شمروخ الأراجوز يقدمها سمير عبد الباقي

نبض السنين
في قلبي نبض وف يالعروق
من نبض ستة وأربعين
والعشرينات والخمسينات
من اللي جاي..
ومن اللي فات
من الدقايق والساعات
من السنين الألوفات
أنا الولاد
أنا البنات
أنا التلامذة - التلميذات
أنا الرجال السهرانين
علي المكن والموتورات
الفلاحين والأسطوات
أزهار بؤونة وبرمهات
وعلي المدقات البعيدة
عرق جبين الأبهات
وفي الشوارع العريضة
أنا رنين الهتافات
وكلامي زي النيل صريح
وفلْح.. كلْح.. ماهوش
رطان الخواجات
أنا خضار قلب البنات
أنا حنان الأمهات
أنا دفا الابتسامات
وأنا العشم في ما هو آت
أنا تاريخ نبض السنين
عمري ما يغلبني الموات
أنا.. أنا المصري أنا
لو يوم غلبني الكدب
يقتلني السكات
فاتفجّري يا هموم ليالي الصمت
فيضي أغنيات
دانا لو كتمت ف قلبي
ضاع عمري اللي فات..
غيطان الرياح
مصر - غيطان الرياح..
مصر - أصوات التلامذة في الصباح
مصر عابدين والمظاهرات القديمة
مصر - برديس - ملوّي - زفتي - جهينه..
مصر ميت سلسيل وشبرا
مصر شهدا الجامعة لأزهر..
مصر حلوان دنشواي كمشيش وسينا
مصر غنيوة الألم لحن الجراح
اللي عايشة العمر تتحدي الزمن
والأسي..
وسود الليالي.. والقدر
عمرها تزققني ألحان الحماسة..
أعشق الأحلام
ولا أخشي الخطر
مصر تعرف في السياسة..
عارفة إن الشمس فوق سينا
يطلّعها البشر..،
وكل عام وأنتم بخير
مرّت سنة ف حضْنكم «دَستوركو يا سْيادي»
كان هَمّكُم نَبض قلبي وحُبّكم زِوّادي
يا أهْل العَشَم مُش غَشَم كان شوك شماريخي
لسّه الهوَان التاريخي دَابحْني عليَ أولادي
يومي - تزيد غُرْبتي في هواكيِ يا بلادي!
مواطنة
كلّنا بنفرح لرخّ النطرةَ في يوم الغطاس
كلنا بناكل عاشورة وخضرة بالقلقاس..
كلّنا في كنيسَة أو جامع نقولوا «آمين!»
وننادي/ ندرِن يا حسين شي الله يا إلياس
ويلوّنوا البيض ولادْنا في شَم النّسيم بحَماسْ
ضعف البشر
باكره جنون الخلق في الأسواق
وبلادة الإحساس
وعشق الذات
باكره براءة وجوه الجهل والسراق
وسطوة التجار ما بعد الحرب..
والمكر والرغبة في لوي الإيد
باكره سكوت العبيد
والسادة بيشدوا حبال القيد
وباخاف قوي.. لما الكلام
يصبح ساعات الكرب في الواجهة..
والارتياب والنميمة
تصير بديل المواجهة..
ضعف البشر يسلمني للوسواس
والشك.. للأحزان..
نفسي تراودني أحتمي بنفسي
وأشيل علي قدي..
واكتم صدري ع الأنفاس..
لكني.. موتي لو أصير وحدي..
لأن عمري ما لقيت إنسان
يقدر في يوم الشدة يصلب حيلهُ..
إلاّ وكان في الحق ويّا الناس..
يشيل معاهم.. قد ما يشيلوا..
خربشة في القلب
الغنوة بتفرفر بطول اليوم علي لساني
كل اللي شايفه بيفْري كبْد وجْداني..
واكِلني قلبي علي أولادي وأوطاني..
وأنت ولا أنت هِنا..
كنّا زمان ع الفَرح والحزن متوافْقين
خافت كلاب السكك منا شمال ويمين
صبح الغَجر والبقر والعِرّه متّفقين
واحنا اختلف وفْقِنا
فرّقنا صاحب الغَرَض والاّ العَرَض والمال..
والا الحرام المرَض هوّ اللي قَلَب الحال..
والاّ كبرنا وخرّفنا وكنا عيال
عمر وفَلَت منّنا..
الآه بتحرق فؤاد اللي ما ينطقهاش
وكلمة الحق حرّة الندّل ما يطيقهاش
وح أعمل إيه؟ واللصوص اتْحاموا في الأومْباش
اتقاسموا في لحمنا
حرّفت ليه المعاني نسيت أماني الوطن
وبقيت تصدق حكاوي كل حاوي رَطَن
خيّبت فيك ظنّنا
إبدأ بنفسك وفوق.. القلب مستني
ممكن تزيح الغمام اللي عَماك عني..
تعلم القلب يعشق تاني ويغني
حسب وصايا أمنا..
اللي باعوها سَبايا في كل سوق حرّة
وهيّه سِت الصبايا الطيبة الحرّة..
مين علّمتنا تْقاسمنا الحلوة والمرة..
وعَطِتنا لون دمنا!
أمراض مستوطنة
ح تفكر تتعكر.. ومزاجك يتكدّر
فالأجدر أن تحذر.. تحلم أو تتذكر
هذي بلاد زهقانة.. لا مبارح هربانة
بالتاريخ عيانة.. ذاكر لها واتدكتر
أهاليك الخرفانة.. من جوعها فرحانة
لو باتت شبعانة.. علي الفقر ح تتحسّر
ضاربة المخ طبنجة.. شايفة المشمشة منجة
عقلها كان اسفنجة.. عصروها فاتحجر
علي قد ما تديها.. ح تدوسك رجليها
وإن طبطبت عليها.. ح تبيعك ع المكسر
الخوف خوخ راسها.. دوّخها ف وسواسها
واللي كتم أنفاسها.. تحمد له وتكبر
كدابة واصدقها.. علي عيبها باعشقها
الجحش اللي حرقها.. حمرقها واستحمر
صاحية نايمة تشخر.. تغرق أكتر وأكتر
فاكرة الليل ح ينور.. ولوحده ح يتغير
وتفوق م اللي هابلها.. وبالهايفة مبلبلها
تلقي اللي مقندلها.. في الزفة متصدر
حاميها ال.. حراميها.. اللي غّمي عينيها
علي كيفها بيرميها.. تحت كعوب العسكر
وبترفع له الراية.. حدوتة بلا نهاية
ميت لون الحرباية.. والقاضي شيخ منسر
وانت ياللي بتقرا.. في المزامير والبقرة
خايف ليه م الفكرة.. في السكرة بتقشعر..
شكشكة ع الماشي
ألفين سنة ترجموا الشيطان زلط وصخور
بتعبدوه في الظلام وتلعنوه في النور
لو كان حداكم ولو ذرة إيمان في القلب
كان ربنا داوي عيبكو بحجكو المبرور.
وماكانش سابكوا ضحايا المحاكمين بالزور
يا سيدي.. المليونير
حشيت جيوبك ومَلْيرْت القروش في البنك
ظنك فلوسَك تعوّض لك شعور الضّنك
شِبعت من كلّ حاجة وقاتْلَك الحرمان
ح تموت جعان م الطمع ولا تبطّل عَك
جافة مَنابْعكَ، ما دُمت علي القَفا بِتْنسَكّ
بكرة
بكرة ح تصبح كل الأيام.. ذكري..
.. كل الآلام تبهت
توضح كل الأحلام..
وتوِجّ الفكرة تمِدّ خطاوي الإنسان..
يا من تقدر تتخطي حدود الذات..
تفلت من شبك التفاصيل
والتهويل والجزئيات..
ح تشوف في عز الليل الدامي
أضعف ضو لقنديل
وح تلمح بين الخرايات
أطفال الشهدا بتكبر وتشد الحيل..
تِخْزأ عين المتناسِي والمتعامي..
افتح علي قد ما تقدر.. قلبك
اتحامي ف شعبك
تلمح في عز التعتير دربك..
واضح ورحيب ومؤكد..
ملو المسافات
وبوسع الأفق المترابي..
بيطيب جرح المجروح..
ويُرد الروح لليائس
ويعين البائس
ويواسي ضعف المتألم والأسيان
يفضح لوع الخوان..
ويزت جميع الحكام الكلمنجية المرايات..
كلام بسيط في السياسة
سلماً وحرباً علي حَجَر الكدبة يسنوا السكاكين
وعلي الحامي والبارد بيحطوا رقبتك ع السكين
وأما بيتهد القصر بيتهد علي دماغك..
وعلي صداغك في النصر تعلم جزم المهزومين
يا حسرة قلبك.. كام «يونيه» ح تتحمل يا مسكين
ليها شعب يحميها
ياللي لاخمين البلد بالكدب والكورة الخموها
انكتب من بدري علي إيدكم خرابها اخربوها
اللي جاي راح يبقي إيه غير اللي رايح؟
الروايح فَجة من باط الفضايح اكتموها
كل من جاهل أبوه، سارقها وبيلعن أبوها!!
من نهنهات المشيب
طول ما انت عايش ما بين الناس وناس حواليك
ح تحس للشعر معني.. وفايدة للشبابيك
لكن كتير تبقي ميت وانت مش داري..
هاري الحواري غنا ولا حد حاسس بيك
لكن في كل الحالات سر الحياة في إيديك!
طلعة الوطن
مزع ثياب الضحية
اطلع من تاريخك الأليم
من ليل سجونك الغبية
من ويل ملوكك الخطية
أطلق خيول أحلامك العصية
واجمع شتات أولادك الشقية
وشق صدر ضعفك القديم
لا تحتمي إلا بجموع الناس
تمتد بيك جدور طلوعك اللي جاي..
في الزمن وفي المكان...
عمره ما كان ولن يكون وطن عظيم
إلا وخطت خدوده صلابة المتراس
وأنا ياللي باكره مسيل الدم والأسية
باحب طلعة الأوطان...
من الجراح الأبية..
ورهافة الإحساس
الكمين لمحمد صالح
يتصادف أنهم يستوقفونه
كلما عاد متأخراً إلي بيته
يتفحصون الأوراق
ويسألونه عن اللوحات المعدنية
ثم يسمحون له بمواصلة السير
يتصادف أنهم يستوقفونه أخيراً
يكون قد تأخر أكثر مما اعتاد
ويكونون قد انتظروا طويلاً
دون أن يعثروا علي ضالتهم
يتفحصون الأوراق
ويتركونه مثلما يفعل كل مرة
يغادر السيارة
ليتأكد من وجود اللوحات ذاتها
في مكانها هناك
ثم يطلقون عليه الرصاص
يومية النبي المهزوم الأولي لصلاح عبد الصبور
يأتي من بعدي من يعطي الألفاظ معانيها
يأتي من بعدي من لا يتحدث بالأمثال
إذ تتأبي أجنحة الأقوال
أن تسكن في تابوت الرمز الميت
يأتي من بعدي من يبري فاصلة الجملة
يأتي من بعدي من يغمس مدات الأحرف في النار
يأتي من بعدي من ينعي لي نفسي
يأتي من بعدي من يضع الفأس برأسي
يأتي من بعدي
من يتمنطق بالكلمة ويغني بالسيف!!