حديث المدينة

الاربعاء 7/9/2011
مفيد فوزى : حينما ذهب القضاه فى المانيا يطالبون بمساواتهم بالأجور بالمعلمين وقفت لهم ميركل مستشارة المانيا المرأة القوية فى فى أوروبا وقالت لهم بالحرف الواحد اتريدون التساوى بمن علموكم ؟ حين ذهب أحد وزراء التعليم فى مصر يوما ما إلى اليابان اراد أن يسأل ببساطة عن سر التعليم فى اليابان ؟ فقال المسئول اليابانى فى تواضع أعطينا المعلم مرتب وزير وحصانة دبلوماسى ماذا يعنى هذا ؟ يعنى أن المعلم فى العالم الأول المتقدم والمتحضر هو أساس النهضة وعماد التنوير والأهم فى منظومة التنوير هنا فى مصر تتدنى نظرتنا الرسمية للمعلم أنا أشعر بالخجل وأنا أقولها علنا لكنها حقيقة العملم مرتبه هزيل كيانه مهزوز تدريبه معدوم ماذا كان من الممكن أن يحدث إلا أن يكون هكذا التعليم فى مصر لكى يعتدى التلميذ على مدرس أو يصحب عائلته فى طابور الصباح لتأديب المعلم هذه نوبة صحيان للمعلم المصرى قبل أن يأتى عاما دراسى جديد بلا تعليم النحقيق صوت وصورة ومعكم مفيد فوزى فى حديث المدينة .
فاصل
مفيد فوزى : كتب الكاتب التربوى كمال مغيث مقالا فى المصرى اليوم بعنوان عام دراسى جديد بلا معلمين العنوان صادم ومن بين ما قاله الدكتور كمال كتب يقول أنه ذات يوم إستأجر أحد الأشخاص لعله لأحد الأباء إستأجر مجموعة من البلطجية ودخلوا المدرسة عنوتا أثناء طابور الصباح وكان ذلك لتأديب أحد المعلمين أمام تلاميذه وزملائه عقابا له على تأنيب أبن موظف كبير كتب أيضا أن الوزير الأستاذ الدكتور ذكى بدر كان يلجأ إلى ما يسمى بالشو الإعلامى إلى درجة أنوا كان ممكن يعاقب المدرسين بأنوا يمدهم زى ما بيقول كتب يقول أيضا أن المشكلة أن هناك أحيانا حالات خطيرى تحدث ومع ذلك تحفظ بأسم ما يسمى بلملمة الموضوعات ولذلك هو بيقول كأنك يا أبو زيد ما غزيت ماذا قصدت دكتور كمال من هذا المقال الصادم ؟
كمال غيث : قصدت أن الفت النظر إلى المحور الأساسى فى مشكلة التعليم فى مصر وهو المعلم يعنى نحن نعرف علوم التربية أنوا ممكن تعمل أحسن تكنولوجيا وأحسن مبنى وأحسن مناهج وأحسن وأحسن إمتحانات ولكن المعلم اليائس المحبط الكاره الذى لا يرضى عن نفسه وعن مهنته ممكن يبوظ كل ده وممكن المعلم أللى معندهوش مبنى ولا عنده منهج لكنه راضى وسعيد وكفأ يقدر يعمل من ورق الجرايد اللى سيادتك قريت منه ده علوم وموضوعات وتعليم وهكذا فأنا حبيت أحط المدرس فى قلب الصورة واللى أنا شايف أنوا محور الفساد اللى ألم بالعملية التعليمية منذ حوالى 40 عام
مفيد فوزى : الإعتداء على مدرس عنوه فى طابور الصباح كيف يمكن أن نتقى ونتجنب مثل هذه الحوادث الأن ؟ أم هى فى زمن البلطجة ستصبح منهجا
كمال غيث : هى منهج فى زمن البلطجة وإذا كان هم المدرسين شافوا الدكتور ذكى بدر الوزير اللى المفروض يدخل يحافظ عليهم بيدخل يشتم ويضرب وبيقول فى التليفون تعال شوف الوساخة اللى هنا لمدير المدير المديرية وقال كده وكان شيىء الحقيقة مبتذل إلى حد كبير فكان دا منطقى أنوا دا كان واحد من المتنفذين موظف كبير أبنه راحله أللى عنده 10 سنين المدرس قاله أقف أرفع أيديك فوق راسك زى ما أى مدرس ممكن يعاقب تليميذ فى السن دا فجاب ميكروباص فيه 15 بلطجى ودخلوا علشان يضربوا الراجل والوزير يسرى الجمل لم ينبث ببنت شفاه ومقالش حاجة خالص ومقدمش إحتجاج ومقالش أنا هروح أزور المدرسة أرفع معنوياتها بعد هذا الحادث البشع والفظيع ومفيش أى حاجة فضلا عن الشيىء اللى كان الأخطر بقى النقابة ليس لدينا نقابة معلمين الحقيقة نقابة المعلمين أصبحت بؤرة للفساد أنت تعرف يا أستاذ مفيد كإعلامى كبير أن 7000 صحفى أقاموا الدنيا ولم يقعدوها أيام إنتخابات ضياء رشوان ومكرم محمد والدنيا وقفن على رجلها والحكومة بتعمل أيه ؟ أحنا عندنا النقابة فيها أكثر من مليون شهر مليون مدرس ما إتكلمتش أنت عمرك سمعت رأيها فى أى مشكلة بتتناول قضايا تتعلق بالعلمين ؟ عمرنا سمعنا رأيها فى مشكلة الكادر ؟ رأيها فى الترقيات رأيها فى إيراد المعلمين نقابة المعلمين بالذات يا أستاذ مفيد إتعملت سنة 1955 بعد ثورة يوليو وهى النقابة الوحيدة التى حرست الدولة على أن يكون على رأسها وزير التعليم إذنا ما كانش ينفع لما الدكتور حسين بهاء الدين عندوا نقابة الأطباء اللى هو عضو فيها فيبقى الوزير السابق ويبقى الدكتور مصطفى كمال حلمى الرجل المهذب رحمه الله يفضل هو النقيب 20 سنة مات الدكتور الأستاذ مصطفى كمال حلمى من 5 سنين
مفيد فوزى : أخطاء المعلمين علشا نبقى موضوعيين ما أنا مش هقدر أخد طول الخط مع المعلم لازم أعرف أيه أخطاء المعلمين فى مصر ؟
كمال غيث : ما هو كمان سيادتك لازم تقولى أنوا فيه أولويات فيه أخطاء للصحفيين شوف رئيس التحرير عامل إزاى ؟ شوف السيستم اللى محطوط عامل إزاى ؟ علشان ما يتفرقش دمه بين القبائل وننتهى للوضع اللى أحنا منتهين فيه التعليم تعرض فى عهد مبارك إلى عملية إفساد لم تتعرض لها المؤسسة من قبل ما هو أنت لما تدينى 120 جنيه وتقولى روح درس تروح تشتغل شمحطجى وتشتغل لص ومد إيدك فى جيوب العيال وخد فلوس
مفيد فوزى : ماذا قصدت بعام دراسى بلا تعليم ؟
كمال غيث : لأنوا المعلمين بيهددوا إذا لم تتعدل أحوالهم المادية والمهنية والإجتماعية لم يعودوا مجرد جسد ميت ولم يعودا يعنى كتلة صماء بلا معنى ولكن انشأوا عدد كبير من الروابط والنقابات المستقلة وبيهددوا أنوا إذا لم تتعدل أمورهم المادية والإجتماعية والوظيفية فأنهم سوف يضربون عن العمل فى أول يوم دراسى وهكذا قد نجد أبنائنا يذهبون إلى المدرسة ولا يجدوا المعلم يقف أمامهم بعد طابور الصباح فى اليوم الأول
مفيد فوزى : الا يتسلل إلى عقل وطنى مثلك هل هذا من الوطنية ؟
كمال غيث : تخريب التعليم هو أشد وطأة على الوطن من الخيانة السافرة المباشرة ومن تهريب الأسرار العسكرية
فاصل
مفيد فوزى : فيه قضية نفسى أفهمها وحضرتك عميد للدراسات التربوية لماذا لا يستعان بالتربويين كمدرسين فى وزارة التربية والتعليم ويقال لا تعيين مع إنهم أكثر الناس دراية بالعملية التعليمية إن جاز التعبير ؟
سامى نصار: هى كان فى البداية كانوا بيستعينوا بيهم كان هناك أمر تكليف لخريجى كلية التربية زى الصيادلة ليعملوا فى وزارة التربية والتعليم ثم جاءت الحكومة السابقة د: أحمد نظيف الغى أمر التكليف والمشكلة أنهم بدأوا يستعينوا بمعلمين من خارج كليات التربية دون أن يكونوا مؤهلين تربويا بيشغلوهم بالحصة بيشغلوهم بالعقد المؤقت وهكذا
مفيد فوزى : لما تكتشف أنوا مدرس خريجى صنايع وبعدين تكتشف أنوا بيدرس لغة عربية أيه المعنى المستتر خلف هذا ؟
سامى نصار: هو فيه معانى كثيرة تستتر خلف هذا يعنى من أهم هذه المعانى أن التعليم أصبح مهنة من لا مهنة له أى إنسان يستطيع أن يعمل فى مهنة التعليم وبالتالى لم توضع المعايير التربوية لإختيار المعلم المناسب الذى يدرس المادة أو المقرر المناسب لتخصصه
مفيد فوزى : ولا هو أربح أنه اختار مثلا مدرسا للغة العربية ؟ هل هى أربح ؟
سامى نصار : معلم الصنايع ؟
مفيد فوزى : أه
سامى نصار : هو المسألة أنوا هو مش بيختار يعنى هو بيختار إن هو يوضع فى هذا المكان لكن مفيش فى أيده أنوا هو يتعين يدرس لغة عربية وهى القضية أنوا فى التعليم الإبتدائى فى ال3 سنوات الأولى فى معلم الفصل معلم الفصل بيدرس كل حاجة فممكن هذه النوعية من المعلمين ودى مرحلة تأسيسية ودى مرحلة خطيرة يعنى ما بيعلموهوش كيف يقرأ ؟ ما بيعلمهوش الصعوبات اللغوية اللى بيواجهها الطفل لأول مرة عندما يبدأ القراءة ما بيعلمهوش إزاى يمسك القلم صح
مفيد فوزى : عايز أقول لحضرتك حاجة يمكن تكون خارج الموضوع المعلم إنما أساسية يعنى الخط بتاع التلامذة فى هذا الزمن ردئ وفى مزنى كان حصة الخط حصة ضرورية على جانب كبير من الأهمية أنت كرجل تربوى ومتخصص كعميد فى الدراسات التربوية فهمنى لماذا هذا الغياب ؟
سامى نصار : لأن حصة الخط العربى ألغيت لم يعد هناك حصة الخط لم يعد هناك كراسة الخط كان زمان بيجبولنا كراسة للخط فيها كل أنواع الخطوط وبندرب عليها دلوقتى مفيش
مفيد فوزى : هل الكتابة بالكمبيوتر أصبحت البديل ؟
سامى نصار : دى دخلت بقى هى التى قضت على هذا تماما لأن اللى ما بيعرفش يكتب بيستخدم الكيبورد والكيبورد بتصححله أخطائه الكمبيوتر بيصحح الأخطاء لو فيه خطأ بيبقى تحتيه خط أحمر يصححاله دلوقتى الكمبيوتر حل محل المهارات الإنسانية أو اليدوية دلوقتى مدرسة الخطوط أغلقوها
مفيد فوزى : كمان
سامى نصار : أه طبعا كان فى مقالات فى الصحف من أسبوعين أو تلاتة بيطلبوا أنوا المدرسة لازم تفتح أغلقت رغم أنوا المسألة منخدهاش من هذه الزواية فقط تعليم الخط دا تعليم للفن للجمال يعنى من الأشياء الوجدانية اللى بترقى بالأنسان يعنى الأنسان لما بيقرا خط
مفيد فوزى : حضرتك تعلم أنوا فى كلية الشرطة فى حاجة أسمها كشف الهيئة شكل الظابط كيانه شخصيته وأنا مثلا من الناس أللى بكل تواضع طلبت أنوا يكون فيه كشف هيئة للصحفى مش عايزه جدال فكره عقله مظهره أسلوبه تدفقه كل هذه الأشياء جديرة بأن تكون محل مراقبة هل هناك كشف هيئة للمدرسين يقنع التلامذة جوا الفصل إن دا كيان محترم يستحق الإحترام وأنا أسف إذا كنت بقول هذا الكلام
سامى نصار: هو الحقيقة يا أستاذ مفيد فيه عندنا فى كليات التربية نمط فى القبول أنوات مكتب التنسيق بيودى كليات التربية على حسب المجموع هنا بيجرى إختبار أو مقابلة شكلية فقط مش فعلية معياريرية لأنوا مكتب التنسيق جابه طب هنوديه فين ؟ هنرجعه فين تانى ؟
مفيد فوزى : هل فى يوم من الأيام يعاد النظر فى مكتب التنسيق ؟
سامى نصار : والله أرجوا أن يتحقق هذا بس بشرط أن نجد معيار بديلا لتحقيق تكافؤ الفرص بحيث ما يكنش الإلتحاق بالجامعة بناءا على القدرات المادية أو المكانة الإجتماعية أو إلى أخره خاصتا أننا نعيش فى مجتمع الغالبية فيه من الفقراء أى مجتمع فى هذا الزمن فى مجتمع المعرفة الذى نعيشه فى حاجة إلى التوسع فى التعليم الجامعى
مفيد فوزى : ما سبب التطاول على المدرس؟ دا سؤال أخير
سامى نصار : السبب فى التطاول هو أن المعلم قيمته فى المجتمع
مفيد فوزى : قد تدنت
سامى نصار : لأ بلاش تدنت
مفيد فوزى : نشيلها
سامى نصار : إهتزت لأسباب كتيرة من أولها ضعف دخوله المادى فبيلجأ إلى الدروس الخصوصية أنا مش ممكن أروح أمد إيدى لطالب وأحتفظ بمكانتى وأحتفظ بإحترامى دا معيار أساسى السبب الثانى أن المعلم فى الزمن الماضى كان معلما مثقفا نحن لا نهتم فى مؤسسات إعداد المعلم فى مصر بتثقيف المعلم المعلم ليس ناقل للمعرفة المعلم ليس كشكولا لأ صاحب رسالة أحنا حولناه إلى أداة دربناه على بعض المهارات وبعض الأداءات وبنقوله أدخل الفصل أعمل كذا دا إنسان له إتجاهات له إهتمامات له ميول له رؤى مختلفة عما بيتدرب عليه ثم بيتعامل مع مواقف مختلف مع أطفال مع كبار لهم أيضا إهتمامات وميول ومواقف ومخاوف مختلفة يعنى علينا أن نعد المعلم القادر على تعليم الأطفال كيف يتعلمون ؟ وكيف يبدعون ؟
مفيد فوزى : وكيف يفكرون ؟
سامى نصار : وكيف يفكرون ؟
فاصل
مفيد فوزى : أنت شايف المشهد التعليمى فى مصر شكله أيه بخبرتك الطويلة ورؤيتك ؟
وليم عبيد : طبعا ليس كما نتمناه يعنى هو دون المستوى حاليا دون المستوى وطبعا الواحد ما يقدرشى يقول أنوا دى حاجة فجائية فيه تراكمات كثيرة وخبرات كثيرة سابقة ومع كان وجود محاولات أيضا للإصلاح لأن الواحد لا ينكر أنوا كان فيه أيضا محاولات بين الحين والأخر لكن التعليم متعدد المتغيرات عندى منهاج عندى معلم عندى إداريين عندى إدارة عندى ميزانية عندى كتاب مدرسى عندى تنمية مهنية للمعلم عندى إعداد معلم عندى أعداد ما بتكفيش وربما العذر بسبب الميزانية ما أعينش خريجى كليات التربية اللى هما أصلا معدين معلمين وأعين بالقطعة وأعين بالحصة فى كثير من الأحيان لناس مش معدين كمعلمين
مفيد فوزى : هل هذا راجع إلى قلة ميزانية وزارة التربية والتعليم ؟
وليم عبيد : يعنى فى تصورى طبعا الميزانية عنصر لكن أيضا التخطيط الواعى
مفيد فوزى : غائب ؟
وليم عبيد :لأنوا النظرة المستقبلية والإعداد للمستقبليات
مفيد فوزى : أنا إذا اذنت باخد من كل هذه المنظومة شخصية المعلم ب‘تباره وأرجوا أن تتفق معى أو تختلف بإعتباره هو القاعدة الأساسية للتعليم ككل
وليم عبيد : هذا صحيح فالمعلم هو شريان الحياه فى العملية التعليمية يعنى لو المنهج ضعيف ولا حتى مدير المدرسة ضعيف ولا الكتاب مش قوى لو عندى معلم متميز هطلعلك نظام تعليمى كويس جدا
مفيد فوزى : هل تسهم النقابة بشيئ متعلق بكيان المعلم ؟
وليم عبيد : مع الأسف ونحن فى أرض النقابة وأنا عضو نقابة أنا أعتقد أن النقابة لم تقم بدورها بالنسبة للمعلم
مفيد فوزى : حضرتك حضرت مين من النقباء ؟
وليم عبيد : أنا طبعا قبل ما أروح الجامعة حضرت مجدى حسين
مفيد فوزى : دا كان دا وزير
وليم عبيد : هو اللى حصل كان نقيب وكان وزير وأذكر أنوا فى أول إجتماع للجمعية العمومية فى النقابة وأذكر أنوا أحد الشباب من أعضاء الجمعية العمومية ومجدى حسين وهو فى عز مجده يعنى كان عضو الظباط الأحرار فى الثورة وخاطبه بكل شجاعة وإقتدار وقال له يا سيادة الوزير هل أنت وزير أم نقيب ؟ وكيف تكون وزيرا ونقيب ؟ هل أنت وزيرا بالنهار ونقيبا بالليل ؟ وأنا أعلم أن دور النقيب إن هو يتحاور مع الوزير أو يناقض الوزير أحيانا فيما يخص مصلحة المعلمين فكيف يحدث ذلك معك ؟ أحد زملائه أو أحد الأعضاء التانيين شخط فيه وقاله له أجلس سكلتك أمك لزميله أحد مظاهر النفاق للمسئولين وبعدين الوزير نفسه قال يتكلم ويقول رأيه أحنا دولة تدعوا للديمقراطية وهذا الكلام يعنى طبعا بعد كده ما نعرفش حصل أيه يعنى ؟
مفيد فوزى : هل المعلم فى مصر يحتاج إلى إعداد أكثر من مطلبهم الذى يمكن أن يعتقد الناس أنوا مطلب فئوى رغم أننى أرى أن مطالب المعلمين ليست فئوية بقدر ما هى ضرورة إجتماعية لأن المدرس إن لم يجد له كيان شخصى وإنسانى وعلمى يفقد طريقه وإحترامه هل توافقنى على هذا ؟
وليم عبيد : هذا كلام صحيح وأنا أعتقد أنوا الدولة وليس وزير التربية والتعليم تعمل كل جهدها لأنها تقدم للمعلم حياة إنسانية مادية وأدبية تليق بكرامته وبدوره لأن بدون المعلم أخاف على التليميذ أخاف على المدرسة أخاف على مستقبل البلد
مفيد فوزى : يعنى المدرس فى مصر مهضوم حقه ولا أيه بالظبط أنت شايف أيه ؟ بسم تجربتك وخبرتك الطويلة
وليم عبيد : يعنى أنا شايف أنوا المدرس ما أخدش حقوقه المالية حتى لما عملوا الكادر وضعوا الوزارة السابقة وما قبل السابقة يعنى حطوا حاجات يعنى الكادر معناه إضافة للمرتب لجميع المعلمين أبتدى يعملوا حاجة لازم يمتحن ولازم نصنفه
مفيد فوزى : هل هو مطلب عاقل أنوا يمتحن المدرس ؟
وليم عبيد :المدرس يمتحن فى موقع أخر غير الكادر لما أجى أرقيه أعمله تنمية مهنية دى مطلوبة مطلوب أنوا المدرس يتعملوا تنمية مهنية وبرامج تدريبية لكن لا علاقة لها بالكادر
مفيد فوزى : اللى فكر فى الربط بين الترقية والكادر والإمتحانات والتدريس هدفه أيه ؟
وليم عبيد : هما طبعا الحقيقة فى وجهة نظرى وقد لا تكون صالحة تماما مستشارو الوزير معظمهم كانوا أساتذة جامعة ويعنى تربويين من أساتذة الجامعة ويعنى فى ذهنهم عنصر الإمتحانات التقويم
مفيد فوزى : يعنى معايير معينة
وليم عبيد : معايير معينة يعنى هما خدوا صورة مكانتش واصفة تماما لوضع المعلم أنوا هو أستاذ الجامعة لما بيجى يترقى لازم يقدم أبحاث
مفيد فوزى : طيب هسألك سؤال مهم المدرسين اللى سافروا للخارج وإستزادوا من خبرة الخارج وعادوا إلى مصر وكان فى مشكلة بينهم وبين الصدام للمنهج الدراسى فى مصر هل دول كانوا مجرد شو ؟
وليم عبيد : هو مش شو هو الروتين وحش هو المدرس طلع بره ورجع إلى مدرسته المفروض الناس دول اللى رجعوا المفروض فى مدارس نموزجية إتعملت جديد يا أما فصول حتى داخل نفس المدرسة يدرسوا فيها ويماريوا الحاجات اللى شافوها ويجربوا المناهج اللى موجودة لكن مع الأسف رجع مدرسته وبقى يتلقى التعليمات من الموجه والتعليمات كانت ضيقة ولصيقة دا بيقولوا من شهر كذا لى كذا تدرس الفصل الفلانى من صفحة كذا لى كذا فى الأيام الفلانية طب فين حرية المعلم ؟ فين اللى إتعلموا أنوا المدرس له حرية الإختيار والتفاوض مع الطلبة يعنى فيه بعض المدارس بره بيتفاوض المعلم مع الطالب يدرسوا أيه ؟ أسمه المنهج التفاوضى وحتى لو فيه منهج مقرر يتفاوضوا ندرس دا الأول ولا دا بعديه نرتبه إزاى ؟ ندى دا كام حصة ودا كام حصة ؟ يعنى فى حاج دور المعلم أنوا هو ياخد رأى الطالب أيضا ويتفاوض مع الطالب
مفيد فوزى : أيه الفرق يا دكتور وليم بينك كمدرس درست الرياضة فى يوما ما ومدرس الرياضة اليوم؟ دا أخر سؤال
وليم عبيد : يعنى أنا طبعا لغاية دلوقتى مش شايف أى تغيير فى كتب الرياضة وساعات فى إمتحانات الرياضة يعنى إلى حد كبير حتى فى الثانوية العامة شاركت يعنى زمان يعنى أو من قريب لكن مدرس الرياضة زى أى مدرس تانى اللى عايز نقول بعض علشان التعميم والقضية الجزئية لا تصدر الحكم على القضية الكلية انوا قد ما تقدر قدى واجبك أحنا خريجى كليات التربية
مفيد فوزى : أنت حضرتك بتقول ما بيتاخدوش دلوقتى يعنى أفهم من كده أنوا فيه بطالة فى خريجى التربية ؟
وليم عبيد : أيوه فى بطالة فى خريجى كلية التربية
مفيد فوزى :طب ليه ما بياخدوهمش فى وزارة التربية والتعليم ؟
وليم عبيد :ممنوع التعليم كان فيه تعليمات من أحد رؤساء الوزارارت ممنوع تعينات الخريجيين زىى ما كان الأول
مفيد فوزى : أستاذ نبيل يعنى فيه سؤال فى دماغى كده وأنا أتعرض لقضية المعلم هل مفيش فلوس لمعلمين ؟ هل النقابة مفيهاش فلوس ؟ هل الوزارة موازنة مش عاملة حسابها للمعلم الل هو أساس العملية التعليمية فى مصر ؟
نبيل صادق : أنا بعتقد أنوا ممكن تكون ميزانية وزارة التربية والتعليم تكفى لحافز ال200% وتكفى للزيادات المطلوبة إذا إتعاد التوزيع عليها وإذا إتحط حد أقصى للأجور وحد أدنى للأجور بطريقة يكون فيها عدالة إجتماعية ويكون فيها عدل ويكون فيها مساواة بين الوظائف داخل التربية والتعليم مفيش حد ياخد مبالغ خيالية وأحنا فى دولة ما نعتبرش دولة بالثراء الفاحش علشان ندى مرتبات زى مثلا حضرتك هنا على سبيل المثال عندنا رئيس قطاع تنمية الموارد البشرية راتبه 75 ألف وبدل غدارة 9000 يعنى أنا بعد 21 سنة وأكثر فى التربية والتعليم إجتزت كل الإمتحانات وكل الدورات التدريبية راتبى ما بيحصلش الحد الأدنى اللى الناس كانت بتطالب بيه اللى هو 1200 والوزير ما إحترامى الشديد له بيطلع يصدر أرقام نسب مئوية 300 ، 350 وأرقام بالشكل ده أنا عايز أقوله أنا إستفدت أيه ؟ أنا اللى وصلنى كام أنا اللى بقبضوا فعليا كام ؟ يعنى كيف يكون راتبى لا يصل إلى 1200 شهريا والرواتب كلها غير رئيس قطاع خدمة العملاء راتبه 81 ألف
مفيد فوزى : عملاء أيه ؟
نبيل صادق : داخل وزارة التربية والتعليم عندنا الوزارة موجود فيها طبقة من المستشارين وطبقة من الإداريين رؤساء القطاع ورؤساء الإدارات داخل الوزارة وداخل ديوان عام الوزارة رواتبهم خيالية كل قطاع
مفيد فوزى : قولى الأرقام مباشرتا
نبيل صادق : يعنى مثلا عندنا رئيس قطاع الشئون المالية راتبه 78 ألف
مفيد فوزى :78 ألف فى أيه ؟
نبيل صادق : شهريا وفوقهم 9000
مفيد فوزى :غيره
نبيل صادق : عندنا مثلا مدير عام الدعم الفنى فيه عندنا الأنظمة الجديدة اللى دخلت اللى هى خاصة بالجودة وما شابه ذلك مرتبه كام ؟ هنا راتبه 56 ألف وبدل إدارة 6000 ومكافأة شهرية 9000 يعنى إجمالى 71 ألف جنيه شهرى
مفيد فوزى : وأنت مرتبك كام ؟
نبيل صادق : مرتبى لا يتجاوز 1200 شهريا
مفيد فوزى : غيره
نبيل صادق : عندنا بعد مدير عام تحسين الجودة بقطاع الجودة ودى من الحاجات الحديثة اللى إنشأت راتبه 34 ألف جنيه وبدل إدارة 6000 جنيه ومكافأة شهرية 81 ألف جنيه الإجمالى 48 ألف جنيه
مفيد فوزى : حضرتك مرتبك كام ؟
نبيل صادق : مرتبى لا يتجاوز 1200 شهرى
مفيد فوزى : غيره
نبيل صادق : عندى مدير عام الأموال والعلاقات البنكية بقطاع الأموال راتبه 49 الف جنيه عندى بدل إدارة 6000 ومكافأة شهرية 18 ألف
مفيد فوزى : كله كام ؟
نبيل صادق : كله إجمالى 73 ألف
مفيد فوزى : فى الشهر
نبيل صادق : فى الشهر لو أحنا نزلنا للمحافظات وكلاء الوزارة ومديرين عموم الإدارات بردوا رواتبهم تتقارب مع هذه النسب لأن هما بيحصلوا على أى شيىء يتم داخل المدارس هو بيحصد وبيجنى أرباحه أكثر من المعلم اللى هو قاعد بيشتغل وبيكد داخل الفصول وخارجها وينتظم فى الدراسة من صباحا إلى مساءا غير التكليفات اللى بتيجى أنا على سبيل المثال بأحضر فى المدرسة من 8 لى 8,5 بنتهى منها الساعة 2 بيجيلى تكليف بتدريب من 2 لى 6 مساءا
مفيد فوزى : بتاخد عليه أجر؟
نبيل صادق : بدون أجر وكثر من التدريبات سواء خاصة بإنتيل سواء خاصة بأوراتل سواء بإمتحانات خاصة فى كفر الشيخ ال أى سى دى أيل لم أسترد مليم منهم من الدولة يعنى مطلوب منى أنى أنا أرعى نفسى مهنيا وأكاديميا من جيبى الخاص
مفيد فوزى : هل لو أنا قاطعتك وقلت عليك أنك شهيد حى صح ؟
نبيل صادق : قالولنا الكلام ده لما كانوا بيشوفوا المعناه اللى أحنا بنعانيها علشان نعدى محافظتين وتلاتة علشان نمتحن علشان نوصل ونمتحن فى حاجة قبل ما يطلع موضوع الكادر والكلام دا وكنا بناخد شهادة لما خلصتها وأنا شديد الفرحة بيها ورايح أسلمها فى الملف قالولى ملهاش أى لزمة أنت خدت دى ليه ؟ ولا دى بتاعة أيه ؟ لما أنا أشرف على النشاط المدرسى بتاع المدرسة ويحقق مركز على مستوى الجمهورية يكون مكافاتى 10 جنيه شهادة إستثمار ب 10 جنيه بعد أن أكون صرفت من جيبى مئات الجنيهات من جيبى على هذا النشاط لأن ميزانيته لا تتجاوز ال 200 جنيه سنويا إن أنا أنتج بيها مسرحية يكون فيها كم المن البروفات يكون فيها كم من الديكورات وبعد المصروف دا كله متلقيش كلمة شكر من حد إنما تلاقى معاملة سيئة جدا ودا اللى أحنا بنطلبه مش مطالب المعلمين بس خاصة بالماليات إنما خاصة بالمعاملة والكرامة كان فيه وقفة فى تصحيح الكنترول فى الثانوية فى المنصورة إن رئيس لجنة التصحيح وهو مدير عام خدمات بمديرية التربية والتعليم فى المنصورة أساء وتلفظ بألفاظ خارجة مع أحد المدرسين وأفراد الأمن التابعين له إحتجزوا هذا المدرس وأحنا خلصناه وتانى يوم أعدنا لأن بردوا طلبنا بتحسين المعاملة بتحديد ساعات العمل علشان أقعدها وأركز فيها لا تتجاوز ال 8 ساعات ميبقاش أكتر من كده فى نفس الوقت أتساوى مع الملاحظ اللى هو يومه بأتنين وأنا بقعد فترة أطول منه وبقعد أصحح دى مكانش فيها أى نوع من العدالة لأن أحنا كتخصص لغة إنجليزية كمدرسين الورقة بيصححها 30 مدرس فى بقيت المواد التانية 15 يعنى معناه أنوا أنا بتقضاه نص ما يتقضاه مدرس فى المواد التانية ودا بيبقى فيه ظلم وباخد أقل من اللى بيلاحظوا نرجع لموضوعنا أنوا لازم يبقى فيه عدالة فى التوزيع
مفيد فوزى : أستاذ نبيل ربنا يتولاك
نبيل صادق : أحنا شاكرين جدا إن حضرتك توقف معانا لأن الإعلام بيصورنا بصورة أحنا مش كده أبدا .