وجهة نظر

عبد اللطيف المناوي: السيدات والسادة مساء الخير تعقد في شرم الشيخ يوم الاربعاء المقبل القمة الاقتصادية العربية الثانية اجتماعاتها التمهيدية تبدا بالفعل من الغد تعقد القمة وعشرات القضايا لازالت عالقة ، السيدات والسادة عقدت القمة الاقتصادية الاولى منذ عامين ناقشت قضايا وطرحت مشروعات لازالت تنتظر التنفيذ فهل تنجح القمة المنتظرة في شرم الشيخ في تحقيق حلم السوق العربية المشتركة الذي عاش عشرات السنين هل تكتمل مشاريع الربط الكهربائي العربي ومد خطوط الغاز العربي واقرار لوائح النقل البحري وتنفيذ مشروع دعم الصناعات الصغيرة والمتوسطة ما هي المعوقات امام التكامل الاقتصادي العربي بعد ان فشل التكامل السياسي حتى الان وكيف يمكن الوصول الى طريق واحد في ظل اختلاف الانظمة الاقتصادية العربية وهل تتجاوز هذه القمة البيانات الختامية والتوصيات المعتادة الى حيز التنفيذ والاهم ما الذي سيعود على الشعوب العربية من هذا التكامل السيدات والسادة نستمع اليوم الى وجهة نظر المهندس رشيد محمد رشيد وزير التجارة والصناعة والقائم باعمال وزير الاستثمار اهلا بيك يافندم.. واسمح لي ان ابدا معك من المنطقة التي انتهت فيها القمة الماضية قمة الكويت منذ عامين ، قمة الكويت حذرت من مجموعة من التحديات تواجه الامة العربية ممكن نحصرها في تفاقم معدلات الفقر والبطالة تدهور اوضاع المواطن العربي تواضع حجم التجارة العربية البينية تواضع حجم الاستثمارات المحلية هجرة رؤوس الاموال وضعف البنية التحتية وعدم مواكبة المخرجات العلمية التعليمية لاحتياجات التنمية ومواجهة المنافسة العالمية السؤال هو هل ننتظر من هذه القمة ايضا ان تخرج بنفس التحديات
م: رشيد محمد رشيد: كلنا نعلم ان هناك حلم عربي اقتصادي بقاله 60 سنة بنتكلم عن سوق عربية مشتركة بنتكلم عن تكامل اقتصادي يجمع الدول العرية كلها ويمكن الحل الاقتصادي كان يسبق الحلم السياسي لانه من بدء انشاء جامعة الدول العربية كان هناك حديث عن ذلك التكامل الاقتصادي ولكن لاول مرة بمبادرة مصرية كويتية تعقد قمة عربية مخصصة بالكامل للتنمية والاقتصاد وهي قمة الكويت في سنة 2009 وبالتالي كان هناك حديث عن النواحي الاقتصادية ولكن كانت من ضمن جدول اعمال قمة كان دائما الجزء السياسي هو اللي بيطغى عليها ولكن للاسف ان قمة الكويت في نفس التوقيت او قبلها اسبوع حصل الغزو الاسرائيلي على غزة دي حتى اعلاميا ودعائيا والتواصل مع المواطن العربي لم تكن هناك رسالة قوية طلعت انه كان فيه تغطية كبيرة للجان السياسي
عبد اللطيف المناوي: كان وقتها الحديث عن اعادة اعمار غزة
م: رشيد محمد رشيد: المصالحة وكانت قمة غزة لكن الحقيقة انه ما تم اعداده لهذه القمة سنة 2009 وما تم اتخاذه من قرارات من القادة والرؤساء في يناير 2009 في الكويت هي نقلة حقيقية في العمل الاقتصادي الجماعي العربي لانه لو نظرت الى هذه القرارات تبث منظومة التكامل الاقتصادي فيها بكفاءة عالية لانه احنا بنتكلم عن سوق عربية مشترك بنتكلم عن قرار طلع في هذه القمة بيقول انه فيه اتحاد جمركي عربي بيتكلم عن اننا نبدا التفاوض في ادارة تحرير الخدمات ، ادارة تحرير الخدمات دا شئ اساسي اللي هي بتمس حرية حركة العاملين يعني انه شركات المقاولات وشركات النقل تشتغل مفيش حاجة لنظام كفيل مفيش حاجة لاي من الدول العربية بعضها وبين بعض في العديد من الممارسات من ناحية الاطباء من ناحية المحامين كلها زي بعض بنتكلم عن الربط الكهربائي بنتكلم عن الربط السككي بنتكلم عن الربط بالنسبة لخطوط الطرق بنتكلم عن السماوات المفتوحة بنتكلم عن حرية انتقال الافراد بنتكلم عن كثير من الامور اللي بتمس قدرة هذه المنطقة انها تقفز الي مستوى اعلى من التكامل الاقتصادي العبرة بالتنفيذ ولكن هذه القمة حددت النقاط وحددت الموضوعات والتوقيتات والجهات المسئولة عنها اولا طبعا احنا متاخرين مفيش شك لكن مقدرش اقول انه مفيش تحرك لا فيه تحرك والشئ الايجابي ان هذه القمة التي سوف تعقد هذا الاسبوع في شرم الشيخ كان هناك حرص من الاعداد اللي تم من الحكومات ومن الوزارات اللي كانوا مسئولين ان احنا نتمسك بنتائج الكويت بحيث اننا مش هنضيق حاجة لو سالتني ايه المبادرات الجديدة في شرم الشيخ ..؟ مفيش مبادرات جديدة في شرم الشيخ
عبد اللطيف المناوي: احنا ننفذ ما التزمنا به
م: رشيد محمد رشيد: بالظبط مش معقول ان احنا نخلي القمم الاقتصادية زيها زي ماكان عليه قبل كده نقول قرارا وبعدين نقلب الصفحة ونقول قرارات تانية لا احنا بنقول انه القادة اتفقوا على هذه القرارات يجب الالتزام بهذه القرارات
عبد اللطيف المناوي: طب ايه اللي هيحصل ايه المختلف المرة دي
م: رشيد محمد رشيد: اولا ان هذه القمة هتؤكد ان قرارات الكويت ملزمة للناس كلها فيه نوع من المتابعة لهذه القرارات لانه بعض هذه القرارات تحركت الاتحاد الجمركي في مصر اخدت المبادرة فيه تفاوض مع دول التعاون الخليجي فتحنا ملف مع سوريا فتحنا ملف مع الاردن بتتحرك موضوع الربط السككي والربط الطرقي فيه حركة من وزراء النقل ابتدوا ان هما يقعدوا مع بعض وجابوا شركات وابتدوا ان هما يحضروا كثير من الامور الموجودة فالعمليات النهاردة الخاصة بالربط بين شبكات الكهربا والطاقة ولمن ليس بالحماس اللي احنا عايزينه داخل الحكومات حتى الان
عبد اللطيف المناوي: طب خليني اقف عند النقطة دي ما الذي يتوقع من القمة بتاعة هذا الاسبوع ازاي ممكن ان نخلق هذا الحماس بشكل اكثر وضوحا هل ما حدث في تونس وهي اسباب اقتصادية هل يمكن ان يكون احد الدوافع لرؤية الاقتصاد العربي ككل للامور بشكل مختلف وبشكل مغاير
م: رشيد محمد رشيد: اكيد لانه كل مايحدث من حولنا ، النهاردة بقالنا 3 او 4 سنين في ازمات اقتصادية متواصلة مرينا بازمة ارتفاع الاسعار في 2008 وبعدين مرينا الازمة الاقتصادية دلوقت دخلنا في ازمة اسعار مرة تانية فالازمات من حوالينا مستمرة وبالتالي كل حكومات المنطقة تعلم النهاردة عندنا تحدي كبير وهذا التحدي جزء من مقاومته او جزء من العمل معناه ان احنا نشتغل مع بعض وكل ما نشتغل مع بعض كل ما فرصتنا هتكون احسن ، منظومة الامن الغذائي في المنطقة هتسهل العملية علينا منظومة التعاون في عملية الاستثمار هتخلي فيه فرص عمل اكتر فتح اسواق بين الدول العربية بعضها وبعض هيسهل خلق وظائف اكتر فمفيش شك انه التكامل الاقتصادي في المنطقة العربية جزء من حل المشاكل وجزء من ازاي نواجه التحديات الموجودة اتصور انه مما رايته في قمة الكويت انه القادة العرب مقتنعين ولكن هي العملية حماسة التنفيذ
عبد اللطيف المناوي: حماسة التنفيذ غاية عند القادة ولا عند المستويات الادنى ولا ...
م: رشيد محمد رشيد: خلي بالك هو ايه التحدي الموجود في عمليات التكامل .؟ التحدي انه فيه شيئين طبيعي بيبقوا صعبين على الحكومات جزء منه هو انه أي حكومة لازم تتنازل عن جزء من سلطاتها النهاردة دولة مصر انا كوزير تجارة باخد قراراتي كاملة داخل مصر لو انا لا النهاردة جزء من منظومة عربية مقدرش اخد قراري لوحدي فاصبحت النهاردة اتنازل عن جزء من قراري مقدرش اوقف سلعة بين السعودية ومصر مقدرش اتدخل في قرارات معينة من غير ما ارجع للوزراء العرب وهكذا وكذلك زميلي وزير النقل وزميلي وزير الصحة فبتبتدي زي المجموعة الاوربية الاتحاد الاوروبي كل دولة لها حدود لا تستطيع انها تتعداها بدون موافقة الدول التانية فيه جزء من التنازل من سيادتك داخل دولتك بتنازل فيه للاقليم اللي انت بتعيش فيه ودا مش حاضر لسه دا لسه فيه النزاع السياسي موجود جواه والنزاع النفسي موجود فيه انه الدول العربية تبتدي تتحرك وبعدين تقول الدول العربية بتاع ايه لا خلينا في حالنا احنا عندنا مشاكلنا ليه واحد عربي من هنا ولا من هنا هو اللي ييجي يقول نحل مشاكلنا ازاي الشئ التاني انه يبقي فيه نوع من الحماية مطلوبة من داخل البلد فييجي يقول الحقني فيه مصنع في سوريا ولا في السعودية ولا في مصر هيقفلي مصنعي هنا فاديني حماية فتبتدي الوزارات والمسئولين يتدخلوا حرصا على حاجات قصيرة طبعا يجب ان احنا كشعوب نعلم انه التكامل الاقليمي له تمن يجب ان ندفعه وهذا التمن انه النهاردة هنتوجه من مستوى محلي الى مستوى اقليمي فيه شركات هتتقفل فيه مصانع هتتقفل مقابل انه يبقى فيه شركات ومصانع اقوى على مستوى المنطقة العربية كلها الحاجات دي بتخلي الناس تتردد بتخلي الناس تخاف المسئولين يخافوا من هذه المواجهة في فترة من الفترات ، الشئ الايجابي عشان بس ما نحطش صورة سلبية انه النهاردة حصل تغير من ناحية المناخ في الشركات نفسها من 20 ، 30 سنة جزء من فشل المنطقة العربية انها تعمل اولا احنا كان عندنا انظمة كل واحد ماشي في نظام معين واحد ماشي في اقتصاد سوق حر واحد ماشي في اقتصاد سوق موجه واحد اخترع نظام جديد ماشي بيه كل واحد ماشي بنظام معين لسنوات طويلة جدا النهاردة فيه اتجاه ان كل الدول تمشي في اقتصاد سوق حر والدليل على كده ان 15 دولة عربية سواء ان هما اعضاء او هيبقوا اعضاء في فترة قريبة في منظمة التجارة العالمية فهما ماشيين بقواعد منظمة التجارة العالمية خلاص الانظمة الاقتصادية تساوت كل الدول بتشتغل الاقتصاد الحر كله بيتكلم عن قطاع خاص كله بيتكلم عن استثمار اللغة اصبحت واحدة في المنطقة كلها الشئ الاولاني اللي اخرنا لمدة طويلة انه مكنش فيه لاعبين انت عامل زي واحد حضر ملعب وسوق اقليمي ومفيش ناس تلعب لانه مكانش فيه شركات انت عايز تجارة وعايز استثمار وتجارة بينية طب مين اللي هيعمل الكلام دا ، انت عندك شركات الشركات كلها كانت حكومية ونتيجة انها حكومية الكفاءة بتاعتها كانت واطية الحاجة التانية انه كل ما يحصل خلاف سياسي تقوم ساحب شركاتك كلها ودا كان النمط اللي حنا كلنا ماشيين بيه انا مصر عاملة شركات سوريا حصل الخلاف الشركات خلاص السعودية مع اليمن حصل مشكلة وكله واقف مع بعضه ، النهاردة اصبح شئ مختلف اصبح فيه شركات خاصة اقليميا يعني النهاردة فيه شركات لا تمثل دولة خلاص
عبد اللطيف المناوي: تجاوز مساحة الخلاف السياسي
م: رشيد محمد رشيد: بالظبط.. في الامارات في دبي ولكن النهاردة هذه الشركة حجم عملها في دبي 10% بتبتدي في مصر حجم عملها 20% بتبتدي في الكويت لكن هي موجودة في الدول العربية بتجارة وموجودة في الدول العربية استثمار، هذه الشركات هي اللي حركت التجارة البينية من سنة 2000 الى سنة 2010 من 6% الى 12% تضاغفت في هذه الفترة ، حركت الاستثمارات البينية من 2 مليار دولار لى 20 مليار دولار سنويا في سنة 2010 ومازال الرقم ببسيط ولكن تضاعف 10 مرات انت ممكن تقعد معانا تقو ل انتوا متخلفين ما تتحركوا احنا عايزين نشيل نظام الكفيل احنا عايزين نشيل أي قيود على الافراد احنا عايزين يبقى عندنا قدرة ان انا احرك المديرين بتوعي من بلد عربية الى بلد عربية من غير فيزا من غير تاشيرات من غير أي عوائق عايز احرك فلوسي من دون أي تردد عايز النظام اللي يبقى موجود يبقى واحد عايز يبقى نقل البضائع من القاهرة الى الرياض يبقى زي ما بتنقلها من القاهرة الى الاسكندرية
عبد اللطيف المناوي: احنا وصلنا لفين الى أي مدة شركات النقل لها تاثير؟
م: رشيد محمد رشيد: دي الشئ الايجابي هذه الشركات هتبقتى موجودة في القمة
عبد اللطيف المناوي: دا المنتدى الخاص بالشركات
م: رشيد محمد رشيد: احنا عاملين النهاردة الغرف التجارية النشاط الاقتصادي في المنطقة كلها وجايبين كمان مجموعة الشركات في الدول الاقليمية ليه احنا عملنا التفريق دا بين الاتنين لانه احنا عندنا الغرف التجارية المصرية الغرف التجارية السعودية الغرف التجارية الليبية طبعا كل دول بيمثلوا كل المصالح داخل مصر وتونس و.. و.... ودول هيتكلموا بالاضافة طبعا الى مجموعة الشركات اللي عندهم التجارة هما اللي فعلا حطوا النهاردة هدف تكامل وشغالين على المستوى الاقليمي وجايين يقولولنا ايه مشاكلهم على المستوى الاقليمي احنا جربنا واشتغلنا وحطينا مليار وعشرة وعشرين وشغالين فهيبقى لهم كلمة قدام القادة يوم الاربع وهيقولوا احنا اشتغلنا وشغالين ودي طلباتنا وطبعا قبل الاجتماع يوم الاربع عندنا اجتماعات يوم التلات هيقعدوا مع الوزراء هيقعدوا مع رؤساء الوزراء هيكلموهم دا الشئ الايجابي من هذه القمة انه ليست فقط حكومات تتكلم ببعض لكن هي فعلا المجتمع الاقتصادي ومجتمع الشركات بيكلم بعض
عبد اللطيف المناوي: هل تعتقد ان ذلك الاحساس بالظروف الاقتصادية الضاغطة عالميا ومحليا والظروف الاجتماعية الضاغطة محليا واقليميا هل تعتقد ان هذا يمكن ان يدفع القادة العرب الى الاقتناع بشكل اكبر واكثر ايجابية في هذا الاتجاه؟
م: رشيد محمد رشيد: اكيد..انا هتكلم من منطلق مصري احنا في مصر هنا ماشيين في هذا الاتجاه بقالنا سنوات كثيرة ليه؟ لانه احنا شايفين ان هذا التوجه الاقليمي للدول العربية يحقق اهدافنا احنا عايزين خلق فرص عمل عايزين نرفع مستوي المعيشة للمواطن المصري دي النقطتين اللي احنا دايما بنتحدث عنهم .. طيب انت عايز فرص عمل ، فرصة العمل هتيجي منين بدون استثمار يبقى انت عاوز استثمار ولكن الشرط الاساسي لوجود استثمار وجود طلب طب الطلب دا يجي منين ..؟ يجي من الانتعاش في سوقك المحلي وسوقك الاقليمي واول دايرة موجودة حواليك هي الدايرة العربية فانت كل ما هيكون تكامل بينك وبين الدول العربية كل ما اقدر اودي سلعة لليبيا للسعودية للسودان لتونس للبنان كل دا هينعش الاقتصاد المصري وهيخلي النهاردة قدرتنا على جذب الاستثمرات اكتر كل ما هذه الحركة هتتم كل ما مستوى المعيشة هيرتفع عندنا ودا اللي احنا النهاردة بيخلينا نزق في هذا التكامل العربي مصر واخدة المبادرة مصر خدت مبادرة لقمة في الكويت ومصر اخدت اغلب المباردرات اللي انا بقولك عليها
عبد اللطيف المناوي: فيه كام دولة تقريبا او النسبة قد ايه اللي عندها حالة من حالات التخوف اكثر من المناسب للاندماج اقتصاديا؟
م: رشيد محمد رشيد: انا مش هقول اسامي انما اقدر اقول 50% من الدول العربية وخلي الك ال50% تاني هما مترددين هما مش مترددين لانهم مش عايزين ..لا .. هما مش عارفين يعملوا ايه نتيجة ظروف سياسية معينة نتيجة اوضاع داخلية معينة نتيجة ضعف معين موجود في الاقتصاد او السياسية
عبد اللطيف المناوي: هل هما 50% من المؤثرين؟
م: رشيد محمد رشيد: لا خلي بالك انا مش عايز اقول ان هذه النسبة هي السبب في الاعاقة المفروض ان ال50 % اللي شغالة تشتغل دا مبدا مصر بتؤيده لكن مع احترامي لكثير من الدول فيه دول مش عايزة تتحرك لو فيه 6 او 7 دول عايزة تشتغل في حاجة معينة تشتغل يعني فيه اتفاقية التجارة العربية الحرة اللي بينفذها فعلا 15 دولة من 22 ، الجزائر مثلا مش منفذاها ، السودان مش منفذاها بالكامل لاسباب معينة انما ما تقولش ان دولة او اتنين او تلاتة مش عايزين ينفذوها يوقفوا التانية وبالتالي مش هي دي سبب عدم سرعة هو حتى ال15 دولة اللي بينفذوا فيه كثير من المعوقات اجي مثلا وزير التجارة يقول الا انا عاوز الورقة بتاعتنا هي اللي تمشي وييجي وزير الصحة اللي بيشرف على النواحي الصحية الناس بتوعه يقولوا لا احنا عاوزين الورقة بتاعتنا اللي تمشي وهكذا وكل دولة بتعمل مثل هذا الموقف اللي هي عملية التنازل عن السيادة اللي انا اشرت اليها من البداية ، من ضمن المعوقات ايضا انه كل ما تيجي بضاعة يقولك اه دي جاية من الصين ويهربوها هنا علشان يقفلوا لنا المصانع فاحنا بنقول ياجماعة يجب ان احنا نتعدى ونتخطى
عبد اللطيف المناوي: ازاي يمكن الوصول الى الاقناع بعكس دا؟
م: رشيد محمد رشيد: لا ماهو الكلام دا بينبع من الرغبة التقليدية للحماية يعني عندنا مصانع بتنتج بوتاجاز يقولك مش عايز ولا مصنع يجيلي من السعودية ولا من سوريا ياخد السوق من عندي ممكن في بعض الاحيان بيحصل تجاوزات بس خلي بالك فيه تجاوزات يعني ممكن واحد يشتكي ان مصر بتصدر لنا بضائع وهي جاية من الصين ويحط عليها انه صنع في مصر ويصدرها طب انا كدولة هل لي مصلحة في هذا ..لا طبعا يعني انما كدولة كحكومة مصرية ماليش مصلحة دا انا عامل التجارة دي علشان الوظائف مش عايز اشجع المنتج الصيني فانا هكون اول واحد ضد هذا التوجه فمن هذا المنطلق انا عملت نظام للترابط بينا وبين بعض كوزرا لما ييجي واحد يقولي فيه حاجة من الدولة الفلانية مخالفة عندي خط ساخن بيني وبين هذه الدولة برفع التليفون وبقول المصنع دا ايه رايك فيه انا بثق في كلامه لو رجع وقالي المصنع دا كويس بمشيه ليه لانه زي ما بقولك ان هو ملوش مصلحة انه يساعد واحد يهرب
عبد اللطيف المناوي: اللي انا شايفه مازالت هذه المسالة تعتمد على الرغبة الشخصية لدى الوزير
م: رشيد محمد رشيد: لا هو العكس صحيح هو التوقيف بيجي من الوزير هو المفروض يمشي رسمي يعني فيه مستندات
عبد اللطيف المناوي: لا انا بتكلم على فكرة الدفع للامام
م: رشيد محمد رشيد: هضرب لك مثال انا لما جيت الوزارة سنة 2004 كانت تنفيذ الاتفاقية التجارة الحرة سنة 2005 وكان عليا ضغوط شديدة جدا من جهات كثيرة في الصناعة المصرية تقولي ما تنفذهاش لانه لو نفذتها احنا هنضر امنا من تقييمي للموقف انا شايف انه من مصلحة مصر لكن اللي انا شرحته لما هتتوجه من اقتصاد محلي اى اقتصاد اقليمي فيه بعض الناس هتنضر لكن المجموع هيستفيد لكن اللي حصل بعد كده انه التجارة البينية للدول العربية ارتفعت معدل 4 مرات صادراتنا زادت 4 مرات للدول العربية هل واردات الدول العربية زادت طبعا زادت عن المصانع اتاثرت ايوة فيه بعض المصانع اتاثرت انما زي ما انت بتقول انه للاسف هي بتيجي من اقتناع شخصي وطبعا هي سياسة ولكن لو وزير صناعة حب انه يقيد المسالة واللي حصل عشان تعرف العملية دي تمت ازاي في سنة 2005 كان فيه جولة سريعة للمنطقة العربية واتفقت مع 5 او 6 من الوزراء اللي عندهم نفس الحماس واتفقنا ان احنا نعمل مجموعة عمل مع بعض ويمكن هذه المجموعة هي اللي خلت هذه الاتفاقية تمشي
عبد اللطيف المناوي: هي مبادرة فردية؟
م: رشيد محمد رشيد: يعني هقولك حاجة التناقض العجيب انه الكل مقتنعين بهذا يعني الرئيس مبارك والكل هما مقتنعين ولكن المشكلة مسالة التنفيذ فيه تعقيدات ودي بتعتمد على كفاءة الناس الموجودة وتوجهاتهم والكلام دا يتناقشوا فيه من 50 او 60 سنة ولكن الموضوع ما بيجيش بالعواطف
عبد اللطيف المناوي: جزء مهم ذكرناه مهندس رشيد مسالة التجارة العربية والبينية المشتركة ايه هو الهدف ايه هو الtarget العربي هل احنا وصلنا ليه وايه هي المعوقات؟
م: رشيد محمد رشيد: لا شوف العلاقات البينية احنا وصلنا ل12% من اجمالي التجارة ولو قلنا الكلام دا في مناطق تكاملية اخرى زي اوروبا او اميركا الشمالية او المنطقة الاسيوية هتلاقي هذه النسبة بتتراوح من 30 الى 40% ولو خدت في الاعتبار ان ال12% دي فيها برضه بترول فمفيش شك انه احنا محتاجين نطلع الطلعات دي الشئ التاني لو اتكلمنا عن الاستثمرات الشئ العجيب لما خدت هذه المبادرة من اسبوعين تلاتة وجم عدد من الشركات 127 شركة عربية اكبر شركات موجودة مصرية وسعودية وكويتية واردنية وسورية ومغربية يقولك احنا احسن استثمارات عندنا ود شركات تحت ايدها 500 مليون مثلا يقولك احسن استثمارات عندنا في المنطقة ولكن احنا مشكلتنا فرص الاستثمار ، المنطقة مفيهاش فرص استثمار كفاية الدول ما بتفتحش هذه الفرص بالقدر الكافي ، الناس بتقول طب لو انا حطيت على الترابيزة 50 مليار دولار فين فرص الاستثمار هحطهم فين انا النهاردة ممكن احطهم في بنك في اوروبا في امريكا احطهم في 24 ساعة اقدر احطهم واستثمرهم طب انا لو جيت مصر احط فين ال50 مليار دول لو المنطقة بالكامل هحط 50 كمليار هحطهم فين فين المشروعات اللي تستوعب فين الاليات الاقتصادية
عبد اللطيف المناوي: وظيفة مين دي؟
م: رشيد محمد رشيد: لا هو مش حكاية وظيفة هو التطور الاقتصادي اللي موجود في المنطقة احنا النهاردة بنقول احنا اقتصاد حر بنفتح مجالات للقطاع الخاص مازالت مجالات محصورة يعني خلينا نرجع للسوق المحلي فيه القانون اللي بيتكلم عن مشاركة القطاع العام مع القطاع الخاص في عملية البنية التحتية دا لوحده هيفتح المجال للاستثمار ممكن يصل ل20 او 30 مليار في السنة بعد 4 او 5 سنن دا هيفتح مجالات للاستثمار تبقى عايز من القطاع الخاص انه يحط لك 20 او 30 مليار ، النهاردة القطاع الخاص في مصر بيستثمر تقريبا من 80 الى 100 مليار جنيه في السنة دا رقم على المستوى العربي ضعيف انت النهاردة 100 مليار جنيه يعني اقل من 20 مليار دولار في السنة ، القطاع الخاص بالكامل يستثمره طب انت ازاي توصل هذه الاستثمرات ل200 و300 و400 ، جزء من المطلوب انك تفتج مجالات الاستثمار ازاي تفتح فرصة اكبر في الصناعة في السياحة في الاسكان في التعليم في الصحة في المرافق ازاي تفتح العمليات دي بحيث ان الفلوس تضخ في المناطق، معندكش انت مصر استثمراتها كلها 130 او 140 في السنة احنا النهاردة دولة لو عرفنا نرفع الاستثمارات من 300 الى 500 مليار التنمية هترتفع الى 10% هتلاقي البلد دي حاجة تانية احنا هنستفيد ولكن في نفس الوقت الاستثمارات دي هتلاقي سكة تخش فيها
عبد اللطيف المناوي: هذا الحلم الفردي لدولة ايه هي الالية اللي من خلال القمة الاقتصادية انها تحقق او تدفع
م: رشيد محمد رشيد: جزء من هذه القمة موضوع المرافق اللي موجود فيه ناس تقول الدول العربية لو عايزة فعلا تعمل تكامل حاجتين تلاتة لو عملتهم هيعملو فرق كبر جدا ايه هما ..؟؟ ان اولا تسيب حرية انتقال الافراد ، دول العالم فيها ارهاب وبتاع بس بتتحرك مع بعض شوفوا لنا طريقة الناس تعرف تتحرك في الدول العربية دون القيود اللي موجودة نمرة اتنين افتح المجال للشركات انها تعمل خطوط وسكك حديد في المنطقة طبعا انت معندكش في مصر النهاردة هل عندك طريق للسودان هل عندك سكة حديد للسودان معندكش عندك سكة حديد لليييا ايه هي الوسيلة انك تنتقل الى المنطقة الشرقية محدودة جدا ، افتح السماوات بين الدول العربية كلها اسعار الطيران تنخفض كلها افتح النهاردة الخطوط البحرية ادي حوافز للخطوط البحرية تشتغل
عبد اللطيف المناوي: بس دي قرارات قادة
م: رشيد محمد رشيد: جزء منها تشريعات في دول
عبد اللطيف المناوي: القادة هنا اصحاب القرار في دولهم السؤال هو امتى يوصل القناعة دي؟
م: رشيد محمد رشيد: لا القناعة موجودة هي المشكلة التنفيذ المشكلة ازاي النهاردة الحكومات الموجودة انها تنفذ افتح الحاجات اللي بتتحرك هتلاقي الاشياء مشيت لوحدها خلي البني ادمين تتحرك خلي السلع تتحرك وحاول قدر الامكان انك توحد في التشريعات لو الكلام دا الدول عملته الشعوب هتتحرك
عبد اللطيف المناوي: احنا فين من النقطتين الاخريتين اللي هي فكرة التشريعات
م: رشيد محمد رشيد: فيه تفاوت بين دول ودول اللي ظروفهم الاقتصادية متشابهة وقرروا ان هما يعملوا تجمع موجود نجحوا في حاجات كثيرة حركوا الافراد بالبطايق الشخصية اتكلمنا على موضوع حرية حركة الاموال قدر كبير ابتدوا يتكلموا عن اتحاد جمركي فالسلع بتتحرك بطريقة اسهل وابتدوا يتكلموا حتى عن الوحدة النقدية والعملة الخليجية الموحدة
عبد اللطيف المناوي: هنا السؤال هنا التكامل بين متساويين الدارج يقولك انا هنا دولة غنية ادخل عندي دولة فقيرة ليه؟
م: رشيد محمد رشيد: احنا في مصر القوة الشرائية عندنا اضعف من السعودية ولكن النهاردة السعودية مع دول اخرى عايزة سوق بالتالي عايزة دولة زي مصر صحيح على مستوى الدخل احنا اقل منهم ولكن على مستوى الاقتصاد احنا نعتبر اقتصاد كبير والدليل على كده روح شوف منطقة اسيا النهاردة احتوا دولة زي فيتنام زي تايلاند ليه لانه عاوز النهاردة يخلق اسواق خدت اليونان والبرتغال ودول البلقان رغم انها دول محدودة ولكن فيه النهاردة رؤية معينة بتقول اه انت فقير وانا غني هناك تدرج معين انت هتمشي معايا فيه او انا هساعدك لان انا مقتنع في النهاية ان دخولك معايا في هذا التجمع هيفيدني شخصيا
عبد اللطيف المناوي: فكرة الاتحاد الاوربي يعمل نفس الحكاية السؤال هو هل الرؤية دي موجودة عندنا؟
م: رشيد محمد رشيد: عندنا الرؤية ولكن مشكلتنا انه فيه حاجة اسمها جامعة الدول العربية لانه جامعة الدول قالت من البداية احنا مؤسسين على اساس سياسي التجمعات التانية دي بدات بداية اقتصادية والله احنا عندنا تجمع اقتصادي وبالتالي الي هيستوفي الشروط دي اهلا بيه في المجموعة بتاعتنا احنا ابتدينا بحاجة اسمها جامعة الدول العربية تستوفي الشروط السياسية فاصبحت انت معانا فاصبحت انت جوه الجامعة من غير ما تستوفي أي شروط اقتصادية وبالتالي انت ما اصحش عليكم النهاردة التزام تمشي في العملية المطلوبة ومن المفيد انك تعمل تجمع برة الجامعة العربية اقتصادي وتقول والله فيه شروط معينة عشان تتأهل وتخش ..حصل مثلا في مجلس التعاون الخليجي قال ماشي احنا هنعمل تجمع معين وفيه تاهيل معين احنا هنشتغل بيه ولكن في اطار جامعة الدول العربية انت متقدرش النهاردة تستعد نص الدول تقوله انت غير مؤهل
عبد اللطيف المناوي: هل مش وارد في القمة الاقتصادية ان تصل الى قرار بالشكل الصحيح اللي هو اصبح عكسي النهاردة؟
م: رشيد محمد رشيد: الحوار اللي انا بقوله دا ماهواش حوار مش موجود مثلا انت لمنا تيجي تطبق اتفاقية التجارة الحرة بتقول ماشي ولكن فكرة ان انا هقف جنبهم واساعدهم المنظومة الاورية والمنظومة الاسيوية انا انا النهاردة هخش بمفهوم اقتصادي بحت وهعملك برنامج والتزم جماعي طبعا احنا لسه مش فيها خالص لانه زي ما بقولك انت بديت النهاردة بمفهوم سياسي ، اذن المفهوم السياسي طغى على الاجندة الاقتصادية
عبد اللطيف المناوي: ارجع للاجتماع اللي اتصور انه كان على درجة عالية من الاهمية تقريبا اكبر المستثمرين العرب هل ممكن ان يكون لهم دور واضح كلجنة استشارية في القمة العربية؟
م: رشيد محمد رشيد: طبعا هو مش في القمة العربية دي المنظومة كلها يعني في اوروبا مثلا اسمه "الدائرة المستديرة للشركات الصناعية الكبرى " هذا التجمع الموجود في اوروبا هو 45 شركة مش كبيرة يمثلوا المجموعة التجارية ويدوا رد الفعل لكل السياسات من الناحية الاقتصادية من منطلق انهم من كار المستثمرين ويستطيعوا ان هما يقولوا ايه التوجهات اللي هما عايزينها وايه تاثيرات التشريعات اللي بتطلع من المجموعة الاوربية شكلها ايه مفيش شك انه التجمعات مطلوبة في المنطقة العربية انه يبقى فيه صوت موجود ويقول يا جماعة هذه القرارات في الاتجاه الصح هذه القرارات بطيئة هنا فيه بدايل تانية تعملوها وفعلا هما اتفقوا ان هما هيأسسوا مكتب لهم هنا في القاهرة هيعقدوا اجتماع لهم اول يوم التلات على هامش القمة في شرم الشيخ لانه احنا امل انه هذا الكيان وغيره يبتدوا يظهروا على الساحة ويكونوا كيانات قوية ولها صوت لانه انت النهاردة لما تتكلم عن كل المنطقة وكلها قطاع خاص وعلي مستوى اقليمي اكيد كل دولة لها اليات ولكن على مستوى المنطقة انت محتاج انه يبقى فيه مثل هذه الاليات
عبد اللطيف المناوي: بالنسبة للمسائل الخاصة البنية التحتية والخاصة بالكهرباء والطرق والكباري هل في من دا وهل دا موضوع على خطة القمة الاقتصادية وايه المشروعات اللي بتقدمها ويمكن تنفيذها؟
م: رشيد محمد رشيد: كثير من الدول النهاردة بدات في اطلاق يد المشاركة بين القطاع الخاص والحكومة السعودية شغالة الكويت الامارات ومصر بدات كذلك في العام الماضي ، النهاردة القمة فعلا طرحت من خلال قرارات القمة في الكويت مجموعة من المشروعات الكبيرة في البنية التحتية من اهمها مشروعات الربط السككي الربط الكهربائي حتى لما قعدنا في اجتماع تحضيري الناس اللي ماسكين هذه المشروعات قالوا لنا انه من ضمن اسباب تعطل هذه المشروعات ان احنا معندناش تمويل قلنا لهم افتحوا المجالات طب اذا كانت الدول قالت ان القطاع الخاص يخش فيها طب ما نفتح المجال لهذه الشركات ولكن برضه بنقول ان هذا الكلام عايز تشريع من الدول لقوانين تبقى متشابهة لانه الناس عايزة ضمانات مش من دولة وانما من 4 او 5 دول مع بعض لو واحد داخل في طريق في 4 دول عايز كل الدول متفقة
عبد اللطيف المناوي: وبالتالي دا عايز الارادة السياسية
م: رشيد محمد رشيد: طبعا طبعا التوجه موجود ولكن بتختبر ما تيجي في التفاصيل مين اللي هيبقى له كلمة هنا ومين اللي هيبقى له كلمة هنا
عبد اللطيف المناوي: اكتر مجال من هذه المجالات احنا متقدمين فيها ايه
م: رشيد محمد رشيد: الربط الكهربي .. بس احنا واخدين توجه للمنطق العربية لانه خلي بالك لما ترجع للمنظومة الاقتصادية الي بداناها في اطار السياسات اللي موجودة انت بتتكلم عايز وظائف عايز استثمارات عايز مستوى معيشة لازم تتجه للمنطقة بتاعتك امكانياتك في حدود الدولة لها حدود ودي اهمية المنطقة العربية بالنسبة لنا بغض النظر عن العواطف والروابط التاريخية والعروبة من منطلق المصلحة البحتة يعني هضرب لك مثال روح لمنطقة زي اسيا دول ما بيطيقوش بعض دول قطعوا بعض النهاردة تايوان مع الصين يشتغلوا مع بعض والصين وفيتنام كل هذه الدول قعدت في حروب انما المصلحة مصلحة من منطلق المصلحة قعدوا مع بعض فمن باب اولى طبعا لو احنا النهاردة عندنا المودة يبقى برضه المصالح
عبد اللطيف المناوي: هناك مودة وهناك تحديات وهناك خطر ماثل
م: رشيد محمد رشيد: لن يكون هناك أي اقتصاد في المنطقة العربية والنجاح على المستوى العالمي الا لو نجحنا اقليميا عشان كده اسيا النهاردة فيها تكتلات كبيرة الهند والصين ما يقدروش يشتغلوا لوحدهم لازم يشتغلوا في اطار اقليمي، اوروبا ما يقدرش يشتغل لوحده لازم النهاردة يشتغل في اطار اقليمي
عبد اللطيف المناوي: في احد العناصر المهمة للاقتصاد العربي صناديق الاستثمارا ت تعالى نتكلم عن صندوق التمويل الكويتي او شركة الاستثمارات اللييية وشركة الاستثمار الاماراتية هل هناك شكل من اشكال الامكانية لايجاد صيغة مشتركة والتعاون المشترك؟
م: رشيد محمد رشيد: هو بس خليني افرق فيه نوعين من الصناديق فيه صناديق تمويل بمعنى انها بتمول مشروعات تنموية وهي صناديق مشابهة لنظام البنك الدولي دي بتمول مشروع كهربا لدولة عربية بشروط ميسرة وهي صناديق ادت عملها على المستوى المناسب ومصر استفادت في كثير من مشروعاتها منها ولكن مشروعات محدودة بتتكلم عن مشروعات دول في بنية تحتية مشروعات دول اساسية على التوازي وهي اكبر منها بكثير صناديق الاستثمار زي الليبي اكبرهم على الاطلاق صندوق استثمار ابو ظبي دي فيها مئات المليارات اللي موجودة ودي تتكلم على الاستثمارات انا النهاردة عامل صندوق باستثمارات على مستوى اقتصادي بحت مفيهوش أي نوع من التنمية ، احنا عايزين نوجه هذه الاستثمارات للمنطقة ولكن هذه الصناديق بتقول انا عاوز استثمر في أي منطقة تانية لو انا باخد عائد 2 او 3 او 4% ونسبة المخاطرة بتاعتي يجب انها تكون بالتناسب مع العائد بتاعي السؤال هنا ازاي تفتح المجال لهذه الاستثمارات ممكن تخش عن طريق بورصات ممكن عن طريق سندات او مشروعات كبرى مباشرة هو عايز يخش ب500 مليون او 1000 مليون
عبد اللطيف المناوي: تلك الصناديق هل من الممكن ايجاد صيغة للارتباط بينها وبين بعضها؟
م: رشيد محمد رشيد: يعني مفيش أي قيمة ان هما يرتبطوا ببعض طبعا صندوق زي ابو ظبي فيه مئات المليارات من الدولارات وصندوق جنبه في الكويت وكل واحد عنده توجهاته انت عايز تخلق اليات في الدول العربية تشد هذه الصناديق
عبد اللطيف المناوي: من ضمن هذه الاليات فكرة وجود خريطة استثمارية السؤال هو احنا ليه اتاخرنا عن وجود خريطة عربية استثمارية ومن المسئول عن وضع هذه الخريطة
م: رشيد محمد رشيد: المقصود بالخريطة الاستثمارية المجالات المفتوحة للاستثمار انا النهاردة لما اجي اقول عن الخريطة الاستثمارية في مصر بتكلم عن المشروعات السياحية في المنطقة الفلانيةعندي مشروعات اسكان علىى مستويات معينة نفس الشئ في المنطقة العربية كمشروعات اقليمية انا بتكلم عن مشروعات البنية التحتية والربط ومشروعات الامن الغذائي يعني فيه مشروع امن غذائي احنا معملنهاش يعني احنا بنتكلم عن السلع الغذائية والسؤال هل احنا استغلينا الاراضي اللي موجودة عندنا في المنطقة بالطبع لا عندك زراعات كثيرة ممكن تحسن من جودتها ومن انتاجها ولكن معندكش اليات من خلال استثمارات ضخمة بتتحط في المنطقة في منظومة اقتصادية للزراعة طبعا جزء منها لا يلام منها الناس اللي معاها فلوس نقول طب ما يروحوا السودان يستثمروا لا الموضوع مش انهم يستثمروا فين المناخ النهاردة اللي انت تقدر تخلقه لهذه الاموال انها تتحط بطريقة اقتصادية سليمة احنا عارفين ان فيه مشاكل سياسية ومشاكل امان من هنا بنتكلم عن منظومة تانية ودا اللي اتكلموا فيه المستثمرين لما تجمعوا في القاهرة قالوا فين ضمانات االاستثمار اعملوا لنا صندوق ما يجيش واحد يصحى من النوم يقول انا عاوز امم شركة أأممها بيقولوا ان احنا مستعدين على المخاطرة بس ما تحملونيش المخاطرة السياسية فامن لي الاستثمار الشئ التاني محكمة اقتصادية عربية تشكل فض المنازعات اسلوب تحكيم عربي للمشاكل اللي هتكون موجودة
عبد اللطيف المناوي: منظومة التعليم واحد المبادرات اللي مصر هتتقدم فيها انه يكون التعليم مشروع قومي عربي ايه ملامح هذه الفكرة؟
م: رشيد محمد رشيد: طبعا منظومة التعليم من الحاجات الاساسية احنا بنقول لو احنا تعاونا هتكون مواجهة المشكلة اسهل النهاردة كدولتين نتعاون مع بعض للوصول الى منظومة افضل
عبد اللطيف المناوي: بعض الدول العربية كانت تظن ان النظر لى الشمال هو الاهم هل هذه القناعة ممكن ان تختلف الان بعد الازمات في العالم؟
م: رشيد محمد رشيد: اكيد النهاردة نسبة الاقتناع ان المنطقة لها الاهمية والجاذبية كثير من الدول فهمت المعادلة انا اتصور ان اللي بيعوقها السياسة يعني في مناطق تانية يركنوا السياسة على جنب احنا ما وصلناش للنقطة دي
عبد اللطيف المناوي: احداث تونس الاخيرة ولكن ما الذي يتوقع المواطن العربي من هذه القمة الاقتصادية؟
م: رشيد محمد رشيد: القمة بتطوراتها قراراتها ليست فيها مفاجات ولكن هي مؤثرة الانتقال الى هذه المناطق هيبقى سهل سلعتي هتنتقل اسهل فرص العمل هتزيد هركب سكة حديد اقدر انتقل منها الى تونس مثل يعني كل الامور النهاردة كل السلع في المنطقة هتبقى نفس اسعار السلع بين الدول وبين بعضها لازم النهاردة يبدا الاقتناع انه ما نبقاش في الوضع اللي احنا فيه
عبد اللطيف المناوي: ولكن تظل القناعات السياسية الجادة لدى القادة الاساس
م: رشيد محمد رشيد: ويجب ان نقتنع اننا ما نعملوش حبا وبس لانه الحب ماجابش نتيجة يبقى المصلحة
عبد اللطيف المناوي: المهندس رشيد محمد رشيد اشكرك جزيلا على هذا اللقاء السيدات والسادة القمة الاقتصادية العربية في شرم الشيخ اتمنى ان تكون حلما من 60 عام اتمنى ان نصل الى امكانية هذا السيدات والسادة شكرا لكم والى اللقاء في مرات قادمة باذن الله
النهاية