أحمد عفيفي يكتب: إوعى تخلع ضرسك يا مرسي .. وأنت « واخد بنج »!!

د - علاء الأسواني الله يبارك له لخّص الوضع الراهن اللي احنا بنعيشه ونعاني منه في كلمتين فيهم الشفا .. ولأنه طبيب أسنان قال لك : عشان اخلع ضرسك لازم أخدرك الأول عشان ما تحسش .. وده بالصلاة ع النبي اللي بيعمله المجلس العسكري مع الريس مرسي .. هو كان عارف إن مرسي حيغلب شفيق ويبقى رئيس .. قام أصدر قراره بحل مجلس الشعب وقبلها عمل الإعلان الدستوري المكمل والمكبّل لصلاحياته.. عشان يُظهر ضعفه أمام كل اللي انتخبوه .. بمعني " شوارعي " عايز يقول لنا : مش ده اللي انتم عايزينه .. خلّيه بقى ينفعكم .. عامل فيها " دكر " وبيقرر من نفسه عودة مجلس الشعب .

طيب يالله يا محكمة يا دستورية قولي " كلمتي " .. قصدي كلمتك .. قرار باطل ولاغي وارجع يا عم مرسي في كلامك .. أصل انا -والكلام للمجلس العسكري - فاهمك وعاجنك وخابزك .. عايز تسحب التشريعية مني .. بعينك.. هو انا عبيط .. كل شىء متخطط له صح .. سيبنا مجلس الشعب يلعب ويفرح ويقبض وياخد " سُلف " وقرار حله في مكتب الجنزوري .. يطلع في الوقت المناسب .. لمّا تاخده الجلالة ويفتكر انه مجلس شعب بجد .. مش احنا اللي طبخناه سوا .. من أيام استفتاء مارس 2011 بتاع نعم ولأ .. اللي لولاه كان الإخوان أكلوا البالوظة .. بس البالوظة موجودة في التلاجة .. وقت ما نحب نطلعها ونأكلها لهم حنطلعها .. وادينا طلعناها .. وافرحي بقى يا ولية ووشك في الحيط وقفاكي ليا .. لعب على كبير واحنا ماعندناش كبير .. الكبير عندنا اللي بيسمع كلامنا واللي يجي على حجر عمه .. حيعمل فيها ابو عرام يروح يغني " ظلموه " ويترحم على عبد الحليم حافظ.


طيب اسأل سؤال واجاوب عليه بنفسي : لمّا المجلس العسكري جامد اوي كده وبيعمل اللي هو عايزه .. ليه ما خلاش شفيق ينجح .. ومرسي ياخد المجري ؟ .. ليه صحيح .. كان بإيده مع كل الاحترام والتبجيل للجنة الانتخابات .. لكنه خاف .. ايوه خاف .. مش حيقدر يسيطر ع الوضع لو الإخوان واللي بيكرهوا شفيق حرقوا البلد .. إنما بتوع مدينة نصر والمنصة ، ومعاهم القفا المقطف توفيق عكاشة دول بتوعنا .. إرجعي يابيضا وروحي لمامتك ولمّا نعوزك نجيبك تاني .. قام قالك إبعد عن الشر وغني له .. بس غنّي له بمعلمة .. واقرص القرصة من تحت لتحت وقول أه يا دراعي .. كأنك انت اللي اتقرصت .. لعب حاوي وحلّق حوش ونجح فيه ابن اللئيمة .. وخلى منظر الرئيس المنتخب مش حلو وقسّم الناس نصين .. زي ايام الاستفتاء بتاع نعم ولأ .. نص مع مرسي .. ونص مع القانون وضد الريس.



ولسه ياما في الجراب يا حاوي .. ورقة تانية بنت شياطين في درج مكتب المشير .. لما الدستور اللي إحنا عايزينه يتعمل .. مجلس الشعب " المنحل " يتحل تاني من تلقاء نفسه .. ومعاه - ودي بقى باك ورد وفي الجون - مرسي بره اللعبة .. مفيش رئيس ، ونعيد الماتش ، قصدي الانتخابات تاني .. وبالقانون ، واسألوا المستشارة تهاني الجبالي .. احنا بتوع القانون .. بنحترمه ونقدسه .. ونلّونه ونزوّقه وكله بالورقة والقلم والآلة الحاسبة .. وخلّي بقى الدستوريين بتوع مرسي يقولوا اللي يقولوه .. عندنا زيّهم واكتر يقولوا اللي احنا عايزنهم يقولوه.


بس الورقة دي مش حتطلع دلوقتي .. هتطلع وقت اللزوم .. حتعمل فيها عنتر يا مرسي وتسمع كلام الثوار ، وعايز تنتزع صلاحياتك من الكبير .. حنطّلع الورقة .. لمّيت الدور وعرفت حجمك بالضبط .. الورقة في الدرج .. وتهاني الجبالي في مكتبها : الو ياست الكل .. تعالي .. حتيجي .. قبل ما تاخد اى قرار ارجع للكبير الأول .. انا الكبير .. عملت لك الإعلان الدستوري المكمل وخلّيتك تحلف اليمن حسب الإعلان قدام الدستورية العليا .. يعني م الأخر اعترفت بيه .. وانا اللي حاعمل لجنة الدستور .. واجيب حبيبنا السكّرة يحي بيه الجمل .. ايوه بيه وابو البهوات كمان .. مش بيسمع الكلام ؟ يبقى باشا وشربات ومية ورد .. والوحيد اللي له حق الاعتراض انا .. الكبير .. واللي يقرر ميزانية الدولة برضه انا .. واللي يقول ده يخرج من السجن وده يقعد .. برضه انا .. واكتر من كده .. حنوصل لدرجة انك لو عايز فتة باللحمة الضاني في بيتك ووسط عيالك .. أخليك ترجع لي الأول واشوف الميزانية تسمح ولا لأ .. انا الكبير يا مرسي .. عاجبك .. ولا اطلع الورقة؟!!


طبعا المجلس العسكري مش من السذاجة انه يعمل كل اللي بيقوله ده بالبجاحة دي وع المفتشر .. لكنه زي ما بيقول علاء الاسواني : تاخد البنج الأول واخلع لك ضرس العقل ، وانت مش حاسس ونايم " متبنج " بتحلم وتاكل رز مع الملايكة .. وتفوق ياحبة عيني تلاقي ضرس العقل اتخلع .. عشان متعرفش تفكر أبدا .. وساعتها حتبقى راجل عسكري " صفا .. انتباه.. استرح ".


عشان كده يا ريس مرسي واسمع كلام علاء الاسواني اللي عايز مصلحتك بجد .. لو ضرسك بيوجعك اوي ومش قادر تستحمل اخلعه بإيدك انت ومن غير بنج ..أوعى حد يبنّجك .. صحيح البنج مفيد وبيخليك متحسش بحاجة .. بس في حالتك انت البنج مضر جدا .. يضيّع البلد .. وانت نايم بتاكل مهلبية مش مع الملايكة .. مع الشياطين.


اسمع كلام الأسواني مع محمود سعد .. والله بتكلم جد .. شوف الحلقة على اليوتيوب .. الراجل ده - اقصد الاسواني - بيحب مصر اوي ، ومشرّف بلدنا في العالم كله .. ومش عايز حاجة .. لا طمعان في منصب وزاري - وان كان قدها وقدود - ولا نفسه غير في حاجة واحدة .. يشوف مصر أحسن بلد في الدنيا .. واذا كنت مش عارف .. هو أساسا طبيب اسنان .. ولو ضرسك " نأح عليك " .. خلّيه هو اللي يخلعه لك .. حيديك بنج طبعا .. بس بنج عن بنج يفرق .. وربنا يرحمك من البنج الميري .. بدل ما يخلع ضرسك .. يخلع روحك .. وانت مش حاسس.


خلص الكلام يا ريس مرسي .. وعقلك في راسك تعرف خلاصك؟