أحمد عفيفي يكتب: السيسي .. مش حيرشح نفسه ..!!

معنديش معلومات أكيدة .. بس عندي إحساس إن بعد "الغُلب" ده كله .. والمحايلة .. وونبي تيجي لأ لأ .. حلفتك تيجي .. لأ لأ .. وحياة أبوكي .. لأ .. لأ .. بعد ده كله المشير حيفضل مشير ومش ناوي يدخل معركة الانتخابات الرئاسية .. معركة وجع الدماغ والهم الأزرق .. وفي الآخر إيه يعني أبقى رئيس .. منظرة ؟ مش عايزها .. أنا كده ميت فل وعشرة .. وزير دفاع .. ليّا هيبتي ومكانتي .. والبدلة الميري تفرق كتير عن البدلة العادية .. زراير بتلمع وكتافات عليها نجوم ونسر وغصن الزيتون .. وكاب مزركش وشكله يرد الروح .. إيه اللي يدّخلني أنا في لعبة السياسة .. وهى - شئنا أم أبينا - لعبة وسخة .. لعبة المصالح .. واللي تغلب به العب به .. واضرب تحت الحزام .. واستحمل بقى السكاكين اللي حتتسن عليك عشان تجز رقبتك.
.. طيب عليا بإيه .. بناقص .. اللي عايزها ياخدها .. وخليّني انا في مكاني تحت أمر الشعب الطيب ده .. احميه من بره واحافظ على حقوقه جوّه .. واللي يمس شعرة منه حسابه عسير .. هو انتوا مش عارفين انكم نور عنينا ولا ايه؟.
خلاص بقى .. بلاش طبل وزمر .. و" اتّبط " يا احمد يا موسي ومعاك عم مصطفى بكري .. وقوله محدش حيسمح له يروح على باب المشير في وزارة الدفاع ويُضرب عن الطعام .. ويقعد يغني " ياتجيني يا تقولي اروح لك .. ياتقول اروح منك فين " .. حتسيبنا لمين ياغالي .. " الا انت .. فيها ايه الدنيا ديا الا انت .. كل غالي يهون عليا الا انت .. وابتساماتي واهاتي منك انت " .. عيّط يا بكري وولوّل زي الولايا .. وانت يا موسى يابتاع " انا عايزه بصراحة " .. استرجلوا بقى شوية .. ولو السيسي حيبقى رئيس بجد .. اول حاجة حيعملها يزيحكم بعيد عن سكته .. لانكم تعرّوا .. متشرفوش.
وانتي يا لميس يابنت الحديدي .. صدقيني .. السيسي مش جي .. ياللي كنتي زعلان اوي ان سامي عنان حيرشح نفسه .. ومستغربه اوي من قراره .. ناقص تقوليله : انت البعيد معندكش دم .. انت مش عارف عملت ايه مع المشير طنطاوي .. يابنتي اللي بيته من إزاز .. ميحدفش الناس بالطوب .. قسما بالله .. وقسما بالله كمان مرة .. انا لو منك .. أداري وشي بمنخل واشوف لي اى داهية استخبى فيها .. بعد ماكنت اكبر " رقّاصة " فيكي يابلد ايام مبارك ونجله جمال .. انا مش عارف البجاحة دي كلها جبتوها منين .. سواء انتي او جوزك عمرو اديب او اخوه عماد .. وانتي ماشية بقى خدي في سكتك تامر امين على خيري على اللي اسمها رولا خرسا .. على " اللي تنشك " بتاعة قناة المحور زمان هناء السمري .. و " الوليّة " اللي اسمها حياة الدرديري بتاعت " عكاشة والفراعين .. عايزين الاعلام بقى ينضف شوية .. ومتهيألي انتوا مش ناقصين فلوس .. على قلبكم أد كده .. اتنيلوا بقى وابعدوا بعيد .. ربنا ينتقم منكم واحد واحد .. عشان الحقيقة وبجد .. انتوا اللي خربتوا البلد .. مش مبارك ولا مرسي لوحدهم.
طيب .. زي مابقول .. السيسي مش جي .. اوك .. حنعمل ايه بقى؟ .. يالهويتيييييي .. ياخرابيييييي .. سايبني لمين ياسي السيد .. اروح لمين من بعدك ياغالي .. والعيال دي مين يربيها .. ازاى اصحى الصبح مالقكش جنبي على فرشتي .. كنت حاسة بمصيبة جيا لي .. مصيبة مكنتش على بالي .. يالطيف يالطيف.
هو ده الوضع لو فعلا السيسي مرشحش نفسه ؟ .. ناويين نقضّيها كده يعني .. حنرفع عليه قضية ونجبر القاضي يصدر حكمه بإلزام السيسي بالترشح وتولي الرئاسة .. لأنه وعدنا وخلا بينا .. وفي الحالة دي تفتكروا لو نفذ السيسي الحكم .. حيجي وهو مرتاح .. وحيرّيحكم .. ده حتى المثل بيقول " كله بالخناق الا حبّني غصب " .. اللي مش حابب حاجة وخايف منها .. متحطوش املكم فيه بالجامد .. عشان متتصدموش .. واللي مالوش " تقل " على تولي مسؤولية كبيرة زي حكم مصر .. خلّوه يبعد .. اتخنقنا بقى .. بكره حيعلن .. خلال اسبوع .. لأ لأ .. أخر كلام .. عمرو موسى بيقول بعد 10 ايام .. خلاص بقى .. زهقنا .. اللي عايز يجي يجي .. واللي مش عايز طريق السلامة.
هو ده الكلام الجد وبتاع الناس الجد .. فكروا بجدية .. لو مفيش سيسي .. نروح نموت يعني .. حنعلق أملنا وأمانينا وأحلامنا كلها على واحد بس .. وفي لحظة يخلي بينا الواحد ده .. نقوم نقع على جدور رقبتنا .. شوية عقل ياناس .. لازم يكون عندنا الاختيار البديل .. وفي دماغنا .. لو السيسي اعتذر .. إنما حتبقى صدمة ومصيبة سودا .. وسايبني لمين ياسي "عبد الفتاح" .. يبقى من دلوقتي انصبوا الصوان .. وشوفوا حتاخدوا العزا فين.!!!