سمير عبد الباقي يكتب :شمروخ الأراجوز

كل شهورك.. يونيه
داري لهاليبك جواك
جمرك مين ح يحسه سواك
خبي أحزان العمر المهزوم.. راصداك البوم
راهناك بلسانك علي قوت اليوم
مستنياك تنهش لحمك
أول ما ح تروح في الموت أو في النوم
عقلك في جنانك - صبحك زي مساك
يونيه مش ماضي!
يونيه بيلحّن في ظل النظم الدولية الحرة - غنواك
واللي اكل خيرك في الحوجة استغني بغيرك في الهوجة
بيدو زن لك علي لحن عداك..
{{{
اصحي لنفسك ياعكروت - الدم بقد البرغوت
اخرج م الوهم المكبوت مستضعَف أو متعافي
متعكر أو رايق صافي اكشف سر المخفي الخافي
كل صوابعك طول عمرها في الشق
زورت لحد الخنق
لا شفعت لك (أيوه) ولا نفعت بك (لأ..)
شلت جبال أشواك الحق
في عالم مش عايز غير الحرق
طنطا بتنكر باب الخلق.. دقهلة بتكفّر ديروط
ظرفك مشروط - ملو هدوم الخلق هموم
الجهل لوحده موحدنا للموت
انكشفت كل الأوراق/ اللعب صبح ع المكشوف
طابا مش أعز من الوراق ولا شرم اغلي من كفر بهوت..
كل هزيمة جديدة قديمة بترجع بنت بنوت
أزمة وبتعدي والجرح كما الفَرْح بيبرق ويموت
كل شهور زعماءك يونيه
وكل المدن اللي انت عيشتها حبيتها
هجرت كل خرايط الأرض وماتت
أو.. في طريقها للموت..
الثورة الظاهر ما كانتش أكتر من..
(بانده وبنورة وبوستر وشعار هلفوت)
وجميع المدن العربية ما كانتش إلا جواري
عريانه ف بتارين بيروت
(5 يونية 1982)
رباعيات.. وربع
بلاد بتشفي مفارقة لكن عديمة المجاز
ماتت دراما البشر والشعرا جابت جاز
تايهة في بحور الخرافة من كراهة العلم
والجهل صوّرها فيلم كغَاية في الإنجاز
{{{
شايخ وأهبل وماشي يلُقّ ع العكّاز!

ما فيش أعجوبة انقَح من شبشب زنوبة للصراصير
لا بينفع ويّاها تحليل ولا تعليل ولا تفسير
والكل بيفتي صحافة وشركات جمعيات بورصات
والتعلب فات ميت مرّة متنكر بشعارات التحرير
{{{
والزّنوبة اتخنقت في الحمام متعشّمة في التّغيير

ما عادش صاحب تفضفض له وتشكي له من الحرمان
والشوق لحضن الصداقة والحاجة إلي النسوان
عندك أسامي وزحام أرقام كذا نوته..
خرسا ومكبوتة بلا أحاسيس ولا وجدان
{{{
يا خسارة ضاع عمرنا في معاشرة الأحزان

صوتك بريء نبرته صحّتني من غفوتي
هزت مشاعري خرجت أنادي حريتي
لقيتني مع صُحبة باغرق في بحور الناس..
ملكني إحساس كإني رجعت من غربتي
{{{
وسمعت بلدي بتعزف بالوفاء غنوتي!

(فتي مات بين الطعن والضرب ميتة)
شيلنا ذنوبها لأجيال (شعباً وسلطةً)
فلا اللي سمع الخبر قدرت عيونه تنام
ولا من عليه الكلام بجريمته راح (يفلتن)!
{{{
إذ زي ما تدين تدان يوم ما ح نرجع وطن
اكتشاف
في الزمن الماسخ
فيه ناس يركبها الوسواس
يلبسها الشيطان الخاطي الخنّاس
يغلبها العرق الواطي الدساس
فتبيع الناس - ياسبحانه العاطي - للناس
وناس زي التور الدايخ
تستحْلي الفعل الخايخ
فرحانةَ بالقول البايخ
سكرانة بالشعر الشايخ
راضية بخراب الذمّة وكتْم الأنفاس
{{{
لكن الناس.. الناس..
مهما همْدِت في قلوب الخلْق الهمّة
.. وخمدت نار الإحساس في الأمة
بتقدر في عز الغمة
برضه - ياسبحانه العاطي -
تَحِب وتَفضَل ناس!!
من نهنهات المشيب
سألوني إمتي (الجماعة) يكرموا الشماريخ
أنا قلت كلك نظر - حتي ا لقلوب بتشيخ
وبكره ترجع وطن - كتابها ضمايرها
واللي حاصرها نحاصره دي مصر أم التاريخ
{{{
فيها الضمير ابتدا.. انما فيها العوج تما خيخ
شمروخ خصوصي
مثقفين الثقافة ح يعملوا مؤتمر
لو كان طبيخ واستوي كان العجين اختمر
لكن الشذوذ اللي ماشي في القلوب والعقل
ح يخلي أبوجهل يظهر في الخرابة قمر
{{{
.. واللي استتر في الخفا يبرُق كأنه ظهر
كلام بسيط في السياسة
عملوني أستاذ وأنا يادوب ولد تلميذ
في مجالس الجد بانزل هلفطة وتقميز
وإن كان بابايا بضربة حظ خلفني
مصرّ يقرفني ليه بكل دي مهاميز
{{{
.. دي بير بلا قعر.. فاكره ليه طِعم ولذيذ!!
وكلام تاني في السياسة
مش خص خصوا للتجمع حصة في الشوري
والوفد حتة كبيرة بس في الكورة
ومعاها حسب الأوامر كوتة للستات
وشوية أقباط موالي يكملوا الصورة..
{{{
وإياك تكرر هبالة خالتك المحظورة
المضيفة
مصطبة شعبية بحب مصر مكيفة
تصاحب صدور هذا العدد من الشمروخ الذكري الخمسون لمقتل (شهدي عطية الشافعي) المناضل المصري بعد أن تسرب خبر مقتله تحت التعذيب ورثاه والده في وفيات الأهرام بهذه الأبيات التي جابت الآفاق في مصر والعالم فأوقف التعذيب
فتي مات بين الطعن والضرب ميتة
تقوم مقام النصر إن فاته النصر
وقد كان فوت الموت سهلاً فرده
إليه الحفاظ المر والخلق الوعر
ونفس تعاف العار حتي كأنما
هو الكفر يوم الروع أو دونه الكفر
تردي ثياب الموت صفراً فما دجي
لها الليل إلا وهي سندس حمر
فافتدي بموته المئات من زملائه المعذبين في (أوردي - أبوزعبل) الشهور طويلة راح خلالها ضحايا- منهم (رشدي خليل وعلي متولي الديب والطبيب فريد حداد) حتي كان يوم 15 يونيو 1960.،
وفي هذه الذكري يستضيف الشمروخ قصائد لوالد الشعراء فؤاد حداد عن الشهيد والجلادين. ويطالب معه بالتحقيق الحر الجاد في وقائع ما جري ليكون لبلادنا مستقبل لا يؤرقه شبح المجزرة!
تحت الثري ح أقلق مضاجعكم
أنا اللي تحت الثري ح اقلق مضاجعكم
ماضي وحاضر ومستقبل ح أراجعكم
أولاها من أولة مايو ومواجعكم
أنا كنت عامل وكان أملي حليب صافي
قاسي الملامح رفيق القلب أو صافي
بدأتكم بالسلام وطلبت إنصافي
آدي ولادي.. يتامي..
آمنا بالله وبالإنسان آمنا به
ولكن الوحش ما بيخلصش من نابه
دَاللي طلب منه وردية عمل في اليوم
وزيها لراحتنا وزيها للنوم
لاعاد ينام ولا يتقلب علي جنابه
لكن شهيد.. للأبد..!
رسمه انطوي في الليالي واسمه طاب ونقي
وكان علي الأرض نخلة رجع إليها نقي
ويومه مهما بعد وخياله مهما نأي
خالد علي المشنقة يقلق مضاجعكم
الأمريكانوس
القطر فايت بيقول تووت
والدم لونه بلون التوت
اتدألج اتدألج سحتوت
أناح اشتري بك فولية
{{{
أنا الولد (يونس) ننوس
الأمريكاني الأمريكانوس
اللي ما بيخافشي من الروس
لاعبوني عسكر حرامية
{{{
أنا الولد (مرجان) التيس
اللي عشق بنت الكونتيس قاتل وموش مسئول من حيث
الموت بيلعب لوتارية
{{{
أنا ولد أنا فحل عنيف
(عبداللطيف) مش عبدلطيف
مهمتي الموت والتخويف
والشوم بطاقتي الشخصية
{{{
وأنا الخليفة أنا المأمور
وأنا الملاك (سيد منصور)
نور في الظلام وظلام في النور
يعني مصيبتكم بالمقدور
{{{
وادي اللي كان بيقول ما أقدرش
أنزل طابور أنا ما اتمخطرش
راحت عليكم أيام العرس
آدي الحكومة الوطنية
{{{
إلا ويوم ولا يوم الغد
قال التاريخ: أنا شعري أسودّ
الأوردي قال: إيه اللي جد
أوردي ليمان أبوزعبل سد
كل البنا اللي بناه اتهد
بكلمتين.. شهدي عطية
مش عايز الفجر يطلع
مش عاوز الفجر يطلع
مش عاوزه يطلع يا عالم
دا كل ما الفجر.. يطلع..
أنا.. أنا البني آدم
{{{
بيضربوني في أبوي
وبيضربوني في أمي
مطرح ما باسني أبويا
مطرح ما باستني أمي
الضرب زي الشتيمة
علي حشاك الأليمة
كان ليه حواني حشاك
وترضعيني عشاك
وكل ساعة تقومي
تغيري لي هدومي
مضروب وحالق وحافي
كان ليه يا أمي بنقرا
كان ليه أروح المدارس
وأتعلم الأبجدية
ليه الكتب والفهارس
والامتحان والعيديّة
قولي لابويا اللي غارس
أكتر من العلم فيّه
(عبداللطيف رشدي) وارث
ابنك في جملة عبيده
عبداللطيف رشدي سيده
عبداللطيف رشدي فارس
راكب حصان الحكومة
راسم علي وشه بومة
تصرخ وراه الكوارث
وتمشي قدامه شومة
حلفت بالشومة ديه
وبدم شهدي عطية
حلفت بالدم يجري
علي (حنان) الصبية