم فى الشارع لكل طفل إزاى يفهم يعنى إيه بحث علمى للأسف الناس مش فاهمة يعنى إيه بحث علمى ؟ أو معظم الناس مش هقول الناس كلها الناس فاهمة إن البحث العلمى عبارة عن أبحاث أنا بعملها علشان وظيفنى كده علشان أنا بترقى وبعد كده بتتحط فى الدرج الحقيقة الأبحاث إتعملت فى جميع المجالات أبحاث عظيمة جدا بس فعلا هى لم تطبق معظمها لم تطبق لكن أنا طبقت البحث اللى إتعمل فى مجال إجتماعى على أطفال الشوارع على المدمنين على المسنين البحث اللى بيتعمل فى مجال طبى الإكتشاف المبكر للأورام أو الأدوية اللى بنعالج بها الورم فى الصناعة بدل ما كل حاجة بنستوردها إلى حد ما لو أنا إبتديت مع الطفل الصغير هيزيل مش هيبان تأثيرها بعد شهر أو شهرين لكن على مدى السنوات هنبتدى نفهم قيمة العلم فى الحياة
مفيد فوزى: قضية معنوية يعنى ليست مصنع بين يوم وليلة يتعمل
د. نادية زخارى: مش ممكن دا أنا بغير تفكير ودا أصعب حاجة فى الدنيا
مفيد فوزى: التنمية بدون علم
د. نادية زخارى: أى إختراع أى نهضة من أيام الفراعنة وفيه علم مفيش علم مفيش نهضة مفيش إختراع مفيش تقدم فبالطبيعى كل تنمية لازم يكون قدمها علم
مفيد فوزى: لو قلتلك حروب المستقبل مختلفة تماما
د. نادية زخارى: يعنى ممكن حاجات بنقول خيال علمى إن إحنا نتحارب بالجينات نعرف جينات شعب معين ونقدر نحاربه بيها بميكروبات معينة ودا كان حاصل
مفيد فوزى: أيام العراق الحرب الكيماوية
د. نادية زخارى: الحرب الكيماوية والحرب البكتيرية كل دى ممكن إنها تكون حروب المستقبل
مفيد فوزى: هل فى مصر قاعدة بيانات علمية أنا متذكر لما قابلت دكتور أحمد ذويل بعد ساعات من حصوله على نوبل وكان دا فى السويد أول عبارة نطق بيها قال إنوا لابد من قاعدة بيانات علميا وأنا بسألك يعنى من غير ما أقول كلام مرسل هل فى مصر قاعدة بيانات علمية ؟
د. نادية زخارى: علشان نتحط على أرض الواقع فيه بيانات علمية منتطورة موجودة ورا كل منظمة اللى عامل واللى مش عامل
مفيد فوزى: عجبانى قوى كلمة متنطورة لأنها كلمة مصرية أصيلة زى ما بتقولى إيه ؟ الهدوم فى الأوضة متنطورة يعنى حتة هنا وحاجة هنا مش ثابتة رأيك إن البيانات فى حياتنا متنطورة لكن مفيش بمعنى أدق مرجعية
د. نادية زخارى: القاعدة دى بعملها دلوقتى الوزارة بتعملها لوقتى إن إحنا بنلم كل الهيئات والجامعات والمراكز البحثية إبعتولنا الأبحاث بتاعتكم تشمل إسم الباحث إزاى نتصل بيه ؟
مفيد فوزى: هى دى قاعدة البيانات ؟
د. نادية زخارى: قاعدة البيانات إن أنا أبقى عارفة الأبحاث المختلفة فيوم ما أجى أحب أطلع أبحاث مثلا النسيج الاقى عندى إسم الباحث والبحث إنما الخارطة دى حاجة تانى
مفيد فوزى: كأن قاعدة البيانات هى مرجعية العلم
د. نادية زخارى: الحاجة اللى إتعملت بالفعل وممكن أستفيد بيها فى تطوير شيئا ما
مفيد فوزى: هل إحنا بنتعامل بلغة الإحصاء بشكل مرضى ؟
د. نادية زخارى:لأ
مفيد فوزى: لأ تفتكرى ليه ؟ هل بردوا الإحصاءات متنطورة ؟
د. نادية زخارى: يعنى هدى لحضرتك مثل يعنى فيه إحصائية لمرضى الأورام
مفيد فوزى: دا تخصصك ؟
د. نادية زخارى: أه مش تخصصى إحصائيات مرضى الأورام لكن يعنى الأورام تخصصى اللى بيحصل إن بيجى فى معهد الأورام نعرف نسبة أورام الثدى كام أورام المثانة كام أنا أخدتها فى مرضى معهد الأورام أو فى مرضى الغربية لكن على مستوى مصر دا اللى مطلوب إن أنا أعرف على مستوى السكان
مفيد فوزى: طب أنا لو قلتلك قد إيه عفوا يموتون بهذا المرض فى مصر كم فى المية ؟
د. نادية زخارى: كم فى المية من المصريين لأ مفيش إحصائية بى كده بالظبط مفيش لكن عايز أقولك إن فيه زيادة والزيادة دى بترجع لكذا سبب زيادة حقيقية فى مرض السرطان بسبب تلوث بيئى بسبب أى سببا ما زيادة فى سن عمر الإنسان ومتوسط عمر الإنسان ومرض السرطان بيكتر كل ما بيكبر سنى فالبتالى النسبة بتاعته كبرت زيادة التشخيص أو كفاءة التشخيص خلتنا نعرف اللى بيجيله السرطان أو اللى بيشفى من السرطان لكن كان زمان ممكن الناس تموت وهى مش عارفة ماتت من إيه ؟ وأهليها مش عارفين ماتت ليه ؟
مفيد فوزى: هو إكتشف قريب
د. نادية زخارى: لأ هو مش إكتشف قريب إكتشف من فترة بس وسيلة إكتشافه طبيا بقت أسهل من زمان
مفيد فوزى: هل هناك فيه أمل فى إكتشاف علاج للسرطان ؟
د. نادية زخارى: فيه علاج كتير للأورام علاج الذهب لو أنا أخدت واحد سنتيمتر من أى حاجة وقسمته على واحد على تسع تصفار دا يبقى النانو بارتك اللى أنا أصغر الحجم بتاعه جدا جدا عملية التصغير دى بتخلى دخوله للخلية أسهل من إنوا يكون جزء كبير
مفيد فوزى: طب ليه الدهب ؟
د. نادية زخارى: هو إستخدم الدهب كعلاج للأورام
مفيد فوزى: الدهب اللى إحنا بنعرفه ده ؟
د. نادية زخارى: مش زى اللى إحنا بنعرفه اللى بنلبسه ده البورد عمل مركب منه بيصغر الجزئيات بتاعته جدا جدا بحيث إن الجزيئى الواحد يساوى واحد على تسع أصفار من الحجم بتاعه العملية دى بتخش جوا الخلية أسهل مما تكون الجزئيات كاملة وبالتالى يقدر يموت الخلية السرطانية دى أبحاث لسه
مفيد فوزى: قيد البحث
د. نادية زخارى: قيد البحث وهو لسه فى التجربة فيه أدوية كتيرة جدا ظهرت فى السوق إسمها الدواء الموجه موجه بمعنى إيه ؟ الخلية السرطانية فى جينات بتفرق عن الخلية الطبيعية مشكلة العلاج الكيميائى إنوا ما بيفرق ما بين الخلية دى والخلية دى
مفيد فوزى: بياخد كله
د. نادية زخارى: بياخد كله لكن لو أنا عرف إن الخلية السرطانية فيها الصفة المعينة بأمر التوجه للخلية السرطاني بحيث إن العلاج يدمر الخلية االسرطانية أكتر من الخلية الطبيعية
مفيد فوزى: متوقعة كام سنة يا دكتورة نادية إنوا يصلوا لتدمير الخلية السرطانية فقط دون أت تجور على باقى الخلايا ؟ متوقعة كام سنة ؟
د. نادية زخارى: لأ منقدر نتوقع كام سنة بص حضرتك وإحنا بنتكلم كل يوم فيه بحث جديد
مفيد فوزى: هو حضرتك التخصص بتاعك إيه بالظبط ؟ يمكن الناس متعرفش
د. نادية زخارى: كيميا طبية حيوية وبيولوجيا الأورام يعنى الكيميا الحيوية فى خدمة الأورام السرطانية بمعنى إن بدرس دلالات أورام الإكنشاف بدرى
مفيد فوزى: كل دا خلال البحث لكن إنت مش معالجة ؟
د. نادية زخارى: لأ أنا مش معالجة إنما دا بيعطى للطبيب وبيعطى للمعامل لأن أنا لو إكتشفت المرض بدرى بتبقى نسبة الشفا 90% يعنى الوقاية خير من العلاج زى ما الناس بتقول يعنى الهدف إن أنا أكتشفه بدرى بدلالات أورام دا معناه الكيميا الحيوية الهدف التانى تغييرات جينية لما بعرف إن فيه تغيير معين دا بيساعد على إستنباط علاج معين موجه اللى كنت بقول لحضرتك عليه ممكن بعض المركبات بندرسها إنها هل دى لها أثر على تدمير الخلايا السرطانية ولا لأ وبتابع العلاج بردوا بدلالات الأورام والتغييرات فى الجينات
مفيد فوزى: شفتى فى الحوار يا دكتورة نادية لما سألتك عن تخصصك إنطلقتى زى الحصان اللى بيرمح إنما فى موضوعات تانية بتقعدى تفكرى كتير طب عايز اسألك هل العالم فى مصر الباحث بمعنى أدق يتمتع بالتقدير المادى والأدبى ؟
د. نادية زخارى: إحساسى بيتمتع بالأدبى جامد المادى معقول لا كويس قوى ولا وحش قوى
مفيد فوزى: دكتورة نادية أنا مدرك إنك لم تعرفى الشاشات من قبل صح ؟ وطول عمرك فى البحث وقدام الشغل بتاعك وأتذكر فى سنوات ما إن أنا مرة حاولت إم أنا أجرك للكلام بكاميرا حديث المدينة فاكرة ؟
د. نادية زخارى: فاكرة
مفيد فوزى: وكان فى حتة كده فى شارع فى المهندسين وأصريتى على عدم الكلام وإحتركت رغبتك ومن هنا فأنت بكر على الشاشة ومن هنا أيضا بتوقع البكارة الجميلة فى الصدق الكامل إنت رأيك إن العامل فى مصر يتمتع بإحترام ولكن تنقصه المادة لأنك قلتى إيه يعنى معقولة إنما هى مش معقولة قوى بعنى
د. نادية زخارى: لمظهره ولوضعه الإجتماعى محتاج زيادة
مفيد فوزى: لو قلتلك إن مصر غنية بالعقول مش عايزة جدال ولكن هل تعتقدى إن مصر تقدر يبقى فيها شباب الباحثين واخدين مكانهم فى مصر
د. نادية زخارى: هو زى ما حضرتك بتقول غنية بالعقول وغنية بالإختراعات وبالأبحاث المشكلة نرجع لتعليق حضرتك إن العالم ما بيعرفش يعبر عن نفسه قوى محتاج إن حد يعمله دراسة جدوى
مفيد فوزى: بس عفوا الدكتور أحمد ذويل بارع
د. نادية زخارى: ما هى موهبة
مفيد فوزى: ويعبر ويصوته بيعلى فى حتت وصوته بيوطى فى حتت يعنى إيقاع
د. نادية زخارى: هو ليه كاريزما خاصة
فاصل
مفيد فوزى: الإختراعات يا دكتورة نادية هل ليها مكان فى البحث العلمى ؟ أنا مش عايز كلام مرسل أنا عايز كلام حقيقى لأونا أ،ا جيت هذا المكان من قبل وشفكثيرا من الناس قابلونى وقالولى إنهم إدوا إختراعات وخدوا براءىت الإدارة بالبحث العلمى وإكتشفت إن الإدارة وخدوا براءة الإختراع بأمانة تام هل مفيش فلوس للإنفاق عليه ؟
د. نادية زخارى: هو فيه إختراع وفيه إبتكار الإبتكار دا إن أنا إتنقل من الإختراع النموزج اللى ينفذ على الطبيعة بصورة مصغرة ثم أوصله للجهة المستفيدة إحنا كنا بنقف على الإختراع الوزارة اللى بتحاول تعمله دلوقتى إن إحنا نتعاون مع صناديق خاصة رجال أعمال الصندوق الإجتماعى صندوق مصر الخير يعنى فيه صناديق كتير بنتفق معاهم لتحويل الإختراع إلى أولا نعمله دراسة جدوى ودى الباحث ما بيعرفش يعملها التسويق إن إحنا نعمل علاقة ما بين الجهة المستفيدة والمبتكرين دول ما هو المفيد ماهو مش كل إختراع مفيد بردوا لازم نعرف إن نسبة قليلة من الإختراعات دى هى اللى يمكن نطبقها الحاجة التانية إن فيه كمان أبحاث إتعملت مش لازم خدت براءة إختراع لكن إحنا شايفين إنها مهمة لبعض المشاريع اللى دلوقتى فيه إهتمام بيها
مفيد فوزى: هل معامل البحث العلمى فى مصر بحالة جيدة ؟ الإجابة لابد أن تكون بأمانة
د. نادية زخارى: لو إتكلمت عن معهد الأورام أنا فخورة بى جدا
مفيد فوزى: غير معهد الأورام
د. نادية زخارى: كان فعلا فيه ميزانيات حلوة للتجهيز
مفيد فوزى: أصل أنا أتذكر أن فيه بعض الداكاترا فى كلية علوم مش عايز أقول كلية إيه ؟ قالى نحن ننفق على شراء المواد الللازمة للمعامل ما مدى صحة هذا الكلام ؟
د. نادية زخارى: لأ صح فيه أماكن الأجهزة فيها غير متواجدة أو الأجهزة بايظة الاباحثين فى بعض الأحيان بيصرفوا من جيبهم على أبحاثهم وكأنوا هو علشان شاطر بدل ما نكافؤ لأ بندفعه تمن البحث اللى هو بيعمله فدى طبعا مشكلة بنحاول نحلها بطرق تانية فيه بعض الصناديق الخاصة بالبحث العلمى بتدعم مشاريع المشروع بيبقى فى حدود المليون جنيه المليون جنيه دى بيشترى بيها أجهزة أو كيماويات تصرف على البحث وبيبقى فيه كمان عائد مادى مرتبات لناس اللى بتشتغل اللى بياخد المشروع ده اللى بنقول عليه أى بى أو الباحث الرئيسى اللى بيشتغلوا تحته بيبقوال طلبة الرسايل فدى حل كويس جدا لحتة ضعف الميزانيات اللى فى الجامعات أو فى مراكز الإبحاث فيه كمان التعاون الدولى مشاريع من التعاون الدولى بردوا بدعم الأبحاث بياخدها بردوا الأى بى اللى هو البياحث الأساسى واللى بيشتغلوا معاه
مفيد فوزى: طب إنتى معندكيش مشكلة فى البحث العلمى دايما يتقال إن البحث العلمى فى مصر يحتاج إلى تمويل وميزانيته صغيرة وإن ميزانيته لاتتناسب إطلاقا مع حجم مصر وإن إسرائيل لديها ميزانية خرافية مهولة للبحوث العلمية
د. نادية زخارى: هو طبعا لو قارنا الميزانية اللى هى من الدخل القومى هنقول كده لكن فيه مصادر تانية بس المصادر التانية بتحتاج إن الباحث يكون نشيط شوية
مفيد فوزى: حد قرالك الكف فى يوم من الأيام أو حد شافلك الفنجان طبعا إنت مش مؤمنة بهذا الكلام بإعتبارك باحثة علمية أو حد قالك نبؤ إنه فى يوم من الأيام سيتغير وتصبحين وزيرة يا ولدى وتحملين فوق رأسك أعباء كثيرة يا ولدى
د. نادية زخارى:لأ محصلش
مفيد فوزى: إذنا دى كانت مفاجأة بالنسبالك
د. نادية زخارى: هو كان فيه من كام سنة حسيت إن فيه كام سؤال حواليا طب يا جماعة فى إيه محدش رضى يقولى لكن المره دى
مفيد فوزى: من كام سنة كان هذا السؤال ؟
د. نادية زخارى: من حوالى 4 سنين المره دى كان مفاجأة تامة يعنى
مفيد فوزى: مين اللى كلمك ؟
د. نادية زخارى: مكتب معالى كمال بيه الجنزورى وقالولى إحنا عايزينك دلوقتى حتى يومها كنت راجعة كان عندى محاضرات كتير وكان صوتى ضايع ويمكن بان فى القسم كل الناس كانت فاكرة إن أنا مرعوبة لكن أنا كان صوتى ضايع خالص من كتر الكلام فلما رحت لمعاليه سألنى تقبلى تكونى معانا فى الوزارة ودا طبعا سؤال متواضع من حضرته يعنى قالى مدام إنتى عندك القابلية للعطاء فهتعرفى إنتى هتعملى إيه
مفيد فوزى: سؤال خارج هذا النطاق وإذا كنت مش عايزة تجاوبى عليه متجاوبيش عليه الجسم البشرى ده إيه جوا ؟
د. نادية زخارى: فيه مصانع الخلية اللى ‘حنا ما بنشفهاش بعينينا دى بتقوم بكل وظايف الدنيا فى عدد من ألافات الجينات كل جين بيدينا صفة معينة الجين دا مليان بالأحماض النووية هقولك ‘يه لو إتفتح دا كله يلف الكرة الأرضية تخيل جسمنا لو أخدنا كل الأحماض النووية وفردناها يلف نص الكرة الأرضية كل دا محطوط جوا خلايانا لما الواحد يفكر فيه إعجاز فظيع يعنى مش ببساطة كده تقدر تقول الخلية الل إحنا ما بنشفهاش بتقوم بكل الواجبات لو شفت الجين لو شفت البروتين اللى بيتكون العمليات الحيوية اللى بتقوم بيها شيىء قليل
مفيد فوزى: فعلا وما إتيتم من العلم إلا قليلا
د. نادية زخارى: بالظبط كده
مفيد فوزى: صحيح كما يقول القرأن
مفيد فوزى: أنا عايز أعرف تشخيصك لأمراض مراكز البحوث إيه أفات وأمراض مراكز البحوث ؟ يعنى عفوا هل هما السيستم عفوا هل هما البشر عفوا هل هى مسألة الترقى والدرجات ؟ إيه الأفات فى مراكز البحوث ؟
د. نادية زخارى: نرجع للأفات تانى الناس اللى بتقول ميزانية فدا بيبقى جزءا ما مش كله بيبقى كسل من الباحث إنوا مش قادر يقدم مشروع يكون مقبول
مفيد فوزى: يعنى أقدر أقول إن أحد أفات مراكز البحوث هى
د. نادية زخارى: إن الباحث مش بيقدم مشروع ينجح ويرقى إلى درجة التمويل
مفيد فوزى: إذنا المشكلة هنا البشر ؟
د. نادية زخارى: دى حاجة نمرة إتنن الحتة المادية بردوا يعنى يمكن الجامعة وافقت على حافز الجودة قبل المراكز البحثية لكن إحنا خلاص حلينا الحتة دى إن كمان المراكز البحثية إبتدت تاخد بدل الجودة الحاجة التالته إن فيه بعض الأبحاث بتبقى مكررة أنا فى المعمل دا عملت بحث والتانى بحث والتالت بحث
مفيد فوزى: مين اللى بينسق يا دكتورة نادية ؟
د. نادية زخارى:ولهذا أنا بطلب من كل وكيل معهد أو كلية أو مكز للدراات العليا لما يكون عنده على الكمبيوتر بتاعه الأبحاث اللى إتعملت
مفيد فوزى: أهوا دا بقى أهمية قاعدة البيانات
د. نادية زخارى: بالظبط ومش بس هما اللى عندهم دا أنا عايزة يتجمع عندنا إحنا هنا البيانات دى علشان لما أجى أعمل بحث أفتح وأشوف يا ترى البحث دا إتعمل قبل كده ؟
مفيد فوزى: ومفيش داعى لتكراره
د. نادية زخارى: الأفة الأخيرة نعتبرها الأخيرة الأجهزة اللى بتتجاب أنا حب الملكية إن أنا يبقى عندى الجهاز ده وإن هو معمل مثلا لا يبعد عنى 10 متر أو حتى فى الدور اللى فوقيه طب لزومه إن أنا أجيبه وأستخده بكفاءة 20% فقط وإيه لزوم إن أنا أجيبه والجامعة اللى جنبى ممكن يكون عندها هذا الجهاز ونتعاون لأن دا هيوفر كتير جدا لأن الأجهزة دى بتبقى بملايين
مفيد فوزى: يعنى إنتى قلتى عبارة غريبة قوى قلتى حب التملك
د. نادية زخارى: إلى حد ما كل واحد عايز يبقى عنده هو
مفيد فوزى: تفتكرى ليه قل عدد الطلا الثانوية العامة على كلية الزراعة يعنى فى حديث المدينة قدم مرة عدم الإقبال على كلية الزراعة وإحنا بيتهيألى إن مص بلد زراعية ولا إتغيرت
د. نادية زخارى: هو إتغير إلى حد ما لأن الرقعة الزراعية قلت
مفيد فوزى: تفتكرى ليه ؟
د. نادية زخارى: ليه ما بيتجهوش إلى الزراعة ؟ رغم بر
وا أنا عايزة أقول إن الزراعة دى كلية هايلة اللى عايز يعمل مشروع فيها أقسام كتير للمشاريع
مفيد فوزى: ليه قل الإقبال ؟
د. نادية زخارى: لأن هما ما بيلاقوش مجال للعمل عموما لكن هى حلوة قوى للعايز يعمل مشروع خاص بيه
مفيد فوزى: الصناعة والبحث العلمى أعتقد إن فيه تؤامة بينهم يعنى دا شيىء مهم هل تعتقدى بينك وبين الصناعة تعاون بحيث إنوا تتحول البحوث إلى إشياء صناعية مهمة ؟
د. نادية زخارى: بص حضرتك السؤال دا بتسألوا كتير جدا دا دور العالم ولا دور الصناعة مفيش الإتصال اللى بينهم أنا أعتقد إنوا بدايتا دور العالم إن أنا لما أجى أحط أنا مثلا فى كلية الهندسة أجى أحط رسالة للماجستير أو الدكتوراه اللى عندى لازم أنزله يلف على مصنع معين أو مجموع من الصناعات ويفهم إيه المشكلة ؟ يرججعلى بمشكلة معينة أحطله فيها الخطة بتاعته للبحث فى الحالة دى لما هو يكون فيه إتصال بين المصنع وبين البحث العلمى دا بردوا من الحاجات اللى بنعملها على الوايب سايد هيبتدى المصنع يفهم قيمة البحث العلمى لكن ما أقدرش أقول للمصنع أفهم قيمة البحث العلمى وأنا مش بقدمله حاجة
مفيد فوزى: إيه أول قرار إتخذتيه وإنتى على مكتبك كوزيرة ؟
د. نادية زخارى: أول ق+رار كان تعيين أوائل الخريجيين لكن أول قرار للبحث العملى كان إن إحنا نعمل واب سايد يجمع جميع الأبحاث والوب سايد يقدر يخش عليه جميع رجال الأعمال والجهات المستفيدة الأتنين يقدروا يخشوا على بعض هنعمل زى معرض كبير فى مكان كبير يدعى إليه رجال الأعمال أو الجهات المستفيدة المصانع اللى بيشتغلوا فى المشاكل الإجتماعية مع الباحثين يكون فيه لينك بينهم وإتصال بينهم بحيث يبقى الأبحاث الكويسة تطبق على أرض الواقع وتنهض بالمجتمع والبلد
مفيد فوزى: أنا ليه سألتك السؤال ده لأن بيقال إن الوزير دلوقتى عملية إنوا يمسك قلمم ويقرر شيىء ويضعه قيد التنفيذ وربما لا يأخذ بعض الوزراء قرارات فى هذه الفترة ضمن تصوره إن الفترة دى فترة قصيرة فى حياته المهنية وبعدها ستتغير الأمور إنتى طبعا مدركة هذا الكلام إنتى إنطباعك الشخصى إيه ؟
د. نادية زخارى: أنا أول ما حلفت اليمين جت على هنا على طول تانى يوم كان فيه إجتماع قلتلهم أنا عايز أقعد معاكم وكل واحد يقولى الخريطة بتاعته اللى أنا بطلبه منكم سواء قعدت شهر قعدت تلاتة قعدت أى مدة أنا يهمنى إن أعمل حاجة مفيدة حكاية تسيير الأعمال دى مش بالى ما هو تسيير الأعمال معناها إن أعمل حاجة بردوا مش معناها إن أنا أقعد كده لحد ما مدتى تخلص لأ المفروض أعمل حاجة سواء أنا حصدت الثمرة بتاعتها أو لأ ميهمنيش لكن يهمنى إن أنا أحطها
مفيد فوزى: لما بتقولى أنا عايزة أسيب بصمة كوزيرة دولة للبحث العلمى إيه فى تقدير الشخصى ما هو مش هتقدرى تعملى كل حاجة إيه البصمة اللى ممكن تسيبها عفوا قبل الرحيل من هذا المنصب ؟
د. نادية زخارى: البصة اللى أنا عايزة أسيبها إن المجتمع من أول الطفل لغاية إستاذ الجامعة لحد العالم يعرف يعنى إيه بحث علمى ؟ وأنا عارفة إن البصمة دى ممكن أنا محصدهاش لأنها هتاخد وقت طويل جدا على ما أغير مفهوم الناس للبحث العلمى البصمة التانية إن أنا عايزة الأبحاث العلمية
مفيد فوزى: أنا بذكر بالخير بمناسبة هذا الكلام إنوا لم يكن فى حياتنا أحد يعرف معنى كلمة البيئة أذكر بالخير صاحبة هذا الرأى وهى نادية مكرم عبيد وأتصور إن نادية مكرم عبيد إستطاعت أن تطرح كلمة البيئة فى الشارع المصرى ثم توالى الوزراء فحضرتك عايزة كلمة البحث العلمى فى الفترة الصغيرة دى تبقى متاحة أمام الناس
د. نادية زخارى: معلش فى حاجة أنا سعدت بيها جدا فضيلة شيخ الأزهر لما حط الحريات دايما إحنا لما بنتكلم على حرية العقيدة وحرية الرأى وحرية حرية ولأول مرة قال حرية البحث العلمى دى أسعدتنا جميعا لأن عمر ما حد إتكلم على حرية البحث العلمى
مفيد فوزى: كنت لسه هسألك يعنى إذا كان دا يخطر على بال فضيلة شيخ الأزهر الشيخ أحمد الطيب وهو تفكير شديد التقدم قوليلى هل البحث العلمى له حرية ؟
د. نادية زخارى:ممكن بعض الناس تقول لأ لما ننبحث فى الجزئية دى حرام لما نشوف الجينات نقل الأعضاء جايز
مفيد فوزى: هل تخشى السلفيين المتشددين فى هذا المجال؟
د. نادية زخارى: قد يكون ليهم أفكار أعتقد طول ما فيه مجتمع متنور يقف ضد الأفكار
مفيد فوزى: أنا مش بسألك فى السياسة أنا بسألك فى جوهر البحث العلمى إنتى معتزة إنوا جاءت وثيقة الأزهر المتحضرة حضرتك دخلتى مبحرة فى الدى إن إيه إلى أقصى الدرجات لو دخلتى مبحرة فيما يسمى الإستنساخ وهو مرفوض حتى عالميا وممكن جدا يقول لا حسبى إستوب دا حرام
د. نادية زخارى: هل تعتقد إنهم هيقولوا لأ دا حرام هتكون نسبتهم إيه من اللى هيقول دا مفيد للبشرية أنا أعتقد إن اللى هيقول مفيد للبشرية هيكون أكتر ودايما رأى الأغلبية والرأى المتنور هو اللى بينتصر فى النهاية
مفيد فوزى: دكتور نادية كنت عايز أقولك إحنا فى حديث المدينة قابلنا مرة أثناء سرقة العربيات وهى ظاهرة لم تحدث فى تاريخ مصر من الأبد قابلنا شاب قالى إن هو عمل جهاز بالتليفون عن طريق الموبايل يقدر من خلاله إن يحول العربية إلى كتلة صماء لا تتحرك وغير قابلة للسرقة ولا ينفع فيها مفتاح ولا تهشيم ولا لأى حاجة ويمكن حضرتك وأنتى بتتفرجى على البرنامج هتشوفى المخرج أحمد معوض واخد جزء من كلام الراجل علشان خاطر تعرفى إلى أى مدى يمكن أنا حريص إن أنا أقولك الراجل ده مش يمكن لو يلقى مجال للتعامل مع البحث العلمى مش كان ممكن البحث العلمى كان يستفيد بيزنس لأن أنا بعد ما خلصت البرنامج قلتله هو أنت بتبيعه بكام ؟ قالى لحضرتك تحت أمرك قولتله لأ مالكش دعوة بحضرتى إنت بتبيعه بكام قالى تقريبا ب200 ، 2500 جهاز يحمى السيارة من المشى
د. نادية زخارى: يعنى هو أنتجه كمان
مفيد فوزى: آمال طلع منه فأنا أتصور إن دا مش بالضرورة أن لمثل هذه الأحداث إنما فى العموم مش كل البيوت يا دكتورة نادية عندهم جراجات رغم إنتى عارفة إن الجراج جزء أساسى حين البناء لكن محد إهتم بهذه الأشياء وتحولت الشوارع تقريبا إلى شبه جراجات وأصبح من السهولة فى عز النهار تتسرق عربية فأنا أتصور هذا معرفش ليه إزاى تدوا مجال للباحث المخترع أن يتعاون معاهم ؟
د. نادية زخارى: إحنا عندنا قسم بتاع براءة الإختراع دا بيجى الباحث بيقدم للأسف الباحثين هو الموضوع بياخد وقت مش مننا هو الأول لازم التأكد إن الإختراع ده مش مسروق إنوا يكمن تطبيققه إنوا فيه إبتكار بيلف تقريبا على 40 دولة أو 30 دولة دا هو ده النظام العالمى مش النظام عندنا إحنا دا النظام العالمى علشان ياخد براءة الإختراع
مفيد فوزى: طب ما الراجل مش محتاج براة الإختراع اللى بحكيلك عليه ده بالمبايل وإشتغل يعنى أعتقد يسموه إيه على الموبايل نظام يعنى النظام داخل الموبايل قدر بذهنه ويستفيد بيه لدرجة إن فاكر وأنا بكلمه قالى أنا دلوقتى هكلم العربية أنا دلوقتى هقول للعربية ما تتحركيش
د. نادية زخارى: دا هو واخد كل الخطوات دا هو وصل لهدفه فدا هايل
مفيد فوزى: دكتورة نادية زخارى وزيرة البحث العلمى أرجو ترتيب هذه المهن حسب رؤيتك ممكن وعايز أعرف ترتيبها من زواية نظرة المجتمع لها ماديا وأدبيا تقوليلى مين نمرة واحد ونمرة إتنين وهكذا العالم الباحث الفنان التشكيلى لاعب كرة القدم ممثل السينما الطبيب النفسى الكاتب الروائى نمرة واحد مين ؟
د. نادية زخارى: العالم الباحث طبعا
مفيد فوزى: نمرة واحد العالم الباحث فى مصر ؟
د. نادية زخارى: لأ من منظورى أنا ولا من منظور المجتمع ؟
مفيد فوزى: من منظور المجتمع
د. نادية زخارى: لاعب الكورة من منظور المجتمع
مفيد فوزى: نمرة واحد لاعب الكورة عظيم إتنين
د. نادية زخارى: ممثل السينما
مفيد فوزى: إتنين ممثل السينما تلاتة
د. نادية زخارى: الكاتب الروائى
مفيد فوزى: الكاتب الروائى أربعة
د. نادية زخارى: الفنان التشكيلى
مفيد فوزى: الفنان التشكيلى
د. نادية زخارى: العالم الباحث