اختراق

الاربعاء 8/12/2010
عمرو الليثي: مساء الخيروأهلاً ومرحباً بكم في حلقة جديدة من برنامج اختراق .. زى ما حضراتكم شايفين احنا انهارده بنبدأ دورة برامجية جديدة بنبدأها بديكورجديد .. شكل جديد .. تترجديد .. وإن شاء الله كمان المحتوى يكون محتوى جديد إن شاء الله بإذن الله يكون المحتوى، وانهارده أناعايز اتكلم على الإنسان المصري .. الإنسان المصري هو بطل حرب اكتوبر أيا كان موقعه .. في جبهة القتال .. أو في الجبهة الداخلية .. وكان الثمن غالياً هو أرواح شهدائنا ودماء مُصابينا وحرمان مواطنينا من أبسط ضروريات الحياة في مُعاناة استمرت لعدة سنوات ومن كل هذه التضحيات هناك نماذج فريدة في الشجاعة والفداء تصل إلى حد الخيال .. إنهم مقاتلوا "المجموعة 39" ومن حقهم علينا أن نتذكرهم ونحكي بطولاتهم ..
فاصل "موسيقى عسكرية"
تقرير:المجموعة 39 هم رجال المُهمات القتالية الخاصة الذي لا يقدر عليها سواهم .. تضم صفوة مُقاتلي مصرالتشكيلات كافة كانت مهمتهم رصد كل كبيرة وصغيرة عن العدو وتكبيده أفدح الخسائر ثم العودة .. كانت أسماؤهم مصدررعبٍ للإسرائيليين .. كانت عملياتهم كابوساً مُخيفاً يُطاردهم ليل نهارأطلق عليهم موشى ديان وزيرالدفاع الإسرائيلي تعبير"الأشباح الذين لا يُمكن الامساك بهم".. المجموعة تم تشكيلها في أعقاب نكسة يونيو عام 67 وأشرف على قيادتها وتنفيذ عملياتهم كافة: إبراهيم الرفاعي صاحب المواقف البطولية التي تظل حاضرة في تاريخ الأمة وذاكرتها ..
أحمد رجائي عطية "أحد أبطال المجموعة 39": "المجموعة 39" أحد الأوجه أوالصور لرفض الشعب المصري للاستسلام .. علاوة على ان المخابرات الحربية ابتدت بقرار شجاعة العساكر للبندقية .. شجاعة قرار .. قالهم محمد صادق كان أياميها مديرالمخابرات الحربية وابتدا فعلاً بعمليات إيجابية ببعض من الظباط الموجودين في الإدارة، طبعاً أولهم إبراهيم الرفاعي .. معلش مش هقول ألقاب بقى .. عصام الدالي وبالمناسبة ده دفعتي يعني وأصلاً كان مدفعية زي وأحمد رجائي اللي هو أنا.. اشتغلنا فعلاً .. كل واحد منفرداً عمليات حسب التلقين اللي كان بياخده من اللواء صادق .. اللي هو كان مدير المخابرات في ذلك الوقت يعني.
محيي نوح "أحد أبطال المجموعة 39": احنا الأول كنا كلنا صاعقة كل المجموعة 39 بدايتها من وحدات الصاعقة .. أنا كنت في كتيبة من كتائب الصاعقة .. واشتغلنا خلال فترات في معركة جردانة ثم معركة راس العش ثم معركة .. يعني بقينا نجيب الشاردين فترة مُعينة .. ثم عملنا معركة راس العش مرة تانية .. ثم بعد كده انتقلنا إلى القاهرة .. في القاهرة قالولنا انتوا هتنضموا على العمليات الخاصة بإدارة المخابرات.
أحمد رجائي عطية: أنشئت مجموعة العمليات الخاصة عصام الدالي كان رئيس قسم العمليات وده كان المايسترو في التخطيط يعني لكل عملياتنا .. كنت أنا ماسك الاستطلاع والتدريب .. قسم الاستطلاع والتدريب.
فاصل موسيقى عسكرية
"محيي نوح":احنا كنا كتيبة صاعقة..أنا كنت ماسك سرية في هذه الكتيبة انضمينا على العمليات الخاصة.. كان بيقود العمليات الخاصة الشهيد إبراهيم الرفاعي .. الشهيد إبراهيم الرفاعي ده رجل صاعقة أساساً وهو اللي أنشأ هذه المجموعة .. بداية إنشاءها كانت بعد 67 على طول.
وئام سالم "أحد أبطال المجموعة 39": مجموعة 39 قتال اتشكلت بواسطة المخابرات الحربية واللي أمر بتشكيلها الفريق صادق .. كان مدير المخابرات الحربية .. بدأ باستدعاء إبراهيم الرفاعي كان مقدم وكان له عمليات في اليمن وكان له عمليات في 67 .. وابتدا إبراهيم الرفاعي الشهيد إبراهيم الرفاعي كان برتبة مقدم .. ابتدا بمجموعات.. خد محسن طه 12 فرد من الصاعقة انضموا عليه ثم انضم عليه محيي نوح ثم انضم عليه أحمد رجائي عطية - مع الاحتفاظ طبعاً بالألقاب - وانضميت أنا عليهم لوحدي فرد لأن أنا كنت في مجموعة فدائيين بتشتغل .. وابتدا ينضم بقية المجموعات من الصاعقة البحرية.
محمد عبده "أحد أبطال المجموعة 39": أول ناس التقاهم هما من الصاعقة البحرية فجاب منها النقيب إسلام توفيق وماجد ناشد.. وابتدوا يعملوا ال 17 واحد منهم اسلام وماجد وكان معاهم الدكتور- الله يرحمه - على نصرده كان جاي انضم للمخابرات من أمريكا على طول مباشرة .. إنما دا أول انتقاء.. أول انتقاء وكان بيختاروا من مجموعة الصاعقة البحرية كلهم 17 واحد .. 17 من 300 حاجة مش سهلة .. أما انتقاء الصاعقة .. فأول انتقاء الصاعقة تصدق اللواء صادق على الحاق محمد عبده .. محمود محجوب .. محمد السيد نجم .. محمد نصر .. خمسة .. اللي اشتغل منهم .. اللي انتقى منهم محمد عبده ومحمود محجوب .. دول اللي اشتغلوا في المجموعة بداية .. محدش جه .. بعد كده ضافولنا فصيلة من فصائل الصاعقة .. تصدق المشير قصدي الفريق فوزي على الحاق فصيلة من الصاعقة .. الصاعقة البرية .. عشان هنا بقت الصاعقة البحرية فصيلة .. فانتقينا من ال 30 واحد 10 أفراد.
ماجد ناشد: انضميت للواء القوات الخاصة .. اللي هو اللواء بتاعي وكان مهمتي ساعتها هناك في اللواء إن أنا أدرب عساكرالصاعقة البرية .. إزاي يركبوا القارب .. وما يقعدوش كده ساكتين.. يعني أولاً مايخافش من المية وفي نفس الوقت لوقابلنا أي لانشات يهودي إزاي يتعامل معاها بالأربيجيهات والأسحلة بدون ما يعور اللي جنبه .. فكل ده كان محتاج تداريب .. وإزاي يضرب واللانش عمّال يتشال ويتحط في الموج العالي .. فده كان مهمتي تدريبهم.
"محيي نوح": بدأت العمليات تشتغل بإبراهيم الرفاعي وكان معاه على نصر.. كان معاه اسلام توفيق وكان معاه أحمد رجائي عطية وبعض الناس الآخرين.
ماجد ناشد: 39 قتال ده اتسمت بعدين بعد ما اتعمل 39 عملية .. يعني ومش كلها عميات قتالية يعني مثلاً فيه تلغيم ما بنعتبرهوش قتال إنما مجمل العمليات لما المجموعة اتكونت كان كل العمليات بيتقال عليها منظمة سينا اللي عملتها.
"محيي نوح": إلى أن وصلت العمليات إلى 39 عملية .. وكنا في الوقت ده كان تم تشكيل المجموعة .. تشكيل فصيلة من الصاعقة البحرية وفصيلة من الصاعقة وسرية إلا شوية من الصاعقة ثم بعض المهندسين ثم بعد كده بعض الأفراد من البحوث العسكرية وتكونت المجموعة 39 قتال.
فاصل موسيقى عسكرية مع عرض صور لإحدى المعارك
عمرو الليثي: كان إبراهيم الرفاعي هو البطل الذي كان يختار جنوده بمعايير غاية في الصعوبة والدقة .. فكوّن الشهيد الرفاعي مجموعة مُختارة أشبه بما يكون مُنتخب الكرة، وكلما سمع الشهيد عن شخص قام بعملية مُتميزة يُبادر بضمه إلى المجموعة 39.
"محيي نوح": المجموعة دى كلها كان بيتوفر فيها الآتى .. نمرة واحد لياقة بدنية عالية جداً .. نمرة 2 عندهم ثقافة .. مُقفين .. عندهم ذكاء .. نمرة 3 يعشق العمل الفدائي .. يعني "على نصر" ده كان طبيب .. وطبيب مالوش في العمل الفدائي .. لكن لما لقى المجموعة بتتشكل أصّر إنه ينضم للمجموعة وقابل الشهيد إبراهيم الرفاعي وانضم للمجموعة .. لابد أن يكون عنده عقيدة راسخة .. إنه بيدافع عن قضية مُهمة جداً وكان عنده يا الشهادة .. مفيش عنده حاجة تانية غير الشهادة.
محمد عبده: وكان الانتقاء بيبقى لازم بيكون وطني جداً .. السمات الموجودة فيه حر .. لياقة بدنية عالية جداً .. بيُجيد الرماية من كل الأسلحة .. بيُجيد الرماية في الميدان .. الكلام ده كله معروف.
وئام سالم:ابتدى ينقي بأسباب .. محسن طه لأنه عامل عمليات مُعينة .. أنا كنت عامل عمليات مع الفدائيين في غزة وفي سيناء ولأني ابن شهيد، فكان له اختياره وهو إبراهيم الرفاعي نفسه له أخ شهيد في اليمن سامح الرفاعي .. بحيث إن المجموعة تبقى مُتكاملة كمان كان بيضم البحرية.. وكان بيستدعى طيارات هيليوكبتر بطيارين .. فكانت المجموعة متشكلة من الصاعقة البرية وصاعقة بحرية وبعض الطيارات الهيليوكبتر اللي بتنضم لنا.
موسيقى عسكرية مع عرض صور للأبطال
"محيي نوح": وبدأنا نشتغل كانت المجموعة بتشتغل فين بقى .. كانت بتشتغل من بورسعيد في الشمال وبورفؤاد إلى راس محمد في الجنوب إلى داخل سينا داخل إلى إسرائيل نفسها .. كنا بنشتغل على الجبهة ده كلها عمليات إغارة.. أول عملية إغارة حصلت على الجبهة عملتها المجموعة .. عمليات كماين أول كمين حصل عملته المجموعة وحصلت على سينا .. عمليات استطلاع خلف الخطوط .. كانت بتقوم المجموعة للحصول على المعلومات.
عمروالليثي: 92 عملية قتالية نفذتها "المجموعة 39" شرق القناة بغربها في أعقاب تشكيلها عقب نكسة يونيو 67 وحتى حرب أكتوبر 73 وكانت تضم أفضل وأشجع مُقاتلي الصاعقة البرية والضفادع البشرية والصاعقة البحرية.
"محيي نوح": نقدرنقول إن عدد العمليات اللي عملتها المجموعة عامة هما 92 عملية، بس فيه عمليات قتال .. فيه عمليات استطلاع .. فيه عمليات حصول على المعلومات .. لكن عمليات القتال الفعلية نقدر نقول في حدود 22 عملية، لكن باقي العمليات .. يا هتلاقيها استطلاع خلف الخطوط .. يا هتلاقيها حصول على المعلومات بطريقة أو بأخرى .. هاتلاقيها عمليات تمت في مناطق.. يعني احنا عملنا عمليات أو المجموعة عملت عمليات عن طريق الأردن .. عملت عمليات في داخل إسرائيل نفسها ..
أحمد رجائي عطية: الجبهة على طول الخط كان ما بيفوتش يعني أسبوع أو اتنين إلا ما تكون فيه منطقة متلغمة .. والألغام ده على فكرة كنا مسمينها "الابن البار" .. ليه مسمينها الابن البار لأن اللغم بيتحط في وقت ما ها تعدى يا إما دبابة يا إما مركبة وتشيل اللي فيها .. لدرجة إن ابتدا اليهود يعدوا بحاجة اسمها الدقاقة .. الصبح بدري قبل ما الناس ما يبتدوا يتحركوا عشان ما يقعوش في لغم .. ففكرنا وعملنلها كمين .. كمين بالالغام يعني .. بحيث إن لو جت من فوق .. يعني جت من الشمال للجنوب أو جت من الجنوب للشمال الكور ده لما تخبط لغم متصلة على بعد 4 متر .. يعني هتبقى تحت الدبابة يعني مجموعتين نسف .. فبتيجي في بطن الدبابة، كان محطوطلها ما شاء الله كما شوال أمونال وكام شوال دانة مدفعية .. من شدة هذا الانفجار طار هذا البرج من الضفة الشرقية للضفة الغربية .. يعني طار حوالي 240 متر.
موسيفة مع عرض لصور المعارك
ماجد ناشد:بعد كده كان فيه تفجير مخزن ذخيرة .. الذخيرة بتاعتنا اللي هي سيبناها في 67 هما لموها كلها .. كانت ذخيرة بكميات رهيبة .. كانوا مشونينها .. ابتدت أوامربرضه إنها تتفجر الألغام .. الصواريخ ده كلها .. وفعلاً راحوا بعد كده عملنا عملية الأسير.. اللي هي كانت أول عملية اشترك فيها .. اللي هي من عند جبل مريم في الإسماعيلية.
عمروالليثي: يعتبرونها أول عملية إغارة ويفتخرون بها لأنها كانت أول عملية بالزي العسكري ولا ينسونها لأنهم نجحوا في إحضار أول أسير اسرائيلي ويعتزون بها لأن اسم "المجموعة 39" أطلق بعدها على مجموعتهم.
"محيي نوح": أول كمين حصل الكلام ده 26/8/68 كان الأفراد اللي قاموا بهذه العملية 21 واحد عملوا كمين في منطقة جنوب جبل مريم.
محمد عبده: فين جبل مريم ده .. الناس عاوزة تعرف فين جبل مريم .. عشان تتكلم انهارده لازم تقول الموقع ده فين .. آخر حتة من بحيرة التمساح اسمها طوسون .. بعد طوسون أصادها فيه حاجة اسمها الجندي المجهول .. بعد 2 كيلو أو 4 كيلو هنا جبل مريم .. اتعمل كمين لقوات العدو اللي بتمر من طوسون إلى الدفرسوار.
"محيي نوح": العدو كان بيتحرك باستمرارعلى القناة بين المواقع اللي عاملها.فكان بيأمن المواقع ده بتحركه على القناة .. فكان بيتحرك.. رصد هذا المكان .. فكان بيتحرك في هذا المكان بعربيتين جيب .. المجموعة قالت لازم تعمل كمين للعربيتين الجيب دول .. عملت كمين في منطقة جنوب جبل مريم ..أعد ماجد ناشد ظابط بحري ومعاه 2 من البحرية.
ماجد ناشد: نزلت أنا في المية في الأول .. أنا والله يرحمه الجيزي وغلوش الله يرحمه .. اتنين صف ظباط كانوا وأنا الظابط الوحيد اللي فيهم ونزلنا عوم .. وعدينا اليمة التانية أمننا الساتر الترابي .. مفيش حد مستنينا واديتهم إشارة بالبطارية .. عدوا بقية المجاميع باللنشات.
"محيي نوح": عدوا في البداية .. بعد كده وبعد ما عدوا هما أمنوا المنطقة هناك .. بدأوا تعدي باقي المجموعات .. عملوا .. حفروا حفر برميلية في هذه المنطقة.
أحمد رجائي عطية: كان قايم بها كمجموعات اقتحام عصام الدالي - الله يرحمه - اسلام توفيق - ماجد ناشد .. تلت مجموعات اللي هي ككمين .. مجموعة ساترة كنت أنا .. قائد العملية كلها طبعاً إبراهيم الرفاعي.
وئام سالم: كان معاهم الشهيد عصام الدالي هو اللي حط الألغام .. وكان إبراهيم الرفاعي كان واخدني أنا وصف ظابط المجموعة من غرب القناة .. غرب القناة في المنطقة ده ضيقة شوية.
ماجد ناشد: حطينا الألغام وتلت مجاميع .. كل مجموعة فيها آربيجيه، والألغام حطيناها تحت والباقي معاه البنادق الآلية .. جابوا العربيات من بعيد جايه من الجنوب طالعين للشمال .. تمشي بسرعة جامدة .. بيبقوا خايفين يعني لحد يكون قاعدلهم وعربية سريعة جداً وعربيات جيب أصلاً خفيفة فأول عربية عدت اللغم مانفجرشش فيها لأن العربية لما تجري بسرعة وزنها بيخف علاوة على إن الأرض رملة فاللغم هبط معاها .. ماشغلش الدايرة بتاعته .. المفروض فيه طاقية فوق بتنكسر قوم يشغل الحركة الميكانيكية بتاعته اللي هي بتخليه ينفجر .. اللغم هبط العربية التانية جاية وراها بسرعة خفنا إنها تعدى هي كمان ومانفجرش .. يبقى العملية باظت هما كلهم عربيتين بس .. فأوامر للتلت مجاميع .. كل واحد يضرب آربيجيه في العربية التانية في نفس الوقت اللغم انفجر .. فبقى لغم انفجر في عربية جيب و3 آربيجيه.
موسيقى مع عرض صورة لمعركة بحرية
ماجد ناشد: فنزلنا عشان نجيبها لقينا العربية والأجهزة تسيح جواها واللي فيها أشلاء ومفيش الجهاز اللاسلكي سايح ومفيش أوراق والكلام ده كله .. العربية التانية دخلت في الضلمة وطفت أنوارها على مسافة يعني .. الأولانية اللي عدت.
"محيي نوح": قتل 6 من العدو ما تعورش من عندنا ولا واحد .. جابو أسير وهذا الأسير جريح جه أسير .. ده أول أسير تحصل عليه القوات المسلحة في هذا الوقت.
ماجد ناشد: واحنا بننسحب لقينا واحد بيئن .. الله طب مفيش حد ضرب علينا .. مين اللي اتعور فلقينا الاسير الإسرائيلي ده اللي جبناه عسكري ورانا ما بينا وما بين المية .. ما بين الميه يعني إيه .. يعني انفجر اللغم والتلاتة الآربيجيه نطرته من تحت من ارتفاع من تحت 20 متر وعدى من ورانا .. وبقى ما بينا وبين المية .. يعني إياك الواجد يعيش بعد كده .. بس لقيناه صاحي .. جري قوام وحطيناه في قارب وعدينا بيه على مستشفى القصاصين .. أعتقد .. آه .. وتوفي
موسيق وعرض صورة للشهيد عبد لمنعم رياض
عمرو الليثي: الفريق عبد المنعم رياض كان حريصاً على أن يتواجد يومياً بين صفوف قادته وضباطه على الجبهة .. وبين ما كان متواجداً في إحدى الكتائب بالقرب من شرق القنال بالإسماعيلية ركز العدو ضرباته بعنف على تلك الكتيبة لتصيب إحدى القذائف الفريق عبد المنعم رياض ويستشهد ويصبح 9 مارس يوماً للشهيد.
موسيقى وعر لصورة لجنازة الشهيد عبد لمنعم رياض
أحمد رجائي عطية: طبعاً استشهاد عبد المنعم رياض .. ده كان راجل بالنسبة لنا قدوة ومثل عالي جداً لاستشهاده .. أثر فينا جداً .. والحقيقة كان يرجع هذا الشئ بعد كده لعظمة القيادة السياسية في هذا الوقت .. إن أي حاجة كان بيترد عليها .. يعني .. فلما استشهد الشهيد عبد المنعم رياض جت الأوامر بالانتقام من الموقع اللي طلعت منه دانة الهاون اللي أصابت الشهيد عبد المنعم رياض.
وئام سالم: ده كان تعليمات القيادة .. المجموعة 39 قتال تخش نفس الموقع وتغير عليه .. تغير يعني نروح لغاية الموقع ونهاجمه ونحتله ونجيت عنه معلومات أو أسرى أو سلاح .. أو كده.
محيي نوح: وده أول إغارة تتم على القنال .. عبد المنعم رياض استشهد في 9 مارس 69 احنا عملنا العملية بتاعتنا يوم 19 أبريل 69 .. يعني بعدها بحوالي شهر.
أحمد رجائي عطية: ابراهيم الرفاعي خد تلقين .. جه قالوا ليا وللشهيد عصام الدالي على أساس أنا هاحط الخطة .. اتحطت الخطة .. رحت استطلعت المكان رجعت عملت ماكيت .. يعني أو موقع مُشابه بالظبط.
محيي نوح: الموقع كان عبارة عن 4 دشم حصينة جداً .. دشم .. الدشمة كانت عبارة عن إيه .. الدشمة عبارة عن مكان كبير والمكان ده مُحصن تحضين جيد جداً فيه إيه .. فيه شكاير رمل زائد شبك زائد شكاير دبش زائد- فلنكات سكة حديد .. زائد قضبان سكة حديد .. يعني مايقدرش يعني .. رهيب .. تحصين جامد جداً .. وبعدين الأربع دشم دول موصل بين الدشم من الخنادق .. دشم موصل بينها وبين بعض بخنادق .. كان تحركه بين الدشم من الخنادق ده .. في المنطقة اللي في الوسط فيه منطقة شئون إدارية وبعدين فيه منطقة للخلف .. منطقة إمداد.
أحمد رجائي عطية: قعدنا نتدرب على هذا الموضوع .. مطولش كتير يعني .. بس قعدنا نتدرب على الهجوم على هذا الموقع .. أنا متهيألي .. يعني عدة مجموعات .. هما كانوا أربع مجموعات مجموعة قطع ومجموعة قيادة .. أنا متهيألي من كترالتدريب انضميت للناس بالخطوة هايمشوا الخطوات وهايشتبكوا .. يعني اللي أقصده انهم اتدربوا تدريب كامل.
موسيقى مع عرض صور للتدريب العسكري
أحمد رجائي عطية: يوم العملية خدت الناس وطلعنا فوق برج الآرشاد .. وريتهم الموقع وقلتلهم حتى لو هو بالظبط زي اللي اتدربنا عليه فلان هايبقى هنا وفلان هنا .. فلان هايبقى مجموعة قطع وبعدين تنضم تاني للقتال .. كان الكلام ده حوالي الساعة واحدة واللا اتنين بالليل على آخر ضوء كنا في المنطقة بتاعتنا اللي هي في الضفة الغربية مش بجهازنا القوارب حوالي الساعة 9 مساء ابتدينا نتحرك هي 3 كيلو من الشط من بحيرة التمساح 3 كيلو .. نزلنا جنوب الموقع من نقطة الإنزال جنوب الموقع حوالي 150 متر.
موسيقى عسكرية
عمروالليثي: اللواء محيي نوح أحد أبطال المجموعة 39 وقيادتها وأحد أبطال عملية التمساح الأولي التي قادها المقدم ابراهيم الرفاعي للثأر من موقع العدو الذي انطلق منه القذائف التي أدت إلى استشهاد الفريق عبد المنعم رياض ورفعت أول علم مصري في عملية التمساح الأولي.
محيي نوح: احنا كنا مُدربين تدريب جيد جداً على العبور.. جربنا في النيل .. جربنا في بحيرة قارون ..اتدربنا تدريب جيد جداً ، وبعدين يوم 19 4 في آخر ضوء كنا 64 فرد .. فيه 6 قوارب من مدينة الاسماعلية بدأنا نتحرك بعد ضرب المدفعية على الجبهة كلها.
موسيقى وعرض صورة للمعركة بالمدافع
محيي نوح: بدأنا نتحرك .. مين بقى اللي بيتحرك .. المجموعات كانت مين .. أولاً كان معانا العميد مصطفى كمال .. كان الأب الروحي للمجموعة وكان على الضفة الغربية هو بناخد المعلومات ويدينا المعلومات ..كان يقود الشهيد إبراهيم الرفاعي .. أحمد رجائي عطية كان قائد المجموعة.. وأنا قائد مجموعة ووئام سالم قائد مجموعة ومحسن طه قائد مجموعة .. وكان موجود مع موجود في الضفة الغربية برضه رفعت الزعفراني .. محسن طه كان قائد مجموعة وكان هايحط الغام في الخلف عشان مفيش الدبابات لما تيجي أو لما تتحرك تضرب في هذه الألغام .. وبدأنا نتحرك ضرب مدفعية شغال احنا بالقوارب أبحرنا بالقوارب.
عرض صورة للقوارب البحرية مع موسيقى
وئام سالم:كل قارب فيه مجموعة صاعقة نازلة من 39 قتال نازلة على الموقع .. نزلت المجموعات .. مجموعة بقيادة الشهيد الرفاعي الذي يقود كل العملية .. مجموعة بقيادة أحمد رجائي عطية .. مجموعة بقيادة محي نوح ومجموعة بقيادة محسن طه ومجموعة بقيادتي أنا .. كل مجموعة حوالي 12 جندي .. فيه 12 فيه 13 جندي .. داخلة على دشمة .. الدشمة مبنى من الخرسانة المسلحة المُقواه جداً .. يعني القنابل تيجي على الدشمة مابتعلمهاش حاجة، بتبقى حوالي 20 في 20متر وهو تحت الأرض كمان 20 متر، ومُجهزة بإعاشة لو اضربت بتتقفل البابان عليها وبتعيش فيها لما يكون الضرب جامد .. فلما ابتدا الضرب كان المقصود بيه انهم يغطسوا أو ويدخلوا عشان ما يتعرضولناش واحنا داخلين .. واحنا المجموعات بتتقدم.
عرض صورة للزحف وموسيقى
محيي نوح: بدأنا نتحرك إلى جنوب الموقع .. نزلنا جنوب الموقع بحوالي من 100 إلى 150 متر.. إبراهي الرفاعي ايه ده قال للعميد مصطفى كمال يرفعوا ضرب المدفعية عشان نقدر احنا نقدر ندخل على الموقع .. اترفع ضرب المدفعية .. بدأنا نهجم على الموقع .. دخلنا على الموقع كل واحد كان معين ليه .. دشمة معينة يدخل عليها .. بدانا نتعامل معه العدو.. أنزلنا العلم الإسرائيل ولعنا مناطق الشئون الإدارية الداخلية حصلنا على بعض الاسلحة .. كانت قوة الموقع ده 40 فرد قضينا على قوة الموقع بالكال ال 40 فرد الموجودين في الموقع .. قعدنا في الموقع لمدة ساعين الى أن بدأت تحركات العدو فقالو لنا .. تعليمات جت لنا بان احنا ننسحب .. احنا نفذنا المهمة بتاعتنا .. الموقع مولع .. أهل الإسماعيلية شايفين منظر قدامهم من اجمل ما يكون الموقع اللي كان بيضربهم مولع فكان الكل كان بيقول الله واكبر.
موسيقى مع عرض صور للزحف تحت الأسلا ك ا لشائكة
وئام سالم:فيه واحد داخل على الدشمة بتاعته بأفراده وبعدين بنروح راكبين بقى الدشمة ونخش الدشمة من الداخل .. وفيه فتحات من الداخل بنقول عليها المشغل .. تبقى فتحة بعرض الدشمة ممكن تكون 5 أو ستة متر بارتفاع 30 سم أو 40سم بيطلع منها الرشاشات والعدو يهاجم منها .. فكان دورنا ان احنا نهاجم نبتدى نرمي له قنابل يدوية داخل الدشمة ونعمل عبوات دخان عشان ما يطلعش.. الي طلع اتعاملنا معاه واللي مطلعش ومات تحت هو نصيبه يعني .. في الوسط أنا ركبت دشمة كل مجموعة ركبت دشمة.
أحمد رجائي عطية: كل واحد وصل فوق الدشمة اللي هو هيقتحمها صدرت الأوامر بالاقتحام لكل الدشم في وقت واحد .. تم تدمير الموقع بالكامل وتم جمع الأسلحة اللي هي استولينا عليها .. كانت الصعوبة مش في العملية .. الصعوبة انهم ينسحبوا ويسيبوا الموقع.
محمد عبده: وفيه معانا ظابط صغير اسمه وئام سالم .. وئام سالم ده أبوه شهيد .. الشهيد عبد السلام سالم دفعة جمال عبد الناصر وأمه أم الأبطال .. لأنهم هم 4 ظباط .. كلهم ظباط .. وئام سالم في المعركة ده دخل على دبابة كانت موجودة داخل موقع .. كان بيفك رشاش نص بوصة وقام مارضاش يسب لغاية لما جاب المدفع وحط قنبلتين في البتاع ده عبوتين نافسفة ونسف العربية.. الناس كلها ماتت .. ال 40 واحد بتوع الموقع كلهم ماتوا.. لاقيت عربية نص جنزير تحت الموقع فكلمت .. كان معانا أجهزة لاسلكية صغيرة الحجم يعني .. كلمت الشهيد الرفاعي قلت فيه عربية نص جنزير هنزل لها .. قالي لو فيها رشاشش هاته .. كان معانا عبوات حارقة اسمها السيرمايت ده عبارة عن مركب بيطلع 3000 درجة مئوية وعربية كانت فول تانك .. تانكات البنزين كانت مليانة بنزين على الآخر.. فيها حوالي 20 صفيحة بنزين جبت منها الرشاش وحدفته لبره وبعدين جبنا الذخاير وهي كان فيها عبوات في الأرضية مارضناش ناخد منها عشان ممكن تكون مُجهزة بأشراك خداعية .. وولعنا العبوات وحططتها جوه التانكات لغاية لما العربية ولعت .. قفزت من العربية ورجعت للدشمة تاني ولقيت المجموعة اللي جنبي جابت علم وجابت تليسكوب بتاع رؤية وانا جبت رشاش بذخيرة وابتدت العربية تنفجر بعد النيران اللي اشتعلت فيها .. فيه من الصور الموجودة مع حضراتكم جريدة الأهرام نشرتها والصورة على بعد 3 كيلو باينة الإضاءة بتاعة النار بتاعة العربية بعد 3 ساعات لسه مولعة .. ال 20 صفيحة مولعة يعني 20 في 20 .. 20 لتر في 20 صفيحة ابتدت تنفجر .. ابتدت كل مجموعة تبلغ انها تعاملت مع أفراد الدشمة بتاعتها.
كان عندي شاويش اسمه أبو ريه طلع على الساري والساري أملس ماتعرفش طلع إزاي طلع وجاب العلم بتاع الموقع .. عملية كانت حاجة غريبة قوي .. روح المصريين.
اغنية اصرخي صرخة بلاد .. اصمدي ساعة الألم
ماجد ناشد:الموقع احتل تماماً واتضرب عليه قنابل يدوية جوه الدشم واترمى جواه نابلم ونزلنا العلم ورفعنا العلم بتاعنا .. يعني سيطرنا على الموقع تماماً .. ماكنوش متوقعين ان احنا نعمل حاجة فأول مرة كانت عملية ناجحة وكانت مفاجأة ليهم .. مش متوقعين ان احنا نعمل عملية اقتحام لأربع دشم مسلحة.
وئام سالم: ابتدا العدو يبعت مجموعة احتياطية تاني تندفع بالدخول علينا احنا .. كان محسن طه بجموعته اندفع شرقا في اتجاه المجموعة ده وراصص ألغام وضربت عنده دبابتين كمان .. فالعدوالاحتياطي بتاعه ما تقدمش أكترمن كده وانسحبنا احنا وكانت اصابات بسيطة جداً .. يمكن محيي نوح .. شاظية أو حاجة كده.
أحمد رجائي عطية:أنا فيه واحد تاني اتصاب مساعد اسمه كان أياميها باتشويش اسمه الجيزي ده حتى واحنا في وسط المعركة .. قلت فين .. شاورلي على ضهره .. تحت ضهره وشوية فقلت انزل تحت كده على ناحية المية وهتلاقي القوارب هناك .. واستمرينا في المعركة .. ببص جنبي في وسط المعركة لاقيته جنبي بيقاتل .. يعني وهو واخد الطلقة في ضهره ويمكن جنب سلسلة ضهره واستمر في المعركة.
موسيقى وصورة للنقيب محيي نوح
عمروالليثي:الرئيس جمال عبد الناصر كان حريصاً على تكريم أبطال عملية التمساح الأولي وقام بزيارة النقيب محيي نوح في مستشفى المعادي خلال اصابته.
محيي نوح:انا أصبت في هذه العملية فلما أصبت في هذه العملية خدوني على قيادة اهتمت بي جداً.. إبراهيم الرفاعي اهتم بيا جداً.. على نصر كان معايا هو ورفعت الزعفراني خدوني على مسشفى القصاصين .. في مسشفى القصاصين عملوا لي العلاج اللازم .. تاني يوم الصبح طيارة هيلوكبترخدتني على مستشفي المعادي .. في مستشفى المعادي كنا أنا ملوث بالدم وحالتي مش مظبوطة نتيجة للهدوم مقطعة وملوث بالدم .. فاللواء محمد أحمد صادق كان مدير المخابرات الحربية في ذلك الوقت.. وكان الأب الروحي لهذه المجموعة فبعت جاب لنا غيارات .. وكان معايا واحد تاتي اسمه الجيزي كان مساعد .. فجالي وطلعت في أودتي فوق وجه اللواء محمد أحمد صادق وقالي عد نفسك إن في زيارة مهمة هاتيجى تقعد معاك .. في آخر ضوء قالي عد نفسك نفسياً .. الرئيس جمال عبد الناصر ها يجي يعرف منك ماتم خلال العملية .. فوجئت أنا وضابط صغير فوجئت الرئيس جمال عبد الناصر جاي ومعه القيادة السياسية ومعاه الفريق محمد فوزى وزير الدفاع وجه اللوا محمد احمد صادق وعرفه علي النقيب محيي نوح من الظباط الممتازين في المجموعة 39 قتال مجموعة أو مجموعة الشهيد ابراهيم الرفاعي .. قعد يسألني .. الرئيس جمال عبد الناصر وقتها.. ايه اللي تم .. سأل الدكاترة ممكن تتكلم معاه .. اتكلم معاي حاكيتله ما حدث .. فطلب مننا ان نزيد من هذه العمليات عشان باستمرار نعمل قلق وننزل أكبر الخسائر للعدو.. وكانت ده رفعت رحنا وروح القوات المسلحة في الوقت ده بطريقة جميلة جداً.
محمد عبده: يوم التمساح ده استدعاني ابراهيم الرفاعي وقالي أنا عاوز محمود الجيزي .. ماكناش نعرف عمليات إيه .. قلت له يا افندم اتجوز يوم الحد.. انهارده الاتنين والتلات والاربع قالي تسافر تجيب الجيزي من الإسكندرية .. خدت العربية مع الحاج عبد المؤمن افتكروطلعنا على اسكندرية طب أنا هاطلع للجيزي وهقوله إيه .. هو ساكن في شارع ..... في اسكندرية في حتة اسمها الابراهيمية .. في أول الشارع فرن جبت تورتة باحدى عشر قرش وطلعت بقى .. قلت أنا جاي أباركلك وبتاع بقى .. مراته بصت كده يعني من كلامى قال لها ده محمدعبده .. فعاوزاتكلم معاه .. فقلت له يا اخي ماتخلي العروسة المدام تعبانة .. جابت لنا الشاي على البلكونة .. قلت تعالى نتكلم في البلكونة .. فقلت أنا مُكلف ان أنا اخدك معاي مصرانهارده .. العربية بتاعتنا تحت في الشارع .. الشارع الجانبي .. تنزل معاي دلوقت حالاً .. أنا هستأذن استناك نص ساعة تكون جاي .. وحضرالجيزي ونزل وجينا مصرالخميس الصبح جه تمام للشهيد إبراهيم .. فالشهيد إبراهيم قال له معلش يا جيزي .. في حاجة بسيطة هانعملها .. كانت العملية يوم السبت .. وأصيب محمود الجيزي في هذه العملية مع محيي نوح، وهو محيي نوح أصيب برضه بس ده ولم يبلغ زوجته عن إصابته.. قعد شهر بالكامل واخد طلقة في فخده اليمين وخارجة من نهاية الفخد إلا بعد حوالي 16 أو 17 يوم لما خرج من المستشفى وخرج لمراته .. ده جسارة.
فاصل وأغنية "سكت الكلام والبندقية اتكلمت" لعبد الحليم حافظ
عمرو الليثي:كان هذا بعض ما قدمه أبطال "المجموعة 39 قتال" .. في الحلقة القادمة المزيد والمزيد من بطولات هؤلاء الأبطال أبطال "مجموعة 39 قتال" .. شكرا لكم وتابعونا في الحلقة القادمة إن شاء الله ...